നിയമസഭാ തെരഞ്ഞെടുപ്പ് പൂർണമായും പരിസ്ഥിതി സൗഹൃദമാക്കുകയെന്ന ലക്ഷ്യത്തോടെ ജില്ലാ ശുചിത്വ മിഷന് ഒരുക്കിയ പ്ലാസ്റ്റിക് മാന് ശ്രദ്ധേയമാകുന്നു. പ്ലാസ്റ്റിക് ഉപയോഗത്തിന്റെ പ്രത്യാഘാതങ്ങളെക്കുറിച്ച് വോട്ടര്മാരിലും ഉദ്യോഗസ്ഥരിലും അവബോധം സൃഷ്ടിക്കാനാണ് വേറിട്ട പ്രചാരണ പരിപാടി സംഘടിപ്പിച്ചത്. ഉപയോഗശൂന്യമായ പ്ലാസ്റ്റിക് കുപ്പികളും കവറുകളും ശരീരമാസകലം തുന്നിച്ചേര്ത്ത വസ്ത്രം ധരിച്ചാണ് പ്ലാസ്റ്റിക് മാന് ഹരിത സന്ദേശവുമായി പൊതുജനങ്ങള്ക്കിടയിലേക്ക് എത്തുന്നത്. ഓരോരുത്തരും പ്രകൃതിയിലേക്ക് തള്ളുന്ന പ്ലാസ്റ്റിക് മാലിന്യങ്ങള് എങ്ങനെയാണ് നമ്മുടെ ജീവിതത്തെയും പരിസ്ഥിതിയെയും വരിഞ്ഞുമുറുക്കുന്നത് എന്നതിന്റെ ജീവിക്കുന്ന പ്രതീകമായാണ് പ്ലാസ്റ്റിക് മാൻ.
സ്ഥാനാര്ത്ഥികളും രാഷ്ട്രീയ പാര്ട്ടികളും പ്രചാരണത്തിനായി പ്ലാസ്റ്റിക്, ഫ്ളക്സ് എന്നിവയ്ക്ക് പകരം തുണി, കടലാസ് തുടങ്ങിയ പുനരുപയോഗിക്കാന് കഴിയുന്ന വസ്തുക്കള് മാത്രം ഉപയോഗിക്കുന്നുണ്ടെന്ന് ഉറപ്പാക്കുകയാണ് ഈ ഹരിത തെരഞ്ഞെടുപ്പ് ക്യാമ്പയിനിലൂടെ ശുചിത്വ മിഷൻ ലക്ഷ്യമിടുന്നത്. പോളിങ് സ്റ്റേഷനുകളിൽ ഹരിത ചട്ടം പാലിച്ച് ഡിസ്പോസിബിള് പാത്രങ്ങളും പ്ലാസ്റ്റിക് കുപ്പികളും പൂര്ണ്ണമായും ഒഴിവാക്കാനുള്ള ബോധവത്കരണവും നടത്തുന്നു. ജില്ലയിലെ പ്രധാന ബസ് സ്റ്റാന്ഡുകള്, ചന്തകള്, വിദ്യാലയങ്ങള്, തെരഞ്ഞെടുപ്പ് ഓഫീസുകള് എന്നിവിടങ്ങളെല്ലാം പ്ലാസ്റ്റിക് മാന് സന്ദര്ശിക്കുന്നുണ്ട്. ലഘുലേഖകള് വിതരണം ചെയ്യുന്നതിനൊപ്പം പ്ലാസ്റ്റിക് കുറയ്ക്കുന്നതിനെക്കുറിച്ച് ലളിതമായ ക്ലാസുകളും പ്ലാസ്റ്റിക് മാൻ നല്കും.
എന്റെ വോട്ട് എന്റെ അവകാശം; പ്രചാരണ പരിപാടികൾ സംഘടിപ്പിച്ചു.
ജനാധിപത്യ പ്രക്രിയയിൽ വോട്ട് രേഖപ്പെടുത്തേണ്ടതിന്റെ പ്രാധാന്യത്തെക്കുറിച്ച് പൊതുജനങ്ങളെ ബോധവാന്മാരാക്കുകയെന്ന ലക്ഷ്യത്തോടെ മാനന്തവാടിയിലെ വിവിധ മേഖലകളിൽ വോട്ടിങ് പ്രചരണ പരിപാടികൾ സംഘടിപ്പിച്ചു. ഉന്നതികൾ, വായനശാലകൾ, കുടുംബശ്രീ യൂണിറ്റുകൾ എന്നിവിടങ്ങൾ കേന്ദ്രീകരിച്ച് പ്രത്യേക ക്ലാസ്സുകൾ സംഘടിപ്പിച്ചു. എന്റെ വോട്ട് എന്റെ അവകാശം എന്ന സന്ദേശം ഉയർത്തിക്കൊണ്ട് താലൂക്കിലെ പ്രധാന കവലകളിലും പൊതുസ്ഥലങ്ങളിലും പോസ്റ്ററുകൾ പ്രദർശിപ്പിച്ചു. ബോധവത്കരണ പരിപാടിയുടെ ഭാഗമായി വോട്ടർമാർ പ്രതിജ്ഞയെടുത്തു. മാനന്തവാടി തഹസിൽദാർ എൻ പ്രിയയുടെ നേതൃത്ത്വത്തിൽ സ്വീപ് അംഗങ്ങൾ നേതൃത്വം നൽകി.
