നൃത്തം കഴിഞ്ഞിട്ടേ ശോഭനയ്ക്ക് എന്തുമുള്ളൂ എന്നു പറയാം. അത്രയേറെ പാഷനോടെ നൃത്തത്തെ ഹൃദയത്തിലേറ്റുന്ന കലാകാരിയാണ് ശോഭന. സിനിമയില് നിന്നും ഇടവേളകളെടുത്തു നൃത്തത്തിന്റെ ലോകത്ത് മുഴുകുന്ന ശോഭനയെ നമ്മള് പലകുറി കണ്ടിട്ടുണ്ട്.ശോഭന സ്റ്റേജിലെത്തിയാല്, അതു പിന്നൊരു വിസ്മയക്കാഴ്ചയാണ്.
കഴിഞ്ഞ ദിവസം നിത മുകേഷ് അബാനി കള്ച്ചറല് സെന്ററിലും വിസ്മയകരമായ പ്രകടനമാണ് ശോഭന നടത്തിയത്. ഇതിന്റെ ചിത്രങ്ങളും വീഡിയോകളുമാണ് ഇപ്പോള് ശ്രദ്ധ നേടുന്നത്. കഴുത്തില് തലയോട്ടിമാലയും തലയില് ചന്ദ്രക്കലയും മുഖമാകെ ഭസ്മവും പൂശിയായിരുന്നു ശോഭനയുടെ നൃത്തം. ആ ശിവതാണ്ഡവത്തിനു സാക്ഷിയാവാൻ നടി രേവതി, ബോളിവുഡ് താരം ജാക്കി ഷ്റോഫ് എന്നിവരും എത്തിച്ചേർന്നിരുന്നു.
അതേസമയം, ഒരിടവേളയ്ക്കു ശേഷം മലയാള സിനിമയിലേക്കു തിരിച്ചെത്തുകയാണ് ശോഭന. തരുണ് മൂർത്തി സംവിധാനം ചെയ്യുന്ന ചിത്രത്തില് മോഹൻലാലാണ് ശോഭനയുടെ നായകനാവുന്നത്. മലയാളത്തിന്റെ എക്കാലത്തെയും ഹിറ്റ് ജോഡികളാണ് മോഹൻലാലും ശോഭനയും വർഷങ്ങള്ക്കു ശേഷം ഒരുമിക്കുന്നതിന്റെ സന്തോഷത്തിലാണ് പ്രേക്ഷകരും. ചിത്രത്തിന് താല്ക്കാലികമായി L360 എന്നാണ് പേരു നല്കിയിരിക്കുന്നത്. മോഹൻലാലിന്റെ 360മത്തെ ചിത്രമാണിത്. ശോഭനയും മോഹൻലാലും ഒരുമിക്കുന്ന 56-ാമത്തെ ചിത്രവും.
നാലു വർഷങ്ങള്ക്കു ശേഷമാണ് ശോഭന ഒരു മലയാള സിനിമയില് അഭിനയിക്കുന്നത് എന്ന പ്രത്യേകതയുമുണ്ട് ഈ ചിത്രത്തിന്. വരനെ ആവശ്യമുണ്ട് എന്ന ചിത്രത്തില് കല്യാണി പ്രിയദർശന്റെ അമ്മയായാണ് ഒടുവില് ശോഭന മലയാളത്തില് അഭിനയിച്ചത്. മാമ്ബഴക്കാലം (2004) എന്ന ചിത്രത്തിലാണ് ഏറ്റവുമൊടുവില് ഇരുവരും ജോഡികളായി അഭിനയിച്ചത്. സാഗർ ഏലിയാസ് ജാക്കിയില് (2009) ഇരുവരും ഒന്നിച്ച് അഭിനയിച്ചിരുന്നുവെങ്കിലും ഇരുവരും ജോഡികളായിരുന്നില്ല.
പുതിയ ചിത്രത്തിന്റെ ലൊക്കേഷനില് നിന്നുള്ള ചിത്രങ്ങളും കഴിഞ്ഞദിവസം സമൂഹമാധ്യമങ്ങളില് വൈറലായിരുന്നു.സൗദി വെള്ളക്കയ്ക്ക് ശേഷം തരുണ് മൂർത്തി സംവിധാനംചെയ്യുന്ന ചിത്രമാണിത്. കെ.ആർ സുനിലും തരുണ് മൂർത്തിയും ചേർന്നാണ് തിരക്കഥ ഒരുക്കുന്നത്. രജപുത്ര വിഷ്വല്സ് മീഡിയ അവതരിപ്പിക്കുന്ന ചിത്രം നിർമിക്കുന്നത് എം രഞ്ജിത്ത് ആണ്.
