ഷെഫ്സ് സ്പെഷ്യൽ അസംബ്ലിയും പലഹാരമേളയും സംഘടിപ്പിച്ചു
എച്ച്.ഐ.എം.യു.പി സ്കൂളിൽ ഒന്നാം ക്ലാസിലെ പഠനപ്രവർത്തനമായ രുചിയുത്സവത്തിന്റെ ഭാഗമായി ഷെഫ്സ് സ്പെഷ്യൽ അസംബ്ലിയും പലഹാരമേളയും സംഘടിപ്പിച്ചു.കുട്ടികളിൽ വിവിധതരം പലഹാരങ്ങളെക്കുറിച്ചുള്ള അറിവും ഭക്ഷണവൈവിധ്യങ്ങളെക്കുറിച്ചുള്ള അവബോധവും വളർത്തുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.അസംബ്ലിയിൽ സ്കൂൾ ഹെഡ്മാസ്റ്റർ അലി കെ., പി.ടി.എ പ്രസിഡന്റ് നവാസ് എം.പി., മദർ പി.ടി.എ പ്രസിഡന്റ് സാഹിറ മുജീബ്, സീനിയർ അസിസ്റ്റന്റ് ലെജി ജോൺ, എസ്.ആർ.ജി കൺവീനർ സുബിന, അധ്യാപകരായ സജ്‌ന, സഫ്ന, റഫ്‌ന, ഷെറിൻ സിതാര, അമീറ നുസ്റി എന്നിവർ പങ്കെടുത്തു.രുചിയുത്സവത്തിന്റെ ഭാഗമായി സംഘടിപ്പിച്ച പലഹാരമേള കുട്ടികൾക്ക് വേറിട്ടതും ആസ്വാദ്യകരവുമായ അനുഭവമായി.
ജമാഅത്തെ ഇസ്ലാമി ഏരിയ സമ്മേളനങ്ങൾക്ക് നവംബർ 8ന് തുടക്കമാകും
ജമാഅത്തെ ഇസ്ലാമി വയനാട് ജില്ലയിൽ നടത്തുന്ന ഏരിയ സമ്മേളനങ്ങൾക്ക് നവംബർ 8ന് തുടക്കമാകും. കേരള ഘടകം സംസ്ഥാന വ്യാപകമായി ‘ഇസ്ലാമിക പ്രതിനിധാനത്തിന്റെ കർമസാക്ഷ്യം’ എന്ന പ്രമേയത്തിലാണ് സമ്മേളനങ്ങൾ നടത്തുന്നത്. സമകാലിക സാഹചര്യത്തിൽ ഏറ്റവും കൂടുതൽ ചർച്ച ചെയ്യപ്പടുകയും വിമർശനവിധേയമാക്കപ്പെടുകയും ചെയ്യുന്ന ഇസ്ലാമിക പ്രസ്ഥാനമാണ് ജമാഅത്തെ ഇസ്ലാമി. സംഘടനയുടെ നയനിലപാടുകൾ, പ്രവർത്തനങ്ങൾ, ആദർശം, ലക്ഷ്യം തുടങ്ങിയവയുമായി ബന്ധപ്പെട്ട കാര്യങ്ങൾ അറിയാനുള്ള വേദി കൂടിയായിരിക്കും സമ്മേളനങ്ങൾ.നവംബർ എട്ടിന് മേപ്പാടി ഏരിയ സമ്മേളനം മേപ്പാടി എം.എസ്.എ ഓഡിറ്റോറിയത്തിലാണ് നടക്കുക. അഖിലേന്ത്യാ പ്രതിനിധി സഭാംഗം എം.ഐ അബ്ദുൽ അസീസ് ഉദ്ഘാടനം ചെയ്യും. മാനന്തവാടി ഏരിയ സമ്മേളനം നവംബർ 15ന് പനമരം കൈതക്കൽ ഓഡിറ്റോറിയത്തിൽ നടക്കും. കേരള അസി. അമീർ എം. കെ മുഹമ്മദലി ഉദ്ഘാടനം ചെയ്യും. കൽപറ്റ ഏരിയ സമ്മേളനം നവംബർ 29ന് പിണങ്ങോട് ഉമ്മുൽ ഖുറ കാമ്പസിലാണ് നടക്കുക. സംസ്ഥാന സെക്രട്ടറി അബ്ദുൽ ഹക്കിം നദ്‌വി ഉദ്ഘാടനം ചെയ്യും. ഡിസംബർ 27ന് സുൽത്താൻ ബത്തേരി ഏരിയ സമ്മേളനം ബത്തേരി ടൗണിൽ പ്രത്യേകം സജ്ജമാക്കിയ വേദിയിൽ നടക്കും. കേരള അമീർ പി. മുജീബ് റഹ്‌മാൻ ഉദ്ഘാടനം ചെയ്യും.എല്ലാ സമ്മേളനങ്ങളും വൈകുന്നേരം നാലുമുതലാണ് ആരംഭിക്കുക.ഉദ്ഘാടന സമ്മേളനം, സുഗന്ധമുള്ള ജീവിതം കുടുംബ സെഷൻ, ഹംസഫർ ഡൊക്യുഫിക്ഷൻ, പാനൽ ഡിസ്‌കഷൻ എന്നീ പരിപാടികൾ സമ്മേളനത്തിൻ്റെ ഭാഗമായി നടക്കും.ചർച്ചകൾ, കുടുംബസംഗമങ്ങൾ, ഗൃഹസന്ദർശനങ്ങൾ തുടങ്ങി വിവിധ ജനസമ്പർക്ക പരിപാടികൾ സംഘടിപ്പിച്ചിട്ടുണ്ട്. സമ്മേളനത്തിന്റെ വിവിധ പ്രചാരണപ്രവർത്തനങ്ങൾ നടന്നുവരികയാണ്.
