ബത്തേരി: യുവാവിനെ കത്തികൊണ്ട് വെട്ടിയും കമ്പിവടി കൊണ്ടടിച്ചും കൊലപ്പെടുത്താന് ശ്രമിച്ച കൊടുംകുറ്റവാളി പിടിയില്. ബത്തേരി, പുത്തന്കുന്ന്, പാലപ്പട്ടി വീട്ടില് പി.എന്. സംജാദ്(32)നെയാണ് ബത്തേരി പോലീസ് ചൊവ്വാഴ്ച അറസ്റ്റ് ചെയ്തത്. കാപ്പ കേസിലെ പ്രതിയായ ഇയാള്ക്കെതിരെ കൊലപാതക ശ്രമം, അക്രമിച്ചു പരിക്കേല്പ്പിക്കല്, ആംസ് ആക്ട് തുടങ്ങി ബത്തേരി, അമ്പലവയല് പോലീസ് സ്റ്റേഷനുകളിലായി നിരവധി ക്രിമിനൽ കേസുകളുണ്ട്. കുറിച്യാട് ഫോറസ്റ്റ് സ്റ്റേഷനിലും കേസുണ്ട്.
24.11.2025 തീയതി രാത്രിയാണ് ബത്തേരി ഐസക് ബാറിന് മുന്വശം വെച്ച് ബീനാച്ചി സ്വദേശിയെ സംജാദും ക്രൂരമായി അതിക്രമിച്ച് മാരക പരിക്കേല്പ്പിച്ചത്. സംജാദും ബീനാച്ചി സ്വദേശിയുമുള്പ്പെട്ട റിസോര്ട്ടില് അതിക്രമിച്ചു കയറി മര്ദിച്ച കേസുമായി ബന്ധപ്പെട്ട തര്ക്കമാണ് മര്ദനത്തിന് കാരണം. കൈമുട്ടിനും, കണ്ണിനും, ഷോള്ഡറിനും പരിക്കേറ്റ യുവാവ് അത്യസന്ന നിലയില് കോഴിക്കോട് മെഡിക്കല് കോളജില് ചികിത്സയിലാണ്. ഇന്സ്പെക്ടര് എസ്.എച്ച്.ഒ ശ്രീകാന്ത് എസ്. നായര്, എസ്.ഐമാരായ ജെസ്വിന് ജോയ്, എ.എസ്.ഐമാരായ ജയകുമാര്, ഷാജി ജോസഫ്, എസ്.സി.പി.ഒമാരായ സബിത്ത്, മുസ്തഫ, സി.പി.ഒമാരായ സിജോ, നിയാദ്, രാജീവ്, അനില് എന്നിവരാണ് പോലീസ് സംഘത്തിലുണ്ടായിരുന്നത്.
