ഇന്ത്യ പുതിയതായി വാങ്ങിയ റഫാല് യുദ്ധവിമാനങ്ങള് പീപ്പിള്സ് ലിബറേഷന് ആര്മിയുടെ അഞ്ചാം തലമുറ യുദ്ധവിമാനമായ ചെങ്ദു ജെ-20 നെക്കാള് മികച്ചതല്ലെന്ന ഗ്ലോബല് ടൈംസിന്റെ റിപ്പോര്ട്ടിനു തക്ക മറുപടിയുമായി മുന് എയര് ചീഫ് മാര്ഷല് ബി.എസ് ധനോവ.അഞ്ചാം തലമുറ യുദ്ധവിമാനങ്ങള്ക്ക് കനാര്ഡുകള് ഇല്ലെന്നിരിക്കെ ചൈനയുടെ ചെങ്ദു ജെ-20 യുദ്ധവിമാനങ്ങള്ക്ക് എന്തിനാണ് കനാര്ഡുകള് എന്നാണ് ധനോവ രാജ്യത്തോട് ചോദിച്ചത്.
ആഫ്റ്റര്ബര്ണറുകള് ഉപയോഗിക്കാതെ മാക്ക് ഒന്നിന് മുകളില് എന്ത് കൊണ്ട് ‘മൈറ്റി ഡ്രാഗണ്’ എന്നറിയപ്പെടുന്ന ചെങ്ദു ജെ-20 വിമാനങ്ങള്ക്ക് സൂപ്പര് ക്രൂയിസ് ചെയ്യാന് സാധിക്കുന്നില്ലായെന്ന ചോദ്യവും മുന് എയര്ചീഫ് മാര്ഷല് ചൈനയോട് ആരാഞ്ഞു.റഫാല് വിമാനങ്ങള് മൂന്നാം തലമുറ യുദ്ധവിമാനമാണെന്നും ചൈനയുടെ ജെ-20 യുമായി അതിനു കിടപിടിക്കാന് കഴിയില്ലെന്നും ചൂണ്ടിക്കാട്ടി ചൈനീസ് സൈനിക വിദഗ്ദ്ധനായ സാങ് ഷുഫെങ് കഴിഞ്ഞ ദിവസം രംഗത്തു വന്നിരുന്നു.സാങിനും കൂടിയുള്ള മറുപടിയാണ് മുന് എയര്ചീഫ് മാര്ഷല് ബിഎസ് ധനോവയുടെ ഈ ചോദ്യങ്ങള്.
