Lമാനന്തവാടി: കേരളത്തിലെ പൊതു വിദ്യാലയങ്ങളില്‍ സെക്കന്‍ഡറി വിഭാഗത്തിലെ മികച്ച പി.ടി.എ. ക്കുള്ള അവാര്‍ഡില്‍ മൂന്നാം സ്ഥാനം മാനന്തവാടി ഗവ.വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍ കരസ്ഥമാക്കി. 3,00,000 രൂപയും പ്രശസ്തിപത്രവും അടങ്ങുന്നതാണ് അവാര്‍ഡ്. പി.ടി.എ പ്രസിഡന്റായി പി.പി.ബിനുവും, വൈസ് പ്രസിഡന്റായി അനിത എന്‍.ആറും, എസ്.എം സി. ചെയര്‍മാനായി സി.പി.മുഹമ്മദാലിയും, മദര്‍ പി.ടി.എ പ്രസിഡന്റായി സ്മിത തോമസും നേതൃത്വം നല്‍കുന്ന കമ്മിറ്റിയാണ് അവാർഡിന് അര്‍ഹമായ ത്.കഴിഞ്ഞ രണ്ട് അധ്യായന വര്‍ഷങ്ങളിലെ പ്രവര്‍ത്തന മികവ് പരിഗണിച്ചാണ് അവാര്‍ഡ്. സ്‌കൂളിന്റെ ഭൗതിക സൗകര്യ വികസന പ്രവര്‍ത്തനങ്ങള്‍ക്കൊപ്പം വിദ്യാര്‍ത്ഥികളുടെ അക്കാദമിക മുന്നേറ്റത്തിനും, സുരക്ഷയ്ക്കും, ആരോഗ്യപരിപാലനത്തിനുമുതകുന്ന പ്രവര്‍ത്തനങ്ങളാണ് മുഖ്യമായും ഇക്കാലയളവില്‍ പി.ടി.എ.യുടെ നേതൃത്വത്തില്‍ ഏറ്റെടുത്തു നിര്‍വഹിച്ചത്.
വിദ്യാലയവുമായി ബന്ധപ്പെട്ടസാമൂഹിക പ്രസക്തിയുള്ള വിഷയങ്ങളില്‍ ഇടപെട്ട് പരിഹാരമുണ്ടാക്കുന്നതിനും, കുട്ടികളുടെ കൊഴിഞ്ഞ് പോക്ക് പൂര്‍ണ്ണമായും തടയുന്നതിനും, റിസൽട്ട് വര്‍ദ്ധിപ്പിക്കുന്നതിനും പി.ടി.എ.നിര്‍ണായക പങ്കുവഹിച്ചിട്ടുണ്ട്.
ജനപ്രതിനിധികള്‍, തദ്ദേശ സ്വയംഭരണ സ്ഥാപനങ്ങള്‍, പൂര്‍വ വിദ്യാര്‍ത്ഥികള്‍, അധ്യാപകര്‍, രക്ഷിതാക്കള്‍ എന്നിവരുടെ പിന്തുണയോടെ ഒന്നരക്കോടിയില്‍പ്പരം രൂപയുടെ വികസന പ്രവര്‍ത്തനങ്ങളാണ് പി.ടി.എ.ഇക്കാലയളവില്‍ ഏറ്റെടുത്ത് നിര്‍വഹിച്ചിട്ടുള്ളത്.