ആർ.എസ്.പി മുട്ടിൽ ലോക്കൽ സമ്മേളനം നടത്തി
റവല്യൂഷഷണറി സോഷ്യലിസ്റ്റ് പാർട്ടി മുട്ടിൽ ലോക്കൽ സമ്മേളനം കെ.പങ്കജാക്ഷൻ നഗറിൽ വെച്ച് നടത്തി.കൽപ്പറ്റ മണ്ഡലം സെക്രട്ടറി കുഞ്ഞിമുഹമ്മദ് കൈതപ്പള്ളി സമ്മേളന നഗരിയിൽ പതാക ഉയർത്തി. ആർ.എസ്.പി ജില്ലാ സെക്രട്ടറി പ്രവീൺ തങ്കപ്പൻ സമ്മേളനം ഉദ്ഘാടനം ചെയ്തു. എം.കെരാമകൃഷ്ണൻ പൊതുസമ്മേളനത്തിൽ അധ്യക്ഷത വഹിച്ചു. മനു മാനന്തവാടി മുഖ്യപ്രഭാഷണം നടത്തി. അഷ്‌റഫ് എടവനി , പ്രകാശൻ മാനന്തവാടി, സുലൈമാൻ ബത്തേരി, പ്രിൻസ് പുൽപള്ളി, പ്രസാദ് മാളിയേക്കൽ, സി.എം ബാലൻ പൊഴുതന , മുഹമ്മദാലി എം പരിയാരം എന്നിവർ സംസാരിച്ചു.മുട്ടിൽ ടൗണിൽ പ്രകടനവും നടത്തി.
റോഡപകടങ്ങളില്‍ പെടുന്നവരെ മിനിറ്റുകള്‍ക്കകം ആശുപത്രിയില്‍ എത്തിക്കുക ലക്ഷ്യം; `ഗോള്‍ഡന്‍ ഗോള്‍' പദ്ധതിയുമായി ആരോഗ്യവകുപ്പ്
ഗോള്‍ഡന്‍ ഗോള്‍ പദ്ധതിയുമായി ആരോഗ്യവകുപ്പ്. അപകടങ്ങളില്‍ പരുക്കേല്‍ക്കുന്നവരെ മിനിറ്റുകള്‍ക്കകം ആശുപത്രിയില്‍ എത്തിക്കുക ലക്ഷ്യം. 108,സര്‍ക്കാര്‍, സ്വകാര്യ ആംബുലന്‍സുകളെ പദ്ധതിയുടെ ഭാഗമാക്കും. തിരുവനന്തപുരം കൊല്ലം ആലപ്പുഴ ജില്ലകളില്‍ പദ്ധതി ആദ്യം നടപ്പിലാക്കും. ജീവന്‍ രക്ഷിക്കുന്നവര്‍ക്ക് ഇനി മുതല്‍ ആരോഗ്യവകുപ്പ് ആദരം നല്‍കും. അപകടത്തില്‍ പെടുന്നവരെ രക്ഷപ്പെടുത്തുന്നതുമായി ബന്ധപ്പെട്ട് പൊതുജനങ്ങള്‍ക്ക് ബോധവല്‍ക്കരണം നല്‍കാനും തീരുമാനം.അപകടത്തില്‍പ്പെടുന്നവരെ മിനിറ്റുകള്‍ക്കുള്ളില്‍ പരിക്കിന്റെ സ്വഭാവത്തിനനുസരിച്ച് അനുയോജ്യമായ ആശുപത്രിയിലെത്തിച്ച് കൃത്യസമയത്ത് ചികിത്സ ഉറപ്പാക്കുകയാണ് ലക്ഷ്യം. 108നൊപ്പം സര്‍ക്കാര്‍, സ്വകാര്യ ആംബുലന്‍സുകളെയും ഒന്നിപ്പിക്കുന്നതാണ് പദ്ധതി. തിരുവനന്തപുരം, കൊല്ലം, ആലപ്പുഴ ജില്ലകളില്‍ പദ്ധതി പരീക്ഷണാടിസ്ഥാനത്തില്‍ നടപ്പാക്കാനാണ് ആരോ?ഗ്യവകുപ്പിന്റെ ആലോചന. കമ്പ്യൂട്ടര്‍ അധിഷ്ഠിത ഡിസ്പാച്ച് സംവിധാനം, ജിപിഎസ് ട്രാക്കിങ്, ജിഐഎസ് മാപ്പിങ് സംവിധാനങ്ങളും ഉപയോഗപ്പെടുത്തും.
