മലപ്പുറം: വളര്‍ത്തുനായയെ ഇരുചക്രവാഹനത്തിന്റെ പിന്നില്‍ കെട്ടിയിട്ട് വാഹനമോടിച്ച്‌ ഉടമ. മലപ്പുറം, ഇടക്കരയിലാണ് നാട്ടുകാര്‍ നോക്കിനില്‍ക്കെ നായയെ കെട്ടിവലിച്ചത്. വണ്ടിക്ക് ഒപ്പമെത്താന്‍ കിണഞ്ഞ് പരിശ്രമിക്കുന്ന നായയെ കണ്ട് നാട്ടുകാര്‍ ഇവര്‍ക്ക് പുറകെ പോയി. വാഹനം നിര്‍ത്താനുള്ള നാട്ടുകാരുടെ ആവശ്യത്തെ അവഗണിച്ച്‌ ഉടമ വീണ്ടും സ്‌കൂട്ടറോടിക്കുകയായിരുന്നു. പെരുങ്കുളം മുതല്‍ മുസ്ല്യാരങ്ങാടി വരെ മൂന്ന് കിലോമീറ്ററോളം ദൂരമാണ് നായയെ കെട്ടിവലിച്ചത്.
നായയെ ഉപേക്ഷിക്കാന്‍ കൊണ്ടുപോയതാണെന്നാണ് സൂചന. നായയ്ക്ക് പരിക്കേറ്റിട്ടുണ്ട്. ഔദ്യോഗികമായി പരാതി ലഭിച്ചിട്ടില്ലെങ്കിലും പൊലീസ് സംഭവത്തില്‍ അന്വേഷണം തുടങ്ങി.
കഴിഞ്ഞ വര്‍ഷം സമാന സംഭവത്തില്‍ കാര്‍ ഡ്രൈവറെ പൊലീസ് അറസ്റ്റ് ചെയ്തിരുന്നു. നായയുടെ കഴുത്തില്‍ കുരുക്കിട്ട് ടാക്സി കാറിന്റെ പിന്നില്‍ കെട്ടിയിട്ട ശേഷം വാഹനം ഓടിച്ച നെടുമ്ബാശേരി പുത്തന്‍വേലിക്കര ചാലാക്ക കോന്നംഹൗസില്‍ യൂസഫിനെയാണ് അറസ്റ്റു ചെയ്തത്.