സ്‌കൂളിലും പരിസരത്തും വിദ്യാര്‍ത്ഥികളുടെ സുരക്ഷ ഉറപ്പുവരുത്തുന്നതിനായി സെക്യൂരിറ്റി സ്റ്റാഫിന്റെ നിയമനം, സ്‌കൂള്‍ പരിസരം സമ്പൂര്‍ണ സി.സി.ടി.വി. നിരീക്ഷണം എന്നിവ നടപ്പിലാക്കി. സുരക്ഷിതത്വത്തോടൊപ്പം ആരോഗ്യ പരിരക്ഷയും ഉറപ്പുവരുത്തുന്നതിന്റെ ഭാഗമായി പി.ടി.എ.യുടെ മേല്‍നോട്ടത്തില്‍സ്‌കൂള്‍ ക്യാന്റീന്‍ പ്രവര്‍ത്തനം ആരംഭിച്ചു. മെച്ചപ്പെട്ട കായിക ക്ഷമത ലഭ്യമാക്കുന്നതിനും കായിക മത്സരങ്ങളില്‍ മികച്ച പ്രകടനം കാഴ്ചവയ്ക്കുന്നതിനുമായി റെസ് ലിംഗ്, ആര്‍ച്ചറി, ഫുട്ബോള്, വോളിബോള്‍, ക്രിക്കറ്റ്, അത് ലറ്റിക്‌സ് ഇനങ്ങളില്‍ സമ്മര്‍ കോച്ചിംഗ് ക്യാമ്പ് ഉള്‍പ്പെടെപ്രത്യേക പരിശീലന പരിപാടികള്‍ക്ക് നേതൃത്വം നല്‍കാന്‍ പി.ടി.എ.കമ്മിറ്റിക്ക് സാധിച്ചിട്ടുണ്ട്.വിദ്യാലയത്തിലും പൊതുസമൂഹത്തിലും വിവിധങ്ങളായമാര്‍ഗ്ഗത്തിലൂടെ ലഹരിവിരുദ്ധ സന്ദേശ പ്രചാരണങ്ങള്‍ക്ക് പി.ടി.എ.ശക്തമായ നേതൃത്വം നല്‍കിയിട്ടുണ്ട്. വിദ്യാര്‍ത്ഥികളുടെ യാത്രാപ്രശ്‌നം പരിഹരിക്കുന്നതിന് യാത്രാ വാഹന സംവിധാനങ്ങളൊരുക്കിക്കൊണ്ട് കൊഴിഞ്ഞുപോക്ക് പൂര്‍ണമായും തടയുന്നതിന് സാധിച്ചിട്ടുണ്ട് .
മറ്റു പ്രവര്‍ത്തനങ്ങളുടെ ഭാഗമായി വിശാലമായ ഇന്‍ഡോര്‍ ഗെയിംസ് ഓഡിറ്റോറിയം നിര്‍മാണം, ഗ്രൗണ്ട് നവീകരണം, ലാബ് – ലൈബ്രറി നവീകരണ പ്രവര്‍ത്തനങ്ങള്‍ എന്നിവയും പി.ടി.എ.യുടെ നേതൃത്വത്തില്‍ നടപ്പാക്കിയ ശ്രദ്ധേയമായ പ്രവര്‍ത്തനങ്ങളാണ്.
കഴിഞ്ഞ രണ്ട് വര്‍ഷ കാലയളവില്‍ കലാമേളകളിലും, ശാസ്ത്രമേളകളിലും, കായികമേളകളിലും ഉപ ജില്ലാ, ജില്ലാ, സംസ്ഥാന, ദേശീയ തലങ്ങളില്‍ മികച്ച വിജയങ്ങള്‍ കരസ്ഥമാക്കുന്നതിന് പി.ടി.എ യുടെ ഇടപെടല്‍ നിര്‍ണായക ഘടകമായി മാറി. ആറാംതരം മുതല്‍ 10-ാം തരം വരെയും, ഹയര്‍ സെക്കന്‍ഡറി വിഭാഗത്തിലും, വൊക്കേഷണല്‍ ഹയര്‍ സെക്കന്‍ഡറി വിഭാഗത്തിലുമായി രണ്ടായിരത്തില്‍പ്പരം വിദ്യാര്‍ത്ഥികള്‍ പഠിക്കുന്ന മാനന്തവാടി ഗവ.വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍ വയനാട് ജില്ലയിലെ പൊതു വിദ്യാലയങ്ങളില്‍ മുന്‍ നിരയിലുള്ള വിദ്യാലയമാണ്
