Kerala
കേരളത്തിൽ കൂടുതൽ സ്പീഡ് ക്യാമറകൾ വരുന്നു
സംസ്ഥാനത്ത് റോഡപകടങ്ങൾ കുറയ്ക്കുന്നതിന്റെ ഭാഗമായി കൂടുതൽ സ്പീഡ് ക്യാമറകൾ അടിയന്തരമായി സ്ഥാപിക്കാൻ നവംബർ 12-ന് കേരള ഹൈക്കോടതി നിർദ്ദേശം നൽകി. അപകടസാധ്യതയേറിയ മേഖലകൾ കണ്ടെത്തി കൃത്യമായ സമയബന്ധിതമായി കൂടുതൽ സ്പീഡ് വയലേഷൻ ഡിറ്റക്ഷൻ സിസ്റ്റങ്ങൾ (SVDS) സജ്ജമാക്കാൻ ട്രാൻസ്പോർട്ട് കമ്മീഷണറോട് കോടതി ബെഞ്ച് ആവശ്യപ്പെട്ടു. "അമിതവേഗത റോഡ് സുരക്ഷയ്ക്ക് കടുത്ത ഭീഷണിയാണ്", അതിനാൽ ക്യാമറ സംവിധാനങ്ങൾ അടിയന്തരമായി വ്യാപിപ്പിക്കണമെന്ന് കോടതി നിരീക്ഷിച്ചു. ഹർജി കൂടുതൽ വാദത്തിനായി നവംബർ 30-ലേക്ക് മാറ്റിയിട്ടുണ്ട്.അമിതവേഗതയും അപകടകരമായ ഡ്രൈവിംഗും തടയാൻ വരുംദിവസങ്ങളിൽ പരിശോധന കൂടുതൽ കർശനമാക്കും. നിലവിൽ അമിതവേഗതയ്ക്ക് ലൈറ്റ് മോട്ടോർ വാഹനങ്ങൾക്ക് 1,500 രൂപയും മീഡിയം/ഹെവി വാഹനങ്ങൾക്ക് 3,000 രൂപയുമാണ് പിഴ തുക. വാഹനം ഓടിക്കുമ്പോൾ ഫോൺ കൈയിലെടുത്ത് ഉപയോഗിച്ചാൽ ആദ്യതവണ 2,000 രൂപയും കുറ്റം ആവർത്തിച്ചാൽ 5,000 രൂപയും പിഴയൊടുക്കേണ്ടി വരും. ഫോൺ ഉപയോഗമല്ലാതെ അപകടകരമായ രീതിയിൽ വാഹനം ഓടിച്ചാൽ സെക്ഷൻ 184 പ്രകാരം കോടതി നടപടികൾ നേരിടേണ്ടി വരും.ദേശീയ നിർദ്ദേശങ്ങൾക്ക് അനുസൃതമായാണ് കേരളത്തിലും പുതിയ വേഗപരിധികൾ നിശ്ചയിച്ചിട്ടുള്ളത്. ആറുവരി ദേശീയപാതകളിലും നാലുവരി ദേശീയപാതകളിലും കാറുകൾക്ക് പരമാവധി 100 കി.മീ/മണിക്കൂറാണ് വേഗത അനുവദിച്ചിരിക്കുന്നത്. നാലുവരി സംസ്ഥാന പാതകളിൽ (എംസി റോഡ് ഉൾപ്പെടെ) 90 കി.മീ/മണിക്കൂറാണ് പരിധി. നഗര റോഡുകളിൽ ഇത് 50 കി.മീ/മണിക്കൂറായി തുടരും. കുറഞ്ഞ വേഗത നിർദ്ദേശിക്കുന്ന സൈൻബോർഡുകൾ ഉള്ളയിടങ്ങളിൽ അത് കൃത്യമായി പാലിക്കേണ്ടതാണ്.
ഒറ്റ സ്കൂട്ടറിൽ 5 വിദ്യാർത്ഥികളുടെ സാഹസിക യാത്ര; നടപടിയുമായി മോട്ടോർ വാഹന വകുപ്പ്, സ്കൂട്ടർ ഓടിച്ച യുവാവിന്റെ ലൈസൻസ് സസ്പെന്റ് ചെയ്തു
നഗരത്തിൽ ഒറ്റ സ്കൂട്ടറിൽ സാഹസിക അപകടയാത്ര നടത്തിയ അഞ്ച് വിദ്യാർത്ഥികളുടെ ദൃശ്യങ്ങൾ വൈറലായതോടെ നടപടിയുമായി മോട്ടോർ വാഹന വകുപ്പ്. സ്കൂട്ടർ ഓടിച്ച യുവാവിന് പിഴ ഈടാക്കി ലൈസൻസ് റദ്ദാക്കാൻ നടപടി തുടങ്ങിയ എംവിഡി ബോധവത്കരണത്തിനായി അഞ്ച് പേരുടെയും മാതാപിതാക്കളോട് നേരിട്ടെത്താനും നോട്ടീസ് അയച്ചു.ഒരൊറ്റ സ്കൂട്ടർ... പത്ത് കാലുകൾ...അവർ അഞ്ച് പേർ....അമിതവേഗതയിലെ ടീനേജ് ഡ്രൈവിംഗ് അതിര് വിട്ടതിന്റെ ദുരന്തങ്ങൾ ആവർത്തിക്കുന്നതിനിടയിലാണ് ഈ ദൃശ്യവും പുറത്ത് വരുന്നത്. കൊച്ചിയിലെ തിരക്കുള്ള പൈപ്പ് ലൈൻ റോഡിലാണ് അഞ്ച് വിദ്യാർത്ഥികളുടെ അപകടയാത്ര. ഈ കാഴ്ച കണ്ടവർ ദൃശ്യങ്ങൾ പകർത്തി മോട്ടോർ വാഹന വകുപ്പിന്റെ ശ്രദ്ധയിൽപ്പെടുത്തി. പിന്നാലെ എംവിഡി സ്കൂട്ടറിന്റെ നമ്പർ എടുത്ത് ഉടമയെ വിളിച്ചു. കൂട്ടുകാർക്കൊപ്പമെത്താൻ ആവശ്യപ്പെട്ടു.തൃക്കാക്കരയിലെ സ്വകാര്യ എഞ്ചിനീയറിംഗ് കോളേജിലെ സുഹൃത്തുക്കളാണ് അഞ്ച് പേരും. സ്കൂട്ടർ ഓടിച്ച വിദ്യാർത്ഥിയുടെ ലൈസൻസ് താൽകാലികമായി സസ്പെൻഡ് ചെയ്തു. തീർന്നില്ല, ഒന്നിൽ കൂടുതൽ പേരെ സ്കൂട്ടറിൽ കയറ്റിയതിന് ഉടമയ്ക്ക് 1,000 രൂപ പിഴയിട്ടു. ഹെൽമറ്റ് വെക്കാത്ത മൂന്നു പേർ 500 രൂപ വീതവും പിഴ അടയ്ക്കണം. ഇവരുടെ അച്ഛനമ്മാരെയും ചിലത് ധരിപ്പിക്കാനുണ്ടെന്ന് മോട്ടോർ വാഹന വകുപ്പ്. അഞ്ച് വിദ്യാർത്ഥികളും അച്ഛനെയോ അമ്മയെയോ ഒപ്പം കൂട്ടി എത്തി ബോധവ്തകരണ ക്ലാസിൽ പങ്കെടുക്കാനും ആവശ്യപ്പെട്ടിട്ടുണ്ട്.
