കൽപ്പറ്റ വൈ.എം.സി.എയിൽ അഖിലലോക പ്രാർത്ഥനാവാരത്തിന് തുടക്കമായി
വൈ.എം.സി.എയുടെ നേതൃത്വത്തിൽ സംഘടിപ്പിക്കുന്ന അഖിലലോക പ്രാർത്ഥനാവാരത്തിന് കൽപ്പറ്റ വൈ.എം.സി.എയിൽ തുടക്കമായി. നവംബർ 8 മുതൽ 14 വരെ ഒരാഴ്ച നീണ്ടുനിൽക്കുന്ന പ്രാർത്ഥനാവാരം "ഇത്തരമൊരു കാലഘട്ടത്തിനായി നാം വിളിക്കപ്പെട്ടിരിക്കുന്നത്" (Called for Such a Time as This) എന്ന പ്രമേയത്തെ ആസ്പദമാക്കിയാണ് സംഘടിപ്പിക്കുന്നത്.പ്രാർത്ഥനാവാരത്തിന്റെ ഔദ്യോഗിക ഉദ്ഘാടനം ഫാ. ഫ്രാൻസൺ ചേരമാൻകുന്നേൽ മാനേജർ ചുണ്ടേൽ എസ്റ്റേറ്റ് നിർവഹിച്ചു. തുടർന്ന് അദ്ദേഹം വചനസന്ദേശം നൽകി. എസ്ഥേർ 4:14-നെ അടിസ്ഥാനമാക്കിയുള്ള ഈ വർഷത്തെ പ്രമേയം, സമകാലിക സമൂഹത്തിലെ വെല്ലുവിളികൾ തിരിച്ചറിഞ്ഞ് ദൈവം ഏൽപ്പിച്ച ഉത്തരവാദിത്വങ്ങൾ ധൈര്യത്തോടെയും കരുണയോടെയും നിർവഹിക്കാൻ ഓരോരുത്തരും മുന്നോട്ടുവരണമെന്ന സന്ദേശമാണ് നൽകുന്നത്.പ്രാർത്ഥന കേവലം വാക്കുകളിലും ആരാധനാ സമ്മേളനങ്ങളിലും ഒതുങ്ങാതെ ജീവിതത്തിലും പ്രവർത്തനങ്ങളിലും പ്രതിഫലിക്കണമെന്നും വിശ്വാസത്തിൽനിന്ന് സേവനത്തിലേക്കും സാമൂഹിക ഉത്തരവാദിത്വത്തിലേക്കും വളരണമെന്നും പ്രാർത്ഥനാവാരത്തിന്റെ സന്ദേശം ഓർമ്മിപ്പിക്കുന്നു. നീതി, സമാധാനം, മനുഷ്യാന്തസ്സ്, യുവജനങ്ങളുടെ ഉന്നമനം, സാമൂഹിക ഐക്യം എന്നിവയ്ക്കായി പ്രവർത്തിക്കേണ്ടതിന്റെ പ്രാധാന്യവും ഈ പ്രമേയം ഉയർത്തിക്കാട്ടുന്നു.കൽപ്പറ്റ വൈ.എം.സി.എ പ്രസിഡന്റ് പ്രൊഫ. സിബി ജോസഫ് ചടങ്ങിൽ അധ്യക്ഷത വഹിച്ചു. പ്രോഗ്രാം കോർഡിനേറ്റർ ശ്രീ കെ ഐ വർഗീസ് സ്വാഗതവും, വൈ.എം.സി.എ സെക്രട്ടറി സി.എച്ച്. സ്റ്റാൻലി നന്ദിയും, വൈ.എം.സി.എ അംഗങ്ങളായ ജോണി പാറ്റാനി, ഡോ. വി എം ജോസ്, ജൂലി സിബി, സൂസൻ വർഗീസ് തുടങ്ങിയവർ ആശംസകൾ അർപ്പിച്ച് സംസാരിച്ചു.നവംബർ 14 വരെ നീണ്ടുനിൽക്കുന്ന പ്രാർത്ഥനാവാരത്തിൽ പ്രമേയാധിഷ്ഠിതമായ വചനചിന്തകളും പ്രാർത്ഥനകളും ആത്മീയ കൂട്ടായ്മകളും സംഘടിപ്പിക്കും.
കൽപ്പറ്റ ടൗൺ എൻ.എസ്.എസ് കരയോഗം കുടുംബ സംഗമം നടത്തി
കൽപ്പറ്റ എൻ.എസ്.എസ് ഹയർ സെക്കഡറി സ്കൂളിൽ വൈത്തിരി താലൂക്ക് എൻ.എസ്.എസ് യൂണിയൻ പ്രസിഡൻറ് പി.കെ സുധാകരൻ നായർ ഉദ്ഘാടനം നിർവഹിച്ചു തളിപറമ്പ് എൻ.എസ്.എസ് താലൂക്ക് യൂണിയൻ പ്രസിഡൻ്റ് അഡ്വക്കറ്റ് ശ്രീ എം.എം.ഷിജിത്ത് മുഖ്യ പ്രഭാഷണം നടത്തി. പരിപാടിയിൽ എം.സി ജയന്ദ്രൻ മാസ്റ്റർ അധ്യക്ഷനും ലോകേഷ് കെ.ആർ സ്വാഗതവും, വൈത്തിരി താലൂക്ക് എൻ.എസ് എസ് വനിത യൂണിയൻ പ്രസിഡൻറ് എ.പി സവിത, ബിന്ദു സുരേഷ് , വനിതാ യൂണിയൻ സെക്രട്ടറി ,വൈത്തിരി താലൂക്ക് എൻ.എസ്.എസ് യൂണിയൻ അംഗം ബാബുരാജ്. പി., കരയോഗാംഗം സദാശിവൻ കെ എന്നീവർ ആശംസകൾ നേർന്നു. മുരളിധരൻ മക്കോളി വൈത്തിരി താലുക്ക് എൻ.എസ്.എസ് യൂണിയൻ വൈസ് പ്രസിഡൻറ് മുതിർന്ന അംഗങ്ങളെ ഷാളാണിയിച്ച് ആദരിച്ചു. ഉന്നത വിജയം കൈവരിച്ച കുട്ടികളെയും അനുമോദിച്ചു. വൈത്തിരി താലുക്ക് എൻ.എസ് എസ് യൂണിയൻ സെക്രട്ടറി ശ്രീ ഉണ്ണികൃഷ്ണൻ സംഘടന പ്രവർത്തനങ്ങൾ വിശദികരിച്ചു.വിവിധ കലാപരിപാടികളോടെ സംഗമം അവസനിച്ചു കൃഷ്ണ വേണി നന്ദിയും രേഖപ്പെടുത്തി.
