രാവിലെ ഉറക്കമുണര്ന്നാല് ആദ്യം ഒരു കപ്പ് ചായ. പലരുടെയും ദിവസം തുടങ്ങുന്നത് തന്നെ ചായ കുടിച്ചുകൊണ്ടാണ്. എന്നാല് വെറും വയറ്റില് ചായ കുടിക്കുന്ന ശീലം എല്ലാവര്ക്കും ഒരുപോലെ അനുയോജ്യമാണോ?.
രാവിലെ എഴുന്നേറ്റ ഉടന് ഒരു കപ്പ് ചൂടുചായ കുടിക്കുന്നത് പലരുടെയും പതിവാണ്. ക്ഷീണം മാറാനും ഉന്മേഷം ലഭിക്കാനുമാണ് പലരും ചായയെ ആശ്രയിക്കുന്നത്. എന്നാല് ചിലര്ക്ക് വെറും വയറ്റില് ചായ കുടിക്കുന്നത് അസിഡിറ്റി, വയറിലെ അസ്വസ്ഥത തുടങ്ങിയ പ്രശ്നങ്ങള് ഉണ്ടാകാന് കാരണമാകാം. ചായയിലെ കഫീന് ചില ആളുകളില് വയറിലെ ആസിഡ് ഉല്പാദനം വര്ധിപ്പിക്കുകയും നെഞ്ചെരിച്ചിലോ വയറില് അസ്വസ്ഥതയോ ഉണ്ടാക്കുകയും ചെയ്യാം.
എല്ലാവര്ക്കും പ്രശ്നമുണ്ടാകുമോ?
വെറും വയറ്റില് ചായ കുടിച്ചതുകൊണ്ട് എല്ലാവര്ക്കും ആരോഗ്യപ്രശ്നങ്ങള് ഉണ്ടാകണമെന്നില്ല. എന്നാല് ചായ കുടിച്ചതിന് ശേഷം പതിവായി വയറുവേദന, നെഞ്ചെരിച്ചില്, പുളിച്ചുതികട്ടല്, ഓക്കാനം തുടങ്ങിയ പ്രശ്നങ്ങള് അനുഭവപ്പെടുന്നുണ്ടെങ്കില് വെറും വയറ്റില് ചായ കുടിക്കുന്ന ശീലം ഒഴിവാക്കുന്നതാണ് നല്ലത്. പ്രത്യേകിച്ച് നേരത്തെ തന്നെ വയറുമായി ബന്ധപ്പെട്ട അസ്വസ്ഥതകള് അനുഭവപ്പെടുന്നവര് ചായ കുടിക്കുന്ന സമയം ശ്രദ്ധിക്കണം.
ആദ്യം വെള്ളം പിന്നെ ചായ
രാവിലെ എഴുന്നേറ്റ ഉടന് ചായയ്ക്ക് പകരം ആദ്യം വെള്ളം കുടിക്കുന്നത് നല്ലൊരു ശീലമാണ്. അതിന് ശേഷം ചെറിയൊരു ഭക്ഷണം കഴിച്ച ശേഷം ചായ കുടിക്കാം. ഒരു പഴം, കുറച്ച് നട്സ്, അല്ലെങ്കില് ലളിതമായ പ്രഭാതഭക്ഷണം പോലുള്ളവയ്ക്കൊപ്പം ചായ കുടിക്കുന്നത് വെറും വയറ്റില് ചായ കുടിക്കുന്നതിനെക്കാള് അനുയോജ്യമായിരിക്കും.
ചായയില് പഞ്ചസാരയും ശ്രദ്ധിക്കണം
ചായ ഉണ്ടാക്കുന്ന ആരോഗ്യപ്രശ്നം കേവലം വയറിന്റെ പ്രശ്നം മാത്രമല്ല. ചായയില് അമിതമായി പഞ്ചസാര ചേര്ക്കുന്ന ശീലവും ശ്രദ്ധിക്കണം. ദിവസവും പലതവണ കൂടുതല് പഞ്ചസാര ചേര്ത്ത ചായ കുടിക്കുന്നത് ആകെ പഞ്ചസാരയുടെ അളവ് വര്ധിപ്പിക്കും. അതിനാല് ചായയുടെ എണ്ണം കുറയ്ക്കുന്നതിനൊപ്പം പഞ്ചസാരയുടെ അളവും നിയന്ത്രിക്കുന്നത് നല്ലതാണ്.