മദ്യപിച്ച് വാഹനമോടിക്കുന്ന വർക്കെതിരെയുള്ള നടപടികൾ കടുപ്പിച്ച് മോട്ടോർ വാഹനവകുപ്പും പോലീസും
ലഹരിയിൽ വാഹനംമോടിച്ചുണ്ടാക്കുന്ന അപകടങ്ങളും കുറ്റകൃത്യങ്ങളും വർദ്ധിക്കുന്ന സാഹചര്യത്തിൽ, മദ്യപിച്ച് വാഹനമോടിക്കുന്നവർക്കെതിരെയുള്ള നടപടികൾ കടുപ്പിച്ച് മോട്ടോർ വാഹനവകുപ്പും പോലീസും സംസ്ഥാനത്തിന്റെ വിവിധ ഭാഗങ്ങളിൽ രാത്രിയും പകലും ഒരുപോലെ പരിശോധനകൾ കർശനമാക്കിയിട്ടുണ്ട്. കഴിഞ്ഞ ആഴ്ച കോട്ടയം ജില്ലയിൽ മാത്രം 528 പേരാണ് മദ്യപിച്ച് വാഹനംമോടിച്ച് പിടിയിലായത്. ഇത്തരത്തിൽ പിടിയിലാകുന്നവരുടെ ലൈസൻസ് റദ്ദാക്കാനോ സസ്പെൻഡ് ചെയ്യാനോ ഉള്ള ശിപാർശ പോലീസ് മോട്ടോർ വാഹന വകുപ്പിന് കൈമാറുന്നുണ്ട്. ഇതിന്റെ ഭാഗമായി കഴിഞ്ഞ ഒരു വർഷത്തിനിടെ കോട്ടയം ജില്ലയിൽ മാത്രം മദ്യപിച്ച് വാഹനമോടിച്ച 240 പേരുടെ ലൈസൻസ് മൂന്നു മാസത്തേക്ക് മോട്ടോർ വാഹന വകുപ്പ് സസ്പെൻഡ് ചെയ്തിട്ടുണ്ട്. എന്നാൽ മൂന്നു മാസത്തെ സസ്പെൻഷൻ കാലാവധി കഴിഞ്ഞാലും ഇവർക്ക് ഉടൻ തന്നെ ലൈസൻസ് തിരികെ ലഭിക്കില്ല. സസ്പെൻഷൻ കാലയളവ് അവസാനിച്ച ശേഷം മോട്ടോർ വാഹന വകുപ്പ് നിർദ്ദേശിക്കുന്ന ട്രെയിനിങ് കേന്ദ്രങ്ങളിൽ എത്തി മൂന്ന് ദിവസത്തെ 'കറക്ടീവ് ട്രെയിനിങ് പ്രോഗ്രാമിൽ' പങ്കെടുത്ത് വിജയിക്കേണ്ടത് നിർബന്ധമാണ്. പരിശീലനം പൂർത്തിയാക്കിയാൽ മാത്രമേ ഇനി ലൈസൻസ് തിരികെ നൽകുകയുള്ളൂ.
കുഞ്ചാക്കോ ബോബനും പൃഥ്വിരാജും വനം വകുപ്പിൻ്റെ ബ്രാൻഡ് അംബാസഡർമാർ; ഏഴ് പ്രവർത്തന മേഖലകൾ
നടന്മാരായ കുഞ്ചാക്കോ ബോബനും പൃഥ്വിരാജ് സുകുമാരനും വനം വകുപ്പിൻ്റെ ബ്രാൻഡ് അംബാസഡർമാരാകും. വനം - വന്യജീവി സംരക്ഷണ ബോധവൽക്കരണം, വനം വകുപ്പിന്റെ പദ്ധതികളുടെ പ്രചാരണം അടക്കം ഏഴ് പ്രവർത്തന മേഖലകളാണ് ഇരുവർക്കുമുള്ളത്. നേരത്തെ ഏഷ്യാനെറ്റ് ന്യൂസിൻ്റെ 'കാട് വിളിക്കുന്നു ഒരു വർക്കേഷൻ മോഡ്' എന്ന പരിപാടിയിൽ വനം വകുപ്പ് മന്ത്രി ഷിബു ബേബി ജോൺ ഇതേക്കുറിച്ച് സൂചന നൽകിയിരുന്നു. കുഞ്ചാക്കോ ബോബൻ്റെ സാന്നിധ്യത്തിലായിരുന്നു മന്ത്രി ഇക്കാര്യം പറഞ്ഞത്.