അപേക്ഷ തിയതി ദീര്‍ഘിപ്പിച്ചു
ദേശീയ ആരോഗ്യ ദൗത്യത്തിന് കീഴിലെ വിവിധ തസ്തികകളിലേക്ക് ഓണ്‍ലൈനായി അപേക്ഷിക്കാനുള്ള അവസാന തിയതി നവംബര്‍ 14 വൈകിട്ട് അഞ്ച് വരെ ദീര്‍ഘിപ്പിച്ചു. സ്റ്റാഫ് നഴ്‌സ്, എം.എല്‍.എസ്.പി, ജെ.എച്ച്.ഐ, ഡെന്റല്‍ ഹൈജീനിസ്റ്റ്, ഡയറ്റീഷ്യന്‍, ഡെവലപ്മെന്റല്‍ തെറാപ്പിസ്റ്റ്, എപ്പിഡെമിയോളജിസ്റ്റ്, കൗണ്‍സലര്‍, ടി.ബി.എച്ച്.വി തസ്തികകളിലേക്കാണ് നിയമനം. ഉദ്യോഗാര്‍ത്ഥികള്‍ www.arogyakeralam.gov.in ലോ, ഔദ്യോഗിക വെബ്‌സൈറ്റ് മുഖേനയോ അപേക്ഷ നല്‍കണം. അപേക്ഷ സമര്‍പ്പിച്ചവര്‍ വീണ്ടും അപേക്ഷിക്കേണ്ടതില്ല. ഫോണ്‍- 04936 202771.
രജിസ്‌ട്രേഷന്‍ നീട്ടി
പൊതു വിദ്യാഭ്യാസ വകുപ്പും സാക്ഷരതാ മിഷനും സംയുക്തമായി സംഘടിപ്പിക്കുന്ന നാല്, ഏഴ്, പത്ത്, ഹയര്‍ സെക്കന്‍ഡറി തുല്യതാ കോഴ്സുകളിലേക്കുള്ള രജിസ്‌ട്രേഷന്‍ 50 രൂപ പിഴയോടെ നവംബര്‍ 20 വരെ നീട്ടിയതായി സാക്ഷരത മിഷന്‍ ജില്ലാ കോ-ഓര്‍ഡിനേറ്റര്‍ അറിയിച്ചു. രജിസ്റ്റര്‍ ചെയ്യുന്നതിന് നഗരസഭകളിലും ഗ്രാമപഞ്ചായത്തുകളിലും പ്രവര്‍ത്തിക്കുന്ന പ്രേരക്മാരുമായി ബന്ധപ്പെടണം
എം.എല്‍.എ ഫണ്ട് അനുവദിച്ചു
ഐ.സി ബാലകൃഷ്ണന്‍ എം.എല്‍.എയുടെ ആസ്തി വികസന പദ്ധതിയില്‍ ഉള്‍പ്പെടുത്തി സുല്‍ത്താന്‍ ബത്തേരിയില്‍ കെ.എസ്.ആര്‍.ടി.സിക്ക് സൂപ്പര്‍ ഫാസ്റ്റ് ബസ് വാങ്ങുന്നതിന് 48 ലക്ഷം രൂപയുടെ ഭരണാനുമതി ലഭിച്ചു.
ദര്‍ഘാസ് ക്ഷണിച്ചു
മാനന്തവാടി ഗവ മെഡിക്കല്‍ കോളേജില്‍ ചികിത്സ തേടിയെത്തുന്ന ആര്‍.എസ്.ബി.വൈ, ആര്‍.ബി.എസ്.കെ, ജെ.എസ്.എസ്.കെ, ആരോഗ്യകിരണം, എസ്.റ്റി, മെഡിസെപ് പദ്ധതി ഗുണഭോക്താക്കളായ രോഗികള്‍ക്ക് സി.ടി, എം.ആര്‍.ഐ, ഇക്കോ, ഇ.ഇ.ജി, എന്‍ഡോസ്‌കോപ്പി പരിശോധനകള്‍ ചെയ്തു നല്‍കുന്നതിന് അംഗീകൃത സ്ഥാപനങ്ങള്‍, ലബോറട്ടറികളില്‍ നിന്നും ദര്‍ഘാസ് ക്ഷണിച്ചു. ദര്‍ഘാസുകള്‍ നവംബര്‍ 18 ന് വൈകിട്ട് അഞ്ച് വരെ സ്വീകരിക്കും. ഫോണ്‍- 04935-240264
ക്വട്ടേഷന്‍ ക്ഷണിച്ചു
സംസ്ഥാനതല കായിക മേളയില്‍ പങ്കെടുക്കുന്ന സുല്‍ത്താന്‍ ബത്തേരി ട്രൈബല്‍ ഡെവലെപ്‌മെന്റ് ഓഫീസ് പരിധിയിലെ പ്രീ മെട്രിക് ഹോസ്റ്റലുകളിലെ വിദ്യാര്‍ഥികള്‍ക്ക് ആവശ്യമായ സ്‌പോര്‍ട്‌സ് ഇനങ്ങള്‍ വിതരണം ചെയ്യുന്നതിന് ക്വട്ടേഷന്‍ ക്ഷണിച്ചു. ക്വട്ടേഷനുകള്‍ നവംബര്‍ 11 ന് രാവിലെ 11 വരെ സ്വീകരിക്കും. ഫോണ്‍- 04936-221074.
