കൽപ്പറ്റ:2023-24 അദ്ധ്യയന വർഷത്തെ സംസ്ഥാന എൻ എസ് എസ് അവാർഡ് പ്രഖ്യാപിച്ചപ്പോൾ മികച്ച എൻ എസ് എസ് വോളണ്ടിയർക്കുള്ള അംഗീകാരം വടുവൻചാൽ ഗവൺമെന്റ് ഹയർ സെക്കണ്ടറി സ്കൂളിലെ കോമേഴ്സ് വിദ്യാർത്ഥിയായിരുന്ന മുഹമ്മദ് ഫിനാസിന് ലഭിച്ചു.
സാമൂഹിക സേവനത്തിലൂടെ വ്യക്തിത്വവികസനം എന്ന ലക്ഷ്യത്തെ മുൻനിർത്തികൊണ്ട് സ്കൂൾ നാഷണൽ സർവീസ് സ്കീം നടപ്പിലാക്കിയ വിവിധങ്ങളായ പരിപാടികളിലും സ്വന്തം നാട്ടിലെ ജീവകാരുണ്യ-സാമൂഹിക പ്രവർത്തനങ്ങളിലും പങ്കെടുത്തുകൊണ്ട് ഫിനാസ് യുവ തലമുറക്ക് മാതൃകയാവുകയാണ്.
രണ്ട് വർഷങ്ങളിലായി വേണ്ട 240 മണിക്കൂറുകൾക്കുമപ്പുറം എല്ലാ പ്രവർത്തനങ്ങളിലും പങ്കെടുക്കുകയും, സ്കൂൾ പച്ചക്കറി തോട്ടം ,തേനീച്ച വളർത്തൽ, കഴിഞ്ഞ കൊല്ലം ശ്രദ്ധേയമായ ചെണ്ടുമല്ലി കൃഷി , പ്ലാസ്റ്റിക്ക് നിർമ്മാർ ജന പരിപാടി, സ്കൂൾ പെയിന്റിംഗ്, എൽ. പി വിഭാഗത്തിലെ ലൈബ്രറി സജ്ജീകരണം, പുസ്തകത്തണൽ, പങ്കാളിത്ത ഗ്രാമ പ്രവർത്തനം, പ്രിയാബിൾ പ്രൈഡ്, തുടങ്ങി നിരവധി തനത് പ്രവർത്തങ്ങളിലും തന്റെ കഴിവുകൾ പ്രകടിപ്പിച്ച ഫിനാസിനും വടുവൻചാൽ സ്കൂളിനും ജില്ലയ്ക്കു തന്നെ ഇത് അഭിമാന നിമിഷമാണ്.
വടുവൻചാൽ സ്കൂൾ എൻ എസ് എസ് പ്രോഗ്രാം ഓഫീസർ സുഭാഷ് വി പി യുടെയും മാതാപിതാക്കൾ അബ്ദുൾ കലാം , സകീന എന്നിവർ നൽകിയ പിന്തുണയും ഫിനാസിന് നേട്ടമായി.
കൽപ്പറ്റ എൻ എം എം എസ് സ്കൂളിലെ രണ്ടാം വർഷ ബി കോം വിദ്യാർത്ഥിയും കോളേജ് യൂണിവേഴ്സിറ്റി യൂണിയൻ കൗൺസിലറുമാണിപ്പോൾ മുഹമ്മദ് ഫിനാസ്. കഴിഞ്ഞ വർഷത്തെ ഹയർ സെക്കൻ്ററി വിഭാഗം സ്ഥാനത്തെ മികച്ച വൊളണ്ടിയറും മുഹമ്മദ് ഫിനാസായിരുന്നു.