ബ്രാൻഡ് അംബാസഡർമാരുടെ പ്രവർത്തനമേഖലകൾ1. വനം - വന്യജീവി സംരക്ഷണ ബോധവൽക്കരണംവനങ്ങൾ, വന്യജീവികൾ, ജൈവവൈവിധ്യം, ആവാസവ്യവസ്ഥയുടെ സംരക്ഷണം, പാരിസ്ഥിതിക സന്തുലിതാവസ്ഥ എന്നിവയെക്കുറിച്ച് പൊതുപരിപാടികൾ, റെക്കോർഡ് ചെയ്ത സന്ദേശങ്ങൾ, ഡിജിറ്റൽ ആശയവിനിമയ മാർഗങ്ങൾ എന്നിവയിലൂടെ ബോധവൽക്കരണം നടത്തുക.2. വനം വകുപ്പിന്റെ പദ്ധതികളുടെ പ്രചാരണംവകുപ്പിന്റെ തിരഞ്ഞെടുത്ത പദ്ധതികൾ, പൊതുസേവനങ്ങൾ, സംരക്ഷണ കാംപെയ്നുകൾ, പൊതുജന പങ്കാളിത്ത പരിപാടികൾ എന്നിവയുടെ പ്രചാരണത്തിന് പിന്തുണ നൽകുക.3. കുട്ടികളുമായും യുവജനങ്ങളുമായും ഇടപെടൽവിദ്യാഭ്യാസ പരിപാടികൾ, സംവേദനാത്മക സംവാദങ്ങൾ, പ്രകൃതിപഠന ക്യാമ്പുകൾ, യുവജനങ്ങൾക്കായുള്ള ഡിജിറ്റൽ ഉള്ളടക്കങ്ങൾ എന്നിവയിലൂടെ കുട്ടികളിലും വിദ്യാർത്ഥികളിലും യുവാക്കളിലും പ്രകൃതിയോടുള്ള താൽപര്യം വളർത്തുക.4. സാമൂഹ്യ മാധ്യമങ്ങളും പൊതുജന ആശയവിനിമയവുംവകുപ്പിന്റെ ഔദ്യോഗിക സാമൂഹ്യ മാധ്യമ പ്ലാറ്റ്‌ഫോമുകളിലൂടെ സ്ഥിരീകരിച്ച സംരക്ഷണ സന്ദേശങ്ങൾ, ബോധവൽക്കരണ വീഡിയോകൾ, വകുപ്പിന്റെ വിവിധ പ്രവർത്തനങ്ങളെക്കുറിച്ചുള്ള വിവരങ്ങൾ എന്നിവ പങ്കുവയ്ക്കുക.5. സർഗാത്മകവും സാംസ്കാരികവുമായ പ്രചാരണംസിനിമ എന്ന മാധ്യമം പ്രയോജനപ്പെടുത്തി വനം - വന്യജീവി സംരക്ഷണ സന്ദേശങ്ങൾ കൂടുതൽ ജനങ്ങളിലേക്ക് എളുപ്പത്തിൽ എത്തിക്കുന്ന നൂതന ആശയവിനിമയ രീതികൾ വികസിപ്പിക്കുക.6. സമൂഹ പങ്കാളിത്തവും മനുഷ്യ - വന്യജീവി സഹവർത്തിത്വവുംവന്യജീവികളോട് ഉത്തരവാദിത്തപരമായ പെരുമാറ്റം പ്രോത്സാഹിപ്പിക്കുക, വനാശ്രിത സമൂഹങ്ങളോട് ആദരവ് പുലർത്തുക, വന്യജീവികളുമായുള്ള ഏറ്റുമുട്ടലുകൾ ഉണ്ടാകുമ്പോൾ സുരക്ഷിതമായി പ്രതികരിക്കേണ്ട രീതികളെക്കുറിച്ച് ബോധവൽക്കരണം നടത്തുക, സംരക്ഷണ പ്രവർത്തനങ്ങളിൽ പൊതുജനപങ്കാളിത്തം ഉറപ്പാക്കുക.7. പ്രകൃതിപഠനവും പരിസ്ഥിതി സാക്ഷരതയുംആവാസവ്യവസ്ഥകൾ, ജൈവവൈവിധ്യം, പാരിസ്ഥിതിക പരസ്പരബന്ധങ്ങൾ, സുസ്ഥിരമായ സഹവർത്തിത്വത്തിന്റെ പ്രാധാന്യം എന്നിവയെക്കുറിച്ച് പൊതുജനങ്ങളുടെ അറിവ് വർധിപ്പിക്കുന്ന പരിപാടികൾക്ക് പിന്തുണ നൽകുക.
തിരുവനന്തപുരം ജില്ലയിൽ ശക്തമായ മഴ; ഓറഞ്ച് അലേർട്ട്, ഞായറാഴ്ച വരെ മഴ തുടരും
തിരുവനന്തപുരം ജില്ലയിൽ ശക്തമായ മഴ. അടുത്ത മൂന്നു മണിക്കൂറിൽ ജില്ലയിൽ ഓറഞ്ച് അലേർട്ട്. ഇടിമിന്നലോട് കൂടിയ മഴയ്ക്കും മണിക്കൂറിൽ 40-50 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.ആന്ധ്ര തീരത്ത് തീവ്ര ന്യൂനമർദ്ദം സ്ഥിതി ചെയ്യുന്നു.ഞായറാഴ്ച വരെ മഴ തുടരും. ലക്ഷദ്വീപിന് മുകളിലും, തെക്കൻ തമിഴ്നാട്ടിന് മുകളിലുമായി ചക്രവാത ചുഴികളും നിലനിൽക്കുന്നു.