വൈദ്യുതി മുടങ്ങും
വെള്ളമുണ്ട ഇലക്ട്രിക്കല്‍ സെക്ഷന് കീഴിലെ ആറുവാള്‍, അടിവാരം ട്രാന്‍സ്‌ഫോര്‍മര്‍ പരിധിയില്‍ നാളെ (നവംബര്‍ 10) രാവിലെ 8.30 മുതല്‍ വൈകിട്ട് 5.30 വരെ വൈദ്യുതി വിതരണം തടസ്സപ്പെടും.
മലപ്പുറത്ത് 2 പേർക്ക് കൂടി ഷിഗെല്ല; 100 ലേറെ പേർക്ക് രോഗ ലക്ഷണം
മലപ്പുറത്ത് വീണ്ടും രണ്ട് പേർക്ക് കൂടി ഷിഗെല്ല സ്ഥിരീകരിച്ചു. ഇതോടെ ജില്ലയിൽ രോഗം സ്ഥിരീകരിച്ചവരുടെ എണ്ണം ഒമ്പതായി. ഏലംകുളം, ചുങ്കത്തറ, അമരമ്പലം പഞ്ചായത്തുകളിലാണ് രോഗം സ്ഥിരീകരിച്ചത്. കഴിഞ്ഞ ദിവസമാണ് ഏലംകുളം കോരക്കുത്ത് നടന്ന വിവാഹ ചടങ്ങിൽ ഭക്ഷണം കഴിച്ച രണ്ട് കുട്ടികൾക്കും രണ്ട് മുതിർന്നവർക്കും രോഗം സ്ഥിരീകരിച്ചത്. കല്യാണ വീടും വൈകുന്നേരം തുറന്ന് പ്രവർത്തിക്കുന്ന തട്ടുകടയും പ്രഭവ കേന്ദ്രമെന്ന് കണ്ടെത്തിയിരുന്നു. ഇവിടെ നിന്നും ഭക്ഷണം കഴിച്ച 114 പേർക്ക് രോഗ ലക്ഷണവും കണ്ടെത്തുന്ന സാഹചര്യമുണ്ടായി.
ഒറ്റ പരിശോധനയിൽ അവസാനിപ്പിക്കില്ല, പെട്രോളിലെ എഥനോൾ അളവ് കണ്ടെത്താൻ തുടർ പരിശോധനകൾ നടത്താൻ സർക്കാർ നിർദേശം
പെട്രോളിലെ എഥനോൾ അളവ് സ്ഥിരീകരിക്കാനുള്ള സംസ്ഥാന സർക്കാർ നീക്കം ഒറ്റ പരിശോധനയിൽ അവസാനിപ്പിക്കില്ല. തുടർ പരിശോധനകൾ നടത്തണമെന്ന് സർക്കാർ നിർദേശം. പരിശോധനയിൽ ഓയിൽ കമ്പനികളുടെ പ്രതിനിധികളോടും പങ്കെടുക്കാൻ ആവശ്യപ്പെട്ടു. പരിശോധനയ്ക്കായി പെസോ അംഗീകൃത ബോട്ടിലുകൾ എത്തിച്ചു.കർണാടകത്തിൽ വിൽക്കുന്ന പെട്രോളിൽ 26 മുതൽ 31 ശതമാനം വരെ എഥനോൾ അടങ്ങിയിട്ടുണ്ടെന്ന സംസ്ഥാന സർക്കാരിൻ്റെ കണ്ടെത്തലിന് പിന്നാലെയാണ് കേരളത്തിൽ ഇന്ന് പരിശോധന നടക്കുന്നത്. നാല് ജില്ലകളിലെ അഞ്ച് പമ്പുകളിൽ നിന്ന് സാംപിളുകൾ ശേഖരിക്കും. പ്രത്യേക പരിശീലനം കിട്ടിയ ഉദ്യോഗസ്ഥരാണ് പരിശോധന നടത്തുന്നത്. മന്ത്രി അനൂപ് ജേക്കബിൻ്റെ നിർദേശപ്രകാരം, പൊതുവിതരണ ഉപഭോക്തൃകാര്യ കമ്മീഷനാണ് പരിശോധന നടത്തുക.
