മലയാളത്തിന്റെ പ്രിയനടൻ മമ്മൂട്ടിയ്ക്ക് പിറന്നാൾ ആശംസകൾ നേർന്ന് മുഖ്യമന്ത്രി പിണറായി വിജയൻ. പൊട്ടിച്ചിരിയ്ക്കുന്ന മമ്മൂട്ടിക്കൊപ്പമുള്ള ഫോട്ടോ പങ്കുവെച്ചുകൊണ്ടാണ് പിണറായി ആശംസ നേര്‍ന്നിരിക്കുന്നത്.
സിനിമയിലെയും മറ്റ് സാമൂഹ്യ-സാംസ്കാരിക മേഖലകളിലെയും നിരവധി പേരാണ് മമ്മൂട്ടിയ്ക്ക് പിറന്നാൾ ആശംസകൾ നേർന്നുകൊണ്ട് സോഷ്യൽ മീഡിയയിൽ പോസ്റ്റുകളും ചിത്രങ്ങളും പങ്കുവെച്ചിരിക്കുന്നത്. മമ്മൂട്ടിയെ ഉമ്മ വെയ്ക്കുന്ന ചിത്രത്തിനൊപ്പം ഹാപ്പി ബർത്ത് ഡെ ഇച്ചാക്ക എന്ന അടിക്കുറിപ്പുമായാണ് മോഹന്‍ലാല്‍ എത്തിയത്.
ജന്മദിന ആശംസകള്‍ നേരാന്‍ ആരാധകര്‍ കൊച്ചിയിലെ വീട്ടിലെത്തിയതിന്‍റെയും വീഡിയോ കോളിലൂടെ ആഘോഷത്തില്‍ പങ്കെടുത്തതിന്‍റെയും ദൃശ്യങ്ങള്‍ സമൂഹമാധ്യമങ്ങളില്‍ വെെറലാകുന്നുണ്ട്. കൊച്ചിയിലെ വീട്ടിലില്ലാതിരുന്നതുകൊണ്ടാണ് അദ്ദേഹം വീഡിയോ കോളിലൂടെ ആരാധകരെ കാണാനെത്തിയത്.
മമ്മൂട്ടി നായകനാകുന്ന ‘ഡൊമിനിക് ആൻഡ് ദ ലേഡീസ് പേഴ്സ്’ എന്ന ചിത്രത്തിന്‍റെ ടെെറ്റില്‍ പോസ്റ്ററും ജന്മദിന സമ്മാനമായി അണിയറ പ്രവര്‍ത്തകര്‍ പുറത്തുവിട്ടിട്ടുണ്ട്. മമ്മൂട്ടി കമ്പനി നിര്‍മ്മിക്കുന്ന ആറാം ചിത്രം സംവിധാനം ചെയ്യുന്നത് ഗൗതം വാസുദേവ് മേനോനാണ്. കോമഡിക്ക് പ്രാധാന്യമുള്ള ഒരു ക്രൈം ത്രില്ലർ ആയാണ് ഈ ചിത്രം ഒരുങ്ങുന്നതെന്നാണ് സൂചന.
