general
ശ്രുതി ഇനി സന്ദീപിന് സ്വന്തം
മുണ്ടക്കൈ ഉരുൾപൊട്ടൽ ദുരന്തത്തിൽ കുടുംബത്തെ നഷ്‌ടമായ ശ്രുതി വിവാഹിതയായി. ഇന്ന് രാവിലെ ഗുരുവായൂർ ക്ഷേത്രത്തിൽ വച്ചായിരുന്നു വിവാഹം. വയനാട് കളക്‌ടറേറ്റിലെ ജീവനക്കാരനും മാനന്തവാടി സ്വദേശിയുമായ സന്ദീപാണ് വരൻ. മുൻ മന്ത്രി കെ രാജനാണ് ശ്രുതിയുടെ രക്ഷിതാവിന്റെ സ്ഥാനത്ത് നിന്ന് വിവാഹച്ചടങ്ങിൽ പങ്കെടുത്തത്. 2026 ജൂലായിൽ ശ്രുതിയുടെയും സന്ദീപിന്റെയും വിവാഹനിശ്ചയം നടന്നിരുന്നു.എല്ലാം അറിഞ്ഞ് കൈപിടിച്ചയാളാണ് സന്ദീപ്. സന്തോഷത്തോടെ ജീവിക്കാൻ കഴിയണമെന്നാണ് പ്രാർത്ഥനയെന്ന് ശ്രുതി വിവാഹശേഷം പറഞ്ഞു. സന്തോഷത്തോടെ ജീവിതത്തിലേക്ക് കടക്കുന്നുവെന്നും എല്ലാവർക്കും നന്ദിയുണ്ടെന്നും സന്ദീപും പറഞ്ഞു. വയനാട് ദുരന്തത്തിൽ സ്വന്തം കുടുംബത്തിലെ ഒമ്പത് അംഗങ്ങളെയാണ് ശ്രുതിക്ക് നഷ്‌ടപ്പെട്ടത്. പിന്നാലെ പ്രതിശ്രുത വരനും വാഹനാപകടത്തിൽ മരിച്ചിരുന്നു. വാഹനാപകടത്തിൽ ശ്രുതിക്കും ഗുരുതര പരിക്കേറ്റിരുന്നു. പിന്നീട് ശ്രുതിക്ക് സർക്കാർ ജോലി നൽകിയിരുന്നു.
'നോ കീസ് ഫോര്‍ കിഡ്സ് ' കാമ്പയിനുമായി മോട്ടോര്‍ വാഹന വകുപ്പ്
പ്രായപൂർ ത്തിയാകാത്ത കുട്ടികൾ വാഹനമോടിച്ചുണ്ടാകുന്ന അപകടങ്ങൾ തുടർക്കഥയായതോടെ "നോ കീസ് ഫോർ കിഡ്സ് " കാമ്പയിനുമായി മോട്ടോർ വാഹന വകുപ്പ്. സംസ്ഥാനത്തുടനീളം ബോധവത്കരണ കാമ്പയിൻ നടത്താനാണു തീരുമാനം.കാമ്പയിന്റെ ഭാഗമായി ജില്ലാ കലോത്സവ വേദികളിൽ ഉൾപ്പെടെ ഇതുമായി ബന്ധപ്പെട്ട ക്ലാസുകളും ക്വിസ് മത്സരങ്ങളും സംഘടിപ്പിക്കും. കുട്ടികൾക്കു വാഹനത്തിന്റെ താക്കോലല്ല സുരക്ഷിതമായ നാളേക്കുള്ള അറിവാണു കൈമാറേണ്ടതെന്നും ഒരു നിമിഷത്തെ അശ്രദ്ധ ഒരു ജീവിതകാലത്തെ നഷ്ടമാകരുതെന്നും ഉദ്യോഗസ്ഥർ ഓർമിപ്പിക്കുന്നു. കുട്ടികൾക്കു വാഹനങ്ങളുടെ താക്കോൽ കൊടുക്കുന്നത് വലിയ അപകടത്തിലേക്കു നയിക്കുമെന്നും മാതാപിതാക്കൾ കേസിൽ പ്രതികളാകുന്ന സാഹചര്യമുണ്ടാകുമെന്നും ഉദ്യോഗസ്ഥർ ചൂണ്ടിക്കാട്ടുന്നു.സമീപകാലത്തായി ഇത്തരം സംഭവങ്ങൾ ഏറിവരികയാണെന്നും പ്രായപൂർത്തിയാകാത്ത മക്കൾ വാഹനം ഉപയോഗിക്കുന്നതിന്റെ പൂർണ ഉത്തരവാദിത്തം വാഹന ഉടമയ്ക്കാണെന്നും അധികൃതർ ചൂണ്ടിക്കാട്ടി.
ടൂറിസം മേഖലയിലെ സുഗമമായ പ്രവർത്തനങ്ങൾക്ക് പ്രത്യേക സമിതി ജില്ലാ വികസന സമിതി യോഗം ചേർന്നു
ജില്ലയിലെ ടൂറിസം മേഖലയുടെ സുഗമവും ശാസ്ത്രീയവുമായ പ്രവർത്തനങ്ങൾ പരിശോധിക്കാൻ എ.ഡി.എമിന്റെ അധ്യക്ഷതയിൽ പ്രത്യേക സമിതി രൂപീകരിക്കാൻ ജില്ലാ വികസന സമിതി യോഗത്തിൽ തീരുമാനമായി. ടൗൺ പ്ലാനർ കൺവീനറും തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ, ടൂറിസം ഡെപ്യൂട്ടി ഡയക്ടർ, ഡി.ടി.പി.സി സെക്രട്ടറി, ടൂറിസം മേഖലയുമായി ബന്ധപ്പെട്ട് പ്രവർത്തിക്കുന്നവർ സമിതിയിൽ അംഗങ്ങളായിരിക്കുമെന്ന് ജില്ലാ കളക്ടർ വി. ചെൽസാസിനി അറിയിച്ചു. സുൽത്താൻബത്തേരി - പെരിക്കല്ലൂർ, മുള്ളൻകൊല്ലി - മരക്കടവ്, റോഡുകളുടെ നിർമ്മാണം പൂർത്തിയാകാത്തതിൽ പൊതുജനങ്ങൾ നേരിടുന്ന പ്രതിസന്ധിയ്ക്ക് ശാശ്വത പരിഹാരം ഉണ്ടാവണമെന്ന് എം.പിയുടെ പ്രതിനിധി കെ.എൽ പൗലോസ് യോഗത്തിൽ ആവശ്യപ്പെട്ടു. കൈനാട്ടി ട്രാഫിക് സിഗ്നലുകളുടെ അപാകതകൾ പരിഹരിച്ച് പൂർണ്ണതോതിൽ പ്രവർത്തന സജ്ജമാക്കണമെന്ന് കൃഷി വകുപ്പ് മന്ത്രിയുടെ പ്രതിനിധി വി.എ മജീദ് യോഗത്തിൽ ആവശ്യപ്പെട്ടു. പുഴയുടെയും തോടുകളുടെയും ഓരങ്ങളിൽ നിർമിച്ച വീടുകളുടെ സുരക്ഷയ്ക്കായി സംരക്ഷണ ഭിത്തികൾ നിർമ്മിക്കണമെന്നും എം.എൽ.എ ഫണ്ട് ഉപയോഗിച്ച് വന മേഖലയിൽ നിർമിക്കുന്ന ഫെൻസിങ് പ്രവൃത്തികൾ സമയ ബന്ധിതമായി നടപ്പിലാക്കണമെന്നും അദ്ദേഹം പറഞ്ഞു. പട്ടികവർഗ വികസന വകുപ്പ് ജില്ലാ തലത്തിൽ ടി.ആർ.ഡി.എം മിഷൻ പ്രകാരം സ്ഥലം വാങ്ങി പൂർത്തീകരിച്ച് വീടും അടിസ്ഥാന സൗകര്യങ്ങളും നൽകിയിട്ടും പല വീടുകളിലും ആളുകൾ താമസിക്കാത്ത സാഹചര്യം ചർച്ച ചെയ്യുന്നതിന് ജനപ്രതിനിധികളെ പങ്കെടുപ്പിച്ച് യോഗം ചേരാൻ ജില്ലാ വികസന സമിതി യോഗത്തിൽ തീരുമാനിച്ചു. ജില്ലാ കളക്ടർ വി. ചെൽസാസിനിയുടെ അധ്യക്ഷതയിൽ ആസൂത്രണ ഭവനിലെ എ.പി.ജെ ഹാളിൽ ചേർന്ന യോഗത്തിൽ എ.ഡി.എം കെ. അജീഷ്, ജില്ലാ പ്ലാനിങ് ഓഫീസർ എം. കമാലുദ്ദീൻ, ജില്ലാതല ഉദ്യോഗസ്ഥർ, ജനപ്രതിനിധികൾ തുടങ്ങിയവർ പങ്കെടുത്തു.
ട്രാക്ക് മുറിച്ച് കടക്കുന്നത് ക്രിമിനൽ കുറ്റം; അപകടം സംഭവിച്ചാൽ നഷ്ടപരിഹാരം നൽകേണ്ടതില്ലെന്ന് ട്രൈബ്യൂണൽ
ട്രാക്ക് മുറിച്ച് കടക്കുന്നതിനിടെ ട്രെയിന്‍ തട്ടിയുണ്ടാകുന്ന അപകടത്തില്‍ നഷ്ടപരിഹാരം നല്‍കാനാകില്ലെന്ന് എറണാകുളം റെയില്‍വെ ക്ലെയിംസ് ട്രൈബ്യൂണല്‍. റെയില്‍വെ ട്രാക്ക് മുറിച്ച് കടക്കുന്നത് ക്രിമിനല്‍ കുറ്റമാണ്. അതുകൊണ്ടുതന്നെ ട്രാക്ക് മുറിച്ച് കടക്കുമ്പോഴുണ്ടാകുന്ന അപകടങ്ങളില്‍ നഷ്ടപരിഹാരം നല്‍കാന്‍ കഴിയില്ലെന്നും റെയില്‍വെ ക്ലെയിംസ് ട്രൈബ്യൂണല്‍ പറഞ്ഞു. മാവേലിക്കര റെയില്‍വെ സ്റ്റേഷനില്‍ ട്രാക്ക് മുറിച്ച് കടക്കുന്നതിനിടെ ട്രെയിന്‍ തട്ടി പരിക്കേറ്റ ചങ്ങനാശ്ശേരി സ്വദേശി തോമസ് ജോണിന്റെ അപേക്ഷ തള്ളിയാണ് ട്രൈബ്യൂണല്‍ ഉത്തരവിട്ടത്.കൊല്ലം-എറണാകുളം മെമുവില്‍ യാത്ര ചെയ്യുന്നതിനിടെ ട്രെയിനില്‍ നിന്ന് വീണ് പരിക്ക് പറ്റിയെന്നും നഷ്ടപരിഹാരം വേണമെന്നും പറഞ്ഞായിരുന്നു തോമസ് ട്രൈബ്യൂണലിനെ സമീപിച്ചത്. അപകടത്തെ തുടര്‍ന്ന് കോട്ടയം മെഡിക്കല്‍ കോളേജ് ആശുപത്രിയില്‍ ദീര്‍ഘനാള്‍ ചികിത്സ തേടിയെന്നും പത്ത് ലക്ഷം രൂപ നഷ്ടപരിഹാരം നല്‍കണമെന്നുമായിരുന്നു തോമസിന്റെ ആവശ്യം. എന്നാല്‍ തെളിവുകള്‍ സഹിതം തോമസിന്റെ വാദം റെയില്‍വെ തള്ളി.