സുബഹി നിസ്കാരത്തിന് സമ്മാനമായി ലഭിച്ച സൈക്കിൾ മോഷണം പോയി; കണ്ണീരോടെ വിദ്യാർത്ഥി അമീൻ ബാദുഷ
കെല്ലൂർ: നബിദിനാഘോഷത്തിന്റെ ഭാഗമായി സുബഹി നിസ്കാരത്തിൽ ഏറ്റവും കൂടുതൽ പങ്കെടുത്തതിന് സമ്മാനമായി ലഭിച്ച സൈക്കിൾ മോഷണം പോയതിന്റെ സങ്കടത്തിലാണ് കെല്ലൂർ കാരാട്ടുകുന്ന് മഹല്ലിലെ വിദ്യാർത്ഥിയായ അമീൻ ബാദുഷ.കഴിഞ്ഞ നബിദിനാഘോഷത്തോടനുബന്ധിച്ച് സംഘടിപ്പിച്ച മത്സരത്തിൽ മുടങ്ങാതെ സുബഹി ജമാഅത്തിൽ പങ്കെടുത്തതിനാണ് അമീൻ ബാദുഷയ്ക്ക് സൈക്കിൾ സമ്മാനമായി ലഭിച്ചത്. സമ്മാനം ലഭിച്ചതു മുതൽ പള്ളിയിലേക്ക് പോകാൻ സ്ഥിരമായി ഉപയോഗിച്ചിരുന്നതും ഈ സൈക്കിളായിരുന്നു.കഴിഞ്ഞ ദിവസം രാത്രിയിലാണ് വീട്ടുപരിസരത്ത് സൂക്ഷിച്ചിരുന്ന സൈക്കിൾ മോഷണം പോയത്. ഏറെ പ്രിയപ്പെട്ട സൈക്കിൾ നഷ്ടപ്പെട്ടതോടെ അമീൻ ബാദുഷ വലിയ വിഷമത്തിലാണ്. സൈക്കിൾ എത്രയും വേഗം കണ്ടെത്താനാകുമെന്ന പ്രതീക്ഷയിലാണ് ഈ കൊച്ചുമിടുക്കൻ.
ഐഎംബി സ്തനാർബുദ ബോധവൽക്കരണ ക്ലാസ് നടത്തി
സ്തനാർബുദത്തെ കുറിച്ച് സ്ത്രീകളിൽ ശരിയായ അറിവ് എത്തിക്കുകയും,പരിശോധനകളോടുള്ള മടിയും തെറ്റിദ്ധാരണകളും കുറക്കുകയും നേരത്തെയുള്ള രോഗനിർണയത്തിന്റെ പ്രാധാന്യം ബോധ്യപ്പെടുത്തുകയും വേണമെന്ന് വയനാട് ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ പറഞ്ഞു.കൽപറ്റയിൽ വയനാട് ജില്ല KNM ൻ്റെ ആരോഗ്യ വിഭാഗമായ IMB യും ഡോ: മൂപ്പൻസ് മെഡിക്കൽ കോളേജും സംയുക്തമായി വയനാട് ജില്ലയിലെ വിവിധ ഭാഗങ്ങളിൽ നിന്നെത്തിച്ചേർന്ന വനിതകൾക്ക് IMB പിങ്ക് ഒക്ടോബർ ക്യാമ്പയിനിൻ്റെ ഭാഗമായി നടത്തിയ സ്തനാർബുദ ബോധവൽകരണ ക്ലാസ് ഉദ്ഘാടനം ചെയ്ത് സംസാരിക്കുകയായിരുന്നു ചന്ദ്രിക കൃഷ്ണൻ.ഡോ: മൂപ്പൻസ് മെഡിക്കൽ കോളേജിലെ ക്ലിനിക്കൽ ഓങ്കോളജിസ്റ്റ് ഡോ: രാധിക ബോധവൽക്കരണ ക്ലാസ് എടുത്തു. ഐ.എം.ബി ജില്ലാ പ്രസിഡണ്ട് ഡോ: സൂപ്പി,സെക്രട്ടറി ഡോ: അഫ്സൽ, ഡോ: ഷൗക്കീൻ, വിമൻസ് വിംഗ് സംസ്ഥാന സമിതി അംഗം മുംതസ് ടീച്ചർ, അസീസ് പിണങ്ങോട്, ഹമീദ് മേപ്പാടി എന്നിവർ സംസാരിച്ചു.
ഓപ്പറേഷന്‍ തൂഫാന്‍: 15830 പേര്‍ അറസ്റ്റില്‍ കേസുകളുടെ എണ്ണം 14661 ആയി
ഓപ്പറേഷന്‍ തൂഫാന്‍റെ ഭാഗമായി നടത്തിയ പരിശോധനയില്‍ സംസ്ഥാനത്തിന്‍റെ വിവിധ ഭാഗങ്ങളില്‍ നിന്നും ഇതുവരെ 15830 പേരെ അറസ്റ്റ് ചെയ്തു. കഴിഞ്ഞ ദിവസം 63 കേസുകളിലായി 69 പേര്‍ കൂടി അറസ്റ്റിലായതോടെ ഓപ്പറേഷന്‍ തൂഫാന്‍റെ ഭാഗമായി എടുത്ത കേസുകളുടെ എണ്ണം 14661 ആയി. ഇതുവരെ 29439.640 ഗ്രാം എം.ഡി.എംഎയും 2010.574 കി.ഗ്രാം കഞ്ചാവും 1283.91 ഗ്രാം മെത്താഫെറ്റമിനും പിടിച്ചെടുത്തിട്ടുണ്ട്. കഴിഞ്ഞ ദിവസം രജിസ്റ്റര്‍ ചെയ്ത കേസുകളില്‍ സ്മാള്‍ ക്വാണ്ടിറ്റി കൈവശം വച്ചതിന് 16 കേസുകളും മീഡിയം ക്വാണ്ടിറ്റി കൈവശം വെച്ചതിന് നാല് കേസുകളും കൊമേഴ്ഷ്യല്‍ ക്വാണ്ടിറ്റി കൈവശം വെച്ചതിന് മൂന്ന് കേസുകളും 27 എന്‍.