റാഗിങ് തടയാൻ ‘സിദ്ധാർത്ഥ് ‘ സ്റ്റുഡന്റ് വെൽഫെയർ ആപ്പ്; രഹസ്യമായി പരാതിപ്പെടാം
സംസ്ഥാനത്തെ ക്യാമ്പസുകളിൽ റാഗിംഗ് ഉൾപ്പെടെയുള്ള പ്രശ്നങ്ങൾ പൂർണ്ണമായി തടയുന്നതിനും വിദ്യാർത്ഥികളുടെ സുരക്ഷ ഉറപ്പാക്കുന്നതിനുമായി ഉന്നത വിദ്യാഭ്യാസ വകുപ്പ് ‘സിദ്ധാർത്ഥ് സ്റ്റുഡന്റ് വെൽഫെയർ ആപ്പ്’ പുറത്തിറക്കുന്നു. വിദ്യാർത്ഥികളിൽ ശാസ്ത്രബോധവും യുക്തിചിന്തയും വളർത്തുന്നതിനായി കേരള സ്റ്റേറ്റ് ഹയർ എഡ്യൂക്കേഷൻ കൗൺസിലിന്റെ നേതൃത്വത്തിൽ ‘ജവഹർലാൽ നെഹ്റു സെന്റേഴ്സ് ഫോർ സയന്റിഫിക് ടെമ്പർ’ പദ്ധതിക്കും ഇന്ന് തുടക്കമാവുകയാണ്. ഈ സുപ്രധാന പദ്ധതികളുടെ ഔദ്യോഗിക ഉദ്ഘാടനം ബുധനാഴ്ച രാവിലെ 11.30-ന് തിരുവനന്തപുരം ഗവ. വിമെൻസ് കോളേജിൽ വെച്ച് മുഖ്യമന്ത്രി അഡ്വ. വി.ഡി. സതീശൻ നിർവഹിക*‘സിദ്ധാർത്ഥ് സ്റ്റുഡന്റ് വെൽഫെയർ ആപ്പ്’ പ്രത്യേകതകൾ:*പൂക്കോട് വെറ്ററിനറി കോളേജിലെ സിദ്ധാർത്ഥൻ എന്ന വിദ്യാർത്ഥിയുടെ ദാരുണമായ വിയോഗം കേരളത്തിന്റെ മനസ്സിലെ ഉണങ്ങാത്ത വലിയൊരു മുറിവാണെന്നും, ഇത്തരം സംഭവങ്ങൾ ആവർത്തിക്കാൻ പാടില്ലെന്നുമുള്ള ഉന്നത വിദ്യാഭ്യാസ വകുപ്പിന്റെ ഉറച്ച തീരുമാനത്തിന്റെ ഭാഗമായാണ് ഈ ആപ്പ് രൂപീകരിച്ചിരിക്കുന്നത്.വിദ്യാർത്ഥികൾക്ക് തങ്ങളുടെ വ്യക്തിവിവരങ്ങൾ പൂർണ്ണമായും രഹസ്യമാക്കി വെച്ചുകൊണ്ട്, ഓഡിയോ സന്ദേശങ്ങളിലൂടെയോ അല്ലാതെയോ നേരിട്ട് പരാതികൾ അറിയിക്കാനും അടിയന്തര സഹായം തേടാനും ഈ ആപ്പിലൂടെ സാധിക്കും.സുരക്ഷാ വിവരങ്ങൾ ബന്ധപ്പെട്ടവരെ കൃത്യമായി അറിയിക്കാനും ഇതിലൂടെ സാധിക്കും.ആപ്പിന് നിയമപരമായ അടിത്തറ ഉറപ്പാക്കുന്നതിനും സംസ്ഥാന ആന്റി റാഗിംഗ് കമ്മീഷൻ രൂപവത്കരിക്കുന്നതിനുമായി ‘സിദ്ധാർത്ഥ് ആന്റി റാഗിംഗ് ആക്ടിന്റെ’ കരട് സർക്കാരിന്റെ സജീവ പരിഗണനയിലാണ്.*ജവഹർലാൽ നെഹ്റു സെന്റേഴ്സ് ഫോർ സയന്റിഫിക് ടെമ്പർ:*വിദ്യാർത്ഥികളിൽ ശാസ്ത്രബോധവും യുക്തിചിന്തയും മാനവികതയും വളർത്തിയെടുക്കുക എന്ന ലക്ഷ്യത്തോടെയാണ് ഈ പദ്ധതി ആവിഷ്കരിച്ചിരിക്കുന്നത്.ക്യാമ്പസുകളെ അറിവിന്റെയും തുല്യതയുടെയും ഇടങ്ങളാക്കി മാറ്റുക എന്ന ലക്ഷ്യത്തോടെ വിവിധ കോളേജുകളിലായി 300 കേന്ദ്രങ്ങളാണ് ഈ പദ്ധതിയിലൂടെ ഉൾക്കൊള്ളുന്നത്.ഭയരഹിതവും പുരോഗമനപരവുമായ ഒരു കാമ്പസ് അന്തരീക്ഷം സൃഷ്ടിക്കുകയാണ് ഈ ഉദ്യമത്തിലൂടെ ലക്ഷ്യമിടുന്നത്.