ഡോക്ടർക്കും ക്ലിനിക്കിനും ആശുപത്രിക്കും രജിസ്ട്രേഷൻ ഇല്ല, ഗുരുതര അനാസ്ഥ; ശസ്ത്രക്രിയയ്ക്ക് പിന്നാലെ 17-കാരൻ മരിച്ച സംഭവത്തിൽ നിർണായക കണ്ടെത്തൽ
തൊണ്ടയിലെ ശസ്ത്രക്രിയയ്ക്ക് പിന്നാലെ കണ്ണൂരിൽ 17-കാരൻ മരിച്ച സംഭവത്തിൽ മനുഷ്യാവകാശ കമ്മീഷൻ നടത്തിയ അന്വേഷണത്തിൽ കണ്ടത്തിയത് ഞെട്ടിക്കുന്ന വിവരങ്ങൾ. ചികിത്സയിലെ ഗുരുതര അനാസ്ഥയാണ് മരണകാരണമെന്നും ശസ്ത്രക്രിയ നടത്തിയ ഡോക്ടർക്കും ക്ലിനിക്കിനും രജിസ്ട്രേഷൻ ഉണ്ടായിരുന്നില്ലെന്നുമാണ് മനുഷ്യാവകാശ കമ്മീഷന്റെ അന്വേഷണത്തിൽ കണ്ടെത്തിയത്. പിഴവില്ലെന്ന റിപ്പോർട്ട് നൽകി അവസാനിപ്പിച്ച കേസിൽ ഡിഎഒയോ പൊലീസോ ഡോക്ടർക്ക് രജിസ്ട്രേഷൻ ഉണ്ടായിരുന്നോ എന്നതുപോലും അന്വേഷിച്ചില്ലെന്നും കമ്മീഷൻ ചൂണ്ടിക്കാട്ടി. സംഭവത്തിൽ തുടരന്വേഷണം നടത്താനും മനുഷ്യാവകാശ കമ്മീഷൻ ഉത്തരവിട്ടിട്ടുണ്ട്.2024 ജൂലായിലാണ് തൊണ്ടയുടെ ശസ്ത്രക്രിയയ്ക്ക് വിധേയനായതിന് പിന്നാലെ കണ്ണൂർ സ്വദേശിയായ സൂര്യജിത്ത്(17) മരിച്ചത്. കണ്ണൂരിലെ പ്രിയ ഇഎൻടി ക്ലിനിക്കിലാണ് കുട്ടി ശസ്ത്രക്രിയയ്ക്ക് വിധേയനായത്. രണ്ടാംനാൾ രക്തം ഛർദിച്ച് അവശനിലയിലായി. തുടർന്ന് മറ്റൊരു സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരണം സംഭവിക്കുകയായിരുന്നു.ശസ്ത്രക്രിയയിൽ പിഴവ് സംഭവിച്ചെന്നും ആരോഗ്യനില ഗുരുതരമായിട്ടും സ്വകാര്യ ആശുപത്രിയിൽ മതിയായ ചികിത്സ ലഭിച്ചില്ലെന്നും ആരോപിച്ച് സൂര്യജിത്തിന്റെ കുടുംബം പരാതി നൽകിയിരുന്നു. സംഭവത്തിൽ രണ്ട് അന്വേഷണങ്ങളും നടന്നു. കുട്ടിക്ക് അടിയന്തര ചികിത്സ നൽകുന്നതിൽ വീഴ്ചയുണ്ടായെന്നായിരുന്നു ഡിഎംഒ നടത്തിയ ആദ്യ അന്വേഷണത്തിലെ റിപ്പോർട്ട്. എന്നാൽ, ഇതേ ഡിഎംഒ ഉൾപ്പെട്ട മെഡിക്കൽ ബോർഡ് നടത്തിയ അന്വേഷണത്തിൽ ഡോക്ടർക്കോ ചികിത്സ നൽകുന്നതിലോ വീഴ്ചയില്ലെന്നും റിപ്പോർട്ട് നൽകി. ഈ റിപ്പോർട്ട് പൊലീസിന് കൈമാറിയതോടെ കേസും അവസാനിപ്പിച്ചു. ഇതോടെയാണ് കുട്ടിയുടെ കുടുംബം മനുഷ്യാവകാശ കമ്മീഷന് പരാതി നൽകിയത്.
വോട്ട് ചോരി മാത്രമല്ല, ഇത് അവകാശങ്ങൾ മോഷ്ടിക്കലാണ്; ആനുകൂല്യങ്ങൾക്ക് വോട്ടർ ഐഡി നിർബന്ധമാക്കുന്നതില്‍ രാഹുല്‍
ന്യൂദല്‍ഹി: സര്‍ക്കാരിന്റെ ക്ഷേമപദ്ധതികളുടെ ആനുകൂല്യങ്ങള്‍ ലഭിക്കുന്നതിനായി വോട്ടര്‍ ഐഡി കാര്‍ഡ് നിര്‍ബന്ധമാക്കാനാണ് ബിജെപി സര്‍ക്കാര്‍ ശ്രമിക്കുന്നതകെന്ന ആരോപണവുമായി കോണ്‍ഗ്രസ് നേതാവ് രാഹുല്‍ ഗാന്ധി. എസ്‌ഐആര്‍ നടപടിക്കൊപ്പം ഇത്തരമൊരു നീക്കം നടപ്പാക്കുന്നത് ലക്ഷണക്കണക്കിന് ആളുകളുടെ അവകാശങ്ങള്‍ നിഷേധിക്കപ്പെടാന്‍ കാരണമാകുമെന്നും അദ്ദേഹം പറഞ്ഞു. ഇത് കേവലം വോട്ട് ചോരി മാത്രമല്ല, അവകാശങ്ങള്‍ കവര്‍ന്നെടുക്കലാണെന്നും ലോക്‌സഭാ പ്രതിപക്ഷ നേതാവ് ആരോപിച്ചു.ക്ഷേമപദ്ധതികളുടെ ആനുകൂല്യം ലഭിക്കുന്നതിനായി ആധാര്‍ കാര്‍ഡിന് പകരം വോട്ടര്‍ ഐഡി തിരിച്ചറിയല്‍ രേഖയാക്കാന്‍ ഒരുങ്ങുന്നുവെന്ന കേന്ദ്ര പഞ്ചായത്തീരാജ് മന്ത്രി രാജീവ് രഞ്ജന്‍ സിങ്ങിന്റെ വീഡിയോ പങ്കുവെച്ചുകൊണ്ടായിരുന്നു കോണ്‍ഗ്രസ് നേതാവിന്റെ വിമര്‍ശനം.
സന്ദീപിന്റെ കൈപിടിച്ച് ശ്രുതി പുതു ജീവിതത്തിലേക്ക്
മുണ്ടക്കൈ ഉരുൾ ദുരന്തത്തിലെ അതിജീവിത ശ്രുതി നാളെ സുമംഗലിയാകും. വയനാട് കലക്ട്രേറ്റിലെ ജീവനക്കാരൻ സന്ദീപാണ് വരൻ
സംസ്ഥാന മുസാബഖ ഡിസം: 4, 5, 6 ബീനാച്ചിയിൽ ; വരവേൽക്കാൻ വയനാട് ഒരുങ്ങുന്നു
ഏഷ്യയിലെ ഏറ്റവും വലിയ ഇസ് ലാമിക് കലാമേളയായ സമസ്ത കേരളാ ജംഇയ്യത്തുൽ മുഅല്ലിമീൻ സെൻട്രൽ കൗൺസിലിൻ്റെ 18-ാമത് മുസാബഖ ഡിസം: 4, 5, 6 തീയതികളിൽ ബീനാച്ചി നൂറുൽ ഇസ് ലാം തഹ് ഫീളുൽ ഖുർആൻ കോളേജിൽ നടക്കും. ഇദം പ്രഥമമായി വയനാട്ടിലെത്തുന്ന മുസാബഖയെ വരവേൽക്കാൻ വയനാട് ഒരുക്കങ്ങൾ ആരംഭിച്ചു. സംഘാടക സമിതി രൂപീകരണത്തിനായി ബീനാച്ചി മദ്റസയിൽ ചേർന്ന ജില്ലയിലെ സമസ്തയുടെയും പോഷക ഘടകങ്ങളുടെയും ജില്ലാ- താലൂക്ക്- റെയ്ഞ്ച് ഭാരവാഹികളുടെയും വിപുലമായ കൺവെൻഷൻ സെൻട്രൽ കൗൺസിൽ സംസ്ഥാന സെക്രട്ടറി കൊടക് അബ്ദുറഹ് മാൻ മുസ് ലിയാർ ഉദ്ഘാടനം ചെയ്തു. എസ് കെ ജെ എം ജില്ലാ പ്രസിഡണ്ട് കെ.വി. എസ് തങ്ങൾ അദ്ധ്യക്ഷനായി. സെൻട്രൽ കൗൺസിൽ ട്രഷറർ അബ്ദുൽ ഖാദർ അൽ ഖാസിമി മുഖപ്രഭാഷണം നിർവഹിച്ചു. സ്റ്റേറ്റ് സെക്രട്ടറി കെ.ടി ഹുസൈൻ കുട്ടി മൗലവി പദ്ധതി അവതരിപ്പിച്ചു. സെൻട്രൽ കൗൺസിൽ ഭാരവാഹികളായ ടി കെ മുഹമ്മദ് കുട്ടി ഫൈസി പട്ടാമ്പി, സി. മുഹമ്മദലി ഫൈസി കോട്ടോപ്പാടം, സിദ്ദീഖ് ഫൈസി വെൺമണൽ , മാനേജർ ഉസ്മാൻ ഫൈസി ഇന്ത്യനൂർ, ജില്ലാ നേതാക്കളായ എം. ഹസൻ മുസ് ലിയാർ , ഇബ്റാഹിം ഫൈസി വാളാട് , അശ്‌റഫ് ഫൈസി പനമരം, സൈനുൽ ആബിദ് ദാരിമി, പി. സുബൈർ കണിയാമ്പറ്റ, അയ്യൂബ് മുട്ടിൽ , മുഹ്‌യിദ്ദീൻ കുട്ടി യമാനി പന്തിപ്പൊയിൽ , അബ്ബാസ് വാഫി ചെന്ദലോട് , സ്വാദിഖുൽ അമീൻ ഫൈസി, കെ.ഉമർ ഫൈസി ബീനാച്ചി മഹല്ല് പ്രസിഡണ്ട് കെ.കെ ബശീർ , ഖത്തീബ് ഡി. എച്ച് അലി ദാരിമി , തഹ്ഫീളുൽ ഖുർആൻ കോളേജ് പ്രിൻസിപ്പാൾ മുബാറകലി മിസ്ബാഹി , അബ്ദുൽ മജീദ് അൻസ്വരി, അബ്ദുറസാഖ് ദാരിമി സംസാരിച്ചു. ജില്ലാ സെക്രട്ടറി ഹാരിസ് ബാഖവി കമ്പളക്കാട് സ്വാഗതവും ബീനാച്ചി മഹല്ല് സെക്രട്ടറി യു.എ മുഹമ്മദലി നന്ദിയും പറഞ്ഞു .
