തിരുവനന്തപുരം: സംസ്ഥാനത്തെ 62 ലക്ഷം ക്ഷേമ പെൻഷൻ ഗുണഭോക്താക്കൾക്കുള്ള ഈ മാസത്തെ പെൻഷൻ വിതരണം ഇന്ന് ആരംഭിക്കും. വർധിപ്പിച്ച തുകയും ഒരു മാസത്തെ കുടിശ്ശികയും ഉൾപ്പെടെ 3600 രൂപയാണ് ഓരോരുത്തർക്കും ലഭിക്കുക.
പ്രതിമാസ പെൻഷൻ 2000 രൂപയായി ഉയർത്തിയ ശേഷമുള്ള ആദ്യ വിതരണമാണിത്. ഇതിനൊപ്പം കുടിശ്ശികയുണ്ടായിരുന്ന ഒരു ഗഡു പെൻഷൻ കൂടിയാണ് നൽകുന്നത്. ബാങ്ക് അക്കൗണ്ടുകൾ വഴിയും സഹകരണ സംഘം ജീവനക്കാർ വീടുകളിൽ നേരിട്ടെത്തിച്ചുമാണ് പെൻഷൻ വിതരണം ചെയ്യുന്നത്.
പെൻഷൻ വർധിപ്പിച്ചതോടെ, ക്ഷേമ പെൻഷൻ വിതരണത്തിനായി പ്രതിവർഷം 13,000 കോടി രൂപയാണ് സർക്കാർ മാറ്റിവെക്കുന്നതെന്ന് മുഖ്യമന്ത്രി അറിയിച്ചിരുന്നു. ഇതിനുപുറമെ, സർക്കാർ ജീവനക്കാർക്കും അധ്യാപകർക്കും നൽകാനുള്ള ഡിഎ കുടിശ്ശികയുടെ ഒരു ഗഡു കൂടി ഈ വർഷം അനുവദിക്കുമെന്നും സർക്കാർ വ്യക്തമാക്കിയിട്ടുണ്ട്.