ഡി.പി.എസ് ആക്ട് പ്രകാരം 40 കേസുകളും കോട്പ പ്രകാരം 36 കേസുകളും രജിസ്റ്റര്‍ ചെയ്തിട്ടുണ്ട്. ഇവരില്‍ നിന്ന് 272.260 ഗ്രാം എം.ഡി.എംഎയും 0.078 കി.ഗ്രാം കഞ്ചാവും 57.23 ഗ്രാം മെത്താഫെറ്റമിനും പിടിച്ചെടുത്തു. ഓപ്പറേഷന്‍ തൂഫാന്‍റെ ഭാഗമായി ഇന്നലെ മാത്രം സംസ്ഥാനത്തുടനീളം കേരള പോലീസ് 28 ബോധവത്ക്കരണ ക്ലാസുകള്‍ നടത്തി. ഇതുവരെ നടത്തിയ ആകെ ബോധവത്ക്കരണ ക്ലാസ്സുകളുടെ എണ്ണം 12025 ഉം കൗണ്‍സിലിങ്ങുകളുടെ എണ്ണം 1114 ഉം ആണ്. സ്കൂള്‍, കോളേജ് പ്രൊട്ടക്ഷന്‍ ഗ്രൂപ്പുകളുടെ നേതൃത്വത്തില്‍ ആകെ 8245 ബോധവത്ക്കരണ പരിപാടികളും നടത്തി.ലഹരി വിപണനത്തെക്കുറിച്ചുള്ള വിവരങ്ങള്‍ പൊതുജനങ്ങള്‍ക്ക് നേരിട്ടും (9497979794, 9497927797) വാട്സ്ആപ്പ് (9995966666) മുഖേനയും പോലീസിനെ അറിയിക്കാം. ഈ നമ്പറുകളിലേക്ക് ബന്ധപ്പെടുന്നവരുടെ വിവരങ്ങള്‍ രഹസ്യമായി സൂക്ഷിക്കും. ഡോ. അഞ്ചല്‍ കൃഷ്ണകുമാര്‍,ഡെപ്യൂട്ടി ഡയറക്ടര്‍, സ്റ്റേറ്റ് പോലീസ് മീഡിയ സെന്‍റര്‍
ഗൂഗിള്‍ പേ ഉപയോഗിക്കുന്നുണ്ടോ? എങ്കില്‍ ശ്രദ്ധിച്ചോളൂ, അക്കൗണ്ടിലെ പണം നിമിഷനേരംകൊണ്ട് കാലിയാക്കുന്ന പുതിയ തട്ടിപ്പ് എത്തിയിട്ടുണ്ട്
ഗൂഗിള്‍ പേ ഉള്‍പ്പെടെയുള്ള യുപിഐ ആപ്പുകള്‍ ഉപയോഗിക്കുന്നവരുടെ അക്കൗണ്ട് കാലിയാക്കുന്ന തരത്തിലുള്ള പുതിയ തട്ടിപ്പുകള്‍ വ്യാപകമാകുന്നു.കരുതിയിരുന്നില്ലെങ്കില്‍ ഒരുപാട് ദുഃഖിക്കേണ്ടിവരും. ഉപഭോക്താക്കള്‍ക്ക് ഒരു സംശയവും തോന്നാത്ത രീതിയിലായിരിക്കും തട്ടിപ്പ് നടത്തുന്നത്. പ്ലേസ്റ്റോർ വഴിയല്ലാത്ത തേർഡ് പാർട്ടി ആപ്പുകള്‍, അപരിചിത ലിങ്കുകള്‍ എന്നിവ വഴി ഫോണിന്റെ വിദൂര നിയന്ത്രണം കരസ്ഥമാക്കുന്ന ഹാക്കർമാരാണ് ഇത്തരം തട്ടിപ്പുകള്‍ നടത്തുന്നതും നിയന്ത്രിക്കുന്നതും. ബാങ്ക് ജീവനക്കാരെന്ന വ്യാജേന ഫോണ്‍വിളിച്ച്‌ ഏതെങ്കിലും ആപ്പ് ഡൗണ്‍ലോഡ് ചെയ്യാൻ ആവശ്യപ്പെടുകയും അങ്ങനെ ഫോണിന്റെ നിയന്ത്രണം ഏറ്റെടുക്കുന്ന രീതിയുമുണ്ട്.സിസ്റ്റം അപ്‌ഡേറ്റ് ചെയ്യാൻ ആവശ്യപ്പെട്ട് ഫോണില്‍ സന്ദേശം എത്തി തട്ടിപ്പ് നടത്തുന്നതാണ് ഒരു രീതി. ഫോണ്‍ സാധാരണ രീതിയില്‍ പ്രവർത്തിക്കാൻ അനുവദിക്കാതെയായിരിക്കും സിസ്റ്റം അപ്‌ഡേറ്റ് എന്ന് സ്ക്രീനില്‍ കാണിച്ചുകൊണ്ടിരിക്കുന്നത്. ഇതുകണ്ട് ഉപഭോക്താവ് ആശയക്കുഴപ്പത്തിലാകുന്ന സമയത്ത് തട്ടിപ്പുകാർ ഫോണിലെ വിവരങ്ങളുടെയും ഗൂഗിള്‍ പേ ഉള്‍പ്പെടെയുള്ള യുപിഐ ആപ്പുകളുടെയും പൂർണ നിയന്ത്രണം ഏറ്റെടുക്കും. പിന്നെ അക്കൗണ്ടിലെ പണം പോകുന്ന വഴി മഷിയിട്ടുനോക്കിയാലും അറിയില്ല.അക്കൗണ്ടില്‍ നയാ പൈസ ഇല്ലാത്തവർപോലും തട്ടിക്കപ്പെടും എന്നാണ് അധികൃതർ മുന്നറിയിപ്പുനല്‍കുന്നത്.ഫോണിന്റെ നിയന്ത്രണം ഏറ്റെടുക്കുന്ന തട്ടിപ്പുകാർ ഫോണ്‍ ഉടമയുടെ പേരില്‍ വായ്പയോ ക്രെഡിറ്റോ എടുക്കുകയും ആ പണം കൊണ്ടുപോവുകയും ചെയ്യും. ഫോണ്‍ ഉടമയുടെ അക്കൗണ്ടുപേയോഗിച്ച്‌ അരുതാത്ത ഇടപാടുകള്‍ക്ക് പണം കൈമാറുകയും ചെയ്യും.