വ്യാഴാഴ്ച മുതല്‍ തദ്ദേശ തിരഞ്ഞെടുപ്പിന് നാമനിര്‍ദേശ പത്രിക സമര്‍പ്പിക്കാം.കര്‍ശന കോവിഡ് സുരക്ഷാ മാനദണ്ഡങ്ങളാണ് തിരഞ്ഞെടുപ്പ് കമ്മിഷന്‍ ഏര്‍പ്പെടുത്തിയിരിക്കുന്നത്.
നാമനിര്‍ദേശ പത്രിക സ്വീകരിക്കാനായി വരണാധികാരികള്‍ വലിപ്പവും വായു സഞ്ചാരവുമുള്ള മുറികള്‍ ഏര്‍പ്പെടുത്തും.നാമനിര്‍ദേശ പത്രികാ സമര്‍പ്പണത്തിന് സ്ഥാനാര്‍ത്ഥി നിര്‍ദേശിക്കുന്നയാള്‍ ഉള്‍പ്പെടെ മൂന്ന് പേര്‍ക്ക് മാത്രമേ പ്രവേശന അനുമതിയുള്ളൂ.
കൈകഴുകി,സാനിറ്റൈസര്‍ ഉപയോഗിച്ച ശേഷമേ ഹാളില്‍ പ്രവേശിക്കാവൂ. മാസ്‌ക് നിര്‍ബന്ധമാണ്. സാമൂഹിക അകലം പാലിച്ചു വേണം പത്രിക ഉദ്യോഗസ്ഥര്‍ക്ക് കൈമാറാന്‍. ആവശ്യമെങ്കില്‍ സ്ഥാനാര്‍ത്ഥികള്‍ക്ക് നാമനിര്‍ദേശ പത്രിക സമര്‍പ്പണത്തിന് നേരത്തെ നിശ്ചിതമായ സമയം ബുക്ക് ചെയ്യാം. തിരക്ക് ഒഴിവാക്കാനാണിത്.