സഹപ്രവർത്തകൻ്റെ കുടുംബത്തെ ചേർത്തുപിടിച്ച് ജംഇയ്യത്തുൽ മുഅല്ലിമീൻ
എസഹപ്രവർത്തകൻ്റെ കുടുംബത്തെ ചേർത്തുപിടിച്ച് ജംഇയ്യത്തുൽ മുഅല്ലിമീൻസ്.കെ.ജെ.എം ജില്ലാ കമ്മിറ്റിയുടെ തവാറുസ് ഫണ്ട് കൈമാറി.സേവനത്തിലിരിക്കെ മരണപ്പെടുന്ന മുഅല്ലിമിൻ്റെ കുടുംബത്തിനെ ചേർത്ത്പിടിക്കുകയെന്ന ബാധ്യതാ നിർവഹണത്തിനായി ജില്ലാ ജംഇയ്യത്തുൽ മുഅല്ലിമീൻ രണ്ട് വർഷം മുമ്പ് രൂപംനൽകിയതാണ് തവാറുസ് പദ്ധതി. അമ്പതിനായിരം രൂപയാണ് ജില്ലാ ജംഇയ്യത്തുൽ മുഅല്ലിമീൻ നൽകുന്നത്. ജില്ലാ പ്രസിഡണ്ട് കെ. വി എസ് ഇമ്പിച്ചിക്കോയ തങ്ങൾ, സെക്രട്ടറി ഹാരിസ് ബാഖവി , ട്രഷറർ സൈനുൽ ആബിദ് ദാരിമി, വൈസ് പ്രസിഡണ്ടുമാരായ അശ്‌റഫ് ഫൈസി പനമരം , അബ്ദുള്ളക്കുട്ടി ദാരിമി തുടങ്ങിയവർകഴിഞ്ഞയാഴ്ച മരണപ്പെട്ട പൊഴുതന ആറാം മൈലിലെ മുഅല്ലിമിൻ്റെ വീട്ടിലെത്തി കുടുംബാംഗങ്ങളെആശ്വസിപ്പിക്കുകയും തവാറുസ് ഫണ്ട് കൈ മാറുകയും ചെയ്തു. ടി കെ അബൂബക്കർ മൗലവി , വി.പി ഇബ്റാഹിം ഫൈസി സംബന്ധിച്ചു.
നെല്ലിയമ്പം ജി.എൽ.പി. സ്കൂളിൽ ലഹരി വിരുദ്ധ ബോധവൽക്കരണ സെമിനാർ സംഘടിപ്പിച്ചു
ലഹരിയുടെ വിപത്തിനെതിരെ സമൂഹത്തെ ബോധവൽക്കരിക്കുക എന്ന ലക്ഷ്യത്തോടെ ജി.എൽ.പി.സ്കൂൾ നെല്ലിയമ്പത്തിൽ രക്ഷിതാക്കൾക്കായി "മയങ്ങില്ല കേരളം;ഹരമല്ല ലഹരി" എന്ന പേരിൽ ബോധവൽക്കരണ സെമിനാർ സംഘടിപ്പിച്ചു. വിമുക്തി മിഷൻ, വൈത്തിരി താലൂക്ക് ലീഗൽ സർവീസസ് അതോറിറ്റി,വയനാട് ഡിസ്‌ട്രിക്റ്റ് ലീഗൽ സർവീസസ് അതോറിറ്റി എന്നിവയുടെ സംയുക്ത സഹകരണത്തോടെയാണ് പരിപാടി നടത്തിയത്. ലഹരി വിരുദ്ധ ബോധവൽക്കരണം, കുട്ടികളോട് മാതാപിതാക്കൾ പുലർത്തേണ്ട സമീപനങ്ങൾ എന്നീ വിഷയങ്ങളെ ആസ്പദമാക്കി എക്സൈസ് വിമുക്തി മിഷൻ വയനാട് ജില്ലാ കോർഡിനേറ്റർ എൻ.സി.സജിത്ത്കുമാർ അച്ചൂരാനം ക്ലാസെടുത്തു. വാർഡ് മെമ്പർ എം.കെ.സുചിത്ര ഉദ്ഘാടനം നിർവ്വഹിച്ചു. പി.ടി.എ.പ്രസിഡൻ്റ് എ.സബ്ന അദ്ധ്യക്ഷത വഹിച്ച യോഗത്തിൽ സ്കൂൾ ഹെഡ്മിസ്ട്രസ് കെ.ജി.ഷൈലജ സ്വാഗതം ആശംസിച്ചു.എസ്.എം.സി.അംഗം റസാഖ് ചക്കര, ചെയർമാൻ ഷഫീന, വൈത്തിരി താലൂക്ക് പി.എൽ.വി.മുംതാസ്.സി, എം.പി.ടി.എ.പ്രസിഡൻ്റ് പി.ജാസ്മിൻ,പി.ടി.എ. വൈസ് പ്രസിഡൻ്റ് കെ.എം.ഇസ്മായിൽ, അബ്‌ദുൾ സലാം,വിജി ജോസഫ് എന്നിവർ സംസാരിച്ചു. എസ്.ആർ.ജി. കൺവീനർ ശ്രീജ സൈമൺ ചടങ്ങിന് നന്ദി രേഖപ്പെടുത്തി.
അമ്പലവയൽ സ്കൂളിൽ ലഹരി വിരുദ്ധ ബോധവൽക്കരണ സെമിനാർ സംഘടിപ്പിച്ചു
യുവതലമുറയെ കാർന്നുതിന്നുന്ന ലഹരിക്കെതിരെ കരുത്തുറ്റ പ്രതിരോധം തീർക്കാൻ വിദ്യാർത്ഥികൾ ഒന്നിക്കണമെന്ന ആഹ്വാനവുമായി അമ്പലവയൽ ജി.വി.എച്ച്.എസ്.എസിൽ ലഹരി വിരുദ്ധ ബോധവൽക്കരണ സെമിനാർ സംഘടിപ്പിച്ചു. സ്കൂളിലെ ആന്റി നാർക്കോട്ടിക് ക്ലബ്ബ്, ടീൻസ് ക്ലബ്ബ് എന്നിവയുടെ സംയുക്ത ആഭിമുഖ്യത്തിൽ 'ജീവിതമാണ് ലഹരി' എന്ന മുഖ്യ പ്രമേയത്തിലായിരുന്നു പരിപാടി.സ്കൂൾ ഹെഡ്മിസ്ട്രസ് പി. ഒ.സുമിത ഉദ്ഘാടനം നിർവഹിച്ച ചടങ്ങിൽ സീനിയർ അസിസ്റ്റന്റ് ഷാന്റി ഫ്രാൻസിസ് അധ്യക്ഷത വഹിച്ചു. വിമുക്തി മിഷൻ ജില്ലാ കോർഡിനേറ്റർ എൻ.സി.സജിത്ത്കുമാർ അച്ചൂരാനം മുഖ്യപ്രഭാഷണവും ബോധവൽക്കരണ ക്ലാസും നയിച്ചു.തെറ്റായ ലഹരികളിലേക്ക് വഴിമാറാതെ, ജീവിതത്തിലെ സർഗ്ഗാത്മകതയും വലിയ സ്വപ്നങ്ങളുമാണ് യഥാർത്ഥ ലഹരിയാക്കേണ്ടതെന്ന് അദ്ദേഹം ഓർമ്മിപ്പിച്ചു. ലഹരി മാഫിയകളുടെ കെണികളിൽ വീഴാതിരിക്കാനുള്ള ജാഗ്രതയെക്കുറിച്ചും നിയമവശങ്ങളെക്കുറിച്ചും വിദ്യാർത്ഥികൾക്ക് വിശദമായ മാർഗ്ഗനിർദ്ദേശങ്ങൾ നൽകി.ലഹരിമുക്ത ക്യാമ്പസ് ലക്ഷ്യമിട്ട് വിദ്യാർത്ഥികൾ ചടങ്ങിൽ പ്രതിജ്ഞയെടുത്തു. സ്റ്റാഫ് സെക്രട്ടറി സി.ഷമീറ,എസ്.ആർ.ജി. കൺവീനർമാരായ കെ. എസ്.സജിത,ടി.പി. അജീഷ് കുമാർ,ക്ലബ്ബ് പ്രതിനിധികളായ ഏബൽ ചെറിയാൻ,അലോണ റെജി എന്നിവർ ആശംസകൾ നേർന്നു. ടീൻസ് ക്ലബ്ബ് കൺവീനർ ടി.ഇ.ഹെലന സ്വാഗതവും ആന്റി നാർക്കോട്ടിക് ക്ലബ്ബ് കൺവീനർ കെ. എം.രഘു നന്ദിയും രേഖപ്പെടുത്തി.