ഇന്‍ജക്ഷന്‍ മാറി കുത്തുന്ന നഴ്‌സുമാര്‍ പഠിച്ചത് വേറെ സംസ്ഥാനങ്ങളില്‍ നിന്ന്'; കെ മുരളീധരന്‍
ഇന്‍ജക്ഷന്‍ മാറി കുത്തുന്ന നഴ്‌സുമാര്‍ പഠിക്കുന്നത് വേറെ സംസ്ഥാനങ്ങളില്‍ നിന്നെന്ന് ആരോഗ്യമന്ത്രി കെ മുരളീധരന്‍. അവിടങ്ങളില്‍ ഇവിടെ ഉള്ളത് പോലെയുള്ള പഠനം ഇല്ലെന്നും അദ്ദേഹം കൂട്ടിച്ചേര്‍ത്തു. കൂടുതല്‍ നഴ്‌സിംഗ് സീറ്റുകള്‍ അനുവദിക്കുമെന്ന് മുഖ്യമന്ത്രി ഉറപ്പ് നല്‍കി. നിലവില്‍ 100 സീറ്റ് എന്നത് 200 ആക്കും. കെഎംഎസ്‌സിയലില്‍ ഉദ്യോഗസ്ഥര്‍ വരാത്തത് എന്ത് കൊണ്ടെന്ന് ചോദിച്ച മന്ത്രി മരുന്ന് കമ്പനിക്കാരെ തന്റെ അടുത്ത് കൊണ്ട് വരരുത് എന്ന് കര്‍ശനമായി താന്‍ പറഞ്ഞിട്ടുണ്ടെന്ന് വ്യക്തമാക്കി. മരുന്നിന്റെ ഗുണമേന്മ പരിശോധിക്കേണ്ടത് ഉദ്യോഗസ്ഥരാണ്. അതിന്റെ ഉത്തരവാദിത്തവും ഏറ്റെടുക്കേണ്ടി വരും. അത് കൊണ്ടാണ് ഉദ്യോഗസ്ഥര്‍ വരാത്തതെന്ന് മുരളീധരന്‍ പറഞ്ഞു. 50/50 എന്ന് പറഞ്ഞാല്‍ ഇഷ്ടം പോലെ ഉദ്യോഗസ്ഥര്‍ വരും. അങ്ങനെ പറയാത്തത് കൊണ്ടാണ് ആരും വരാത്തതെന്നും അദ്ദേഹം കൂട്ടിച്ചേര്‍ത്തു.എസ്എംഎ മരുന്ന് വിവാദത്തില്‍ പ്രതികരിച്ച അദ്ദേഹം പ്രതിപക്ഷ നേതാവ് അയച്ച കത്തില്‍ പറഞ്ഞത് വിലകൂടിയ മരുന്ന് കൊടുക്കാനാണെന്നും അല്ലാതെ ആശങ്കയല്ല പ്രകടിപ്പിച്ചതെന്നും പറഞ്ഞു. പിണറായി ചെയ്തത് പോലെ എല്ലാവര്‍ക്കും അമേരിക്കയില്‍ പോയി ചികിത്സിക്കാന്‍ പറ്റുമോ എന്നും അദ്ദേഹം പരിഹസിച്ചു. യുഡിഎഫില്‍ ഒരു പ്രശ്‌നവുമില്ലെന്നും മന്ത്രി പറഞ്ഞു. മന്ത്രിസഭയില്‍ എല്ലാവരും ഒരുമിച്ച് ഒരു ടീം ആയിട്ടാണ് പ്രവര്‍ത്തിക്കുന്നത്. തന്റെ വകുപ്പില്‍ വകുപ്പ് മന്ത്രി എന്ന നിലയില്‍ താനുമായി മുഖ്യമന്ത്രി ആലോചന നടത്താറുണ്ട്. അതാത് വകുപ്പ് മന്ത്രിമാരുമായി ആലോചിച്ചിട്ടാണ് മുഖ്യമന്ത്രി തീരുമാനം എടുക്കുന്നത്. ഇപ്പോള്‍ വൈദ്യുതിയുടെ ആവശ്യമില്ല എന്ന കാര്യമാണ് മുഖ്യമന്ത്രി പറഞ്ഞത്. ഭാവിയില്‍ വേണ്ടി വന്നേക്കാം. പ്രധാനപ്പെട്ട എല്ലാ വിഷയങ്ങളും മന്ത്രിസഭയില്‍ ചര്‍ച്ച ചെയ്യാറുണ്ടെന്നും മുരളീധരന്‍ വിശദീകരിച്ചു. അടൂര്‍ പ്രകാശ് പാര്‍ട്ടിയുടെ അച്ചടക്കം ലംഘിച്ചിട്ടില്ലെന്ന് പറഞ്ഞ അദ്ദേഹം എല്ലാ കാര്യങ്ങളും ഭംഗിയായി മുന്നോട്ടു പോകുമെന്നും ചര്‍ച്ചകളും കൂടിയാലോചനകളും ഒക്കെ നടക്കുന്നുണ്ടെന്നും വ്യക്തമാക്കി.
പാലക്കാട് കാര്‍ മരത്തിലിടിച്ച്‌ അപകടം; രണ്ട് പേര്‍ മരിച്ചു, രണ്ട് പേരുടെ നില ഗുരുതരം
പാലക്കാട്: പാലക്കാട് കുളപ്പുള്ളി പാതയില്‍ മനിശ്ശീരിയില്‍ നിയന്ത്രണം വിട്ട കാർ കലുങ്കിലും മരത്തിലുമിടിച്ച്‌ രണ്ടുപേർ മരിച്ചു.ചൊവ്വാഴ്ച അർധരാത്രി 12.30ഓടെയായിരുന്നു അപകടം. സൗത്ത് പനമണ്ണ സ്വദേശി വൈശാഖ്, ഒപ്പമുണ്ടായിരുന്ന വാസു എന്നിവരാണ് മരിച്ചത്. വൈശാഖാണ് കാർ ഓടിച്ചിരുന്നതെന്നാണ് വിവരം.കാറിലുണ്ടായിരുന്ന മറ്റ് മൂന്ന് പേർക്ക് പരിക്കേറ്റു. പനമണ്ണ, കണ്ണിയംപുറം സ്വദേശികളായ നിതിൻ, ഗോവിന്ദ്, ശ്രീജിത്ത് എന്നിവർക്കാണ് പരിക്കേറ്റത്. ഇവരില്‍ രണ്ടുപേരുടെ നില അതീവ ഗുരുതരമാണ്. വാണിയംകുളം ഭാഗത്തുനിന്ന് അമിതവേഗത്തിലെത്തിയ കാർ നിയന്ത്രണം വിട്ട് ആദ്യം കലുങ്കിലും പിന്നീട് മരത്തിലും ഇടിക്കുകയായിരുന്നു. ഇടിയുടെ ആഘാതത്തില്‍ കാർ പൂർണമായും തകർന്നു.വിവരമറിഞ്ഞ് ഷൊർണൂരില്‍ നിന്ന് ഫയർഫോഴ്സ് സംഘം സ്ഥലത്തെത്തി. കാറിന്റെ ഭാഗങ്ങള്‍ വെട്ടിപ്പൊളിച്ചാണ് അഞ്ചുപേരെയും പുറത്തെടുത്തത്. പരിക്കേറ്റ മൂന്നുപേരെ വാണിയംകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. മരിച്ച രണ്ടുപേരുടെയും മൃതദേഹങ്ങള്‍ ഇതേ ആശുപത്രിയില്‍ സൂക്ഷിച്ചിരിക്കുകയാണ്.
മുന്നിൽ വരുന്ന ടിഷ്യു പേപ്പറുകളിൽ ഒപ്പിടാറില്ല, ഫയൽ പരിശോധിച്ച് വിശദാംശങ്ങൾ പഠിച്ചാണ് തീരുമാനം എടുത്തത്'; മറുപടിയുമായി മുഖ്യമന്ത്രി
വൈദ്യുതി വാങ്ങൽ കരാറുമായി ബന്ധപ്പെട്ട പ്രതിപക്ഷ നേതാവ് പിണറായി വിജയൻ്റെ പ്രതികരണത്തിന് മറുപടിയുമായി മുഖ്യമന്ത്രി വി ഡി സതീശൻ. വൈദ്യുതി കരാർ സംബന്ധിച്ച് വിശദമായ മറുപടി നൽകിയിട്ടും ഉന്നയിച്ച അതേ 'ദുരൂഹ' ആരോപണം പ്രതിപക്ഷ നേതാവ് ഇന്നും ആവർത്തിക്കുകയാണെന്ന് മുഖ്യമന്ത്രി പറഞ്ഞു. 12.50 രൂപയ്ക്ക് ഹിമാചൽ പ്രദേശ് വൈദ്യുതി നൽകാമെന്ന് പറഞ്ഞതിൻ്റെ രേഖകൾ എവിടെയെന്ന് ചോദിച്ചതിന് പ്രതിപക്ഷ നേതാവ് മറുപടി പറഞ്ഞിട്ടുമില്ല. അതിനാൽ അത്തരമൊരു ഓഫർ ഹിമാചൽ പ്രദേശ് നൽകിയിട്ടില്ലെന്ന് പ്രതിപക്ഷ നേതാവിന് ബോധ്യപ്പെട്ടെന്ന് കരുതട്ടെയെന്നും മുഖ്യമന്ത്രി പറഞ്ഞു.ഹിമാചലിൽ നിന്ന് വൈദ്യുതി വാങ്ങുന്നതിന് രാജസ്ഥാൻ ഒക്ടോബർ 18ന് തീരുമാനിച്ചിരുന്നു. ഒക്ടോബർ 28ന് രാജസ്ഥാൻ റെഗുലേറ്ററി കമ്മീഷന് മുന്നിൽ കരാർ നിർദേശങ്ങൾ എത്തുകയും ചെയ്തു. കെഎസ്ഇബി ശുപാർശയിൽ അന്തിമ തീരുമാനം എടുക്കാൻ മുഖ്യമന്ത്രിയെന്ന നിലയിൽ തൻ്റെ പക്കൽ ഫയൽ വരുന്നത് ഒക്ടോബർ 30നാണെന്ന് മുഖ്യമന്ത്രി പറഞ്ഞു.
