തിരുവനന്തപുരം: സംസ്ഥാനത്ത് 130ളം തസ്തികകളിലേക്കുള്ള വിജ്ഞാപനം പിഎസ്സി ഉടൻ പുറത്തിറക്കും. മുന്നോക്ക വിഭാഗങ്ങളിലെ സാമ്പത്തികമായി പിന്നോക്കം നിൽക്കുന്നവർക്ക്‌ 10 ശതമാനം സംവരണം കൂടി ഉൾപ്പെടുത്തിയാണ്‌ വിജ്ഞാപനം ഇറക്കുക. നേരത്തേ വിജ്ഞാപനം ചെയ്യാൻ തീരുമാനിച്ചിരുന്നെങ്കിലും ഇറക്കാതിരുന്ന അൻപതോളം പോസ്റ്റുകളിലേക്കുള്ള വിജ്ഞാപനവും ഇതിലുണ്ടാവും.
അതേസമയം സാമ്പത്തിക സംവരണത്തിന് മുൻകാല പ്രാബല്യം നൽകാൻ നിയമപ്രശ്നം ഉണ്ടെന്ന നിലപാടിലാണ് പിഎസ്സി. ഇനിയുള്ള വിജ്ഞാപനങ്ങളിൽ സാമ്പത്തിക സംവരണം ഏർപ്പെടുത്തിയാൽ നിയമതടസ്സമില്ലാതെ പോകാമെന്നും അവർ ചൂണ്ടിക്കാട്ടുന്നു.
അതേസമയം, കഴിഞ്ഞ 23നു കേരള സ്റ്റേറ്റ് ആൻഡ് സബോർഡിനേറ്റ് സർവീസ് റൂളിൽ ഭേദഗതി വന്ന സാഹചര്യത്തിൽ അന്നു മുതൽ തയാറാക്കുന്ന ചുരുക്കപ്പട്ടികയ്ക്കും റാങ്ക്‌പട്ടികയ്ക്കും സാമ്പത്തിക സംവരണം ബാധകമാണെന്ന വാദവും ഉയരുന്നുണ്ട്.