വനിതാ സംരംഭകരുടെ ഉത്പന്നങ്ങള്‍ക്ക് വിപണന സൗകര്യം ഉറപ്പാക്കും: മന്ത്രി ബിന്ദു കൃഷ്ണ വനിതാ വിപണന കേന്ദ്രം മന്ത്രി ഉദ്ഘാടനം ചെയ്തു
വനിതാ സംരംഭകരുടെ ഉത്പന്നങ്ങള്‍ക്ക് വിപണന സൗകര്യം ഉറപ്പാക്കുമെന്ന് വനിതാ-ശിശുവികസന വകുപ്പ് മന്ത്രി ബിന്ദു കൃഷ്ണ. കര്‍ഷകര്‍-സംരംഭകര്‍ എന്നിവരുടെ ഉത്പന്നങ്ങള്‍ക്ക് കൃത്യമായ വിപണന സൗകര്യം ഉറപ്പാക്കുക ലക്ഷ്യമിട്ട് മാനന്തവാടി ബ്ലോക്ക് പഞ്ചായത്ത് ജനകീയാസൂത്രണ പദ്ധതിയിലുള്‍പ്പെടുത്തി നിര്‍മിച്ച വനിതാ വിപണന കേന്ദ്രത്തിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി. കാര്‍ഷിക പ്രാധാന്യവുമുള്ള വയനാട്ടിലെ ജനങ്ങളുടെ ക്ഷേമത്തിനും അതിജീവനത്തിനും ഊന്നല്‍ നല്‍കുന്ന പദ്ധതികള്‍ നടപ്പാക്കാന്‍ സര്‍ക്കാര്‍ പ്രതിജ്ഞാബദ്ധമാണെന്നും മന്ത്രി പറഞ്ഞു. മാനന്തവാടി ബ്ലോക്ക്പഞ്ചായത്ത് പരിസരത്ത് നിര്‍മിച്ച ടേക്ക് എ ബ്രേക്ക് കെട്ടിടം ബ്ലോക്ക് പഞ്ചായത്ത് പ്രസിഡന്റ് മീനാക്ഷി രാമന്‍ ഉദ്ഘാടനം ചെയ്തു. മാനന്തവാടി ബ്ലോക്ക്പഞ്ചായത്ത് പ്രസിഡന്റ് അധ്യക്ഷയായ പരിപാടിയില്‍ തദ്ദേശ സ്വയംഭരണ വകുപ്പ് ജോയിന്റ് ഡയറക്ടര്‍ പി.സി മജീദ്, മാനന്തവാടി നഗരസഭാ വൈസ് ചെയര്‍പേഴ്സണ്‍ സിന്ധു സെബാസ്റ്റ്യന്‍, തവിഞ്ഞാല്‍-വെള്ളമുണ്ട-തൊണ്ടര്‍നാട് ഗ്രാമപഞ്ചായത്ത് അധ്യക്ഷന്മാരായ എം.ജി ബിജു, ഖമര്‍ ലൈല, പ്രമോദ് മാസ്റ്റര്‍, ബ്ലോക്ക് പഞ്ചായത്ത് വൈസ് പ്രസിഡന്റ് സി.പി മൊയ്തീന്‍ ഹാജി, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷരായ ഒ.ടി മുഹമ്മദ് ഉനൈസ്, ചിന്നമ്മ ജോസ്, ആസ്യ മൊയ്തു, ജില്ലാ പഞ്ചായത്ത് അംഗങ്ങളായ ജില്‍സണ്‍ തൂപ്പുംകര, ലിയി ജോസ്, ആസൂത്രണ സമിതി ഉപാധ്യക്ഷന്‍ എ പ്രഭാകരന്‍ മാസ്റ്റര്‍, ജനപ്രതിനിധികള്‍, രാഷ്ട്രീയ പാര്‍ട്ടി പ്രതിനിധികള്‍, ഉദ്യോഗസ്ഥര്‍ എന്നിവര്‍ സംസാരിച്ചു.
പഞ്ചാബിൽ ട്രെയിനിന് തീപിടിച്ചു, 4 കോച്ചുകളിൽ തീപിടുത്തം; ആളപായം ഇല്ലെന്ന് നോർത്തേൺ റെയിൽവേ
പഞ്ചാബ്: പഞ്ചാബിൽ ട്രെയിനിന് തീപിടിച്ചു, 4 കോച്ചുകളിൽ തീപിടുത്തം. ആളപായം ഇല്ലെന്ന് നോർത്തേൺ റെയിൽവേ അറിയിച്ചു. പഞ്ചാബിലെ സരായ് ബഞ്ചാര റെയിൽവേ സ്റ്റേഷന് സമീപം കർമ്മഭൂമി എക്സ്പ്രസിന്റെ നാല് കോച്ചുകളിലാണ് തീപിടുത്തമുണ്ടായത്. ഇതുവരെ ആളപായമൊന്നും റിപ്പോർട്ട് ചെയ്തിട്ടില്ല. അമൃത്സറിനും ന്യൂ ജൽപൈഗുരിക്കും ഇടയിൽ ഓടുന്ന ട്രെയിൻ നമ്പർ 12508 കർമ്മഭൂമി എക്സ്പ്രസിന്റെ എഞ്ചിനിൽ നിന്നാണ് തീപിടിത്തമുണ്ടായത്.തീപിടിത്തത്തിന് കാരണം ഷോർട്ട് സർക്യൂട്ടാണെന്ന് സംശയിക്കുന്നതായി വൃത്തങ്ങൾ അറിയിച്ചു. എന്നിരുന്നാലും, കൃത്യമായ കാരണം ഇതുവരെ ഔദ്യോഗികമായി സ്ഥിരീകരിച്ചിട്ടില്ല. റെയിൽവേ ഉദ്യോഗസ്ഥരും അടിയന്തര സേവന ജീവനക്കാരും സംഭവ സ്ഥലത്തെത്തി, നിരവധി കോച്ചുകളിൽ നിന്ന് തീയും പുകയും ഉയരുന്നത് സംഭവസ്ഥലത്തു നിന്നുള്ള ദൃശ്യങ്ങളിൽ കാണാം.അമൃത്സറിൽ നിന്ന് പുറപ്പെട്ട ട്രെയിൻ രാജ്പുരയിൽ നിന്ന് 15 കിലോമീറ്റർ അകലെ ഒരു ഗ്രാമത്തിനടുത്തായി സ്ഥിതി ചെയ്യുന്ന ബസന്ത്പുര റെയിൽവേ സ്റ്റേഷന് സമീപമാണ് തീപിടിച്ചതെന്ന് വൃത്തങ്ങൾ അറിയിച്ചു.സംഭവത്തിൽ ഇതുവരെ ആർക്കും പരിക്കുകളോ ജീവഹാനിയോ ഉണ്ടായതായി റിപ്പോർട്ടുകൾ ഇല്ല.
മുടങ്ങി കിടക്കുന്ന പ്രവാസി ക്ഷേമ പെൻഷൻ കൃത്യമായി വിതരണം ചെയ്യുക:പ്രവാസി കോൺഗ്രസ് മുട്ടിൽ
പ്രവാസി കോൺഗ്രസ് മുട്ടിൽ മണ്ഡല കൺവെൻഷൻ ഓലൻ ഓഡിറ്റോറിയത്തിൽ വെച്ച് സംഘടിപ്പിച്ചു. പ്രവാസി കോൺഗ്രസ് ജില്ല പ്രസിഡന്റ് സജി മണ്ഡലത്തിൽ ഉദ്ഘാടനം നിർവഹിച്ചു.കല്പറ്റ ബ്ലോക്ക് പ്രസിഡന്റ് സുനിൽ കുന്നിതൊടി അധ്യക്ഷത വഹിച്ചു. സിദ്ദിഖ് ഓണാട്ട്, ബാബു പിണ്ടിപ്പുഴ, വിപിൻ വി. ജെ, ബോബൻ ആന്റണി എന്നിവർ നേർന്ന് സംസാരിച്ചു. പ്രവാസി കോൺഗ്രസ് മുട്ടിൽ മണ്ഡലം പ്രസിഡന്റായി അഖിൽ കുന്നുമലിനെയും ജനറൽ സെക്രട്ടറിയായി അരുൺ കുമാറിനെയും ട്രഷററായി മുജീബ് റഹ്മാനെയും തിരഞ്ഞെടുത്തു.കല്പറ്റ ബ്ലോക്ക് വൈസ് പ്രസിഡന്റ് ആയി സിദീഖ് ഓണാട്ടിനേയും, മണ്ഡലം വൈസ് പ്രസിഡന്റ് മാരായി ഫൈസൽ എൻ. ടി, നൗഷാദ് കുന്നത്ത് എന്നിവരെയും, ജോയിൻ സെക്രട്ടറി മാരായി കാദർ പരിയാരം, ബഷീർ നരിക്കോടൻ, അബ്ദുൽ അസീസ് എന്നിവരെയും, എക്‌സി കുട്ടീവ് അംഗങ്ങൾ ആയി സൗമ്യ അരുൺ, ഉസ്മാൻ സാറതൊടിയിൽ ബൈജു കുമാർ, ജോസഫ് ചാക്കോ,എന്നിവരെയും തിരഞ്ഞെടുത്തു.അഖിൽ കുന്നുമ്മൽ സ്വാഗതവും അരുൺ കുമാർ നന്ദിയും പറഞ്ഞു
മുൻഗണനാ റേഷൻ കാർഡുകൾ സറണ്ടർ ചെയ്യണം
മുൻഗണനാ വിഭാഗം എ.എ.വൈ/പി.എച്ച്.എച്ച് റേഷൻ കാർഡുകൾ കൈവശമുള്ള ഗുണഭോക്താക്കൾക്ക് ഡിസംബർ ഒൻപത് വരെ പിഴ യില്ലാതെ സ്വമേധയാ റേഷൻ കാർഡ് സറണ്ടർ ചെയ്യാമെന്ന് ജില്ലാ സപ്ലൈ ഓഫീസർ അറിയിച്ചു.ബന്ധപ്പെട്ട രേഖകളുമായി അതത് താലൂക്ക് സപ്ലൈ ഓഫീസുകളിലെ ത്തി അപേക്ഷ നൽകി റേഷൻ കാർഡുകൾ തരം മാറ്റാവുന്നതാണ്.ഒരു ഏക്കറിന് മുകളിൽ സ്ഥലം ഉള്ളവർ, 1000 സ്ക്വയർ ഫീറ്റിന് മുകളിൽ വീടുള്ളവർ, നാല് ചക്രവാഹനമുള്ളവർ, സർക്കാർ ജീവന ക്കാർ, 25,000 രൂപയ്ക്ക് മുകളിൽ വരുമാനമുള്ളവർ,ആദായ നികുതി അടയ്ക്കുന്നവർ എന്നിവരാണ് മുൻഗണന വിഭാഗം റേഷൻ കാർഡു കൾക്ക് അർഹതയില്ലാത്തവർ.കൂടുതൽ വിവരങ്ങൾക്കായി വൈത്തിരി (04936 255222), ബത്തേരി (04936 220213), മാനന്തവാടി (04935 240252) നമ്പറുകളിൽ ബന്ധപ്പെടാം.