വൈദ്യുതി കരാറുമായി ബന്ധപ്പെട്ട രേഖകൾ മുഖ്യമന്ത്രി എന്തുകൊണ്ട് പുറത്ത് വിടുന്നില്ല: പിണറായി വിജയൻ
വൈദ്യുതി കരാറുമായി ബന്ധപ്പെട്ട രേഖകൾ മുഖ്യമന്ത്രി എന്തുകൊണ്ട് പുറത്ത് വിടുന്നില്ലെന്ന് പ്രതിപക്ഷ നേതാവ് പിണറായി വിജയൻ. ആരോപണങ്ങൾക്ക് വ്യക്തത നൽകാതെ മുഖ്യമന്ത്രി ഒളിച്ചോടുന്നുവെന്നും പ്രതിപക്ഷ നേതാവ് കുറ്റപ്പെടുത്തി. വിഷയത്തിൽ ദുരൂഹതയും അവ്യക്തതയും സൃഷ്ടിക്കാൻ ശ്രമം നടക്കുന്നുവെന്നും പ്രതിപക്ഷ നേതാവ് ചൂണ്ടിക്കാണിച്ചു.കെഎസ്ഇബി സാങ്കേതികവും സാമ്പത്തികവുമായ പരിശോധന നടത്തി സർക്കാരിന് സമർപ്പിച്ച ഹിമാചൽ വൈദ്യുതി വാങ്ങാനുള്ള പ്രൊപ്പോസൽ അട്ടിമറിച്ചത് എന്തിന്റെ അടിസ്ഥാനത്തിലാണെന്നും പ്രതിപക്ഷ നേതാവ് പിണറായി വിജയൻ ചോദിച്ചു. വകുപ്പ് മന്ത്രിയുടെ അഭിപ്രായം മറികടന്ന് ജിഎൻഎയുമായി കരാറിന് മുഖ്യമന്ത്രി തീരുമാനിച്ചത് ആർക്കുവേണ്ടിയാണെന്ന ചോദ്യവും പ്രതിപക്ഷ നേതാവ് ഉന്നയിച്ചു. ജിഎൻഎയുമായി ബന്ധപ്പെട്ട മുഴുവൻ ഫയലുകളും കത്തുകളും പുറത്തുവിടണമെന്നും പ്രതിപക്ഷനേതാവ് ആവശ്യപ്പെട്ടു. കെഎസ്ഇബി തള്ളിയ ജിഎൻഎ ഓഫർ കണ്ണടച്ച് സ്വീകരിച്ചത് ഏത് മാനദണ്ഡപ്രകാരമാണെന്ന ചോദ്യവും പ്രതിപക്ഷ നേതാവ് ഉന്നയിച്ചു.
ശ്രേയസ് സ്വാശ്രയ സംഘം ഓൾഡ് ഏജ് ഹോമിൽ സ്നേഹ വിരുന്നൊരുക്കി
നമ്പ്യാർകുന്ന് യൂണിറ്റിലെ ധനശ്രീ സ്വാശ്രയ സംഘത്തിന്റെ രണ്ടാം വാർഷികാഘോഷം പഴൂർ ഓൾഡ് ഏജ് ഹോമിൽ സംഘടിപ്പിച്ചു.ബത്തേരി മേഖല പ്രോഗ്രാം ഓഫീസർ പോൾ പി. എഫ്.ഉദ്ഘാടനം ചെയ്തു.സംഘം പ്രസിഡന്റ്‌ രമേശ്‌ അദ്ധ്യക്ഷത വഹിച്ചു.ഫാ.ഫാമിയൻ മുഖ്യ സന്ദേശം നൽകി.യൂണിറ്റ് കമ്മിറ്റി അംഗങ്ങളായ അൽഫോൻസ,സൂസി എന്നിവർ സംസാരിച്ചു.ചന്ദ്രിക സ്വാഗതവും, പ്രഭാകരൻ നന്ദിയും രേഖപ്പെടുത്തി.സ്നേഹവിരുന്നോടെ സമാപിച്ചു.
കെഎസ്ഇബി ചെയർമാന്റെ മാറ്റം സ്വാഭാവികം, സര്‍ക്കാര്‍ അറിയാതെ ബാറുകള്‍ അനുവദിക്കാൻ പാടില്ല; വാർത്താസമ്മേളനത്തിൽ മുഖ്യമന്ത്രി
അന്താരാഷ്ട്ര മാരിടൈം മ്യൂസിയം കരടിന് അംഗീകാരം നൽകി മന്ത്രിസഭ. സ്വപ്നപദ്ധതിയുടെ ഭാഗമെന്ന് മുഖ്യമന്ത്രി വി ഡി സതീശൻ പറഞ്ഞു. വാർത്താസമ്മേളനത്തിൽ മന്ത്രിസഭ യോഗ തീരുമാനങ്ങൾ വിശദീകരിക്കുകയായിരുന്നു മുഖ്യമന്ത്രി. ആരോഗ്യവകുപ്പിൽ ഡെന്റൽ ഹൈജീനിസ്റ്റ് ഗ്രേഡ് 2 വിൽ 12 തസ്തികയും കാത്ത് ലാബ് ടെക്നീഷ്യൻസിലേക്ക് 16 പുതിയ തസ്തികയും അംഗീകരിച്ചതായും മുഖ്യമന്ത്രി വ്യക്തമാക്കി. കോഴിക്കോട് കോർപറേഷനിൽ നിന്ന് പിരിച്ചുവിട്ടവർക്ക് ആശ്വാസമാകുന്ന മന്ത്രിസഭ യോഗതീരുമാനവും മുഖ്യമന്ത്രി അറിയിച്ചു. സൂപ്പർ ന്യൂമറി തസ്തിക ആക്കി നിലനിർത്തും. ഗവർണർക്കെതിരെയും മുഖ്യമന്ത്രി വിമർശനമുന്നയിച്ചു.പിഎസ് സിയിലെ ശുപാര്‍ശ നടപടിക്രമം പാലിക്കാതെയെന്നും മുഖ്യമന്ത്രി വിമര്‍ശിച്ചു. സര്‍ക്കാരുമായി ആലോചിച്ചില്ലെന്നും ഗവര്‍ണര്‍ ചെയ്തതിനോട് യോജിപ്പില്ലെന്നും മുഖ്യമന്ത്രി പറഞ്ഞു. പി എസ് സിയിൽ നടക്കുന്നത് ഞെട്ടിക്കുന്ന ക്രമക്കേടാണ്. പാര്‍ട്ടി ബന്ധുക്കളെയും സ്വന്തക്കാരെയും നിയമിക്കുന്നു. പി എസ് സിയിൽ ശുദ്ധീകരണം നടത്തുമെന്നും മുഖ്യമന്ത്രി അറിയിച്ചു. ഐഎഎസ് സ്ഥലംമാറ്റം ചട്ടപ്രകാരമാണ്. കെഎസ്ഇബി ചെയര്‍മാന്‍റെ മാറ്റം സ്വാഭാവികമാണെന്നും മുഖ്യമന്ത്രി പറഞ്ഞു.
വീണ്ടും തിരിച്ചു കയറിത്തുടങ്ങി സ്വർണ വില; പവന് കൂടിയത് 200 രൂപ
സംസ്ഥാനത്ത് സ്വർണ വിലയിൽ ഇന്ന് നേരിയ വർധവ്. 22 കാരറ്റ് സ്വർണത്തിന് ഗ്രാമിന് 25 രൂപയാണ് കൂടിയിരിക്കുന്നത്. പവന് 200 രൂപയോളവും കൂടിയിരിക്കുകയാണ്. ഇതോടെ സ്വർണം ഗ്രാമിന് 12,825 രൂപ എന്ന നിലയിലും പവന് 1,02,600 രൂപ എന്ന നിരക്കിലുമെത്തിയതായി കേരളാ ഗോൾഡ് ആന്റ് സിൽവർ മെർച്ചന്റ്സ് അസോസിയേഷൻ അറിയിച്ചു. അന്താരാഷ്ട്ര വിലയിലെ കയറ്റിറക്കങ്ങളാണ് കേരളത്തിലെയും സ്വർണ വിലയെ സ്വാധീനിക്കാറുള്ളത്. അതേ സമയം, സംസ്ഥാനത്ത് വെള്ളി വിലയിൽ മാറ്റമില്ലാതെ തുടരുന്നു. ഇന്ന് ഗ്രാമിന് 200 രൂപയിലും 10 ഗ്രാമിന് 2,000 രൂപയിലുമാണ് വ്യാപാരം നടക്കുക.
ആഭ്യന്തരമന്ത്രിക്ക് നൽകുന്ന പരാതികളിൽ ഇനി നടപടി വേഗത്തിലാകും; പൊലീസിൽ പുതിയ സംവിധാനം
ആഭ്യന്തരമന്ത്രിക്ക് നൽകുന്ന പരാതികളിൽ നടപടി വേഗത്തിലാക്കാൻ കേരള പൊലീസിൽ പുതിയ സംവിധാനം. 'എച്ച് എം ആക്ട്സ്' (HM Acts) എന്ന പേരിൽ തയ്യാറാക്കിയ ഡിജിറ്റൽ പെറ്റിഷൻ മാനേജ്മെന്‍റ് സിസ്റ്റം വഴി പരാതികൾ രേഖപ്പെടുത്താനും തുട‍ർ നടപടികൾക്കായി ബന്ധപ്പെട്ട ഓഫീസുകളിലേക്ക് അയക്കാനും കഴിയും.പരാതികളിൽ സ്വീകരിച്ച നടപടികൾ നിരീക്ഷിക്കാനും വിവരം പരാതിക്കാരനെ അറിയിക്കാനും സംവിധാനമുണ്ടാകും. അടിയന്തര നടപടി വേണ്ട പരാതികളിൽ മന്ത്രിയുടെ ഓഫീസിൽ നിന്ന് നിർദേശം രേഖപ്പെടുത്താനും കഴിയും.