ഇത്തരം തട്ടിപ്പുകള്‍ക്ക് ഇരയാവുന്നതായി സംശയം തോന്നിയാല്‍ ഉടൻ ഗൂഗിള്‍ പേ കസ്റ്റമർ കെയറിലോ ബന്ധപ്പെട്ട യുപിഐ ആപ്പ് ആപ്ലിക്കേഷന്റെ സപ്പോർട്ട് വിഭാഗത്തിലോ ബന്ധപ്പെട്ട് അക്കൗണ്ട് താല്‍ക്കാലികമായി ബ്ലോക്ക് ചെയ്യുകയോ ഇടപാടുകള്‍ മരവിപ്പിക്കുകയോ ചെയ്യാൻ ആവശ്യപ്പെടുക.ഒട്ടും വൈകാതെവേണം ഇതുചെയ്യാൻ. ഇതിനൊപ്പം അക്കൗണ്ട് വിവരങ്ങള്‍ സുരക്ഷിതമാക്കാനും സംശയാസ്പദമായ ഇടപാടുകള്‍ തടയാനും ബാങ്കുകളാേട് ആവശ്യപ്പെടുകയും ചെയ്യണം.ദേശീയ സൈബർ ഹെല്‍പ്പ്‌ലൈൻ നമ്പറായ 1930ല്‍ ഉടൻ വിളിക്കുകയോ അല്ലെങ്കില്‍ ഔദ്യോഗിക വെബ്‌സൈറ്റ് വഴി പരാതി രജിസ്റ്റർ ചെയ്യുകയോ ചെയ്യുക. ഒപ്പം പൊലീസിലും പരാതി നല്‍കണം. അധികം വൈകാതെ ഇക്കാര്യങ്ങള്‍ ചെയ്താല്‍ നഷ്ടപ്പെട്ട പണം തിരികെ ലഭിക്കാനുള്ള സാദ്ധ്യത കൂടുതലാണ്.ഫോണ്‍ തനിയെ ഓഫ് ആകുക, ആപ്പുകള്‍ തുറക്കപ്പെടുക തുടങ്ങിയ പ്രശ്നങ്ങള്‍ കണ്ടാല്‍ ഉടൻ ഇന്റർനെറ്റ് കണക്ഷൻ ഓഫ് ചെയ്യുകയോ സിം കാർഡ് ഊരിമാറ്റുകയോ ചെയ്യുക. ഇങ്ങനെ ചെയ്യുന്നതിലൂടെ നിങ്ങള്‍ പറ്റിക്കപ്പെടുന്നത് ഒഴിവാക്കാം.
സംസ്ഥാനത്ത് കോഴിമുട്ട വില കുതിച്ചുയരുന്നു; ഒരാഴ്ചയ്ക്കിടെ വർധിച്ചത് രണ്ട് രൂപയോളം; തീറ്റവിലയും ഉൽപാദനച്ചെലവും വർധിച്ചു..!
സംസ്ഥാനത്ത് കോഴിമുട്ടയുടെ വിലയിൽ വലിയ വർധന. ഒരാഴ്ചയ്ക്കിടെ ഒരു മുട്ടയ്ക്ക് രണ്ട് രൂപയോളമാണ് വർധിച്ചിരിക്കുന്നത്. നിലവിൽ വിപണിയിൽ ഒരു കോഴിമുട്ടയ്ക്ക് എട്ട് രൂപയാണ് വില ഈടാക്കുന്നത്. ക്രിസ്മസ്, പുതുവത്സര സീസൺ അടുത്തെത്തിയതോടെ വരും ദിവസങ്ങളിലും മുട്ടവില ഉയരാനാണ് സാധ്യതയെന്ന് കച്ചവടക്കാർ.ക്രിസ്മസ്, പുതുവത്സര ആഘോഷങ്ങൾ മുന്നിൽക്കണ്ട് കേക്ക് നിർമാണത്തിനായി ബേക്കറികളും മറ്റും വ്യാപകമായി മുട്ട വാങ്ങി സംഭരിക്കുന്നത് വില വർധനവിന് ആക്കം കൂട്ടിയിട്ടുണ്ട്. ഉത്സവ സീസണിൽ ആവശ്യകത ഇനിയും ഉയരാൻ സാധ്യതയുള്ളതിനാൽ പെട്ടെന്ന് വില കുറയാൻ ഇടയില്ലെന്നാണ് വ്യാപാരികളുടെ വിലയിരുത്തൽ. കോഴിത്തീറ്റയുടെ വില വൻതോതിൽ ഉയർന്നതാണ് മറ്റൊരു പ്രധാന കാരണം. നേരത്തെ 1800 മുതൽ 2000 രൂപ വരെ വിലയുണ്ടായിരുന്ന ഒരു ചാക്ക് കോഴിത്തീറ്റയ്ക്ക് ഇപ്പോൾ 2760 രൂപ വരെയായി വർധിച്ചിട്ടുണ്ട്. കോഴിത്തീറ്റയുടെ പ്രധാന ഘടകമായ ചോളത്തിന്റെ ലഭ്യതക്കുറവും പ്രതിസന്ധിയായിട്ടുണ്ട്. എത്തനോൾ നിർമാണത്തിനായി ചോളം വ്യാപകമായി ഉപയോഗിക്കാൻ തുടങ്ങിയതോടെ കോഴിത്തീറ്റ നിർമാണത്തിന് ആവശ്യമായ ചോളം ലഭ്യമല്ലാതായി. ഇത് തീറ്റവിലയും അതുവഴി ഫാമുകളിലെ ഉൽപാദനച്ചെലവും കുത്തനെ ഉയർത്തി.ഉൽപാദനച്ചെലവിലുണ്ടായ വർധനയും വിപണിയിലെ ഉയർന്ന ആവശ്യകതയുമാണ് കോഴിമുട്ടയുടെ വില റെക്കോർഡിലേക്ക് ഉയരാൻ കാരണമെന്ന് വ്യാപാരികൾ. സാധാരണക്കാരുടെ അടുക്കള ബജറ്റിനെ താളംതെറ്റിക്കുന്നതാണ് ഈ വിലക്കയറ്റം.
