നിസ്സാരമെന്ന് തള്ളല്ലേ ഈ ലക്ഷണങ്ങൾ; കിഡ്നി ക്യാൻസറിന്റെ ആദ്യ സൂചനകളാകാം
കിഡ്നി ക്യാൻസറിന്റെ പ്രധാനപ്പെട്ട ചില ലക്ഷണങ്ങൾ എന്തൊക്കെയാണെന്ന് നോക്കാം
പുറംവേദന
വൃക്കയുമായി ബന്ധപ്പെട്ട രോഗങ്ങളുടെ ഒരു പ്രധാന ലക്ഷണമാണ് പുറംവേദന. മുതുകിന്റെ ഇരുവശങ്ങളിലും വേദന അനുഭവപ്പെടുന്നുണ്ടെങ്കിൽ തീർച്ചയായും ഒരു ഡോക്ടറെ കാണണം. ഇത് കിഡ്നി ക്യാൻസറിന്റെ ഒരു പ്രധാന ലക്ഷണമാകാം.
വിളർച്ച
കിഡ്നി ക്യാൻസർ ബാധിച്ചവരിൽ വിളർച്ച അഥവാ അനീമിയ സാധാരണയായി കണ്ടുവരാറുണ്ട്. രക്തത്തിലെ ഹീമോഗ്ലോബിന്റെ അളവ് കുറയുന്നതാണ് ഇതിന് കാരണം.
കാലുകളിലെ നീര്
വൃക്കയുടെ പ്രവർത്തനം തകരാറിലാകുമ്പോൾ കാലുകളിലും പാദങ്ങളിലും നീര് വയ്ക്കുന്നത് സാധാരണയാണ്. ശരീരത്തിൽ യൂറിക് ആസിഡിന്റെ അളവ് കൂടുമ്പോഴാണ് ഇങ്ങനെ സംഭവിക്കുന്നത്. ഈ ലക്ഷണം കണ്ടാൽ ഉടൻ വൈദ്യസഹായം തേടണം.
ശരീരത്തിലെ മുഴകൾ
അടിവയറ്റിലോ, ഇടുപ്പിന്റെ വശങ്ങളിലോ, വൃക്കകൾ സ്ഥിതി ചെയ്യുന്ന ഭാഗത്ത് പുറകിലോ മുഴകൾ കാണുന്നുണ്ടെങ്കിൽ ശ്രദ്ധിക്കണം. ഇത് ക്യാൻസർ മുഴകളുടെ ലക്ഷണമാകാൻ സാധ്യതയുണ്ട്. അതിനാൽ അവഗണിക്കരുത്
മൂത്രത്തിൽ രക്തം
മൂത്രമൊഴിക്കുമ്പോൾ എപ്പോഴും ശ്രദ്ധിക്കുക. അതിൽ രക്തത്തിന്റെ അംശം കണ്ടാൽ ഉടൻ ഡോക്ടറെ സമീപിക്കണം. ഒന്നോ രണ്ടോ തുള്ളിയാണെങ്കിൽ പോലും ഇത് ഗൗരവമായി കാണണം. വൃക്കരോഗങ്ങളുടെ പ്രധാന ലക്ഷണങ്ങളിൽ ഒന്നാണിത്.
ക്ഷീണം
വൃക്കരോഗങ്ങൾ ഉള്ളവർക്ക് കടുത്ത ക്ഷീണവും തളർച്ചയും അനുഭവപ്പെടുന്നത് സാധാരണമാണ്. ഇടയ്ക്കിടെ കഠിനമായ ക്ഷീണം തോന്നുന്നുണ്ടെങ്കിൽ വൈദ്യപരിശോധന നടത്താൻ മടിക്കരുത്.
വിശപ്പില്ലായ്മ
വിശപ്പില്ലായ്മ പലർക്കും ഒരു സാധാരണ പ്രശ്നമായി തോന്നാം. എന്നാൽ തുടർച്ചയായി വിശപ്പ് അനുഭവപ്പെടാതിരിക്കുന്നത് കിഡ്നി സംബന്ധമായ പ്രശ്നങ്ങളുടെ തുടക്കമാകാം. ദഹനപ്രശ്നങ്ങൾ കാരണമല്ലാതെ ദീർഘകാലം വിശപ്പില്ലായ്മയുണ്ടെങ്കിൽ ഡോക്ടറെ കാണുന്നത് നല്ലതാണ്.
ഉയർന്ന രക്തസമ്മർദ്ദം
രക്തസമ്മർദ്ദം അഥവാ ബ്ലഡ് പ്രഷർ എപ്പോഴും നിയന്ത്രിച്ചു നിർത്തേണ്ടത് അത്യാവശ്യമാണ്. പെട്ടെന്ന് രക്തസമ്മർദ്ദം കൂടുന്നത് കിഡ്നി ക്യാൻസറിന്റെ ഒരു ലക്ഷണമാകാം. അതിനാൽ ബിപി എപ്പോഴും നിരീക്ഷിച്ച് നിയന്ത്രണത്തിലാക്കണം.