സംസ്ഥാനത്ത് ശക്തമായ മഴ മുന്നറിയിപ്പ്; ഏഴ് ജില്ലകളില്‍ യെല്ലോ അലേര്‍ട്ട്
തിരുവനന്തപുരം :സംസ്ഥാനത്ത് നവംബര്‍ 2, 3, 6 തീയതികളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യത. നവംബര്‍ 02 മുതല്‍ 06 വരെ ഇടിമിന്നലോടുകൂടിയ മഴയ്ക്കും മണിക്കൂറില്‍ 30-40 കിലോമീറ്റര്‍ വേഗതയില്‍ ശക്തമായ കാറ്റിനും സാധ്യതയുണ്ട്. ഇന്ന് തൃശൂര്‍ മുതല്‍ കാസര്‍?ഗോഡ് വരെയുള്ള ഏഴ് ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചു. മറ്റു ജില്ലകളില്‍ അലേര്‍ട്ട് പ്രഖ്യാപിച്ചിട്ടില്ല. നാളെ മലപ്പുറം, കോഴിക്കോട്, വയനാട്, കണ്ണൂര്‍, കാസര്‍?ഗോഡ് ജില്ലകളിലാണ് യെല്ലോ അലേര്‍ട്ട് പ്രഖ്യാപിച്ചത്.അതേസമയം, ബംഗാള്‍ ഉള്‍ക്കടലില്‍ രൂപപ്പെട്ട ചുഴലിക്കാറ്റ് 'മുറസു' ഇന്ന് രാത്രി 11:30-നും പുലര്‍ച്ചെ 4 മണിക്കും ഇടയില്‍ തെക്കന്‍ ആന്ധ്രാപ്രദേശ് ഒംഗോളിന് സമീപം നെല്ലൂരിനും നരസാപുരത്തിനും ഇടയില്‍ ശക്തമായ ചുഴലിക്കാറ്റായി മണിക്കൂറില്‍ 100-110 കിലോമീറ്റര്‍ വേഗതയിലും പരമാവധി മണിക്കൂറില്‍ 120 കിലോമീറ്റര്‍ വരെ വേഗതയിയിലും കരയില്‍ പ്രവേശിക്കാന്‍ സാധ്യതയുണ്ടെന്ന് കാലാവസ്ഥ വകുപ്പ്. ഇതേ തുടര്‍ന്ന്, തെക്കന്‍ കേരളത്തിനും സമീപപ്രദേശങ്ങള്‍ക്കും മുകളിലായി ചക്രവാതച്ചുഴി നിലനില്‍ക്കുന്നുണ്ട്.
കുത്തനെ ഇടിഞ്ഞ് സ്വർണ വില! ഒരു ലക്ഷത്തിനരികെയെത്തി!
സംസ്ഥാനത്ത് സ്വർണ വിലയിൽ വൻ ഇടിവ്. ഇന്ന് കേരളത്തിൽ 22 കാരറ്റ് സ്വർണം ഗ്രാമിന് 310 രൂപയും പവന് 2480 രൂപയുമാണ് കുറഞ്ഞിരിക്കുന്നത്. ഇതോടെ ഇന്ന് കേരളത്തിൽ ഗ്രാമിന് 12,730 രൂപയിലും പവന് 1,01,840 രൂപ എന്ന നിലയിലുമാണ് സ്വർണം വ്യാപാരം നടക്കുകയെന്ന് കേരളാ ഗോൾഡ് ആന്റ് സിൽവർ മെർച്ചന്റ്സ് അസോസിയേഷൻ അറിയിച്ചു. അന്താരാഷ്ട്ര വിലയിലെ കയറ്റിറക്കങ്ങളാണ് കേരളത്തിലെയും സ്വർണ വിലയെ സ്വാധീനിക്കാറുള്ളത്. അതേ സമയം, സംസ്ഥാനത്ത് വെള്ളി വിലയും കുറഞ്ഞു. ഇന്ന് ഗ്രാമിന് 210 രൂപയിലും 10 ഗ്രാമിന് 2,100 രൂപയിലുമാണ് വ്യാപാരം നടക്കുക.
സംസ്ഥാനത്ത് ലോഡ് ഷെഡിംഗ് ഒഴിവാക്കാനുളള ശ്രമമാണ് നടക്കുന്നതെന്ന് സണ്ണി ജോസഫ്; 'കിട്ടാവുന്നിടത്ത് നിന്നെല്ലാം വൈദ്യുതി വാങ്ങും'
സംസ്ഥാനത്ത് ലോഡ് ഷെഡിംഗ് ഒഴിവാക്കാനുളള ശ്രമമാണ് നടക്കുന്നതെന്ന് വൈദ്യുത മന്ത്രി സണ്ണി ജോസഫ്. കിട്ടാവുന്നിടത്ത് നിന്നെല്ലാം വൈദ്യുതി വാങ്ങാനാണ് ശ്രമം. ദില്ലിയിൽ തണുപ്പ് കാലമാകുമ്പോൾ വൈദ്യുതി ഉപയോഗം കുറയും. ഇതോടെ കേരളത്തിൽ വൈദ്യുതി കിട്ടാനുള്ള സാധ്യത കൂടും. മുഖ്യമന്ത്രി നേരിട്ട് ഇടപെട്ടിട്ടുണ്ടെന്നും സണ്ണി ജോസഫ് പറഞ്ഞു. സംസ്ഥാനത്ത് അടുത്തമാസം മുതൽ ലോഡ് ഷെഡിങ്ങിന് സാധ്യതയുണ്ടെന്ന വാർത്ത വന്നതിന് പിന്നാലെയാണ് പ്രതികരണം.ദീർഘകാലത്തേക്ക് വൈദ്യത്രി ലഭ്യമാക്കാനുള്ള കാര്യങ്ങൾ നടത്തുകയാണ്. സോളാർ ബാറ്ററി കിട്ടാത്തതാണ് സോളാർ പവർ സ്റ്റേഷൻ ഉദ്ഘാടനം വൈകാൻ കാരണമെന്നും മന്ത്രി പറഞ്ഞു. മുഴുവൻ സമയത്തും പ്രസിഡൻ്റ് ഇല്ലാത്തതിനെ കുറിച്ച് ഞാനാണ് ആദ്യം പറഞ്ഞത്. മുല്ലപ്പള്ളി എന്നെ ഉദ്ധരിച്ചാണ് പറഞ്ഞത്. ഒരു സ്‌തംഭനവും കോൺഗ്രസിൽ ഇല്ലെന്നും സണ്ണി ജോസഫ് പറഞ്ഞു.
കെപിസിസി പുനഃസംഘടനാ ചര്‍ച്ചകള്‍ പുനരാരംഭിക്കാന്‍ ഹൈക്കമാന്‍ഡ്; അര ഡസനിലേറെ നേതാക്കള്‍ പരിഗണനയില്‍
തിരുവനന്തപുരം: കെപിസിസിപുനഃസംഘടനാ ചര്‍ച്ചകള്‍ പുനരാരംഭിക്കാന്‍ ഹൈക്കമാഡ്. മുഴുവന്‍ സമയ അധ്യക്ഷനെ നിയമിക്കാനാണ് നീക്കം. അധ്യക്ഷ സ്ഥാനത്തേക്ക് അര ഡസനിലേറെ നേതാക്കള്‍ പരിഗണനയിലുണ്ട്. വനിതാ അധ്യക്ഷ വേണമെന്ന ആവശ്യവും ഉയരുന്നുണ്ട്. റവന്യൂ മന്ത്രി എ പി അനില്‍കുമാര്‍, ജോസഫ് വാഴയ്ക്കന്‍, എം എം ഹസ്സന്‍ തുടങ്ങിയവര്‍ അധ്യക്ഷ സ്ഥാനത്തേക്ക് പരിഗണനയിലുണ്ട്.ബെന്നി ബഹനാന്‍, കൊടിക്കുന്നില്‍ സുരേഷ് എന്നിവര്‍ക്ക് വേണ്ടിയും നേതാക്കളുടെ ആവശ്യം ശക്തമാണ്. മാത്യു കുഴല്‍നാടനെ പരിഗണിക്കണമെന്ന് ഒരു വിഭാഗം ആവശ്യമുയര്‍ത്തുമ്പോള്‍, അധ്യക്ഷ പദവി ലക്ഷ്യമിട്ട് ഷാഫി പറമ്പിലും രംഗത്തുണ്ട്. ഉടന്‍ പുനഃസംഘടന നടത്തണമെന്നാണ് ദീപാ ദാസ് മുന്‍ഷിയുടെ റിപ്പോര്‍ട്ട്. പല ജില്ലകളിലും സംഘടനാ പ്രവര്‍ത്തനം നിശ്ചലമെന്നും റിപ്പോര്‍ട്ടിലുണ്ടായിരുന്നു.ഡല്‍ഹിയിലെ സമരത്തിന്റെ പശ്ചാത്തലത്തിലാണ് കെപിസിസി പുനഃസംഘടന നീണ്ടു പോയതെന്നാണ് മുന്‍ കെപിസിസി അധ്യക്ഷന്‍ എം എം ഹസ്സന്‍ പ്രതികരിച്ചത്. പുനഃസംഘടന എത്രയും വേഗം വേണമെന്ന് എല്ലാവരും ആവശ്യപ്പെട്ടതാണ്. ഗ്യാനേഷ് കുമാറിനെതിരായ വിഷയത്തില്‍ അയവ് വരുമ്പോള്‍ പുനഃസംഘടന നടക്കുമെന്നും എം എം ഹസ്സന്‍ റിപ്പോര്‍ട്ടറിനോട് പറഞ്ഞു.
