ജില്ലയിലെ ഹയർസെക്കൻഡറി നാഷണൽ സർവീസ് സ്കീം യൂണിറ്റുകളുടെ നേതൃത്വത്തിൽ നിർമ്മിച്ച സ്നേഹഭവനത്തിന്റെ താക്കോൽ പട്ടികജാതി-പട്ടികവർഗ- പിന്നാക്ക ക്ഷേമ വകുപ്പ് മന്ത്രി ഒ. ആർ. കേളു കൈമാറി. സാമൂഹിക ഉത്തരവാദിത്തവും സേവന മനോഭാവവും മുന്നോട്ട് വെച്ച് എൻ.എസ്.എസ് വിദ്യാർത്ഥികൾ ഒരു കുടുംബത്തിന് വീടൊരുക്കിയാണ് മാതൃകയായത്.
പുറ്റാട് മലയച്ചംകൊല്ലിയിൽ താമസിക്കുന്ന വടുവഞ്ചാൽ സ്കൂളിലെ മുൻ വിദ്യാർത്ഥിയായ അനഘന്റെ കുടുംബത്തിനാണ് വീട് നിർമിച്ചു നൽകിയത്. രണ്ട് വർഷം മുമ്പ് ക്യാൻസർ രോഗത്തെ തുടർന്ന് അനഘന്റെ പിതാവ് മരണപ്പെട്ടിരുന്നു. അമ്മ ഹരിത കർമ്മ സേന അംഗമായി ജോലി ചെയ്യുന്നു. സഹോദരി പോളിടെക്നിക് ഡിപ്ലോമ വിദ്യാർത്ഥിനിയാണ്.
750 സ്ക്വയർ ഫീറ്റ് വിസ്തൃതിയുള്ള വീടിന്റെ നിർമ്മാണം 10.5 ലക്ഷം രൂപ ചെലവിലാണ് പൂർത്തീകരിച്ചത്. വിദ്യാർത്ഥികളും അധ്യാപകരും ചേർന്നാണ് ധനസഹായം സമാഹരിച്ചത്. ജില്ലയിലെ 59 എൻ.എസ്.എസ് യൂണിറ്റുകളിലെ വിദ്യാർത്ഥികൾ ദൗത്യത്തിൽ പങ്കാളികളായി.
ലഹരി വിരുദ്ധ പ്രവർത്തനങ്ങൾ, വയൽ കൃഷി, അങ്കണവാടി നവീകരണം, പ്ലാസ്റ്റിക് മുക്ത ഗ്രാമങ്ങൾ തുടങ്ങി നിരവധി സാമൂഹിക-പരിസ്ഥിതി പ്രവർത്തനങ്ങളിലൂടെ ജില്ലയിലെ എൻ.എസ്.എസ് യൂണിറ്റുകൾ ഇതിനകം തന്നെ ശ്രദ്ധേയമായ ഇടപെടലുകൾ നടത്തിയിട്ടുണ്ട്.
ജില്ലയിൽ എൻ.എസ്.എസ് യൂണിറ്റുകളുടെ നേതൃത്വത്തിൽ നിർമ്മിക്കുന്ന മൂന്നാമത്തെ വീടാണ് ഇത്.
എം.എൽ.എ ഐ.സി ബാലകൃഷ്ണൻ അധ്യക്ഷത വഹിച്ച പരിപാടിയിൽ അമ്പലവയൽ ഗ്രാമപഞ്ചായത്ത് പ്രസിഡന്റ് എൻ.സി കൃഷ്ണകുമാർ, കൽപറ്റ ബ്ലോക്ക് പഞ്ചായത്ത് അംഗം സൈനബ ഉസ്മാൻ,വാർഡ് മെമ്പർ ജിൻസി അനീഷ്,ഹയർസെക്കൻഡറി ജില്ലാ കോ-ഓർഡിനേറ്റർ
ഷിവി കൃഷ്ണൻ, കരിയർ ഗൈഡൻസ് ജില്ലാ കോ-ഓർഡിനേറ്റർ കെ ബി സിമിൽ,എൻഎസ്എസ് ജില്ലാ കൺവീനർ കെ എസ് ശ്യാൽ, ക്ലസ്റ്റർ കൺവീനർമാരായ എം കെ രാജേന്ദ്രൻ,എ വി രജീഷ്,കെ രവീന്ദ്രൻ,പി കെ സാജിദ്,വി പി സുഭാഷ് എന്നിവർ സംസാരിച്ചു.
