പ്രായമാകുന്നതിനനുസരിച്ച് ചര്‍മ്മത്തില്‍ ചുളിവുകളും വളയങ്ങളും വരാം.
അത്തരം മാറ്റം വരുന്നത് സ്വാഭാവികമാണ്. പ്രായം തോന്നിക്കുന്നതിൽ ചർമ്മ സംരക്ഷണം പ്രധാനഘടകമാണ്.
ചർമ്മത്തിന് പ്രായക്കുറവ് തോന്നിക്കുന്നതിൽ ചർമ്മ സംരക്ഷണത്തിന് മാത്രമല്ല നമ്മൾ നിത്യ ജീവിതത്തിൽ കഴിക്കുന്ന ഭക്ഷണത്തിനും ഇതിൽ പ്രധാന പങ്കുണ്ട്.
ചർമ്മ സംരക്ഷണത്തിനായി പലരും ബ്യൂട്ടി പാർലറുകളിൽ പോവുകയോ പരസ്യങ്ങളുടെ ചുവടു പിടിച്ചു പോയി വിപണിയിൽ സുലഭമായ ക്രീമുകളും മറ്റും ഉപയോഗിക്കാറാണ് പതിവ്.
എന്നാൽ ഇവയൊന്നും തന്നെ വേണ്ടത്ര ഫലം നൽകണമെന്നില്ല ദിവസേന ഒരൽപ്പം സമയം കണ്ടെത്തിയാൽ വീട്ടിൽത്തന്നെ ചെയ്യാവുന്നതേയുള്ളൂ. ചര്‍മ്മം ചെറുപ്പമായിരിക്കാന്‍ വീട്ടില്‍ പരീക്ഷിക്കാവുന്ന ചില ഫേസ് പാക്കുകളെ പരിചയപ്പെടാം…
ഒന്ന്…
പപ്പായ കൊണ്ടുള്ള ഫേസ് പാക്കാണ് ആദ്യമായി ഈ പട്ടികയില്‍ ഉള്‍പ്പെടുന്നത്. പപ്പായയില്‍ അടങ്ങിയിരിക്കുന്ന ആന്റി ഓക്സിഡന്‍റുകള്‍ ചര്‍മ്മത്തിലെ ചുളിവുകളെ തടയുന്നു. ഇതിനായി ആദ്യം വിളഞ്ഞ പപ്പായ നാലായി മുറിച്ചതിന് ശേഷം അതില്‍ നിന്ന് ഒരു ഭാഗം എടുക്കുക. ശേഷം ഒരു ടീസ്പൂണ്‍ തേനും അര ടീസ്പൂണ്‍ നാരങ്ങാ നീരും പപ്പായയും ചേര്‍ത്ത് മിശ്രിതമാക്കുക. ഇത് മുഖത്ത് പുരട്ടി 30 മിനിറ്റിന് ശേഷം കഴുകി കളയാം.
രണ്ട്…
മുട്ടയും ചര്‍മ്മത്തിലെ ചുളിവുകളെ തടയാന്‍ സഹായിക്കും. ഒരു മുട്ടയുടെ വെള്ള, ഒരു ടീസ്പൂണ്‍ തൈര്, ഒരു ടീസ്പൂണ്‍ തേന്‍, ഒരു ടീസ്പൂണ്‍ വെള്ളരിക്ക നീര് എന്നിവ എടുത്ത് നന്നായി മിശ്രിതമാക്കാം. ഇനി ഈ മിശ്രിതം മുഖത്തും കഴുത്തിലും പുരട്ടി 15 മിനിറ്റിന് ശേഷം കഴുകി കളയാം.
മൂന്ന്…
മുഖത്തെ ചുളിവുകള്‍ അകറ്റാന്‍ കോഫിയും സഹായിക്കും. കോഫിയിലിടങ്ങിയിരിക്കുന്ന ആന്റി ഓക്സിഡന്റുകൾ ആണ് ഇതിന് സഹായിക്കുന്നത്. ഇതിനായി കോഫി വെളിച്ചെണ്ണയിലോ ഒലീവ് ഓയിലിലോ ചേര്‍ത്ത് മിശ്രിതമാക്കാം. ശേഷം ഈ മിശ്രിതം മുഖത്ത് പുരട്ടാം. 15 മിനിറ്റിന് ശേഷം കഴുകി കളയാം
