തിരുവനന്തപുരം: കാലവര്ഷത്തിന്റെ രണ്ടാം പകുതി അടുത്തയാഴ്ചയോടെ ശക്തി പ്രാപിക്കും. ഈമാസം നാലോടുകൂടി ബംഗാള് ഉള്കടലിന്റെ മുകളില് ന്യൂനമര്ദ്ധം രൂപപ്പെടാന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് സംസ്ഥാന ദുരന്ത നിവാരണ അതോറിട്ടിയെ അറിയിച്ചിട്ടുണ്ട്. ഇതിന്റെ പശ്ചാത്തലത്തില് അടുത്തയാഴ്ച കാലവര്ഷം കനക്കുമെന്നാണ് കാലവസ്ഥ വിദ്ധഗ്ദര് ചൂണ്ടിക്കാട്ടുന്നത്
എന്നാല് കഴിഞ്ഞ വര്ഷത്തേപ്പോലെ പ്രളയത്തിനു കാരണമായത്രയും തീവ്രതയിലുള്ള മഴയ്ക്ക് സാധ്യതയില്ല.രൂപപ്പെടാന് സാധ്യതയുള്ള ന്യൂനമര്ദ്ധം സാധാരണ ഗതിയില് കാലവര്ഷത്തിലുണ്ടാകാറുള്ളതാണ്. ഇത് അതിശക്തി പ്രാപിക്കില്ല. എന്നാല് ഇതിന് ശേഷവും പസഫിക്ക് സമുദ്രത്തില് നിന്ന് വേറൊരു ന്യൂനമര്ദ്ധ സാധ്യതയും കാണുന്നുണ്ട്.
അത് ശക്തി പ്രാപിക്കുമൊയെന്ന് ഇപ്പോള് പ്രവചിക്കാന് സാധിക്കില്ല.4 ദിവസം മുമ്പ് ബംഗാള് ഉള്ക്കടലില് ഉണ്ടായ അന്തരീക്ഷ ചുഴിയുടെ പശ്ചാത്തലത്തിലാണ് ഇപ്പോള് സംസ്ഥാനത്ത് നല്ല മഴ ലഭിക്കുന്നത്.
ജാഗ്രത
അടുത്ത രണ്ട് ദിവസങ്ങളില് എറണാകുളം,ഇടുക്കി,വയനാട്,കോഴിക്കോട് എന്നിവിടങ്ങളില് ശക്തിയായ മഴയായിരിക്കും. മണ്ണിടിച്ചില് സാധ്യതയുള്ളതിനാല് മലയോര പ്രദേശത്തുള്ളവര് ജാഗ്രത പാലിക്കണം.ഇന്നും നാളെയും പൊഴിയൂര് മുതല് കാസര്കോഡ് വരെയുള്ള കേരള തീരത്ത് 3.3 മീറ്റര് വരെ ഉയരത്തില് തിരമാലയ്ക്ക് സാധ്യതയുണ്ട്.
ശക്തമായ കാറ്റ്
കേരളം,കര്ണാടക, ലക്ഷദ്വീപ്, മാലിദ്വീപ് എന്നിവിടങ്ങളില് നാളെ മുതല് 4 വരെ മണിക്കൂറില് 40 മുതല് 50 കി.മി വരെ വേഗതയില് ശക്തമായ കാറ്റിന് സാധ്യതയുണ്ട്.
യെല്ലോ അലര്ട്ട്
ഇന്നും നാളെയും: പത്തനംതിട്ട, ആലപ്പുഴ, കോട്ടയം, ഇടുക്കി. എറണാകുളം, തൃശ്ശൂര്, മലപ്പുറം, കോഴിക്കോട്, കണ്ണൂര്,കാസര്കോഡ്
നാളെ മാത്രം: വയനാട്