മമ്മൂട്ടിയുമായുള്ള എസ്എഫ്ഐ-ഡിവൈഎഫ്ഐ നേതാക്കളുടെ കൂടിക്കാഴ്‌ച; വിശദീകരണവുമായി ചിന്ത ജെറോം; സൈബർ ആക്രമണം ശരിയല്ലെന്ന് വിമർശനം
മമ്മൂട്ടിയുമായുള്ള ഡിവൈഎഫ്ഐ-എസ്എഫ്ഐ നേതാക്കളുടെ കൂടിക്കാഴ്‌ചയിൽ വിശദീകരണവുമായി ഡിവൈഎഫ്ഐ സംസ്ഥാന പ്രസിഡൻ്റ് ചിന്ത ജെറോം. ഇരു സംഘടനകളുടെയും പ്രവർത്തകരുടെയും അനുഭാവികളുടെയും ഭാഗത്ത് നിന്നുണ്ടായ അതിരൂക്ഷമായ സൈബർ ആക്രമണത്തിന് പിന്നാലെയാണ് വിശദീകരണം. മമ്മൂട്ടിക്ക് എതിരെ നടക്കുന്ന സൈബർ ആക്രമണം ശരിയായ സമീപനമല്ലെന്നും എപ്പോഴോ പറഞ്ഞുതീർന്ന ഒരു കാര്യത്തിൻ്റെ പേരിൽ ആക്രമണം തുടരുന്നത് ശരിയല്ലെന്നും ചിന്ത ജെറോം നിലപാടെടുത്തു. മമ്മൂട്ടി എന്നും ഇടതുപക്ഷ പുരോഗമന ആശയങ്ങൾക്കൊപ്പം നിൽക്കുന്ന ആളാണെന്നും മഹാനടനാണെന്നും ഓർമിപ്പിച്ച ചിന്ത ജെറോം മമ്മൂട്ടി മലയാളത്തിൻ്റെ പൊതുസ്വത്തെന്നും പറഞ്ഞു.
കേരളത്തിന് 70 വയസ്, 70 വയസ് പിന്നിട്ടവർക്ക് വെളിച്ചെണ്ണയ്ക്ക് 70 രൂപ ഇളവ്; 'മ'യിൽ തുടങ്ങുന്ന പേരുള്ള ഉത്പന്നങ്ങൾക്കും സപ്ലൈകോ ഓഫർ
കേരളത്തിന് 70 വയസ് തികയുന്ന നവംബർ ഒന്നിന്, 70 വയസും അതിന് മുകളിൽ പ്രായവുമുള്ള മുതിർന്ന പൗരന്മാർക്ക് പ്രത്യേക ഓഫറുകളുമായി സപ്ലൈകോ. ആയിരം രൂപയ്ക്ക് മുകളിൽ സബ്സിഡിയിതര സാധനങ്ങൾ വാങ്ങുന്ന 70 വയസോ അതിൽ കൂടുതലോ പ്രായമുള്ള ഉപഭോക്താക്കൾക്ക് ശബരി വെളിച്ചെണ്ണയുടെ പരമാവധി ചില്ലറ വിൽപ്പന വിലയിൽ നിന്ന് 70 രൂപ കുറച്ച്, ഒരു ലിറ്റർ 229 രൂപ നിരക്കിൽ ലഭ്യമാക്കും.കേരളത്തിന്‍റെ വളർച്ചയ്ക്കും പുരോഗതിക്കും സാക്ഷികളായ മുതിർന്ന തലമുറയോടുള്ള ആദരസൂചകമായി നവംബർ ഒന്ന് മുതൽ ഏഴ് വരെയാണ് ഓഫർ. മലയാളത്തിലെ 'മ' എന്ന അക്ഷരത്തിൽ തുടങ്ങുന്ന ശബരി ഉൽപ്പന്നങ്ങൾക്കും പ്രത്യേക ഓഫറുണ്ട്. ശബരി മഞ്ഞൾപ്പൊടി, മല്ലിപ്പൊടി, മുളകുപൊടി എന്നിവയുടെ 100 ഗ്രാം പാക്കറ്റുകൾക്ക് നവംബർ ഒന്ന് മുതൽ ഏഴ് വരെ സപ്ലൈകോ നിലവിൽ നൽകുന്ന വിൽപ്പന വിലയിൽ നിന്ന് ഏഴ് ശതമാനം വിലക്കുറവ് ലഭിക്കും. ഈ ആനുകൂല്യം എല്ലാ ഉപഭോക്താക്കൾക്കും ലഭിക്കും. കേരളപ്പിറവിയുടെ മധുരം വീടുകളിലേക്കും പകരാൻ ശബരി പായസമിക്സ് ഉൽപ്പന്നങ്ങൾക്ക് നവംബർ ഒന്ന് മുതൽ 30 വരെ 10 ശതമാനം വിലക്കുറവും എല്ലാ ഉപഭോക്താക്കൾക്കും ലഭ്യമാക്കും. സപ്ലൈകോ നിലവിൽ നൽകുന്ന വിലക്കുറവിനും പുറമെയാണിത്.അതേസമയം, സ്വന്തം ബ്രാൻഡായ ശബരിയുടെ പുതിയ ഉൽപ്പന്നങ്ങളായ മൈദ, റവ എന്നിവ വിപണിയിലിറക്കാൻ ഒരുങ്ങുകയാണ് സപ്ലൈകോ. ശബരി ആട്ട, ശബരി ഗോൾഡ് ചായപ്പൊടി, ശബരി ഹോട്ടൽ ബ്ലെൻഡ് ചായപ്പൊടി എന്നിവ പുതിയ ബ്രാൻഡഡ് പാക്കിംഗിൽ പുനരവതരിപ്പിക്കുകയും ചെയ്യും. ഒക്ടോബർ 31ന് വൈകിട്ട് മൂന്നിന് എറണാകുളം ഐഎംഎ ഹൗസിൽ നടക്കുന്ന ചടങ്ങ് ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബ് ഔദ്യോഗികമായി ഈ പുതിയ ഉത്പന്നങ്ങൾ വിപണിയിലിറക്കും.
വീണാ ജോർജിനെ ആക്രമിച്ചെന്ന കേസ്; പുറത്ത് പരിക്ക് ഉണ്ടായിരുന്നില്ല, പരിയാരത്തെ ഡോക്ടർമാരുടെ മൊഴിയെടുത്ത് എസ്ഐടി
കണ്ണൂർ: കണ്ണൂരിൽ വീണാ ജോർജിനെ കെഎസ്‍യു പ്രവർത്തകർ ആക്രമിച്ചെന്ന കേസിൽ പരിയാരം മെഡി. കോളേജിലെ ഡോക്ടർമാരിൽ നിന്ന് എസ്ഐടി മൊഴിയെടുത്തു. പുറത്ത് കാണത്തക്ക പരിക്ക് വീണാ ജോർജിന് ഉണ്ടായിരുന്നില്ലെന്ന് ഡോക്ടർമാർ മൊഴി നൽകിയതായാണ് സൂചന. തീവ്രപരിചരണ വിഭാഗത്തിൽ പ്രവേശിപ്പിച്ചത് കഴുത്തിൽ നീർക്കെട്ട് ഉണ്ടായിരുന്നതിനാലാണെന്നും മൊഴി നൽകിയിട്ടുണ്ട്. ആശുപത്രിയിൽ നിന്ന് മെഡിക്കൽ രേഖകളും എസ്ഐടി ശേഖരിച്ചു. അതേസമയം, കേസില്‍ തെറ്റായി മൊഴി നല്‍കിയ മുന്‍ഗണ്‍മാനെതിരെ എസ്ഐടി ഉടന്‍ ഡിജിപിക്ക് റിപ്പോര്‍ട്ട് നല്‍കും. വീണയുടെ മുന്‍ ഗണ്‍മാന്‍ അഭിലാഷിനെതിരെ നടപടി ശുപാര്‍ശ ചെയ്തു കൊണ്ടുള്ള റിപ്പോര്‍ട്ടാണ് നല്‍കുക. കെ എസ് യു പ്രവര്‍ത്തകര്‍ ആയുധമുപയോഗിച്ച് അക്രമിച്ചെന്ന മൊഴി വീണയുടെ നിര്‍ദേശ പ്രകാരമാണ് നല്‍കിയതെന്ന് അഭിലാഷ് എസ് ഐ ടിയോട് വെളിപ്പെടുത്തിയിരുന്നു. അഭിലാഷിന്‍റെ മൊഴിയുടെ അടിസ്ഥാനത്തിലായിരുന്നു കെ എസ് യു പ്രവര്‍ത്തകര്‍ക്കെതിരെ വധശ്രമമുള്‍പ്പെടെയുള്ള വകുപ്പുകള്‍ ചുമത്തി പൊലീസ് നേരത്തെ കേസെടുത്തത്.
