ന്യൂഡല്ഹി: കുടുംബ ബജറ്റിന് കൂടുതൽ ഭാരമായി സവാളയുടെ വില കുതിച്ചുയരുന്നു. ഡല്ഹിയില് സവാള വില കിലോയ്ക്ക് 62 രൂപ വരെ എത്തി. കരിഞ്ചന്ത, പൂഴ്ത്തിവെപ്പ്, അമിത ലാഭമെടുക്കല് എന്നിവയാണ് വിലക്കയറ്റത്തിന് കാരണമാവുന്നതെന്ന് കേന്ദ്ര സര്ക്കാര് ആരോപിച്ചു. അതേസമയം, സര്ക്കാര് നിശ്ചയിച്ച കേന്ദ്രങ്ങളിലൂടെയും മൊബൈല് വാനുകളിലൂടെയും കിലോയ്ക്ക് 35 രൂപ നിരക്കില് സവാള വില്ക്കുമെന്ന് കേന്ദ്രം അറിയിച്ചിട്ടുണ്ട്. ഉപഭോക്തൃകാര്യ, ഭക്ഷ്യ-പൊതുവിതരണ മന്ത്രാലയത്തിന്റേതാണ് അറിയിപ്പ്.