സമൂഹ മാധ്യമങ്ങള്‍ക്ക് കടിഞ്ഞാണിടാന്‍ കേന്ദ്രം: നിയമപരമായ പരിരക്ഷ എടുത്ത് കളയാന്‍ നീക്കം
ന്യൂഡല്‍ഹി: സമൂഹ മാധ്യമങ്ങള്‍ക്ക് കടിഞ്ഞാണിടാന്‍ നീക്കവുമായി കേന്ദ്ര സര്‍ക്കാര്‍. സമൂഹ മാധ്യമങ്ങള്‍ക്കുള്ള നിയമപരമായ പരിരക്ഷ എടുത്തു കളയാനാണ് കേന്ദ്ര സര്‍ക്കാര്‍ നീക്കം നടത്തുന്നത്. ഐടി ആക്ടിലെ 79-ാം വകുപ്പിലെ മാറ്റങ്ങളാണ് പരിഗണനയില്‍ ഉള്ളത്. 79-ാം വകുപ്പ് പ്രകാരം ഉപയോക്താക്കള്‍ പോസ്റ്റ് ചെയ്യുന്ന ഉള്ളടക്കങ്ങള്‍ക്ക് കമ്പനികള്‍ നേരിട്ട് നിയമപരമായി ഉത്തരവാദികളാകില്ല. ഉള്ളടക്കങ്ങളുടെ പേരില്‍ കമ്പനികള്‍ക്കെതിരെ നേരിട്ട് കേസെടുക്കാവുന്ന തരത്തിലാണ് മാറ്റങ്ങള്‍ പരിഗണിക്കുന്നത്.ലോകത്തിലെ ഏറ്റവും വലിയ ഇന്റര്‍നെറ്റ് കമ്പനികളില്‍ പലതിന്റെയും ബിസിനസ്സ് മാതൃകകളില്‍ ഈ സംരക്ഷണം നിര്‍ണായക ഘടകമാണ്. വിവരങ്ങള്‍ കൈമാറുകയോ എത്തിക്കുകയോ ചെയ്യുന്ന സേവനങ്ങള്‍ക്ക് (ഇന്റര്‍നെറ്റ് സേവന ദാതാക്കള്‍ (ISPs), ടെലികോം സേവന ദാതാക്കള്‍ (TSPs), പിയര്‍-ടു-പിയര്‍ മെസേജിംഗ് പ്ലാറ്റ്ഫോമുകള്‍) മാത്രമായി ഈ സംരക്ഷണം പരിമിതപ്പെടുത്താമോ എന്നാണ് സര്‍ക്കാര്‍ പരിശോധിച്ചുവരുന്നത്.
കലകൾ മാനവികത ഉയർത്തിപ്പിടിക്കുന്നു ;കെ.ടി ഹംസ മുസ് ലിയാർ
മാനവീകത ഉയർത്തിപ്പിടിക്കുന്നതിലും സമൂഹത്തിൻ്റെ ഐക്യവും വികാസവും രൂപപ്പെടുത്തുന്നതിലും ലോകത്ത് എക്കാലത്തും കലകൾ വഹിച്ച പങ്ക് തുല്യതയില്ലാത്തതാണെന്നും ഓരോ വിഭാഗവും കലയെ ഉപയോഗപ്പെടുത്തുന്ന രീതി അവലംബിച്ചാണ് സമൂഹത്തിൽ അത് സ്വാധീനം ചെലുത്തുന്നതെന്നും സമസ്ത കേരളാ മദ്റസാ മാനേജ്മെൻ്റ് അസോസിയേഷൻ സംസ്ഥാന പ്രസിഡണ്ട് കെ ടി ഹംസ മുസ് ലിയാർ പറഞ്ഞു. വാരാമ്പറ്റ സആദാ കോളേജിൽ ജില്ലാ മുസാബഖയുടെ സംഘാടക സമിതി രൂപീകരണ കൺവെൻഷൻ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വർത്തമാന കാലത്ത് സംവദിക്കാൻ നവ തലമുറയെ പ്രാപ്‌തരാക്കുന്നതിൽ മുസാബഖ വലിയ പങ്കു വഹിക്കുന്നുവെന്ന് അദ്ദേഹം പറഞ്ഞു. ജില്ലാ മുസാബഖ സമിതി ചെയർമാൻ അശ്‌റഫ് ഫൈസി പനമരം അദ്ധ്യക്ഷനായി.ജില്ലാ പ്രസിഡണ്ട് കെ.വി .എസ് ഇമ്പിച്ചിക്കോയ തങ്ങൾ പ്രാർഥനക്ക് നേതൃത്വം നൽകി. സമസ്ത ജില്ലാ ട്രഷറർ ഇബ്റാഹിം ഫൈസി വാളാട് , എസ്. ഇ. എ സെക്രട്ടറി കെ.സി മുനീർ, ജില്ലാ കമ്മിറ്റി അംഗങ്ങളായ ഹാശിം ദാരിമി തരുവണ , നൗഷാദ് ദാരിമി മാനന്തവാടി, ശംസുദ്ദീൻ ദാരിമി പന്തിപ്പൊയിൽ, സുബൈർ വാഫി പൊഴുതന , കബീർ യമാനി , മാമുക്കോയ ചുണ്ടേൽ , മഹല്ല് ഭാരവാഹികളായ എ.സി മായൻ ഹാജി, എ.സി പോക്കു, എ. കെ അന്ത്രു ഹാജി, കമ്പ അബ്ദുള്ള , കൊടുവേരി നാസർ, റാഫി യമാനി , ഫൈസൽ ദാരിമി എന്നിവർ സംസാരിച്ചു. ജില്ലാ സെക്രട്ടറിമാരായ ഹാരിസ് ബാഖവി കമ്പളക്കാട് സ്വാഗതവും അബ്ദുൽ മജീദ് അൻസ്വരി നന്ദിയും പറഞ്ഞു
ഇനി കറന്റ് പോയാലും പേടിക്കേണ്ട! ഇലക്ട്രിക് കാർ വീട്ടിലെ ഇൻവെർട്ടറാക്കാം; ഫാനും ലൈറ്റും പ്രവർത്തിപ്പിക്കാം
കറണ്ട് പോകുമ്പോള്‍ വീട്ടിലെ ഫാനും ലൈറ്റും പ്രവര്‍ത്തിക്കാതാകുന്നത് പലര്‍ക്കും വലിയ ബുദ്ധിമുട്ടാണ്. ഇതിനായി ഇന്‍വെര്‍ട്ടറോ ജനറേറ്ററോ ഉപയോഗിക്കുന്നവരാണ് അധികവും. എന്നാല്‍ നിങ്ങള്‍ക്ക് ഒരു ഇലക്ട്രിക് കാര്‍ ഉണ്ടെങ്കില്‍ അതിന്റെ ബാറ്ററി വീട്ടിലെ ചില ഉപകരണങ്ങള്‍ പ്രവര്‍ത്തിപ്പിക്കാനും ഉപയോഗിക്കാം. അതിനുള്ള സംവിധാനങ്ങളാണ് V2L, V2H സാങ്കേതികവിദ്യകളിലുള്ളത്. എന്താണ് ഈ സാങ്കേതികവിദ്യകള്‍?. ഇലക്ട്രിക് കാറിന്റെ ബാറ്ററിയില്‍ നിന്ന് ശരിക്കും വീട്ടിലെ വൈദ്യുതി ആവശ്യങ്ങള്‍ നിറവേറ്റാനാകുമോ?.electric car can serve as inverteഎന്താണ് V2L സാങ്കേതികവിദ്യ?V2L എന്നതിന്റെ പൂര്‍ണരൂപം Vehicle to Load എന്നാണ്. ഇലക്ട്രിക് കാറിന്റെ ബാറ്ററിയില്‍ സംഭരിച്ചിരിക്കുന്ന വൈദ്യുതി ഉപയോഗിച്ച് പുറത്തുള്ള ഇലക്ട്രോണിക് ഉപകരണങ്ങള്‍ പ്രവര്‍ത്തിപ്പിക്കാന്‍ സഹായിക്കുന്ന സംവിധാനമാണിത്. കാറിന്റെ ബാറ്ററിയില്‍ നിന്നുള്ള DC വൈദ്യുതിയെ ഇന്‍വെര്‍ട്ടറിന്റെ സഹായത്തോടെ AC വൈദ്യുതിയാക്കി മാറ്റിയാണ് ഉപകരണങ്ങളിലേക്ക് എത്തിക്കുന്നത്. കാറില്‍ ലഭിക്കുന്ന പ്രത്യേക പവര്‍ ഔട്ട്ലെറ്റിലൂടെയോ അഡാപ്റ്ററിലൂടെയോ വൈദ്യുതി ഉപയോഗിക്കാം. ഇതിലൂടെ മൊബൈല്‍ ഫോണ്‍ ചാര്‍ജ് ചെയ്യാനും ലാപ്‌ടോപ്പ് പ്രവര്‍ത്തിപ്പിക്കാനും LED ലൈറ്റുകള്‍ തെളിക്കാനും ഫാന്‍ പ്രവര്‍ത്തിപ്പിക്കാനും കഴിയും. പക്ഷേ എല്ലാ ഇലക്ട്രിക് കാറുകളിലും ഈ സൗകര്യം ലഭ്യമല്ല. V2L പിന്തുണയുള്ള വാഹനം ഉപയോഗിക്കുന്നവര്‍ക്കായിരിക്കും ഈ സൗകര്യം ലഭിക്കുക. ചില കാറുകളില്‍ പ്രത്യേക പവര്‍ ഔട്ട്ലെറ്റ് ഉണ്ടാകും. മറ്റു ചിലതില്‍ അനുയോജ്യമായ അഡാപ്റ്റര്‍ ആവശ്യമായി വരും.
'നിങ്ങൾ ഉടൻ അറിയും' കാത്തിരുന്നോളൂ എന്ന് ട്രംപ്; ഭീഷണി യുഎസ് ഇടക്കാല തെരഞ്ഞെടുപ്പിലെ പരാജയത്തിന് പിന്നാലെ; ജാഗ്രതയോടെ ഇറാൻ
ഇടക്കാല തെരഞ്ഞെടുപ്പിലേറ്റ കനത്ത തിരിച്ചടിക്ക് ശേഷവും ഇറാനെതിരെ കടുത്ത മുന്നറിയിപ്പുമായി അമേരിക്കൻ പ്രസിഡൻ്റ് ഡോണൾഡ് ട്രംപ്. യുഎസിൻ്റെ അനുമതിയില്ലാതെ ഇറാന് ആണവ പദ്ധതിയുമായി മുന്നോട്ട് പോകാൻ കഴിയില്ലെന്ന് വ്യക്തമാക്കിയ അദ്ദേഹം, ഇറാനിൽ കൂടുതൽ നാശമുണ്ടാക്കാൻ ആഗ്രഹിക്കുന്നില്ലെന്നും എന്നാൽ ഒരുപക്ഷെ അതും ചെയ്തേക്കുമെന്നും വ്യക്തമാക്കി. എന്താണ് ചെയ്യുകയെന്ന് ഉടനെ അറിയുമെന്നും അദ്ദേഹം കൂട്ടിച്ചേർത്തു.
