മാനന്തവാടിയില്‍ വനിതാ വിപണന കേന്ദ്രം പ്രവർത്തനത്തിന് ഒരുങ്ങുന്നു

Advertisement
Featured Image

വനിതാ സംരംഭകരുടെ ഉത്പന്നങ്ങൾ വിപണിയിലെത്തിക്കാൻ സ്ഥിരം ഇടമൊരുക്കി മാനന്തവാടി ബ്ലോക്ക് പഞ്ചായത്തിന്റെ കീഴിലെ വനിതാ വിപണന കേന്ദ്രം പ്രവർത്തനങ്ങൾക്ക് തുടക്കമാകുന്നു. മാനന്തവാടി ബ്ലോക്ക് പഞ്ചായത്തിന് സമീപം രണ്ട് നിലകളിലായി നിർമിച്ച കെട്ടിടത്തിൽ കുടുംബശ്രീ അംഗങ്ങൾക്കും വനിതാ ഗ്രൂപ്പുകൾക്കും സംരംഭകർക്കുമായി പത്ത് വിപണന മുറികളാണ് ഒരുക്കിയിട്ടുള്ളത്.

വനിതാ സംരംഭങ്ങളുടെ വളർച്ചയും പ്രാദേശിക ഉത്പന്നങ്ങളുടെ വിപണനവും വനിതകൾക്ക് വരുമാന സ്രോതസ് എന്നിവ ലക്ഷ്യമിട്ടാണ് കേന്ദ്രം ഒരുക്കിയിരിക്കുന്നത്. ഉത്പന്നങ്ങൾ പ്രദർശിപ്പിക്കാനും വിൽപ്പന നടത്താനും ഇവിടെ സൗകര്യമൊരുക്കും. കെട്ടിടത്തിൽ പൊതുജനങ്ങൾക്കും യാത്രക്കാർക്കുമായി 'ടേക്ക് എ ബ്രേക്ക്' പദ്ധതിയുടെ ഭാഗമായി ശൗചാലയ സൗകര്യവും ഒരുക്കിയിട്ടുണ്ട്.

2026 ഓഗസ്റ്റ് 25 നാണ് കെട്ടിടത്തിന്റെ നിർമാണം പൂർത്തീകരിച്ചത്. ഗ്രൗണ്ട് ഫ്ലോറിന് 219.45 ചതുരശ്ര മീറ്ററും ഒന്നാം നിലയ്ക്ക് 248.72 ചതുരശ്ര മീറ്ററുമാണ് വിസ്തീർണം. ആകെ 442.74 ചതുരശ്ര മീറ്റർ നിർമിത വിസ്തീർണമുള്ള കെട്ടിടത്തിന്റെ നിർമാണത്തിന് 1,73,95,000 രൂപയാണ് ചെലവഴിച്ചത്. കേന്ദ്രത്തിന്റെ ഉദ്ഘാടനം നവംബർ ആറിന് മന്ത്രി ബിന്ദു കൃഷ്ണ നിർവഹിക്കും. ഇതോടെ വനിതാ സംരംഭകർക്ക് വിപണനത്തിന് സ്ഥിരം ഇടവും പൊതുജനങ്ങൾക്ക് അടിസ്ഥാന സൗകര്യവും ഒരുമിച്ച് ലഭ്യമാക്കുന്ന കേന്ദ്രം മാനന്തവാടിയുടെ സംരംഭക-വ്യാപാര മേഖലയ്ക്ക് പുതിയ സാധ്യതകൾ തുറക്കും.

Advertisement

Related News