സ്കൂൾ ക്യാമ്പസുകളിൽ ലിപ്സ്റ്റിക്കിനും സൗന്ദര്യവർധക വസ്തുക്കൾക്കും നിയന്ത്രണം; ആരോഗ്യസുരക്ഷയ്ക്ക് മുൻഗണന നൽകി കേരളത്തിൽ ബോധവൽക്കരണ ക്യാമ്പയിൻ
തിരുവനന്തപുരം: സ്കൂൾ വിദ്യാർഥികൾക്കിടയിൽ ലിപ്സ്റ്റിക് ഉൾപ്പെടെയുള്ള സൗന്ദര്യവർധക വസ്തുക്കളുടെ ഉപയോഗം വർധിക്കുന്നതിനെത്തുടർന്ന് കുട്ടികളുടെ ആരോഗ്യസുരക്ഷ ലക്ഷ്യമിട്ട് കേരളത്തിൽ ബോധവൽക്കരണ പ്രവർത്തനങ്ങൾ ശക്തമാകുന്നു. ലിപ്സ്റ്റിക്, കാജൽ, ഐലൈനർ, മസ്‌കാര തുടങ്ങിയ ഉൽപ്പന്നങ്ങളുടെ അമിതവും വിവേചനരഹിതവുമായ ഉപയോഗം കുട്ടികളുടെ ആരോഗ്യത്തെ ബാധിക്കുമെന്ന ആശങ്കയാണ് ഇതിന് പിന്നിൽ.വിലകുറഞ്ഞതും ഗുണനിലവാരം ഉറപ്പില്ലാത്തതുമായ ചില സൗന്ദര്യവർധക ഉൽപ്പന്നങ്ങളിൽ ലെഡ്, മെർക്കുറി, കാഡ്മിയം തുടങ്ങിയ ഹാനികരമായ ലോഹങ്ങൾ അടങ്ങിയിരിക്കാനുള്ള സാധ്യത ആരോഗ്യവിദഗ്ധർ ചൂണ്ടിക്കാട്ടുന്നു. ഇത്തരം വസ്തുക്കളുടെ ദീർഘകാല സമ്പർക്കം ചർമപ്രശ്നങ്ങൾക്കും മറ്റ് ആരോഗ്യപ്രശ്നങ്ങൾക്കും കാരണമാകാമെന്നതിനാൽ കുട്ടികൾക്കിടയിൽ അവബോധം വളർത്തേണ്ടതിന്റെ ആവശ്യകതയും ഉയരുന്നു.കൊല്ലം ജില്ലയിൽ ബാലാവകാശ സമിതിയുടെ നേതൃത്വത്തിൽ സ്കൂൾ വിദ്യാർഥികൾക്കിടയിലെ സൗന്ദര്യവർധക വസ്തുക്കളുടെ ഉപയോഗത്തിനെതിരെ ബോധവൽക്കരണ ക്യാമ്പയിൻ ആരംഭിച്ചിരുന്നു. ആരോഗ്യവിദഗ്ധരുടെ ക്ലാസുകൾ, വിദ്യാർഥികൾക്കും രക്ഷിതാക്കൾക്കുമുള്ള ബോധവൽക്കരണം തുടങ്ങിയവയിലൂടെ സ്കൂൾ ക്യാമ്പസുകളെ സൗന്ദര്യവർധക വസ്തുക്കളുടെ അനാവശ്യ ഉപയോഗത്തിൽനിന്ന് മുക്തമാക്കുകയാണ് ലക്ഷ്യം. മലപ്പുറം ഗവൺമെന്റ് ഇൻസ്റ്റിറ്റ്യൂട്ട് ഓഫ് ടീച്ചർ എജ്യുക്കേഷനും ലിപ്സ്റ്റിക് രഹിത ക്യാമ്പസ് എന്ന ആശയം നടപ്പാക്കിയിട്ടുണ്ട്.കുട്ടികളെ ശിക്ഷിക്കുന്നതിനേക്കാൾ ആരോഗ്യബോധവും ശരിയായ ശീലങ്ങളും വളർത്തുന്നതിന് മുൻഗണന നൽകണമെന്നാണ് ഈ പ്രവർത്തനങ്ങളുടെ സന്ദേശം. രക്ഷിതാക്കളും അധ്യാപകരും സ്കൂൾ അധികൃതരും ഒരുമിച്ച് പ്രവർത്തിച്ചാൽ മാത്രമേ കുട്ടികളിൽ സുരക്ഷിതമായ ശീലങ്ങൾ വളർത്തിയെടുക്കാൻ കഴിയൂ.കുറിപ്പ്: സംസ്ഥാനത്തെ എല്ലാ സ്കൂളുകളിലും ലിപ്സ്റ്റിക് ഉപയോഗം നിരോധിച്ചുകൊണ്ടുള്ള പൊതുവായ സർക്കാർ ഉത്തരവ് സ്ഥിരീകരിച്ചിട്ടില്ല. അതിനാൽ നിലവിലെ നടപടി ഔദ്യോഗിക നിരോധനമായി അവതരിപ്പിക്കുന്നതിനുപകരം ബോധവൽക്കരണ ക്യാമ്പയിനായാണ് ഇവിടെ വിവരിച്ചിരിക്കുന്നത്.
‘തരം താഴ്ത്തൽ നടപടി പുനഃപരിശോധിക്കണം’: CPIM കേന്ദ്ര നേതൃത്വത്തെ സമീപിച്ച് പി പി ദിവ്യ
കണ്ണൂർ: തരം താഴ്ത്തൽ നടപടി പുനപരിശോധിക്കണമെന്നാവശ്യപ്പെട്ട് സിപിഐഎം കേന്ദ്ര കമ്മിറ്റിക്ക് കത്ത് നൽകി പി പി ദിവ്യ. ജില്ലാ കമ്മിറ്റിയിൽ നിന്ന് ഒഴിവാക്കി രണ്ട് വർഷമായിട്ടും നീതി ലഭിച്ചില്ലെന്നും കത്തിൽ ചൂണ്ടിക്കാട്ടുന്നു. വർഗ-ബഹുജന സംഘടനകളിൽ നിന്ന് ഒഴിവാക്കിയത് എന്തിനെന്നും ചോദ്യം. വിപുലീകൃത ജില്ലാ കമ്മിറ്റിക്ക് മുന്‍പാണ് കേന്ദ്ര കമ്മിറ്റിക്ക് കത്ത് നല്‍കിയത്.പിപി ദിവ്യയെ വീണ്ടും ജില്ലാ കമ്മിറ്റിയില്‍ ഉള്‍പ്പെടുത്താനുള്ള നീക്കങ്ങള്‍ നടന്നിരുന്നു. എന്നാല്‍ കത്ത് നല്‍കിയിട്ടും വിപുലീകൃത ജില്ലാ കമ്മിറ്റിയില്‍ തിരിച്ചുവരാന്‍ പിപി ദിവ്യയ്ക്ക് കഴിഞ്ഞില്ല. ചില നേതാക്കള്‍ പിപി ദിവ്യയുടെ തിരിച്ചുവരവിനെ എതിര്‍ത്തിരുന്നു. അതിനിടെ പാര്‍ട്ടിയില്‍ നിന്ന് അകലുന്നവെന്ന സൂചന നല്‍കി പിപി ദിവ്യ ഫേസ്ബുക്കില്‍ കുറിപ്പ് പങ്കുവെച്ചിരുന്നു. ഇതിന് പിന്നാലെ നേതാക്കള്‍ പിപി ദിവ്യയെ ബന്ധപ്പെട്ടുവെന്നാണ് വിവരം. പ്രശ്‌നങ്ങള്‍ പരിഹരിക്കാമെന്നും പാര്‍ട്ടിയുമായി അകന്ന് പോകരുതെന്നും നേതാക്കള്‍ പറഞ്ഞതായാണ് വിവരം.
ട്രെന്റ് മാറിയോ? സംസ്ഥാനത്ത് സ്വർണ വിലയിൽ നേരിയ വർധനവ്
ഇന്ന് സംസ്ഥാനത്ത് സ്വർണ വിലയിൽ നേരിയ വർധനവ്. 22 കാരറ്റ് ഒരു ഗ്രാം സ്വർണത്തിന് 20 രൂപയും പവന് 80 രൂപയുമാണ് കൂടിയിരിക്കുന്നതെന്ന് കേരളാ ഗോൾഡ് ആന്റ് സിൽവർ മെർച്ചന്റ്സ് അസോസിയേഷൻ പുറത്തു വിട്ട കണക്കുകൾ വ്യക്തമാക്കുന്നു. ഇതോടെ സ്വർണം ഗ്രാമിന് 13,070 രൂപയിലും പവന് 1,04,560 രൂപയിലുമെത്തി. കഴിഞ്ഞ 2 ദിവസം കൊണ്ട് സ്വർണത്തിന് 2640 രൂപയാണ് കുറഞ്ഞിരുന്നത്. അന്താരാഷ്ട്ര വിപണിയിൽ സ്വർണവില 4000 ഡോളറിന് താഴേക്ക് എത്തിയിരുന്നു. അന്താരാഷ്ട്ര വിലയിലെ കയറ്റിറക്കങ്ങളാണ് കേരളത്തിലെയും സ്വർണ വിലയെ സ്വാധീനിക്കാറുള്ളത്. അതേ സമയം, സംസ്ഥാനത്ത് വെള്ളി വിലയിൽ മാറ്റമില്ലാതെ തുടരുന്നു. നിലവിൽ വെള്ളി ഗ്രാമിന് 20 രൂപയിലും 10 ഗ്രാമിന് 2,200 രൂപയും എന്ന കണക്കിലാണ് വ്യാപാരം നടക്കുന്നത്.
സന്ദീപ് വാര്യർ എംഎൽഎയുടെ വാഹനം അപകടത്തിൽപെട്ടു, വാഹനത്തിന്റെ ടയർ പൊട്ടിയതിനെ തുടർന്ന് നിയന്ത്രണം നഷ്ടപ്പെട്ട് അപകടം
സന്ദീപ് വാര്യർ എംഎൽഎയുടെ വാഹനം അപകടത്തിൽപെട്ടു. കാറിൻ്റെ ടയർ പൊട്ടിയാണ് അപകടം. വാഹനത്തിലുണ്ടായിരുന്ന എംഎൽഎയും മറ്റ് യാത്രികരും പരിക്കുകളില്ലാതെ രക്ഷപ്പെട്ടു. പുലർച്ചെ ദേശീയപാത 66-ൽ മലപ്പുറം കോയിച്ചനയിൽ വെച്ചായിരുന്നു അപകടം. വാഹനത്തിന്റെ ടയർ പൊട്ടിയതിനെ തുടർന്ന് നിയന്ത്രണം നഷ്ടമാവുകയായിരുന്നു. തൊട്ടുപുറകിൽ വരികയായിരുന്ന മറ്റ് രണ്ട് കാറുകൾ കൂടി കൂട്ടിയിടിച്ചു. അപകടത്തിൽ ആർക്കും പരിക്കില്ല. മലപ്പുറം കോയിച്ചനയിൽ വെച്ചായിരുന്നു അപകടം.
