തിരുവനന്തപുരം: സംസ്ഥാനത്ത് നിയമസഭാ തെരഞ്ഞെടുപ്പു നടക്കുന്ന ഏപ്രില് ഒന്പതിന് പൊതു അവധി. ഏപ്രില് ഒന്പത് വ്യാഴാഴ്ച നെഗോഷ്യബിള് ഇന്സ്ട്രുമെന്റ് ആക്ട് പ്രകാരം പൊതു അവധി പ്രഖ്യാപിച്ച് ഉത്തരവായി.
സംസ്ഥാനത്തെ വാണിജ്യ – സ്വകാര്യ സ്ഥാപനങ്ങളിലെ അടക്കം എല്ലാ ജീവനക്കാര്ക്കും ശമ്പളത്തോടു കൂടിയ അവധിയായിരിക്കും അന്ന് ലഭിക്കുക.
കേരള ഷോപ്പ്സ് ആന്ഡ് കൊമേഴ്സ്യല് എസ്റ്റാബ്ലിഷ്മെന്റ് ആക്ട് പ്രകാരം എല്ലാ സ്വകാര്യ സംരംഭങ്ങള്, സ്വകാര്യ വ്യാവസായിക കേന്ദ്രങ്ങള്, മറ്റു സ്വകാര്യ സ്ഥാപനങ്ങള് എന്നിവയ്ക്കും അവധി ബാധകം. എല്ലാ ജീവനക്കാര്ക്കും ശമ്പളത്തോട് കൂടിയ അവധി നല്കണം.
നിയോജക മണ്ഡലത്തിന് പുറത്തു ജോലി ചെയ്യുന്ന ദിവസവേതന തൊഴിലാളികള്ക്കും ശമ്പളത്തോടു കൂടി അവധി നല്കണം.താല്ക്കാലിക തൊഴിലാളികള് ഉള്പ്പെടെയുള്ള ജീവനക്കാര്ക്കും ശമ്പളത്തോടു കൂടിയ അവധി അനുവദിക്കണമെന്നും ഉത്തരവില് പറയുന്നു.
കേരള നിയമസഭാ തെരഞ്ഞെടുപ്പ് ഏപ്രില് 9ന് നടക്കും. മെയ് നാലിനാണ് വോട്ടെണ്ണല്. കേരളത്തിനൊപ്പം അസം, പുതുച്ചേരി എന്നിവടങ്ങളില് ഏപ്രില് 9ന് തെരഞ്ഞെടുപ്പ് നടക്കും. ഏപ്രില് 23നായിരിക്കും തമിഴ്നാട്ടിലെ തെരഞ്ഞെടുപ്പ്. പശ്ചിമ ബംഗാളില് രണ്ട് ഘട്ടമായാണ് തെരഞ്ഞെടുപ്പ്. ഏപ്രില് 23ന് ഒന്നാം ഘട്ട തെരഞ്ഞെടുപ്പും ഏപ്രില് 29ന് രണ്ടാം ഘട്ട തെരഞ്ഞെടുപ്പും നടക്കും. എല്ലാ സംസ്ഥാനങ്ങളിലും വോട്ടെണ്ണല് മെയ് നാലിനായിരിക്കും.
