യൂട്യൂബില്‍ ഒരു വീഡിയോ കണ്ടു തീർക്കണമെങ്കില്‍ എത്ര പരസ്യങ്ങളാണ് കണ്ടു തീർക്കേണ്ടത്. പരസ്യങ്ങള്‍കൊണ്ട് മാത്രം യൂട്യൂബുണ്ടാക്കുന്ന വരുമാനം എത്രയാണെന്ന് അറിയാമോ?കഴിഞ്ഞ വർഷം മാത്രം യൂട്യൂബ് മൊത്തത്തില്‍ നേടിയ പരസ്യ വരുമാനം 36.2 ബില്യണ്‍ ഡോറാണ് (3,14,940 കോടി രൂപ). നാലാം പാദത്തിലെ പരസ്യ വരുമാനം10.47 ബില്യണ്‍ ഡോളർ (91,117 കോടി രൂപ) ആണ്.
ഒരു പാദത്തില്‍ കമ്ബനി പരസ്യത്തില്‍ നിന്ന് നേടുന്ന ഏറ്റവും വലിയ തുക കൂടിയാണിത്. ഗൂഗിളിൻ്റെ മാതൃകമ്ബനിയായ ആല്‍ഫബെറ്റ് കഴിഞ്ഞ ദിവസം പുറത്തിറക്കിയ നാലാം പാദ ഫലത്തിലാണ് ഇക്കാര്യത്തെ കുറിച്ച്‌ പറയുന്നത്.ആല്‍ഫബെറ്റിൻ്റെ വരുമാനത്തില്‍ വാ‍‌ർഷികാടിസ്ഥാനത്തില്‍ 12 ശതമാനത്തിന്റെ വർധനവുണ്ട്. യൂട്യൂബിൻ്റെ ഈ വരുമാനം പൂർണ്ണമായും പരസ്യ വില്‍പ്പനയില്‍ നിന്നും ലഭിച്ചതാണ്. യൂട്യൂബ് പ്രീമിയം സബ്സ്ക്രിപ്ഷൻ, യൂട്യൂബ് ടിവി എന്നിവയില്‍ നിന്ന് വരുമാനം കൂടി കണക്കിലെടുക്കുമ്ബോള്‍ കമ്ബനിയുടെ ലാഭകണക്ക് ഇനിയും കൂടുമെന്നാണ് റിപ്പോർട്ട്.
2024ലെ അമേരിക്കൻ പ്രസിഡന്റ് തിരഞ്ഞെടുപ്പ് വരുമാന വർധനവിൻ്റെ പ്രധാന കാരണങ്ങളിലൊന്നാണെന്ന് ഗൂഗിളിൻ്റെ ചീഫ് ബിസിനസ് ഓഫീസർ ഫിലിപ്പ് ഷിൻഡ്ലർ പറഞ്ഞു. റിപ്പബ്ലിക് , ഡെമോക്രാറ്റിക്ക് പാർട്ടികളുടെ തിരഞ്ഞെടുപ്പ് ചെലവ് 2020നേക്കാള്‍ ഇരട്ടിയാക്കിയിരുന്നു. തിരഞ്ഞെടുപ്പ് ദിവസം 45 ദശലക്ഷത്തിലധികം പേരാണ് യൂട്യൂബ് കണ്ടൻ്റുകള്‍ കണ്ടത്. ദീർഘനേരമുള്ള പരസ്യങ്ങളെ തുടർന്ന് പലരും യൂട്യൂബ് പ്രീമിയത്തില്‍ സൈനപ്പ് ചെയ്യാൻ നിർബന്ധിതരായിട്ടുമുണ്ട്.
2023 നവംബർ മുതല്‍ ആഡ്ബ്ലോക്കുകള്‍ക്കെതിരെ യൂട്യൂബ് കർശനമായ നടപടികള്‍ സ്വീകരിക്കുന്നുണ്ട്. ആഡ് ബ്ലോക്ക് സേവനം ഉപയോഗിക്കുന്നവർക്ക് പ്ലേബാക്ക് പ്രവർത്തനരഹിതമാക്കുന്നു എന്നാണ് റിപ്പോർട്ട്. വീഡിയോ കാണുന്നത് തുടരണമെങ്കില്‍ പേജിലെ ആഡ്-ബ്ലോക്കറുകള്‍ ഒഴിവാക്കാൻ കമ്ബനി ആവശ്യപ്പെടാറുണ്ട്. ക്രിയേറ്റർമാർക്ക് വരുമാനം പങ്കിടുന്നതിൻ്റെ പ്രധാന ഭാഗമാണ് പരസ്യങ്ങളെന്നാണ് യൂട്യൂബിൻ്റെ വാദം. കൂടാതെവെബ്സൈറ്റുകള്‍ക്കും പണം സമ്ബാദിക്കുന്നതില്‍ പ്രധാന ഘടകമായി പരസ്യത്തെ കണക്കാക്കുന്നു.
ആഡ് ബ്ലോക്കുകള്‍ക്ക് എതിരെ യൂട്യൂബിൻ്റെ പോരാട്ടം ഫലം കാണുന്നുണ്ടെന്നാണ് സൂചനകള്‍ വ്യക്തമാക്കുന്നത്. പരസ്യങ്ങള്‍ കണ്ട് മടുത്തതിനാല്‍ പരസ്യം നിരോധിക്കാനായി പ്രീമിയം സബ്സ്ക്രിപ്ഷൻ വാങ്ങാൻ കൂടുതല്‍ ഉപയോക്താക്കള്‍ നിർബന്ധിതരാകുന്നുണ്ട്.
