ആറു വയസ്സുകാരൻ ഓൺലൈനായി ഓർഡർ ചെയ്തത് ആയിരം ഡോളറിന്റെ ഭക്ഷണസാധനങ്ങൾ. യൂഎസ്സിലെ മിഷിഗണിലാണ് ഈ സംഭവം നടന്നത്. അച്ഛൻറെ ഫോൺ ഉപയോഗിച്ച് കുട്ടി കളിക്കുന്നതിനിടെ ഓൺലൈൻ ഫുഡ് ഡെലിവറി ആപ്പ് വഴി അബദ്ധത്തിൽ ഭക്ഷണം ഓർഡർ ചെയ്യുകയായിരുന്നു. 80,000 ത്തിൽ അധികം രൂപ വില വരുന്ന ഭക്ഷണ സാധനങ്ങളാണ് ആറു വയസ്സുകാരൻ ഓർഡർ ചെയ്തത്. ഭക്ഷണസാധനങ്ങൾ വീട്ടിലെത്തിയപ്പോയാണ് കുട്ടിയുടെ മാതാപിതാക്കൾ ഇക്കാര്യം അറിഞ്ഞത്.
ശനിയാഴ്ച രാത്രിയാണ് സംഭവം. ഉറങ്ങുന്നതിനു മുൻപായി ആറു വയസ്സുകാരൻ മേസണെ ഗെയിം കളിക്കാനായി അച്ഛൻറെ മൊബൈൽ ഫോൺ വാങ്ങി. എന്നാൽ ഏതാനും മണിക്കൂറുകൾ കഴിഞ്ഞപ്പോൾ തങ്ങളുടെ വീട്ടിലേക്ക് തുടരെത്തുടരെയായി ഭക്ഷണസാധനങ്ങളുടെ ഒരു വലിയ നിര തന്നെ എത്താൻ തുടങ്ങിയെന്നാണ് കുട്ടിയുടെ അച്ഛനായ കീത്ത് സ്റ്റോൺഹൗസ് പറയുന്നത്. പല റസ്റ്റോറന്റുകളിൽ നിന്നായാണ് ആറു വയസ്സുകാരൻ ഭക്ഷണസാധനങ്ങൾ ഓർഡർ ചെയ്തത്.
ആയിരം ഡോളറിന്റെ ഭക്ഷണ സാധനങ്ങളാണ് ഒറ്റ രാത്രികൊണ്ട് അവരുടെ വീട്ടിൽ എത്തിയത്. ഓർഡർ ചെയ്യാതെ തന്നെ ഭക്ഷണസാധനങ്ങൾ വീട്ടിലേക്ക് എത്തുന്നത് എന്താണെന്ന് ആദ്യം മാതാപിതാക്കൾക്ക് മനസ്സില്ല. പിന്നീട് മൊബൈൽ ഫോൺ കുട്ടിയുടെ കയ്യിൽ നിന്നും വാങ്ങി പരിശോധിച്ചപ്പോഴാണ് അവയെല്ലാം ഓർഡർ ചെയ്തത് കുട്ടിയാണെന്ന് മാതാപിതാക്കൾക്ക് മനസ്സിലായത്.
ചെമ്മീൻ, സലാഡുകൾ, ഷവർമ, സാൻഡ്‌വിച്ചുകൾ, ചില്ലി ചീസ് ഫ്രൈകൾ തുടങ്ങി വ്യത്യസ്തങ്ങളായ നിരവധി വിഭവങ്ങൾ ആയിരുന്നു മേസൺന്റെ ഓർഡറിനെ തുടർന്ന് അവരുടെ വീട്ടിലെത്തിയത്. വീട്ടിലെ റഫ്രിജറേറ്ററിൽ സൂക്ഷിച്ചതിനും തങ്ങൾ കഴിച്ചതിനും ശേഷവും നിരവധി ഭക്ഷണ സാധനങ്ങൾ ബാക്കി വന്നതോടെ ഒടുവിൽ അയൽക്കാരെയും സുഹൃത്തുക്കളെയും വിളിച്ച് ഭക്ഷണസാധനങ്ങൾ അവർക്ക് നൽകുകയായിരുന്നു.
