നടി മോളി കണ്ണമാലി ഇംഗ്ലീഷ് സിനിമയിൽ അരങ്ങേറ്റം കുറിക്കുന്നു. ‘ടുമാറോ’ എന്ന ചിത്രത്തിലാണ് മോളി ഒരു കഥാപാത്രത്തെ അവതരിപ്പിക്കുന്നത്. ഓസ്ട്രേലിയന് ചലച്ചിത്ര രംഗത്തെ മലയാളിയായ ജോയ് കെ മാത്യുവാണ് ചിത്രത്തിന്റെ കഥയും തിരക്കഥയും സംവിധാനവും നിര്വ്വഹിക്കുന്നത്. സിനിമയുടെ പൂജ നാളെ തിരുവനന്തപുരം മ്യൂസിയത്തില് വെച്ച് നടക്കും.
ലോകത്തിലെ എല്ലാ ഭൂഖണ്ഡങ്ങളില് നിന്നും വിവിധ രാജ്യങ്ങളിലെ അഭിനേതാക്കൾ അണിനിരക്കുന്ന സിനിമയാണ് ടുമാറോ. ആന്തോളജി ശൈലിയിൽ ഏഴ് കഥകള് പറയുന്ന സിനിമയിൽ ഒരെണ്ണം ഇന്ത്യയിൽ വെച്ചാണ് ചിത്രീകരിക്കുക. തിരുവനന്തപുരം, കൊച്ചി, ആലപ്പുഴ എന്നിവിടങ്ങളാണ് പ്രധാന ലൊക്കേഷനുകൾ.
ടാസോ, റ്റിസ്സി, എലൈസ്, ഹെലന്, സാസ്കിയ, പീറ്റര്, ജെന്നിഫര്, ഡേവിഡ്, അലന, ജൂലി, ക്ലെ, ദീപ, ജോയ് കെ മാത്യു എന്നിവരും ചിത്രത്തില് മറ്റു വേഷങ്ങളെ അവതരിപ്പിക്കും. ആദം കെ അന്തോണി, ജെയിംസ് ലെറ്റര്, സിദ്ധാര്ത്ഥന്, കാതറിന്, സരോജ് എന്നിവര് ചേര്ന്നാണ് ഛായാഗ്രഹണം നിർവഹിക്കുന്നത്. മേക്കപ്പ്-എലിസബത്ത്, വസ്ത്രാലങ്കാരം-മേരി ബലോലോംഗ്, സംഗീതം-അനീറ്റ, കല സംവിധാനം-മൈക്കിള് മാത്സണ്, എഡിറ്റിംഗ്-ലിന്സണ് റാഫേല്, സൗണ്ട് ഡിസൈനര്-നീല് റേഡ് ഔട്ട്, നിര്മാണ നിയന്ത്രണം-ടി ലാസര്.