കേരളോത്സവം ഫുട്ബോൾ ടൂർണമെന്റ്: നവോദയ തളിപ്പുഴ ജേതാക്കൾ
വൈത്തിരി ഗ്രാമപഞ്ചായത്ത് കേരളോത്സവത്തിന്റെ ഭാഗമായി സംഘടിപ്പിച്ച ഫുട്ബോൾ ടൂർണമെന്റിൽ നവോദയ തളിപ്പുഴ ജേതാക്കളായി. ചുണ്ടേൽ എസ്റ്റേറ്റ് എൽ.ആർ.സി ഫുട്ബോൾ ഗ്രൗണ്ടിൽ നടന്ന ഫൈനൽ മത്സരത്തിൽ എതിരില്ലാത്ത ഒരു ഗോളിന് കോളിച്ചാൽ എഫ്.സിയെ പരാജയപ്പെടുത്തിയാണ് നവോദയ തളിപ്പുഴ കിരീടം സ്വന്തമാക്കിയത്.മത്സരത്തിന്റെ ഒന്നാം പകുതിയിൽ നവോദയ തളിപ്പുഴയുടെ പത്താം നമ്പർ താരം ആനന്ദാണ് വിജയഗോൾ നേടിയത്.മത്സരത്തിനുശേഷം വിജയികൾക്കുള്ള സമ്മാനദാനവും നടന്നു. വൈത്തിരി ഗ്രാമപഞ്ചായത്ത് പ്രസിഡന്റ് സി.വി. രാജൻ പരിപാടി ഉദ്ഘാടനം ചെയ്തു. വാർഡ് മെമ്പർ ശ്രീജിൻ കുമാർ അധ്യക്ഷത വഹിച്ചു. ഗ്രാമപഞ്ചായത്ത് സെക്രട്ടറി ജോസഫ് ഡാരിൽ ജോസ്, രാഷ്ട്രീയ പാർട്ടി പ്രതിനിധികളായ ഫൈസൽ വൈത്തിരി, കെ. പ്രസാദ് തുടങ്ങിയവർ സംസാരിച്ചു.
ചെറിയ ഉള്ളി വില കേട്ടാല്‍ കണ്ണുനിറയും; കിലോയ്ക്ക് 160 രൂപ, കേരളത്തില്‍ വില കുതിക്കുന്നു
സംസ്ഥാനത്ത് ചെറിയ ഉള്ളി വില കുതിക്കുന്നു. കേരളത്തിലെ ചില്ലറവില്‍പ്പന ശാലകളില്‍ കിലോയ്ക്ക് 160 രൂപയായി ഉയർന്നു.തമിഴ്നാട്ടിലെ മൊത്തവിപണികളില്‍ 60 മുതല്‍ 70 രൂപ വരെയാണ് വില. കാലാവസ്ഥ വ്യതിയാനത്തില്‍ വിളവ് കുത്തനെ കുറഞ്ഞത് വിലക്കയറ്റത്തിന് കാരണമെന്ന് കർഷകരും വ്യാപാരികളും പറയുന്നു.പ്രതികൂല കാലാവസ്ഥ കാരണം തമിഴ്നാട്ടിലടക്കം വടക്കെ ഇന്ത്യയില്‍ ഉള്ളി ഉത്പാദന മേഖലകളില്‍ ഇത്തവണ വിളവ് പകുതിയിലധികമായി കുറഞ്ഞിരുന്നു. ഇതിനുപുറമെയാണ് വിളവെടുപ്പിന് ശേഷമുള്ള തൂക്കക്കുറവ് കർഷകർക്ക് ഇരട്ടപ്രഹരമാകുന്നത്. പാടത്തുനിന്ന് ലഭിക്കുമ്പോള്‍ നല്ല ഈർപ്പവും തൂക്കവുമുണ്ടാകുന്ന ചെറിയ ഉള്ളി, ദിവസങ്ങള്‍ പിന്നിട്ട് ഉണങ്ങുമ്പോള്‍ കാര്യമായി ഭാരം കുറയും.പത്ത് കിലോ ഉള്ളി ഉണങ്ങിക്കഴിയുമ്പോള്‍ പലപ്പോഴും ആറും ഏഴും കിലോയായി ചുരുങ്ങുന്ന അവസ്ഥ. ഈ നഷ്ടം നികത്താനും മെച്ചപ്പെട്ട നിരക്ക് ലഭിക്കാനും കർഷകർ ഉള്ളി ഉണക്കി സൂക്ഷിച്ചുവെച്ച്‌ വിപണിയിലെത്തിക്കുകയാണ് പതിവ്. നിലവില്‍ തമിഴ്നാട്ടിലെ മൊത്തവിപണികളില്‍ കിലോയ്ക്ക് 60 മുതല്‍ 70 രൂപ വരെ നിരക്കിലാണ് കച്ചവടമെങ്കിലും കേരളത്തിലേക്ക് എത്തുമ്പോള്‍ ഈ തൂക്കനഷ്ടവും കയറ്റിറക്കുകൂലിയും കടത്തുചെലവും ഇടനിലക്കാരുടെ ലാഭവും കൂടി ചേരുമ്പോള്‍ വില ഇരട്ടിയിലധികമായി മാറുന്നു. ഇതോടെയാണ് കേരളത്തിലെ ചില്ലറവില്‍പ്പന ശാലകളില്‍ ചെറിയ ഉള്ളി വില 150 രൂപ കടക്കുന്നത്.