കുത്തനെ ഇറങ്ങി സ്വർണ വില, 2 ദിവസം കൊണ്ട് കുറഞ്ഞത് 2640 രൂപ
സംസ്ഥാനത്ത് സ്വർണ വിലയിൽ ഇന്നും ഇടിവ്. ഇന്ന് കേരളത്തിൽ 22 കാരറ്റ് സ്വർണം ഗ്രാമിന് 175 രൂപയാണ് കുറഞ്ഞിരിക്കുന്നത്. പവന് 1400 രൂപയാണ് ഇതോടെ കുറഞ്ഞിരിക്കുന്നത്. നിലവിൽ കേരളത്തിൽ ഒരു ഗ്രാം സ്വർണം 13,060 രൂപയിലും പവന് 1,04,480 രൂപയിലുമാണ് വ്യാപാരം നടക്കുന്നത്. അന്താരാഷ്ട്ര വിപണിയിൽ സ്വർണവില 4000 ഡോളറിന് താഴേക്ക് എത്തിയിരിക്കുകയാണ്. അന്താരാഷ്ട്ര വിലയിലെ കയറ്റിറക്കങ്ങളാണ് കേരളത്തിലെയും സ്വർണ വിലയെ സ്വാധീനിക്കാറുള്ളത്. അതേ സമയം, സംസ്ഥാനത്ത് വെള്ളി വിലയും കുറഞ്ഞു. നിലവിൽ വെള്ളി ഗ്രാമിന് 20 രൂപയിലും 10 ഗ്രാമിന് 2,200 രൂപയും എന്ന കണക്കിലാണ് വ്യാപാരം നടക്കുന്നത്.
സംസ്ഥാനത്ത് അതിശക്തമായ മഴ തുടരും: ഒൻപത് ജില്ലകളിൽ ഓറഞ്ച് അലർട്ട്, അഞ്ച് ജില്ലകളിൽ യെല്ലോ അലർട്ട്
തിരുവനന്തപുരം: സംസ്ഥാനത്ത് തിങ്കളാഴ്ച വരെ അതിശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പ്. ഇന്ന് വടക്കൻ കേരളത്തിലും, തെക്കൻ കേരളത്തിലും മഴ ശക്തമാകും. ഒൻപത് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. വടക്കൻ ജില്ലകളായ കാസർകോട്, കണ്ണൂർ, കോഴിക്കോട്, വയനാട്, തെക്കൻ ജില്ലകളായ തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി ജില്ലകളിലുമാണ് ഓറഞ്ച് അലേർട്ട്. മലപ്പുറം, തൃശൂർ, പാലക്കാട്, എറണാകുളം, ആലപ്പുഴ ജില്ലകളിൽ യെല്ലോ അലർട്ടുമുണ്ട്.
സംഘടനാ ദൗര്‍ബല്യങ്ങള്‍ പരിഹരിക്കാന്‍ തിരുത്തല്‍ നടപടിയുമായി സിപിഐയും; ബ്രാഞ്ച്, ലോക്കല്‍ സമ്മേളനങ്ങള്‍ വിളിക്കും
തിരുവനന്തപുരം: സംഘടനാ ദൗര്‍ബല്യങ്ങള്‍ പരിഹരിക്കാന്‍ തിരുത്തല്‍ നടപടിയുമായി സിപിഐയും. പാര്‍ട്ടിയെ ശക്തിപ്പെടുത്താന്‍ ലക്ഷ്യമിട്ട് ബ്രാഞ്ച്, ലോക്കല്‍ സമ്മേളനങ്ങള്‍ വിളിച്ചുചേര്‍ക്കാന്‍ തീരുമാനം. അപൂര്‍വ്വമായാണ് പാര്‍ട്ടി കോണ്‍ഗ്രസിനോട് അനുബന്ധിച്ച അല്ലാതെ സമ്മേളനങ്ങള്‍ വിളിക്കുന്നത്സംഘടനാ കാര്യങ്ങളും പ്രാദേശിക പ്രശ്‌നങ്ങളും ചര്‍ച്ചചെയ്യാനാണ് സമ്മേളനങ്ങള്‍. താഴെതട്ടില്‍ പാര്‍ട്ടിയെ ശക്തിപ്പെടുത്തുകയാണ് ലക്ഷ്യം. ചര്‍ച്ചയില്‍ സാര്‍വദേശീയ വിഷയങ്ങള്‍ വേണ്ടെന്നും തീരുമാനമുണ്ട്. ബ്രാഞ്ച് ലോക്കല്‍ സമ്മേളനങ്ങളില്‍ സംസ്ഥാന നേതാക്കള്‍ പങ്കെടുക്കും.2027 മാര്‍ച്ച് മുതല്‍ മെയ് വരെയാണ് സമ്മേളനങ്ങള്‍.
കിഫ്ബിയെ തകർക്കാൻ ബോധപൂർവമായ നീക്കമെന്ന് സിപിഎം, സർക്കാർ നിലപാടിനെതിരെ ക്യാംപെയ്ൻ തുടങ്ങും
കിഫ്ബിയെ തകർക്കാൻ ബോധപൂർവമായ നീക്കമെന്ന പ്രചാരണവുമായി ക്യാംപെയ്ൻ തുടങ്ങാൻ സിപിഎം. കിഫ്ബിയുടെ നേട്ടം തമസ്കരിക്കാൻ സർക്കാർ ശ്രമമെന്ന് സിപിഎം സംസ്ഥാന സമിതി വിലയിരുത്തി. സർക്കാർ നിലപാടിനെതിരെ പ്രചാരണം ശക്തമാക്കും. പ്രാദേശിക തലത്തിൽ കിഫ്ബിയുടെ നേട്ടങ്ങൾ എണ്ണിപ്പറഞ്ഞ് പ്രചാരണത്തിനാണ് തീരുമാനം. രാഷ്ട്രീയ ഭേദമില്ലാതെ എല്ലാ മണ്ഡലങ്ങളിലും വികസനം എത്തിച്ചത് കിഫ്ബിയാണെന്നും ഇത് ഇല്ലാതാക്കിയാൽ വികസനത്തിന് ഫണ്ട് കണ്ടെത്താൻ ബദലെന്ത് എന്ന് സംസ്ഥാനസർക്കാർ പറയണം എന്നും സിപിഎം സംസ്ഥാന സമിതി ആവശ്യപ്പെട്ടു.രണ്ട് ദിവസം നീളുന്ന സംസ്ഥാന സമിതി യോഗത്തിൻ്റെ ആദ്യ ദിവസം സംസ്ഥാന, ദേശീയ വിഷയങ്ങളാണ് ചർച്ചയ്ക്ക് വന്നത്. അതിൽ തന്നെ ഏറ്റവും പ്രധാനം, കിഫ്ബിയെ തകർക്കാൻ യുഡിഎഫ് സർക്കാർ ബോധപൂർവമായ നീക്കം നടത്തുന്നുവെന്ന് വലിയ വിമർശനമുണ്ടായി. ഇതിനെതിരെ വിപുലമായ ക്യാംപെയ്ൻ സംസ്ഥാന തലത്തിൽ സംഘടിപ്പിക്കാനാണ് സിപിഎമ്മിന്റെ തീരുമാനം. കിഫ്ബിയുടെ നേട്ടങ്ങൾ തമസ്കരിക്കാൻ ബോധപൂർവമായ ശ്രമമാണ് സർക്കാരിൻ്റെ ഭാഗത്തുനിന്ന് ഉണ്ടാകുന്നതെന്ന് സിപിഎം സംസ്ഥാന സമിതി വിലയിരുത്തി. പ്രാദേശിക തലത്തിൽ കിഫ്ബിയുടെ നേട്ടങ്ങൾ എണ്ണിപ്പറഞ്ഞ് പ്രചാരണം നടത്താൻ സിപിഎം തീരുമാനിച്ചു. ക്യാംപെയ്നിൻ്റെ അന്തിമ രൂപം വെള്ളിയാഴ്ചയോടെ ഉണ്ടാകുമെന്നാണ് പ്രതീക്ഷിക്കുന്നത്.
'കെ മുരളീധരന്‍ ചുമതലയേറ്റെടുത്തത് മുതല്‍ പ്രശ്‌നങ്ങള്‍'; സംയുക്ത വാർത്താസമ്മേളനവുമായി മുൻ ആരോഗ്യമന്ത്രിമാർ
തിരുവനന്തപുരം: ആരോഗ്യമന്ത്രി കെ മുരളീധരനെ വിമര്‍ശിച്ച് എല്‍ഡിഎഫ് സര്‍ക്കാരിൽ വകുപ്പ് കൈകാര്യം ചെയ്തിരുന്ന മന്ത്രിമാരായ പി കെ ശ്രീമതി, കെ കെ ശൈലജ, വീണാ ജോര്‍ജ് എന്നിവര്‍. എല്ലാം നിസ്സാരമായി കാണുന്ന ആരോഗ്യമന്ത്രിയാണ് കെ മുരളീധരൻ എന്നും ചുമതലയേറ്റെടുത്തത് മുതല്‍ പ്രശ്‌നങ്ങള്‍ തുടങ്ങിയെന്നും പി കെ ശ്രീമതി വിമർശിച്ചു.കഴിഞ്ഞ പത്ത് വര്‍ഷക്കാലം ആരോഗ്യമേഖല അഭിമാനകരമായ നേട്ടമുണ്ടാക്കി. ഏവര്‍ക്കും അഭിമാനിക്കാന്‍ കഴിയുന്ന തക്ക നേട്ടം കൈവരിക്കാന്‍ കഴിഞ്ഞ കാലഘട്ടമായിരുന്നു അത്. വിമര്‍ശനത്തെ വിദ്വേഷത്തോടു കൂടി നോക്കി കണ്ടിട്ടില്ല. ജനങ്ങളോടുള്ള പ്രതിബദ്ധതയാണ് നിര്‍വഹിച്ചത്. ആശുപത്രിയുടെ സാഹചര്യങ്ങള്‍ കഴിഞ്ഞ വര്‍ഷങ്ങളില്‍ മാറി. അങ്ങനെയായിരുന്നു പ്രവര്‍ത്തനമെന്നും പി കെ ശ്രീമതി പറഞ്ഞു.