സൗജന്യ പരിശീലനം
കൽപ്പറ്റ പുത്തൂർവയല്‍ എസ് ബി ഐ ആർസെറ്റിയിൽ നവംബര്‍ ഒന്പതിന് ആരംഭിക്കുന്ന സൗജന്യ തയ്യൽ പരിശീലനത്തിന് 18നും 50 നുമിടയിൽ പ്രായമുള്ള തൊഴിൽരഹിതരായ യുവതികളിൽ നിന്നും അപേക്ഷ ക്ഷണിച്ചു. ഫോണ്‍-8590762300, 8078711040
അധ്യാപക നിയമനം
ഗവ. വൊക്കേഷണൽ ഹയർ സെക്കൻഡറി സ്കൂൾ വാകേരിയിൽ എച്ച്.എസ്.ടി ഹിന്ദി തസ്തികയിലേക്ക് ദിവസവേതനാടിസ്ഥാനത്തിൽ താത്കാലിക നിയമനം നടത്തുന്നു. നവംബർ ആറിന് രാവിലെ 10ന് സ്കൂൾ ഓഫീസിൽ കൂടിക്കാഴ്ച നടക്കും. ഉദ്യോഗാർത്ഥികൾ യോഗ്യത തെളിയിക്കുന്ന അസൽ സർട്ടിഫിക്കറ്റുകളും ബയോഡാറ്റയും സഹിതം ഹാജരാകണം. ഫോൺ : 04936 229005, 9847977614.
സൗജന്യ സേവനം
ഇ.പി.എഫ്. ഒ പെൻഷനേഴ്സിന് പോസ്റ്റ് ഓഫീസ് മുഖേന സൗജന്യ സേവനം. പെൻഷനേഴ്‌സ് ലൈഫ് സർട്ടിഫിക്കറ്റ് സമർപ്പിക്കാനുള്ള സേവനം പ്രയോജനപ്പെടുത്തുന്നതിന് അടുത്തുള്ള പോസ്റ്റ് ഓഫീസ് സന്ദർശിക്കണമെന്ന് അസിസ്റ്റൻ്റ് പി എഫ് കമ്മീഷണർ അറിയിച്ചു. ഇ.പി.എഫ്. പെൻഷനേഴ്സിന് പോസ്റ്റ് ഓഫീസ് മുഖേനയുള്ള ഈ സൗകര്യം സൗജന്യ നിരക്കിൽ ലഭ്യമാണ്. ആധാർ നമ്പർ, മൊബൈൽ നമ്പർ, പി. പി. ഒ. നമ്പർ, പെൻഷൻ വരുന്ന ബാങ്ക് അക്കൗണ്ട് വിവരങ്ങൾ എന്നിവ കൈവശം കരുതണം. ലൈഫ് സർട്ടിഫിക്കറ്റ് സമർപ്പിച്ചു കഴിഞ്ഞാൽ ഉടൻ തന്നെ ഫോണിൽ എസ്.എം.എസ്. ലഭിക്കും. തുടർന്ന് ജീവൻ പ്രമാൺ വെബ്സൈറ്റ് വഴി സർട്ടിഫിക്കറ്റ് ഡൗൺലോഡ് ചെയ്യാനും സാധിക്കും.
മാനന്തവാടിയില്‍ വനിതാ വിപണന കേന്ദ്രം പ്രവർത്തനത്തിന് ഒരുങ്ങുന്നു
വനിതാ സംരംഭകരുടെ ഉത്പന്നങ്ങൾ വിപണിയിലെത്തിക്കാൻ സ്ഥിരം ഇടമൊരുക്കി മാനന്തവാടി ബ്ലോക്ക് പഞ്ചായത്തിന്റെ കീഴിലെ വനിതാ വിപണന കേന്ദ്രം പ്രവർത്തനങ്ങൾക്ക് തുടക്കമാകുന്നു. മാനന്തവാടി ബ്ലോക്ക് പഞ്ചായത്തിന് സമീപം രണ്ട് നിലകളിലായി നിർമിച്ച കെട്ടിടത്തിൽ കുടുംബശ്രീ അംഗങ്ങൾക്കും വനിതാ ഗ്രൂപ്പുകൾക്കും സംരംഭകർക്കുമായി പത്ത് വിപണന മുറികളാണ് ഒരുക്കിയിട്ടുള്ളത്.വനിതാ സംരംഭങ്ങളുടെ വളർച്ചയും പ്രാദേശിക ഉത്പന്നങ്ങളുടെ വിപണനവും വനിതകൾക്ക് വരുമാന സ്രോതസ് എന്നിവ ലക്ഷ്യമിട്ടാണ് കേന്ദ്രം ഒരുക്കിയിരിക്കുന്നത്. ഉത്പന്നങ്ങൾ പ്രദർശിപ്പിക്കാനും വിൽപ്പന നടത്താനും ഇവിടെ സൗകര്യമൊരുക്കും. കെട്ടിടത്തിൽ പൊതുജനങ്ങൾക്കും യാത്രക്കാർക്കുമായി 'ടേക്ക് എ ബ്രേക്ക്' പദ്ധതിയുടെ ഭാഗമായി ശൗചാലയ സൗകര്യവും ഒരുക്കിയിട്ടുണ്ട്.2026 ഓഗസ്റ്റ് 25 നാണ് കെട്ടിടത്തിന്റെ നിർമാണം പൂർത്തീകരിച്ചത്. ഗ്രൗണ്ട് ഫ്ലോറിന് 219.45 ചതുരശ്ര മീറ്ററും ഒന്നാം നിലയ്ക്ക് 248.72 ചതുരശ്ര മീറ്ററുമാണ് വിസ്തീർണം. ആകെ 442.74 ചതുരശ്ര മീറ്റർ നിർമിത വിസ്തീർണമുള്ള കെട്ടിടത്തിന്റെ നിർമാണത്തിന് 1,73,95,000 രൂപയാണ് ചെലവഴിച്ചത്. കേന്ദ്രത്തിന്റെ ഉദ്ഘാടനം നവംബർ ആറിന് മന്ത്രി ബിന്ദു കൃഷ്ണ നിർവഹിക്കും. ഇതോടെ വനിതാ സംരംഭകർക്ക് വിപണനത്തിന് സ്ഥിരം ഇടവും പൊതുജനങ്ങൾക്ക് അടിസ്ഥാന സൗകര്യവും ഒരുമിച്ച് ലഭ്യമാക്കുന്ന കേന്ദ്രം മാനന്തവാടിയുടെ സംരംഭക-വ്യാപാര മേഖലയ്ക്ക് പുതിയ സാധ്യതകൾ തുറക്കും.
