സ്മാർട്ട്ഫോണുകളൊന്നും ഇല്ലാതിരുന്ന കാലം. അറിയാത്ത വഴിയിലൂടെ യാത്ര ചെയ്യുമ്പോൾ പലപ്പോഴും നാം വഴിയറിയുന്നത് നാട്ടുകാരോട് ചോദിച്ചിട്ടായിരിക്കും. എന്നാൽ, ഇപ്പോൾ ഗൂഗിൾ മാപ്പ് പോലെയുള്ള സംവിധാനങ്ങൾ സജീവമാണ്. അതിനാൽ തന്നെ കയ്യിൽ ഫോണും ഇന്റർനെറ്റും ഉണ്ടെങ്കിൽ വഴി കണ്ടുപിടിക്കുക എന്നത് ഇന്ന് അത്ര വലിയ ടാസ്ക് ഒന്നുമല്ല. പക്ഷേ, ഗൂഗിൾ മാപ്പ് തന്നെ വഴി തെറ്റിക്കുന്ന അനേകം സംഭവങ്ങളുണ്ട്. മാപ്പ് പിന്തുടർന്ന് കാട്ടിലും പുഴയിലും വരെ എത്തിപ്പോയ ആളുകളുമുണ്ട്. എന്തായാലും, അങ്ങനെ അബദ്ധത്തിൽ പെടുന്ന ആളുകളെ സഹായിക്കാൻ ഒരു ബോർഡ് വയ്ക്കുകയാണ് ഈ നാട്ടുകാർ ചെയ്തത്.
സോഷ്യൽ മീഡിയയിൽ വൈറലായിരിക്കുന്ന ഈ അറിയിപ്പിൽ പറയുന്നത് ഗൂഗിൾ മാപ്പ് തെറ്റാണ്. ഈ വഴി നിങ്ങളുദ്ദേശിക്കുന്ന സ്ഥലത്തേക്കുള്ളതല്ല എന്നാണ്. ഈ സൈൻബോർഡ് കാണുമ്പോൾ മനസിലാവുന്നത് ഗൂഗിൾ മാപ്പ് നോക്കി വന്ന ഒരുപാട് പേർക്ക് ഇതുപോലെ വഴി തെറ്റിയിട്ടുണ്ട് എന്നാണ്. ’ഗൂഗിൾ മാപ്പ് തെറ്റാണ്, ഈ റോഡ് ക്ലബ്ബ് മഹീന്ദ്രയിലേക്ക് പോകില്ല’ എന്നാണ് സൈൻബോർഡിൽ പറഞ്ഞിരിക്കുന്നത്. നാട്ടുകാർ തന്നെയാണ് ആളുകൾ ഇവിടെയെത്തി വഴി തെറ്റിപ്പോവാതിരിക്കാൻ വേണ്ടി ഇങ്ങനെ ഒരു ബോർഡ് വച്ചിരിക്കുന്നത് എന്നാണ് മനസിലാവുന്നത്.
കൊഡഗു കണക്ട് (Kodagu Connect) ആണ് എക്സിൽ ഈ ചിത്രം പോസ്റ്റ് ചെയ്തിരിക്കുന്നത്. വളരെ പെട്ടെന്നാണ് പോസ്റ്റ് ശ്രദ്ധിക്കപ്പെട്ടത്. നിരവധിപ്പേർ പോസ്റ്റിന് കമന്റുകളുമായി എത്തി. അടുത്തിടെ ഗൂഗിൾ മാപ്പിന് വല്ലാതെ തെറ്റുകൾ പറ്റുന്നുണ്ട് എന്നായിരുന്നു മിക്കവരുടേയും കമന്റ്. എന്തായാലും, ഇത്തരം ഒരു ബോർഡ് നാട്ടുകാർ സ്ഥാപിച്ചിരിക്കുന്നത് കൊണ്ടുതന്നെ ഗൂഗിൾ മാപ്പിന് ഇവിടേക്കിനി ആളുകളെ വഴി തെറ്റിക്കാൻ പറ്റുമെന്ന് തോന്നുന്നില്ല.
