നിങ്ങളുടെ പേരിൽ എത്ര സിംകാർഡുകൾ ഉണ്ട്? നിങ്ങളറിയാതെ മറ്റാരെങ്കിലും നിങ്ങളുടെ പേരിൽ സിം കാർഡ് ഉപയോഗിക്കുന്നുണ്ടോ? എളുപ്പത്തിൽ സർക്കാർ സേവനം ഉപയോഗിച്ച് പരിശോധിക്കേണ്ടത് എങ്ങനെ എന്ന് വായിക്കാം

ഇന്ന് സ്മാർട്ട്ഫോണുകള്‍ ഉപയോഗിക്കുന്നവരാണ് കൂടുതലും. സ്മാർട്ട്ഫോണ്‍ ഉപഭോക്താക്കള്‍ ഭൂരിഭാഗവും ഡ്യുവല്‍ സിം ഉപയോഗിക്കുന്നതിനാല്‍, സിം കാർഡ് വില്‍പ്പനയും വർദ്ധിച്ചിട്ടുണ്ട്. ഇത്തരത്തില്‍ ഒരാള്‍ക്ക് ഒന്നില്‍ കൂടുതല്‍ സിം കാർഡുകള്‍ എടുക്കാൻ കഴിയുന്നതിനാല്‍ തട്ടിപ്പിനുള്ള സാധ്യതയും കൂടുതലാണ്.ചിലപ്പോള്‍ നിങ്ങള്‍ പോലും അറിയാതെ നിങ്ങളുടെ സിം കാർഡ് തട്ടിപ്പിനായി ഉപയോഗിക്കുന്നുണ്ടാകാം.

ആധാർ വിവരങ്ങള്‍ ഉപയോഗിച്ചാണ് തട്ടിപ്പുകാർ സിം കാർഡ് സ്വന്തമാക്കുന്നത്. അതിനാല്‍, ഓരോ വ്യക്തിയും നിർബന്ധമായും തങ്ങളുടെ പേരില്‍ എത്ര സിം കാർഡ് രജിസ്റ്റർ ചെയ്തിട്ടുണ്ടെന്ന് അറിഞ്ഞിരിക്കണം. തട്ടിപ്പുകാർ നിങ്ങളുടെ പേരിലുള്ള സിം കാർഡ് എടുത്ത് തട്ടിപ്പ് നടത്തുന്നുണ്ടോയെന്ന് വളരെവേഗം അറിയാനുള്ള മാർഗമാണിത്.ടെലികോം ഡിപ്പാർട്ട്‌മെന്റിന്റെ പോർട്ടല്‍ സന്ദർശിച്ച്‌ നിങ്ങളുടെ പേരില്‍ എത്ര സിമ്മുകള്‍ സജീവമാണെന്ന് എളുപ്പത്തില്‍ പരിശോധിക്കാനാകും. സഞ്ചാര സാഥി പോർട്ടല്‍ (http://tafcop.sancharsaathi.gov.in) ഇതിനായി ഉപയോഗിക്കാം.

നിങ്ങൾ ചെയ്യേണ്ടത്

http://tafcop.sancharsaathi.gov.in സന്ദർശിക്കുക അല്ലെങ്കില്‍ http://sancharsaathi.gov.in എന്ന സൈറ്റ് ഓപ്പണ്‍ ചെയ്യുക.

സിറ്റിസണ്‍ സെൻട്രിക് സേവനങ്ങളില്‍ ടാപ്പ് ചെയ്യുക.

അതിന് ശേഷം Know Your mobile connections എന്നതില്‍ ക്ലിക്ക് ചെയ്ത് മൊബൈല്‍ കണക്ഷനെ കുറിച്ച്‌ പരിശോധിക്കാം.

ഇതിനായി ആദ്യം 10 അക്ക മൊബൈല്‍ നമ്ബർ നല്‍കി കാപ്ച്ച ടൈപ്പ് ചെയ്യുക. ഇതിന് ശേഷം നിങ്ങളുടെ മൊബൈല്‍ നമ്ബറിലേക്ക് വരുന്ന OTP നല്‍കുക. തുടർന്ന് വിശദാംശങ്ങള്‍ സ്ക്രീനില്‍ കാണിക്കും.

നിങ്ങളുടെ പേരില്‍ എത്ര കാർഡുകള്‍ നല്‍കിയിട്ടുണ്ടെന്ന് ഇവിടെ കാണാം.അനധികൃത നമ്ബർ കണ്ടെത്തിയാല്‍, അത് തടയാനും കഴിയും.