വൈദ്യുതി മുടങ്ങും
വെള്ളമുണ്ട ഇലക്ട്രിക്കൽ സെക്ഷനിലെ കല്ലോടി- പടിഞ്ഞാറേക്കുന്നത്ത് റോഡ് ഭാഗത്ത്‌ നാളെ (നവംബർ 5) രാവിലെ 8.30 മുതൽ വൈകീട്ട് 5.30 വരെ വൈദുതി വിതരണം ഭാഗികമായി തടസ്സപ്പെടും.
പട്ടികജാതി കുടുംബങ്ങൾക്ക് ഭവന നിർമാണ ധനസഹായം: അപേക്ഷ ക്ഷണിച്ചു
പട്ടികജാതി വിഭാഗത്തിൽപ്പെട്ട ഭവനരഹിത കുടുംബങ്ങൾക്കും വാസയോഗ്യമല്ലാത്ത വീടുകളിൽ താമസിക്കുന്ന കുടുംബങ്ങൾക്കും സ്വന്തമായി ഭവനം നിർമിക്കുന്നതിന് ധനസഹായം അനുവദിക്കുന്ന തനത് ഭവന പദ്ധതിയിലേക്ക് അപേക്ഷ ക്ഷണിച്ചു. അപേക്ഷകൾ ബന്ധപ്പെട്ട ബ്ലോക്ക് പട്ടികജാതി വികസന ഓഫീസുകളിൽ നവംബർ നവംബർ 16-നകം നൽകണം. മൂന്ന് ലക്ഷം രൂപയിൽ കവിയാത്ത വാർഷിക വരുമാനമുള്ളവർക്ക് അപേക്ഷിക്കാം. അപേക്ഷകന്റെയോ ഭാര്യ/ഭർത്താവിന്റെയോ പേരിൽ ഭവന നിർമാണത്തിന് അനുയോജ്യമായ ഭൂമി ഉണ്ടായിരിക്കണം. ഗ്രാമപ്രദേശങ്ങളിൽ കുറഞ്ഞത് രണ്ട് സെന്റും നഗരപ്രദേശങ്ങളിൽ രണ്ടര സെന്റും ഭൂമി വേണം. അപേക്ഷകന്റെയോ ഭാര്യ/ഭർത്താവിന്റെയോ പേരിൽ വാസയോഗ്യമായ ഭവനം ഉണ്ടായിരിക്കരുത്. കഴിഞ്ഞ 20 വർഷത്തിനുള്ളിൽ പട്ടികജാതി വികസന വകുപ്പ് മുഖേനയോ മറ്റ് സർക്കാർ സ്ഥാപനങ്ങൾ മുഖേനയോ ഭവന നിർമാണത്തിന് ധനസഹായം ലഭിച്ചവരാകരുത്. സർക്കാർ, അർധസർക്കാർ, പൊതുമേഖലാ സ്ഥാപനങ്ങളിൽ സ്ഥിരം ജോലിയുള്ളവർക്കും സർവീസ് പെൻഷൻകാർക്കും അപേക്ഷിക്കാൻ അർഹതയില്ല. അപേക്ഷകർ 70 വയസ്സിൽ താഴെ പ്രായമുള്ള വിവാഹിതരായിരിക്കണം. എന്നാൽ 50 വയസ്സിന് മുകളിൽ പ്രായമുള്ള അവിവാഹിതരായ വനിതകളെയും പരിഗണിക്കും. : 04936 203824
കേരളോത്സവം: രജിസ്ട്രേഷൻ ആരംഭിച്ചു
കൽപ്പറ്റ നഗരസഭയുടെ നേതൃത്വത്തിൽ സംഘടിപ്പിക്കുന്ന കേരളോത്സവം നവംബർ 15 മുതൽ 30 വരെ നടക്കും. കലാ–കായിക മത്സരങ്ങളിൽ പങ്കെടുക്കാൻ താൽപര്യമുള്ളവർ ഓൺലൈനായി https://keralotsavam.com എന്ന വെബ്‌സൈറ്റിലൂടെ അപേക്ഷിക്കണം. രജിസ്ട്രേഷൻ നവംബർ 12ന് വൈകിട്ട് അഞ്ചിന് അവസാനിക്കും. ഫോൺ: 9747261964, 04936-202349
മോണ്ടിസോറി കോഴ്‌സിന് അപേക്ഷിക്കാം
ബിസിൽ ട്രെയിനിങ് ഡിവിഷൻ നവംബറിൽ ആരംഭിക്കുന്ന മോണ്ടിസോറി, പ്രീ-പ്രൈമറി, പ്രൈമറി, നഴ്‌സറി ടീച്ചർ ട്രെയിനിങ് കോഴ്‌സുകളിലേക്ക് അപേക്ഷ ക്ഷണിച്ചു. എസ്.എസ്.എൽ.സി, പ്ലസ് ടു, ബിരുദ യോഗ്യതയുള്ള വനിതകൾക്ക് അപേക്ഷിക്കാം. കോഴ്‌സുകളുടെ കാലാവധി ആറുമാസം മുതൽ രണ്ടുവർഷം വരെ. ഫോൺ: 7994449314
എം എൽ എ ഫണ്ട് അനുവദിച്ചു
ഐ സി ബാലകൃഷ്ണന്‍ എം എൽ എ യുടെ പ്രത്യേക വികസന നിധിയിൽ നിന്നും ബത്തേരി പഴേരി ചക്കാല ഉന്നതി ദൈവപ്പുര നിര്‍മാണം പ്രവൃത്തിക്ക് എട്ട് ലക്ഷം രൂപയുടെ ഭരണാനുമതി ലഭിച്ചു.