റിഷഭ് പന്ത് പുറത്ത്, ബുംറയും ജഡേജയും കളിക്കും; ന്യൂസിലൻഡ് 'എ'യ്‌ക്കെതിരായ മൂന്നാം അനൗദ്യോഗിക ടെസ്റ്റ് നാളെ
ടെസ്റ്റ് പരമ്പരക്ക് മുന്നോടിയായി ഇന്ത്യ 'എ' ടീമും ന്യൂസിലൻഡ് 'എ' ടീമും തമ്മിലുള്ള മൂന്നാമത്തെയും അവസാനത്തെയും അനൗദ്യോഗിക ടെസ്റ്റ് മത്സരം നാളെ തുടങ്ങും. പരിക്കുമൂലം റിഷഭ് പന്ത് മൂന്നാം അനൗദ്യോഗിക ടെസ്റ്റിലും ഇന്ത്യക്കായി കളിക്കില്ല. വരിയെല്ലിനേറ്റ പരിക്കിനെ തുടർന്ന് ബെംഗളൂരുവിലെ ബിസിസിഐ സെന്‍റർ ഓഫ് എക്സലൻസിൽ തുടരുന്ന പന്ത് ബാറ്റിംഗ്, കീപ്പിംഗ് പരിശീലനം പുനരാരംഭിച്ചെങ്കിലും പൂര്‍ണ ഫിറ്റ്നെസ് ടെസ്റ്റ് പാസാവാത്തതിനാലാണ് മൂന്നാം മത്സരത്തില്‍ നിന്ന് ഒഴിവാക്കിയത്.ടെസ്റ്റ് പരമ്പരക്ക് മുമ്പ് ഫിറ്റ്നെസ് ടെസ്റ്റില്‍ വിജയിച്ചില്ലെങ്കില്‍ പന്തിന് ന്യൂസിലന്‍ഡിനെതിരായ ടെസ്റ്റ് പരമ്പര നഷ്ടമാവും. പന്ത് പൂർണ്ണ കായികക്ഷമത കൈവരിച്ചില്ലെങ്കിൽ വിക്കറ്റ് കീപ്പറായി ധ്രുവ് ജുറെൽ തന്നെ ടെസ്റ്റ് ടീമിൽ തുടരുമെന്നാണ് സൂചന. ലിങ്കണിൽ നടക്കുന്ന മൂന്നാം മത്സരത്തിൽ പന്തിന് പകരക്കാരനായി ടി20 ടീം വൈസ് ക്യാപ്റ്റൻ തിലക് വർമ്മ ഇന്ത്യ 'എ' ടീമിനൊപ്പം ചേർന്നിട്ടുണ്ട്.
മദ്യപിച്ച് വാഹനമോടിച്ച് അപകടമുണ്ടാക്കിയാൽ ലൈസൻസ് റദ്ദാക്കണം: എം.വി.ഡി ശക്തമായ നടപടി സ്വീകരിക്കണമെന്ന് ഹൈക്കോടതി
കൊച്ചി: മദ്യപിച്ച് വാഹനമോടിച്ച് അപകടമുണ്ടാക്കിയാൽ ലൈസൻസ് റദ്ദാക്കണമെന്ന് ഹൈക്കോടതി. എം.വി.ഡി ശക്തമായ നടപടി സ്വീകരിക്കണമെന്ന് ഹൈക്കോടതി നിർദേശിച്ചു. വിചാരണ പൂർത്തിയാകുന്നതിന് മുൻപ് തന്നെ ലൈസൻസ് റദ്ദാക്കൽ നടപടികൾ ആരംഭിക്കാമെന്നും മോട്ടോർ വാഹന വകുപ്പിന് നിർദേശം. ലൈസൻസ് റദ്ദാക്കാനുള്ള അധികാരം അധികൃതർ ഉപയോഗിക്കുന്നത് അപൂർവമായി മാത്രമെന്നും കോടതി ആശങ്ക രേഖപ്പെടുത്തി. പ്രാഥമിക തെളിവുകളുണ്ടെങ്കിൽ ലൈസൻസിങ് അതോറിറ്റി അടിയന്തരമായി ഇടപെടണമെന്ന് ഹൈക്കോടതി നിർദേശിച്ചു.ലഹരിയിലുള്ള ഡ്രൈവിംഗ് മൂലം ആർക്കെങ്കിലും പരിക്കോ മരണമോ സംഭവിച്ചാൽ ജാമ്യമില്ലാ വകുപ്പുകൾ പ്രകാരം ഗുരുതരമായ കേസുകൾ ചുമത്തപ്പെടും വർഷങ്ങളോളം നീളുന്ന നിയമക്കുരുക്കുകളും കനത്ത ശിക്ഷയും ലഭിക്കുമെന്ന് എംവിഡി മുന്നറിയിപ്പ് നൽകിയിട്ടുണ്ട്. മദ്യപിച്ച് വാഹനമോടിച്ചാൽ മോട്ടോർ വാഹന നിയമത്തിലെ വകുപ്പ് 185 പ്രകാരമാണ് കേസെടുക്കുന്നത്. ബ്രെത്ത് അനലൈസർ പരിശോധനയിലോ രക്തപരിശോധനയിലോ 100 മില്ലീലിറ്റർ രക്തത്തിൽ 30 മില്ലീഗ്രാമിൽ കൂടുതൽ ആൽക്കഹോളിന്റെ അളവ് കണ്ടെത്തിയാൽ കേസെടുക്കും.അതേസമയം സംസ്ഥാനത്തെ റോഡപകടങ്ങളും മരണനിരക്കും കുറയ്ക്കുക എന്ന ലക്ഷ്യത്തോടെ സംസ്ഥാന സർക്കാർ രൂപീകരിച്ച സമഗ്ര പദ്ധതി കേരള സ്റ്റേറ്റ് റോഡ് സേഫ്റ്റി മിഷന്റെ പ്രഖ്യാപനം ഈ മാസം 15ന് നടക്കുമെന്ന് ഗതാഗത മന്ത്രി സി പി ജോൺ അറിയിച്ചു. റോഡ് അപകട മരണങ്ങൾ കുറയ്ക്കാൻ ബോധവൽക്കരണം നടത്തുമെന്നും മന്ത്രി പറഞ്ഞു.
പശ്ചിമേഷ്യൻ സംഘർഷത്തിൽ പെട്ടുപോയത് കേരള പച്ചകറികൾ; കനത്ത തിരിച്ചടി കണ്ണൂർ എയർപോർട്ടിന്
പശ്ചിമേഷ്യൻ സംഘർഷം കേരളത്തിൽനിന്ന് വിമാനം വഴിയുള്ള പഴം, പച്ചക്കറി കയറ്റുമതിയെ ബാധിച്ചതായി റിപ്പോർട്ട്. കഴിഞ്ഞ വർഷവുമായി താരതമ്യം ചെയ്യുമ്പോൾ കോഴിക്കോട്, തിരുവനന്തപുരം, കണ്ണൂർ വിമാനത്താവളങ്ങളിൽ നിന്നുള്ള കയറ്റുമതി 15 മുതൽ 44% വരെ കുറഞ്ഞു. പ്രതിസന്ധികൾക്കിടയിലും കൊച്ചിയിൽ നിന്നുള്ള കയറ്റുമതിയിൽ വർധനയുണ്ട്. 2025, 2026 വർഷങ്ങളിലെ ജൂലൈ മുതൽ സെപ്റ്റംബർ വരെയുള്ള മാസങ്ങളിലെ കണക്കുകൾ താരതമ്യം ചെയ്ത് കേരള എക്സ്പോർട്ടേഴ്സ് ഫോറം തയാറാക്കിയ റിപ്പോർട്ടിലാണ് ഈ വിവരങ്ങളുള്ളത്.കനത്ത തിരിച്ചടിയുണ്ടായത് കണ്ണൂർ വിമാനത്താവളത്തിനാണ്. കഴിഞ്ഞ വർഷത്തെ അപേക്ഷിച്ച് കയറ്റുമതി 44% കുറഞ്ഞു. കോഴിക്കോട് വിമാനത്താവളത്തിൽ 18%, തിരുവനന്തപുരത്ത് 15% എന്നിങ്ങനെ കുറവ് രേഖപ്പെടുത്തി. കൊച്ചിയിൽ 20.9% വർധന രേഖപ്പെടുത്തി. കോഴിക്കോട്, തിരുവനന്തപുരം, കണ്ണൂർ വിമാനത്താവളങ്ങളിൽ നിന്ന് കൂടുതൽ പഴം,പച്ചക്കറി കയറ്റുമതി ചെയ്യുന്നത് ഗൾഫ് രാജ്യങ്ങളിലേക്കാണ്. കൊച്ചിയിൽ നിന്ന് യൂറോപ്യൻ യൂണിയൻ രാജ്യങ്ങളിലേക്കുൾപ്പെടെ നേരിട്ട് കയറ്റുമതിക്കുള്ള സൗകര്യം നേരത്തെയുണ്ട്. തിരുവനന്തപുരത്തും കോഴിക്കോടും ഇതിന് അനുമതി ലഭിച്ചത് ഈയിടെയാണ്കയറ്റുമതി സുഗമമാക്കുന്നതിനുള്ള അടിസ്ഥാന സൗകര്യങ്ങൾ ഒരുക്കാൻ സർക്കാർ തയാറായാൽ സംസ്ഥാനത്തിന് ഈ മേഖലയിൽ വലിയ സാധ്യതകളുണ്ടെന്ന് കേരള എക്സ്പോർട്ടേഴ്സ് ഫോറം സെക്രട്ടറി മുൻഷിദ് അലി പറഞ്ഞു.