രാജ്യം ഞെട്ടിയ പ്രഖ്യാപനം, നോട്ട് നിരോധനത്തിന് പത്താണ്ട്; ആദ്യ സർജിക്കൽ സ്ട്രൈക്കെന്ന് വിശേഷണം, ഇന്ന് നേട്ടമായി ഉയർത്തിക്കാട്ടാതെ ബിജെപി
നരേന്ദ്ര മോദിയുടെ നോട്ട് നിരോധന പ്രഖ്യാപനത്തിന് ഇന്നേക്ക് പത്ത് വർഷം. മോദി സർക്കാറിന്റെ ആദ്യ സർജിക്കൽ സ്ട്രൈക്കായി വിശേഷിപ്പിക്കപ്പെട്ടെങ്കിലും പത്ത് വർഷത്തിനിപ്പുറം നടപടി നേട്ടമായി ഉയർത്തിക്കാട്ടാൻ ബിജെപിയും മുതിരുന്നില്ല. നോട്ട് നിരോധനം ഇന്ത്യൻ സമ്പദ് വ്യവസ്ഥയിൽ പ്രതിസന്ധിയുണ്ടാക്കി എന്ന വിമർശനം പ്രതിപക്ഷം തുടരുകയാണ്. ഡിജിറ്റൽ പണമിടപാടിലേക്ക് ജനങ്ങളെ അടുപ്പിക്കാനായി എന്നതാണ് നോട്ട് നിരോധനത്തിന്റെ നേട്ടം.2016 നവംബർ 8 രാത്രി 8 മണി. പ്രധാനമന്ത്രി നരേന്ദ്രമോദി രാജ്യത്തെ അഭിസംബോധന ചെയ്തു. ഇന്ത്യ ഒന്നടങ്കം ഞെട്ടിയ നിമിഷം. അഞ്ഞൂറ് ആയിരം നോട്ടുകൾക്ക് കടലാസിന്റെ വിലപോലുമില്ലാതായി. അന്ന് രാജ്യം മുഴുവൻ പ്രചാരത്തിലുണ്ടായിരുന്ന 15.41 ലക്ഷം കോടി രൂപയുടെ നോട്ടുകളാണ് ഒറ്റയടിക്ക് അസാധുവായത്. ഇത് ആകെ പ്രചാരത്തിലുള്ള നോട്ടുകളുടെ 86.9% മൂല്യം വരും. ജനങ്ങൾക്ക് വലിയ ബുദ്ധിമുട്ട് നടപടി മൂലം ഉണ്ടാകുമെന്ന് കേന്ദ്രസർക്കാറിനും അറിയാമായിരുന്നു. പക്ഷേ കള്ളപ്പണക്കാർക്കെതിരായ യുദ്ധപ്രഖ്യാപനമായി മോദി ജനങ്ങൾക്ക് മുന്നിൽ നടപടിയെ അവതരിപ്പിച്ചു. 50 ദിവസം സമയം തരാൻ ആണ് മോദി ആവശ്യപ്പെട്ടത്. പക്ഷേ നിരോധിച്ച നോട്ടെല്ലാം അതേപടി തിരിച്ചെത്താൻ തുടങ്ങിയതോടെ നടപടി പാളിയെന്ന് വ്യക്തമായി.
സംസ്ഥാനത്ത് അടുത്ത അഞ്ച് ദിവസം മഴ കനക്കും; ഇന്ന് 7 ജില്ലകളിൽ യെല്ലോ അലർട്ട്
തെക്കൻ കേരളത്തിലും മധ്യകേരളത്തിലും അടുത്ത അഞ്ച് ദിവസം മഴ കനക്കുമെന്ന് കാലാവസ്ഥാനീരീക്ഷണ കേന്ദ്രം. ഇന്ന് 7 ജില്ലകളിൽ യെല്ലോ അലർട്ടാണ്. തിരുവനന്തപുരം മുതൽ എറണാകുളം വരെയുള്ള ജില്ലകളിലാണ് മഴ മുന്നറിയിപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളിലാണ് യെല്ലോ അലർട്ട് പ്രഖ്യാപിച്ചിരിക്കുന്നത്. നാളെ ഒരു ജില്ലകളിലും മുന്നറിയിപ്പ് നൽകിയിട്ടില്ല.യെല്ലോ അലർട്ട് നൽകിയിരിക്കുന്ന ജില്ലകലിൽ ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്.കേരള – കർണാടക – ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് തടസ്സമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. അതേസമയം കേരളത്തിൽ ഒറ്റപ്പെട്ടയിടങ്ങളിൽ ഇന്ന് മുതൽ നവംബർ 10 വരെ ഇടിമിന്നലോട് കൂടിയ മഴയ്ക്കും മണിക്കൂറിൽ 30-40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ട്. നവംബർ 11 മുതൽ നവംബർ 12 വരെ ഇടിമിന്നലോട് കൂടിയ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
കൂടിക്കാഴ്ച
കാട്ടിക്കുളം ഗവണ്മെന്റ് ഹായർസെക്കന്ററി സ്കൂളിൽ നിലവിലുള്ള തത്കാലിക ഒഴിവിലേക്ക് ക്ലാർക്ക്, HST അറബിക് തസ്തികകളിൽ കൂടിക്കാഴ്ച നവംബർ 11 ബുധൻ രാവിലെ 10 മണിക്ക് സ്കൂൾ ഓഫീസിൽ നടത്തുന്നു.