ഉയർന്ന തുകയ്ക്ക് വൈദ്യുതി വാങ്ങിയത് എന്തിന്?', വൈദ്യുതി നിരക്ക് വർധിപ്പിക്കാനുള്ള നീക്കം പിൻവലിക്കണമെന്നും കെ കൃഷ്ണൻകുട്ടി
സംസ്ഥാനത്ത് ജനങ്ങളുടെ മേൽ അധിക വൈദ്യുതി ഭാരം അടിച്ചേൽപ്പിക്കാനുള്ള നീക്കത്തിനെതിരെ മുൻ വൈദ്യുതി മന്ത്രി കെ. കൃഷ്ണൻകുട്ടി രൂക്ഷവിമർശനവുമായി രംഗത്തെത്തി. കുറഞ്ഞ നിരക്കിൽ വൈദ്യുതി ലഭ്യമാക്കാൻ നിലവിൽ കരാറുകൾ നിലനിൽക്കുമ്പോൾ, എന്തിനാണ് ഉയർന്ന നിരക്കിൽ വൈദ്യുതി വാങ്ങിയതെന്ന് സർക്കാർ വ്യക്തമാക്കണമെന്ന് അദ്ദേഹം ആവശ്യപ്പെട്ടു. നിലവിലുള്ള കരാർ പ്രകാരമുള്ള വൈദ്യുതി ലഭ്യമാക്കാൻ സർക്കാർ എന്തെല്ലാം നടപടികളാണ് സ്വീകരിച്ചതെന്ന് അറിയാൻ ജനങ്ങൾക്ക് അവകാശമുണ്ടെന്ന് അദ്ദേഹം കൂട്ടിച്ചേർത്തു.യൂണിറ്റിന് 14.50 രൂപ എന്ന വലിയ തുകയ്ക്ക് വൈദ്യുതി വാങ്ങേണ്ട സാഹചര്യം എന്തായിരുന്നുവെന്ന് വ്യക്തമാക്കണമെന്ന് ആവശ്യപ്പെട്ട അദ്ദേഹം, ഈ കരാറിന് റഗുലേറ്ററി കമ്മീഷന്റെ അംഗീകാരം ഉണ്ടോ എന്ന് സർക്കാർ പറയണമെന്നും ആവശ്യപ്പെട്ടു. ഉയർന്ന വിലയ്ക്ക് വൈദ്യുതി വാങ്ങി അതിന്റെ ഭാരം നിരക്ക് വർധനയിലൂടെ ജനങ്ങളുടെ തലയിൽ അടിച്ചേൽപ്പിക്കുന്ന നടപടിയിൽ നിന്ന് സർക്കാർ അടിയന്തരമായി പിന്മാറണം. പകൽ സമയത്ത് വൈദ്യുതി നിരക്ക് കുറയ്ക്കാനുള്ള നടപടികൾ കൈക്കൊള്ളണമെന്ന് അദ്ദേഹം നിർദേശിച്ചു. സർക്കാരിന്റെ വൈദ്യുതി നയത്തിൽ മാറ്റം വരണമെന്ന് ചൂണ്ടിക്കാണിച്ച അദ്ദേഹം, പകൽ സമയത്ത് സുലഭമായി ലഭിക്കുന്ന സൗരോർജ്ജം പാഴാക്കി കളയാതെ സംഭരിച്ചുവെച്ച് രാത്രിയിലെ 'പീക്ക്' സമയങ്ങളിൽ പ്രയോജനപ്പെടുത്തുന്നതിനാണ് ശ്രമിക്കേണ്ടതെന്നും ചൂണ്ടിക്കാട്ടി.
വിഎസിന്റെ പേരിലുള്ള ക്യാമ്പസ് ഉയരണം': സ്മാരകം വൈകുന്നതില്‍ കുടുംബത്തിന് അതൃപ്തി
മുന്‍ മുഖ്യമന്ത്രി വി എസ് അച്ച്യുതാനന്ദന്റെ സ്മാരകം വൈകുന്നതില്‍ കുടുംബത്തിന് അതൃപ്തി. പാര്‍ട്ടിയുടെയും സര്‍ക്കാരിന്റെയും സഹായം വേണമെന്ന് മകന്‍ വി എ അരുണ്‍കുമാര്‍ പറയുന്നു. വലിയ ചുടുകാട്ടിലെ സ്തൂപത്തിന് അപ്പുറം വിശാലമായ ചിന്താഗതി വേണം. വിഎസിന്റെ പേരില്‍ ക്യാമ്പസ് ഉയരണം. വിഎസ് ഫൗണ്ടേഷന്‍ നിര്‍ദേശങ്ങള്‍ പാര്‍ട്ടിക്കും സര്‍ക്കാരിനും സമര്‍പ്പിച്ചിട്ടുണ്ടെന്നും അരുണ്‍ കുമാര്‍ പറഞ്ഞു.വിഎസ് ഉന്നയിച്ച വിഷയങ്ങള്‍ ഇപ്പോഴും പ്രസക്തിയുള്ളതാണ്. ഇത് പുതിയ തലമുറ അറിയുകയും ജനങ്ങള്‍ക്ക് ബോധവല്‍ക്കരണം ഉണ്ടാകുകയും ചെയ്യണം. വിഎസിന്റെ ജീവിതവും എല്ലാവരും അറിയണമെങ്കില്‍ ഇത്തരത്തിലുള്ള വിശാലമായ ആശയങ്ങള്‍ പരിഗണിക്കണമെന്നും കുടുംബം ആവശ്യപ്പെടുന്നു.
തുലാവര്‍ഷം കനക്കുന്നു; തെക്കന്‍ ജില്ലകളില്‍ ശക്തമായ മഴ, അലേര്‍ട്ട് ഏഴ് ജില്ലകളില്‍
സംസ്ഥാനത്ത് തുലാവര്‍ഷം കനക്കുന്നു. ഇന്ന് തെക്കന്‍ ജില്ലകളില്‍ മഴ ശക്തമാകുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ഏഴ് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. എറണാകുളം, ഇടുക്കി, കോട്ടയം, ആലപ്പുഴ, പത്തനംതിട്ട, കൊല്ലം, തിരുവനന്തപുരം ജില്ലകളിലാണ് യെല്ലോ അലര്‍ട്ട് നല്‍കിയിരിക്കുന്നത്.
ബാര്‍ സമയം കുറയ്ക്കും,ഹോര്‍ട്ടി വൈനുകള്‍ക്ക് പ്രത്യേക പാര്‍ലറുകള്‍; മദ്യനയം അടിമുടി പരിഷ്‌കരിക്കാന്‍ സര്‍ക്കാർ
സംസ്ഥാനത്തെ മദ്യനയം അടിമുടി പരിഷ്‌കരിക്കാന്‍ സര്‍ക്കാര്‍. ബാര്‍ ലൈസന്‍സുകള്‍ക്ക് നിയന്ത്രണം ഏര്‍പ്പെടുത്തിയേക്കും എന്നാണ് വിവരം. ലൈസന്‍സ് ഫീസ് വര്‍ദ്ധിപ്പിക്കുന്നതും പരിഗണനയില്‍ ഉണ്ട്. ബാര്‍ പ്രവര്‍ത്തന സമയം കുറയ്ക്കാനും ബാറുകളില്‍ പരിശോധനകള്‍ ശക്തമാക്കാനും നടപടി ഉണ്ടാകുമെന്നാണ് റിപ്പോര്‍ട്ട്. വിവാദങ്ങള്‍ക്കിടെ മദ്യനയത്തിന്റെ ഭാഗമായി ഹോര്‍ട്ടി വൈന്‍ വില്‍പ്പനയ്ക്ക് പ്രത്യേക പാര്‍ലറുകള്‍ തുടങ്ങിയേക്കും. സഹകരണ സ്ഥാപനങ്ങളുടെ നേതൃത്വത്തില്‍ പാര്‍ലറുകള്‍ തുടങ്ങാനാണ് ആലോചന. വീര്യം കുറഞ്ഞ മദ്യത്തിന് വില്‍പന അവകാശം നല്‍കുന്നതിലും തീരുമാനം ഉണ്ടാകും. കരട് മദ്യനയം നവംബര്‍ ആദ്യവാരം മുഖ്യമന്ത്രിക്ക് കൈമാറാനാണ് നീക്കം. മദ്യനയത്തിന്റെ കരട് യുഡിഎഫ് ചര്‍ച്ച ചെയ്തതിന് ശേഷമാകും അന്തിമ തീരുമാനം ഉണ്ടാകുക.