ക്രിസ്റ്റ്യാനോ റൊണാൾഡോ അന്താരാഷ്ട്ര ഫുട്ബാളിൽ നിന്ന് വിരമിച്ചു
*ലിസ്ബൺ:* ഫുട്ബാൾ ലോകത്തെ ഒരു യുഗത്തിന് തിരശ്ശീല വീഴുന്നു. പോർച്ചുഗൽ സൂപ്പർതാരം ക്രിസ്റ്റ്യാനോ റൊണാൾഡോ രാജ്യാന്തര ഫുട്ബാളിൽനിന്ന് വിരമിക്കൽ പ്രഖ്യാപിച്ചു. 23 വർഷം നീണ്ട ദേശീയ ടീം കരിയറിനാണ് 41കാരൻ വിരാമമിടുന്നത്. നവംബറിലെ രാജ്യാന്തര മത്സരങ്ങൾക്ക് ശേഷം പോർച്ചുഗലിന്റെ ഏഴാം നമ്പർ ജഴ്സി അഴിച്ചുവെക്കുമെന്ന് താരം സമൂഹമാധ്യമങ്ങളിലൂടെ അറിയിച്ചു.പോർച്ചുഗൽ ജനതയെ അഭിസംബോധന ചെയ്തുള്ള വികാരനിർഭരമായ വിഡിയോയിലൂടെയായിരുന്നു പ്രഖ്യാപനം. 'പോർച്ചുഗൽ എന്നും എന്റെ ഹൃദയത്തിലുണ്ടാകും. ദേശീയ ടീമിന്റെ ഏഴാം നമ്പർ ജഴ്സി തിരിച്ചേൽപിക്കേണ്ട സമയം വന്നിരിക്കുന്നു. അത് എന്റേതുമാത്രമാണെന്ന് ഒരിക്കലും തോന്നിയിട്ടില്ല. 23 വർഷം ഈ ജഴ്സിയണിയാനും ലോകമെമ്പാടുമുള്ള സ്റ്റേഡിയങ്ങളിൽ രാജ്യത്തെ പ്രതിനിധാനം ചെയ്യാനും ലഭിച്ച അവസരം വലിയ അഭിമാനവും ഉത്തരവാദിത്തവുമായിരുന്നു. ഇനി അത് അടുത്ത തലമുറക്ക് കൈമാറേണ്ട സമയമാണ്' -റൊണാൾഡോ പറഞ്ഞു.
മുന്‍ഗണനാ റേഷന്‍ കാര്‍ഡുകള്‍ സറണ്ടര്‍ ചെയ്യണം
മുന്‍ഗണനാ വിഭാഗം എ.എ.വൈ/പി.എച്ച്.എച്ച് റേഷന്‍ കാര്‍ഡുകള്‍ കൈവശമുള്ള ഗുണഭോക്താക്കള്‍ക്ക് ഡിസംബര്‍ ഒന്‍പത് വരെ പിഴയില്ലാതെ സ്വമേധയാ റേഷന്‍ കാര്‍ഡ് സറണ്ടര്‍ ചെയ്യാമെന്ന് ജില്ലാ സപ്ലൈ ഓഫീസര്‍ അറിയിച്ചു. ബന്ധപ്പെട്ട രേഖകളുമായി അതത് താലൂക്ക് സപ്ലൈ ഓഫീസുകളിലെത്തി അപേക്ഷ നല്‍കി റേഷന്‍ കാര്‍ഡുകള്‍ തരം മാറ്റാവുന്നതാണ്. ഒരു ഏക്കറിന് മുകളില്‍ സ്ഥലം ഉള്ളവര്‍, 1000 സ്‌ക്വയര്‍ ഫീറ്റിന് മുകളില്‍ വീടുള്ളവര്‍, നാല് ചക്രവാഹനമുള്ളവര്‍, സര്‍ക്കാര്‍ ജീവനക്കാര്‍, 25,000 രൂപയ്ക്ക് മുകളില്‍ വരുമാനമുള്ളവര്‍, ആദായ നികുതി അടയ്ക്കുന്നവര്‍ എന്നിവരാണ് മുന്‍ഗണന വിഭാഗം റേഷന്‍ കാര്‍ഡുകള്‍ക്ക് അര്‍ഹതയില്ലാത്തവര്‍. കൂടുതല്‍ വിവരങ്ങള്‍ക്കായി വൈത്തിരി (04936 255222), ബത്തേരി (04936 220213), മാനന്തവാടി (04935 240252) നമ്പറുകളില്‍ ബന്ധപ്പെടാം.
സ്റ്റുഡന്റ് കൗണ്‍സലര്‍ നിയമനം
പട്ടികവര്‍ഗ വികസന വകുപ്പിന് കീഴില്‍ പ്രവര്‍ത്തിക്കുന്ന നല്ലൂര്‍നാട് അംബേദ്കര്‍ മെമ്മോറിയല്‍ മോഡല്‍ റസിഡന്‍ഷല്‍ ഗവ ഹയര്‍ സെക്കന്‍ഡറി സ്‌കൂളിലേക്ക് സ്റ്റുഡന്റ് കൗണ്‍സലറെ നിയമിക്കുന്നു. എം.എ സൈക്കോളജി അല്ലെങ്കില്‍ സ്റ്റുഡന്റ് കൗണ്‍സിലിങ്ങില്‍ എം.എസ്.ഡബ്ല്യൂ ആണ് യോഗ്യത. സ്റ്റുഡന്റ് കൗണ്‍സലിങ് സര്‍ട്ടിഫിക്കറ്റ്/ഡിപ്ലോമ നേടിയവര്‍ക്ക് മുന്‍ഗണന. പട്ടികവര്‍ഗ വിഭാഗത്തിലെ യോഗ്യരായ പുരുഷ ഉദ്യോഗാര്‍ഥികള്‍ക്ക് അഭിമുഖത്തില്‍ വെയിറ്റേജ് മാര്‍ക്കിന് അര്‍ഹത ഉണ്ട്. പ്രായപരിധി 25 നും 45 നും ഇടയില്‍. റസിഡന്‍ഷ്യല്‍ സ്ഥാപനമായതിനാല്‍ ഉദ്യോഗാര്‍ഥികള്‍ സ്‌കൂളില്‍ താമസിച്ച് ജോലി ചെയ്യണം. നിശ്ചിത മാതൃകയിലുള്ള അപേക്ഷ, ബയോഡാറ്റ, സര്‍ട്ടിഫിക്കറ്റുകളുടെ സാക്ഷ്യപ്പെടുത്തിയ പകര്‍പ്പുകളുമായി നവംബര്‍ 11 ന് രാവിലെ 10 ന് സ്‌കൂളില്‍ നടക്കുന്ന വാക് ഇന്‍ ഇന്റര്‍വ്യൂവില്‍ പങ്കെടുക്കണം. ഫോണ്‍-9495073565.
റോഡപകടങ്ങളില്‍ പെടുന്നവരെ മിനിറ്റുകള്‍ക്കകം ആശുപത്രിയില്‍ എത്തിക്കുക ലക്ഷ്യം; `ഗോള്‍ഡന്‍ ഗോള്‍' പദ്ധതിയുമായി ആരോഗ്യവകുപ്പ്
ഗോള്‍ഡന്‍ ഗോള്‍ പദ്ധതിയുമായി ആരോഗ്യവകുപ്പ്. അപകടങ്ങളില്‍ പരുക്കേല്‍ക്കുന്നവരെ മിനിറ്റുകള്‍ക്കകം ആശുപത്രിയില്‍ എത്തിക്കുക ലക്ഷ്യം. 108,സര്‍ക്കാര്‍, സ്വകാര്യ ആംബുലന്‍സുകളെ പദ്ധതിയുടെ ഭാഗമാക്കും. തിരുവനന്തപുരം കൊല്ലം ആലപ്പുഴ ജില്ലകളില്‍ പദ്ധതി ആദ്യം നടപ്പിലാക്കും. ജീവന്‍ രക്ഷിക്കുന്നവര്‍ക്ക് ഇനി മുതല്‍ ആരോഗ്യവകുപ്പ് ആദരം നല്‍കും. അപകടത്തില്‍ പെടുന്നവരെ രക്ഷപ്പെടുത്തുന്നതുമായി ബന്ധപ്പെട്ട് പൊതുജനങ്ങള്‍ക്ക് ബോധവല്‍ക്കരണം നല്‍കാനും തീരുമാനം.അപകടത്തില്‍പ്പെടുന്നവരെ മിനിറ്റുകള്‍ക്കുള്ളില്‍ പരിക്കിന്റെ സ്വഭാവത്തിനനുസരിച്ച് അനുയോജ്യമായ ആശുപത്രിയിലെത്തിച്ച് കൃത്യസമയത്ത് ചികിത്സ ഉറപ്പാക്കുകയാണ് ലക്ഷ്യം. 108നൊപ്പം സര്‍ക്കാര്‍, സ്വകാര്യ ആംബുലന്‍സുകളെയും ഒന്നിപ്പിക്കുന്നതാണ് പദ്ധതി. തിരുവനന്തപുരം, കൊല്ലം, ആലപ്പുഴ ജില്ലകളില്‍ പദ്ധതി പരീക്ഷണാടിസ്ഥാനത്തില്‍ നടപ്പാക്കാനാണ് ആരോ?ഗ്യവകുപ്പിന്റെ ആലോചന. കമ്പ്യൂട്ടര്‍ അധിഷ്ഠിത ഡിസ്പാച്ച് സംവിധാനം, ജിപിഎസ് ട്രാക്കിങ്, ജിഐഎസ് മാപ്പിങ് സംവിധാനങ്ങളും ഉപയോഗപ്പെടുത്തും.
കൂട്ട് ബോധവൽക്കരണ സെമിനാർ ശ്രദ്ധേയമായി
കൗമാരപ്രായത്തിൽ വിദ്യാർത്ഥികൾ തെറ്റായ പ്രവണതകളിലേക്ക് വഴുതിപ്പോകാതിരിക്കാൻ നിരന്തരമായ കരുതലും വ്യവസ്ഥാപിതമായ കൗൺസിലിംഗും ഉറപ്പാക്കി അവരെ ശരിയായ ജീവിതലക്ഷ്യങ്ങളിലേക്ക് നയിക്കുകയാണ് സ്കൂളുകളുടെയും സമൂഹത്തിന്റെയും കടമയെന്ന് എക്സൈസ് വിമുക്തി മിഷൻ വയനാട് ജില്ലാ കോർഡിനേറ്റർ എൻ.സി. സജിത്ത്കുമാർ അച്ചൂരാനം ആഹ്വാനം ചെയ്തു. പുൽപ്പള്ളി കാപ്പിസെറ്റ് മുതലിമാരൻ മെമ്മോറിയൽ ഗവ. ഹൈസ്കൂളിൽ വിമുക്തി മിഷൻ സംഘടിപ്പിച്ച "കൂട്ട്“ കരുതലിന്റെ കൈത്താങ്ങ്" ബോധവൽക്കരണ സെമിനാറിൽ മുഖ്യപ്രഭാഷണം നടത്തുകയായിരുന്നു അദ്ദേഹം.ചടങ്ങിൽ സ്കൂൾ ഹെഡ്മിസ്ട്രസ് ഇ.കെ. ഷാന്റി അധ്യക്ഷത വഹിച്ചു. സീനിയർ അസിസ്റ്റന്റ് മാർഗരറ്റ് മാനുവൽ സ്വാഗതമാശംസിച്ചു. അധ്യാപകരായ പി.വി. അഭിലാഷ്, പി.ജെ. ബൈജു, സ്കൂൾ ആന്റി നാർക്കോട്ടിക് ക്ലബ്ബ് പ്രതിനിധികളായ വിദ്യാർത്ഥികൾ ആൽബി ജോസഫ്, വി.എസ്. അഞ്ജന, വിവേക് ദിലീപ്, എം.ജെ. അപർണ്ണ, മെഷ അന്ന ഡെന്നിസ് എന്നിവർ സംസാരിച്ചു. എൻ.പി. രജീഷ് നന്ദി പറഞ്ഞു.