ലേലം
വൈത്തിരി താലൂക്കിലെ തൃക്കൈപ്പറ്റ വില്ലേജിൽ ബ്ലോക്ക് 29 റീസർവേ നമ്പർ 278/2ൽപ്പെട്ട സ്ഥലത്തെ 90 സെന്റീമീറ്ററിൽ അധികം വണ്ണമുള്ള മരങ്ങൾ നവംബർ 17ന് രാവിലെ 11ന് സ്ഥലത്തുവെച്ച് പരസ്യമായി ലേലം ചെയ്യും. ഫോണ്‍- 04936255229
ക്വട്ടേഷൻ ക്ഷണിച്ചു
പേരിയ രാഘവൻ മാസ്റ്റർ മെമ്മോറിയൽ സാമൂഹികാരോഗ്യ കേന്ദ്രത്തിലേക്ക് ആവശ്യമായ ലാബ് റിയേജന്റുകളും അനുബന്ധ സാധനങ്ങളും 2026-27 വർഷത്തിൽ വിതരണം ചെയ്യുന്നതിന് ക്വട്ടേഷനുകൾ ക്ഷണിച്ചു. നവംബർ 11ന് ഉച്ചയ്ക്ക് ഒന്നുവരെ ക്വട്ടേഷനുകൾ നൽകാം. ഫോൺ: 04935 208308, 9747016282.
കൂട്ട് ബോധവൽക്കരണ സെമിനാർ ശ്രദ്ധേയമായി
കൗമാരപ്രായത്തിൽ വിദ്യാർത്ഥികൾ തെറ്റായ പ്രവണതകളിലേക്ക് വഴുതിപ്പോകാതിരിക്കാൻ നിരന്തരമായ കരുതലും വ്യവസ്ഥാപിതമായ കൗൺസിലിംഗും ഉറപ്പാക്കി അവരെ ശരിയായ ജീവിതലക്ഷ്യങ്ങളിലേക്ക് നയിക്കുകയാണ് സ്കൂളുകളുടെയും സമൂഹത്തിന്റെയും കടമയെന്ന് എക്സൈസ് വിമുക്തി മിഷൻ വയനാട് ജില്ലാ കോർഡിനേറ്റർ എൻ.സി. സജിത്ത്കുമാർ അച്ചൂരാനം ആഹ്വാനം ചെയ്തു. പുൽപ്പള്ളി കാപ്പിസെറ്റ് മുതലിമാരൻ മെമ്മോറിയൽ ഗവ. ഹൈസ്കൂളിൽ വിമുക്തി മിഷൻ സംഘടിപ്പിച്ച "കൂട്ട്“ കരുതലിന്റെ കൈത്താങ്ങ്" ബോധവൽക്കരണ സെമിനാറിൽ മുഖ്യപ്രഭാഷണം നടത്തുകയായിരുന്നു അദ്ദേഹം.ചടങ്ങിൽ സ്കൂൾ ഹെഡ്മിസ്ട്രസ് ഇ.കെ. ഷാന്റി അധ്യക്ഷത വഹിച്ചു. സീനിയർ അസിസ്റ്റന്റ് മാർഗരറ്റ് മാനുവൽ സ്വാഗതമാശംസിച്ചു. അധ്യാപകരായ പി.വി. അഭിലാഷ്, പി.ജെ. ബൈജു, സ്കൂൾ ആന്റി നാർക്കോട്ടിക് ക്ലബ്ബ് പ്രതിനിധികളായ വിദ്യാർത്ഥികൾ ആൽബി ജോസഫ്, വി.എസ്. അഞ്ജന, വിവേക് ദിലീപ്, എം.ജെ. അപർണ്ണ, മെഷ അന്ന ഡെന്നിസ് എന്നിവർ സംസാരിച്ചു. എൻ.പി. രജീഷ് നന്ദി പറഞ്ഞു.
