കുട്ടികളെ അതി ക്രൂരമായി മർദിക്കുന്ന അച്ഛൻ്റെ വീഡിയോ ദൃശ്യങ്ങൾ കഴിഞ്ഞ ദിവസങ്ങളിൽ സമൂഹ മാധ്യമങ്ങളിൽ പ്രചരിച്ചതിനെ തുടർന്ന് ഇയാൾക്കെതിരെ കേരള പോലീസ് നടത്തിയ അന്വേഷണം ഫലം കണ്ടു. ഇയാളെ പിടികൂടാൻ ഇന്നലെ സഹായം ചോദിച്ച് പോലീസ് ഒരു വാർത്ത ചെയ്തിരുന്നു.
അതുവഴി ചിലർ നൽകിയ സൂചനകൾ ഉപയോഗിച്ചാണ് ആളെ പിടികൂടിയതെന്ന് പോലീസ് പറയുന്നു. തങ്ങളുടെ ഫേസ്ബുക്ക് പേജിലൂടെ ആണ് കേരള പോലീസ് ഇക്കാര്യം പങ്കുവച്ചിരിക്കുന്നത്.
പോസ്റ്റിൻ്റെ പൂർണ രൂപം വായിക്കാം:-
വൈറൽ വീഡിയോ – കുട്ടിയെ ഉപദ്രവിച്ചയാൾ അറസ്റ്റിൽ
സമൂഹ മാധ്യമങ്ങളിൽ ഏറെ പ്രചരിച്ച വീഡിയോയിൽ കുട്ടികളെ മർദ്ദിക്കുന്ന ആളെ പോലീസ് കണ്ടെത്തി.
ഈ സംഭവത്തെക്കുറിച്ചു അന്വേഷിക്കണമെന്ന ആവശ്യവുമായി ധാരാളം പേർ പ്രസ്തുത വീഡിയോ ഞങ്ങൾക്ക് അയച്ചുതന്നിരുന്നു. അതേത്തുടർന്ന് ഇയാളെ കണ്ടെത്തുന്നതിനായി കേരള പോലീസിന്റെ ഔദ്യോഗിക ഫെയ്‌സ്‌ബുക്ക്‌ പേജിൽ പോസ്റ്റ് ഇടുകയും ചെയ്തു. ദൃശ്യങ്ങളിലുള്ള ആളിനെക്കുറിച്ചു ചിലർ നൽകിയ സൂചനകളിൽ നിന്നും ഇയാൾ ആറ്റിങ്ങൽ സ്വദേശിയായ സുനിൽകുമാർ (45) ആണെന്ന് സോഷ്യൽ മീഡിയ സെല്ലിന് വിവരം ലഭിച്ചു.
തുടർന്ന് ആറ്റിങ്ങൽ Dy SP ക്കും ആറ്റിങ്ങൽ സ്റ്റേഷൻ ഹൗസ് ഓഫീസർക്കും സോഷ്യൽ മീഡിയ സെൽ വിവരം കൈമാറുകയായിരുന്നു.
ആറ്റിങ്ങൽ പോലീസ് ജുവനൈൽ ജസ്റ്റിസ് ആക്ട് പ്രകാരം ഇയാൾക്കെതിരെ കേസെടുക്കുകയും അറസ്റ്റ് ചെയ്യുകയും ചെയ്തു.