യുഎസ് ഇടക്കാല തിരഞ്ഞെടുപ്പ്: ഡെമോക്രാറ്റുകള്‍ക്ക് നേട്ടം, ഇന്ത്യയ്ക്ക് വിസ മുതൽ വ്യാപാരം വരെ നിര്‍ണായകം
യുഎസ് ഇടക്കാല തിരഞ്ഞെടുപ്പിന്റെ ഫലങ്ങള്‍ ഇന്ത്യയും ഏറെ ശ്രദ്ധയോടെയാണ് നിരീക്ഷിക്കുന്നത്. ജനപ്രതിനിധി സഭയായ ഹൗസ് ഓഫ് റെപ്രസന്റേറ്റീവ്‌സിന്റെ നിയന്ത്രണം ഡെമോക്രാറ്റുകള്‍ നേടുമെന്നാണ് വിലയിരുത്തല്‍. സെനറ്റിലും ഡെമോക്രാറ്റുകള്‍ ശ്രദ്ധേയമായ മുന്നേറ്റം നടത്തിയിട്ടുണ്ട്. വാഷിങ്ടണിലെ രാഷ്ട്രീയ അധികാരസമവാക്യത്തില്‍ വന്ന ഈ മാറ്റം ഇന്ത്യ- യുഎസ് ബന്ധത്തെയും സ്വാധീനിച്ചേക്കാം. വ്യാപാര കരാര്‍, ഇറക്കുമതി തീരുവ, ഊര്‍ജ സുരക്ഷ, റഷ്യന്‍ എണ്ണ, പ്രതിരോധ സഹകരണം, നിര്‍മിതബുദ്ധി ഉള്‍പ്പെടെയുള്ള പുതിയ സാങ്കേതികവിദ്യകള്‍, എച്ച്-1ബി വീസ തുടങ്ങിയ വിഷയങ്ങളിലാണ് ഇന്ത്യ പ്രധാനമായും ശ്രദ്ധിക്കുന്നത്.ഇന്ത്യ- യുഎസ് വ്യാപാര കരാര്‍: ഇനി എന്ത്?ഇന്ത്യയെ സംബന്ധിച്ചിടത്തോളം ഏറ്റവും പ്രധാനപ്പെട്ട വിഷയങ്ങളിലൊന്ന് യുഎസുമായുള്ള വ്യാപാര ഇടപാടുകളാണ്. 2026 ഫെബ്രുവരിയില്‍ ഇന്ത്യയും യുഎസും ഇടക്കാല വ്യാപാര കരാറിനുള്ള ഒരു ചട്ടക്കൂട് പ്രഖ്യാപിച്ചിരുന്നു. എന്നാല്‍ ഇന്ത്യ- യുഎസ് വ്യാപാര കരാറിലെ വിപുലമായ ചര്‍ച്ചകള്‍ ഇതുവരെ പൂര്‍ത്തിയായിട്ടില്ല. റഷ്യയില്‍ നിന്ന് ഇന്ത്യ എണ്ണ വാങ്ങുന്നതും അമേരിക്കന്‍ വിപണിയിലേക്കുള്ള പ്രവേശനവുമായി ബന്ധപ്പെട്ട വിഷയങ്ങളുമാണ് പ്രധാന തര്‍ക്കവിഷയങ്ങളില്‍ ചിലത്.തീരുവയില്‍ മാറ്റമുണ്ടാകുമോ?2026 ഫെബ്രുവരിയിലെ യുഎസ് സുപ്രീം കോടതി വിധിക്ക് ശേഷം അമേരിക്കയുടെ തീരുവ നയം കൂടുതല്‍ സങ്കീര്‍ണമായി. നിര്‍ബന്ധിത തൊഴില്‍ ഉപയോഗിച്ച് നിര്‍മിച്ച ഉല്‍പന്നങ്ങളുടെ ഇറക്കുമതി നിയന്ത്രണവുമായി ബന്ധപ്പെട്ട ജൂലൈയില്‍ ഇന്ത്യന്‍ ഇറക്കുമതിക്ക് 10 ശതമാനം അധിക തീരുവ യുഎസ് പ്രഖ്യാപിച്ചിരുന്നു. ഹൗസ് ഡെമോക്രാറ്റുകളുടെ നിയന്ത്രണത്തിലായതോടെ ട്രംപ് ഭരണകൂടത്തിന്റെ തീരുവ നയത്തെക്കുറിച്ചുള്ള പരിശോധന ശക്തമായേക്കാം. തീരുവ അമേരിക്കന്‍ ഉപഭോക്താക്കളെയും കമ്പനികളെയും വിതരണ ശൃംഖലയെയും എങ്ങനെ ബാധിക്കുന്നുവെന്ന് പരിശോധിക്കാന്‍ കോണ്‍ഗ്രസിന് കഴിയും.
വോട്ടർപട്ടിക പരിഷ്കരണം; ഫോം 6 ലെ നിർണായക തിരുത്തൽ പൂർത്തിയാക്കി തിരഞ്ഞെടുപ്പ് കമ്മിഷൻp
ഡൽഹി: സമഗ്ര വോട്ടർ പട്ടിക പരിഷ്കരണവുമായി ബന്ധപ്പെട്ട് ഫോം 6 ലെ നിർണായക തിരുത്തൽ പൂർത്തിയാക്കി തിരഞ്ഞെടുപ്പ് കമ്മിഷൻ. ഫോം 6 ൻ്റെ ഓൺലൈൻ പതിപ്പിൽ നിന്ന് SIR ഡിക്ലറേഷൻ നീക്കം ചെയ്തു. നേരത്തെ രണ്ട് വിഭാഗങ്ങൾ ഒറ്റ ഫോമിന്റെ ഭാഗമാക്കിയത് നിയമവിരുദ്ധമാണെന്ന് തിരഞ്ഞെടുപ്പ് കമ്മിഷണർമാർ ചൂണ്ടിക്കാട്ടിയിരുന്നു. വോട്ടർമാർ നൽകേണ്ട സത്യവാങ്മൂലം ഒഴിവാക്കി വ്യത്യസ്ത ഫോം ആക്കി നിലനിർത്തും.നേരത്തെ രണ്ട് വിഭാഗങ്ങൾ ഒറ്റ ഫോമിൻ്റെ ഭാഗമാക്കിയത് നിയമവിരുദ്ധമാണെന്ന് തിരഞ്ഞെടുപ്പ് കമ്മിഷണർമാർ ചൂണ്ടിക്കാട്ടിയിരുന്നു.ഡിക്ലറേഷൻ പ്രകാരം അവസാന SIR ലെ വോട്ടറിൻ്റെ വിവരങ്ങളോ, മാതാപിതാക്കളുടെ വിവരങ്ങളോ നൽകാതെ എൻറോൾമെൻ്റുമായി മുന്നോട്ട് പോകാൻ കഴിഞ്ഞിരുന്നില്ല.തിരഞ്ഞെടുപ്പ് കമ്മിഷൻ സുപ്രീം കോടതിയിൽ സമർപ്പിച്ച സത്യവാങ്മൂലത്തിലും ഫോം 6 ൽ നിന്ന് ഡിക്ലറേഷൻ ഒഴിവാക്കും എന്ന് അറിയിച്ചിരുന്നു.അതേസമയം, 6 സംസ്ഥാനങ്ങളിൽ എസ്‌ഐആർ സമയപരിധി നീട്ടിയിട്ടുണ്ട്. ഡൽഹിയിൽ അന്തിമ വോട്ടർ പട്ടിക ഡിസംബർ 22 ന് പ്രസിദ്ധീകരിക്കും. മഹാരാഷ്ട്ര, നാഗാലാൻഡ്, ആന്ധ്ര, തെലങ്കാന സംസ്ഥാനങ്ങളിൽ നവംബർ 30 ന് പ്രസിദ്ധീകരിക്കും. അതിനിടെ ഡൽഹി SIR നടപടികളിൽ മുസ്തഫാബാദിൽ വ്യാപക ക്രമക്കേട് നടന്നെന്ന റിപ്പോർട്ട് പുറത്തുവന്നിരുന്നു. മുസ്ലിം വോട്ടർമാരെ പട്ടികയിൽ നിന്നൊഴിവാക്കാൻ ബിജെപി ഏജന്റുമാർ കൂട്ടത്തോടെ ഫോം 7 നൽകി എന്നാണ് ആരോപണം. ബി.ജെ.പി ബൂത്ത് ലെവൽ ഏജന്റുമാർ സമർപ്പിച്ച 572 ഫോം 7 അപേക്ഷകളും മുസ്ലിം വോട്ടർമാർക്കെതിരെയായിരുന്നു.
ജനശതാബ്ദി ഇനി മുതല്‍ സൂപ്പര്‍ ഫാസ്റ്റ് അല്ല: നിരക്കുകള്‍ കുറയും
തിരുവനന്തപുരം-കണ്ണൂര്‍, തിരുവനന്തപുരം- കോഴിക്കോട് ജനശതാബ്ദി ട്രെയിനുകളുടെ സൂപ്പര്‍ ഫാസ്റ്റ് പദവി റെയിൽവേ പിന്‍വലിച്ചു.സൂപ്പര്‍ ഫാസ്റ്റ് സര്‍ചാര്‍ജ് ഒഴിവാകുന്നതോടെ എസി യാത്രയ്ക്ക് 45, നോണ്‍ എസി യാത്രയ്ക്ക് 15 രൂപയും വരുന്ന സൂപ്പര്‍ ഫാസ്റ്റ് സര്‍ചാര്‍ജ് ഈടാക്കില്ല.ഇത് ടിക്കറ്റ് നിരക്കില്‍ കുറവ് വരുത്തുമെന്ന് അധികൃതര്‍ പറഞ്ഞു. ടിക്കറ്റ് നിരക്കിലെ കുറവും ട്രെയിന്‍ നമ്പറിലെ മാറ്റവും ഒഴിച്ചു നിര്‍ത്തിയാല്‍, സ്റ്റോപ്പുകളിലും സമയക്രമത്തിലും മാറ്റമില്ല.ലോകമാന്യതിലക് - തിരുവനന്തപുരം ഗരീബ് രഥ്, എറണാകുളം - പട്‌ന ട്രെയിനുകളും സാധാരണ എക്‌സ്പ്രസുകളായി മാറും.
