ഇന്ത്യക്കാരെ ബാറ്ററിയില്‍ പ്രവർത്തിക്കുന്ന വൈദ്യുത സ്‌കൂട്ടർ വാങ്ങാൻ പ്രേരിപ്പിച്ച കമ്ബനിയാണ് ഓല ഇലക്ട്രിക് (Ola Electric). ഇവി വിപണിയില്‍ വലിയ മാറ്റങ്ങള്‍ കൊണ്ടുവന്ന കമ്ബനി ഇന്ന് രാജ്യത്തെ ഏറ്റവും വലിയ ഇലക്ട്രിക് സ്‌കൂട്ടർ നിർമാണ കമ്ബനിയാണ്. ഇതുവരെ രാജ്യത്തെ മൂന്ന് ലക്ഷത്തിലധികം ഇവികള്‍ വിറ്റഴിച്ച കമ്ബനി അടുത്തതായി ഉന്നംവെക്കുന്നത് മോട്ടോർസൈക്കിള്‍ വിപണിയാണ്. അതിന്റെ ഭാഗമായിതാ ഏവരും ഏറെ നാളായി കാത്തിരുന്ന ബൈക്കിനെയും അവതരിപ്പിച്ചിരിക്കുകയാണ് ഓല.
റോഡ്സ്റ്റർ (Ola Roadster) എന്നറിയപ്പെടുന്ന മോഡല്‍ മൂന്ന് വേരിയന്റുകളിലാണ് വിപണിയില്‍ എത്തിയിരിക്കുന്നത്.റോഡ്സ്റ്റർ X, റോഡ്സ്റ്റർ, റോഡ്സ്റ്റർ പ്രോ എന്നിവയാണ് ഇലക്ട്രിക് ബൈക്കുകളിലെ വേരിയന്റുകള്‍. ഇവയ്ക്ക് യഥാക്രമം 74,999 രൂപ, 1,04,999 രൂപ, 1,99,999 രൂപ എന്നിങ്ങനെയാണ് എക്സ്ഷോറൂം വില വരുന്നത്. താത്പര്യമുള്ളവർക്കായി പുതിയ ഇലക്ട്രിക് മോട്ടോർസൈക്കിളുകളുടെ ബുക്കിംഗും കമ്ബനി ഇതിനോടകം ആരംഭിച്ചിട്ടുണ്ട്. ഡെലിവറി 2025 ജനുവരിയില്‍ ആരംഭിക്കുമെന്നാണ് ബ്രാൻഡ് ഇപ്പോള്‍ അറിയിച്ചിരിക്കുന്നത്.2.5kWh, 3.5kWh, 4.5kWh എന്നിങ്ങനെ മൂന്ന് വ്യത്യസ്ത ബാറ്ററി ഓപ്‌ഷനുകളോടെയാണ് റോഡ്സ്റ്റർ X വാങ്ങാനാവുന്നത്. ഇവയ്ക്ക് 74,999, രൂപ, 84,999, രൂപ, 99,999 രൂപ എന്നിങ്ങനെയാണ് എക്സ്ഷോറൂം വില വരുന്നത്.
അതേസമയം റോഡ്സ്റ്റർ മോഡല്‍ 3 kWh, 4.5kWh, 6kWh എന്നിങ്ങനെ മൂന്ന് വ്യത്യസ്ത ബാറ്ററി സജ്ജീകരണങ്ങളിലും വാങ്ങാം. ഇവയ്ക്ക് 1,04,999, രൂപ. 1,19,999, രൂപ. 1,39,999 രൂപ എന്നിങ്ങനെയാണ് വില നിശ്ചയിച്ചിരിക്കുന്നത്.ബാറ്ററി കപ്പാസിറ്റിയും വിലയും കൂടാതെ റോഡ്സ്റ്റർ X, റോഡ്സ്റ്റർ വകഭേദങ്ങള്‍ അവയുടെ റേഞ്ചിന്റെ അടിസ്ഥാനത്തിലും വ്യത്യാസപ്പെട്ടിരിക്കുന്നു. ടോപ്പ്-സ്പെക്ക് X ട്രിമ്മിന് പരമാവധി 200 കിലോമീറ്റർ റേഞ്ചും 124 കിലോമീറ്റർ ടോപ്പ് സ്പീഡുമാണ് ലഭിക്കുന്നത്. അതേസമയം റോഡ്സ്റ്റർ അതിൻ്റെ ടോപ്പ് സ്പെക്ക് വേരിയൻ്റില്‍ 248 കി.മീ. റേഞ്ചും 126 കി.മീ. ടോപ്പ് സ്പീഡും വാഗ്ദാനം ചെയ്യും. റോഡ്സ്റ്റർ എക്‌സില്‍ 11 കിലോവാട്ട് മോട്ടോറും റോഡ്സ്റ്റർ 13 കിലോവാട്ട് യൂണിറ്റുമായാണ് ജോടിയാക്കിയിരിക്കുന്നത്.
ഫീച്ചറുകളുടെ കാര്യത്തിലും കിടിലമാക്കിയാണ് ഈ രണ്ട് ഇലക്ട്രിക് മോട്ടോർസൈക്കിളുകളും പണികഴിപ്പിച്ചിരിക്കുന്നത്. റോഡ്സ്റ്റർ X ഇവിയില്‍ സ്‌പോർട്‌സ്, നോർമല്‍, ഇക്കോ റൈഡിംഗ് മോഡുകളും ഓല ഒരുക്കിയിട്ടുണ്ട്. MoveOS 5 നല്‍കുന്ന 4.3 ഇഞ്ച് എല്‍സിഡി സ്ക്രീൻ, ഓല മാപ്‌സ് നാവിഗേഷൻ (ടേണ്‍-ബൈ-ടേണ്‍), അഡ്വാൻസ്ഡ് റീജൻ, ക്രൂയിസ് കണ്‍ട്രോള്‍, DIY മോഡ്, TPMS അലേർട്ടുകള്‍, OTA അപ്‌ഡേറ്റുകള്‍, ഡിജിറ്റല്‍ കീ അണ്‍ലോക്ക്, ഓല ആപ്പ് കണക്റ്റിവിറ്റി എന്നീ സവിശേഷതകളും ഇലക്ട്രിക് ബൈക്കിന്റെ പ്രത്യേകതകളാണ്.
അതേസമയം റോഡ്സ്റ്റർ മോഡലില്‍ ഹൈപ്പർ, സ്‌പോർട്‌സ്, നോർമല്‍, ഇക്കോ എന്നീ റൈഡിംഗ് മോഡലുകളോടെയാണ് വിപണിയിലേക്ക് വരുന്നത്. ഇതിന് 6.8 ഇഞ്ച് TFT ടച്ച്‌സ്‌ക്രീൻ, പ്രോക്‌സിമിറ്റി അണ്‍ലോക്ക്, ക്രൂയിസ് കണ്‍ട്രോള്‍, പാർട്ടി മോഡ്, ടാംപർ അലേർട്ട് തുടങ്ങിയ സ്‌മാർട്ട് ഫീച്ചറുകളും Krutrim അസിസ്റ്റൻ്റ്, സ്‌മാർട്ട് വാച്ച്‌ ആപ്പ്, റോഡ് ട്രിപ്പ് പ്ലാനർ തുടങ്ങിയ AI-പവർ ഫീച്ചറുകളും ഓല സമ്മാനിച്ചിട്ടുണ്ട്.
