കോഴിക്കോട്: ഉടമകള് അറിയാതെ ബാങ്ക് അക്കൗണ്ടുകളില് നിന്ന് പണം തട്ടിയെടുത്തതായി പരാതി. 11 പേര് ഇതിനകം വടകര പോലിസ് സ്റ്റേഷനില് പരാതി നല്കി. 1,85,000 ത്തിലധികം രൂപയാണ് ഇവരുടെ അക്കൗണ്ടുകളില് നിന്ന് നഷ്ടപ്പെട്ടത്.
എഞ്ചിനീയറിംഗ് വിദ്യാര്ഥി വടകര മേപ്പയില് കളരിപ്പറമ്പത്ത് അപര്ണ്ണയ്ക്ക് 20,000 രൂപയാണ് നഷ്ടമായത്. തലശേരി കോ-ഓപ്പറേറ്റീവ് എഞ്ചിനീയറിംഗ് കോളജിലെ മൂന്നാംവര്ഷ വിദ്യാര്ഥിനിയായ അപര്ണ്ണയുടെ സ്കോളര്ഷിപ്പ് തുകയാണ് തട്ടിയെടുത്തത്. ശനിയാഴ്ച വൈകിട്ട് 3.55നാണ് 10,000 രൂപ വീതം രണ്ട് തവണയായി എസ്.ബി.ഐ അക്കൗണ്ടില് നിന്ന് അജ്ഞാതന് പിന്വലിച്ചത്. എ.ടി.എം കാര്ഡ് വഴി പണം പിന്വിച്ചുവെന്നാണ് മൊബൈലില് സന്ദേശമെത്തിയത്. എ.ടി.എം കാര്ഡ് ഇവരുടെ കൈവശം തന്നെയുണ്ട്. പിന് നമ്പര് ആര്ക്കും കൈമാറിയില്ലെന്നും അപര്ണ്ണ പറയുന്നു. വടകര പുതിയാപ്പ്മലയില് തോമസിന്റെ എസ്.ബി.ഐ അക്കൗണ്ടില് നിന്ന് 40,000 രൂപയാണ് നഷ്ടപ്പെട്ടത്. 10,000 രൂപ വീതം നാല് തവണകളായി മിനിറ്റുകളുടെ വ്യത്യാസത്തിലാണ് പിന്വലിച്ചത്.
എ.ടി.എം കാര്ഡിന്റെ വിവരങ്ങളും പിന് നമ്പറും ചോര്ത്തിയുള്ള തട്ടിപ്പാണിതെന്ന് സംശയിക്കുന്നു. ആസൂത്രിതമായുള്ള തട്ടിപ്പിന് പിന്നില് സാങ്കേതിക വിദ്യയില് വളരെ അറിവുള്ളവരാണ്. കൂടുതല്പേര് തട്ടിപ്പിനിരയായിട്ടുണ്ടോ എന്നും അന്വേഷിക്കുന്നുണ്ട്. ചിപ്പുള്ള എ.ടി.എം കാര്ഡിലെ വിവരങ്ങള് എങ്ങനെ ചോര്ത്തിയെന്നാണ് പോലിസ് അന്വേഷിക്കുന്നത്. സൈബര് സെല്ലിന്റെ സഹായവും തേടിയിട്ടുണ്ട്.
