രാജ്യത്ത് മുംബൈ ഉള്‍പ്പെടെയുള്ള നിരവധി പ്രദേശങ്ങളിലെ ജിയോ ഉപയോക്താക്കള്‍ ചൊവ്വാഴ്ച രാവിലെ മുതല്‍ വ്യാപകമായ നെറ്റ്‌വർക്ക് തകരാർ നേരിടുന്നു. ഇതോടെ പലർക്കും മൊബൈല്‍ ഫോണ്‍ സേവനം ലഭ്യമല്ലാതായിരിക്കുകയാണ്. ജനപ്രിയ ടെലികോം ദാതാവായ റിലയൻസ് ജിയോയുടെ ഭാഗത്തു നിന്ന് ഇതുവരെ ഈ പ്രശ്നത്തിന്റെ കാരണം അല്ലെങ്കില്‍ പരിഹാരം എന്നിവയെക്കുറിച്ച്‌ ഔദ്യോഗികമായ ഒരു പ്രസ്താവനയും പുറത്തുവന്നിട്ടില്ല.
സേവന തടസങ്ങള്‍ ട്രാക്ക് ചെയ്യുന്ന വെബ്സൈറ്റായ ഡൗണ്‍ ഡിറ്റക്ടർ (Down Detector) ഈ പ്രശ്‌നം സ്ഥിരീകരിച്ചിട്ടുണ്ട്. സേവന തടസം നേരിടുന്ന ഉപയോക്താക്കള്‍ സോഷ്യല്‍ മീഡിയയില്‍ തങ്ങളുടെ ആശങ്കകള്‍ പ്രകടിപ്പിക്കുന്നുണ്ട്. ജിയോ ആപ്പ് പോലും പ്രവർത്തിക്കാത്ത സ്ഥിതിയാണെന്ന് ഒരു ഉപയോക്താവ് എക്‌സില്‍ കുറിച്ചു. മുംബൈയില്‍ ഉടനീളം ജിയോ മൊബൈല്‍ സേവനം മുടങ്ങിയെന്ന് മറ്റൊരു ഉപയോക്താവും കുറിച്ചു.
ഡൗണ്‍ ഡിറ്റക്റ്റർ പറയുന്നതനുസരിച്ച്‌, സെപ്റ്റംബർ 17 ന് ഉച്ചയ്ക്ക് 12.40 ഓടെ ഏകദേശം 10,372 ജിയോ ഉപയോക്താക്കള്‍ നെറ്റ്‌വർക്ക് പ്രശ്‌നം റിപ്പോർട്ട് ചെയ്തു. ഈ ഉപയോക്താക്കളില്‍ 68% പേർ സിഗ്നല്‍ ഇല്ലാത്തതിനെക്കുറിച്ചും, 18% പേർ മൊബൈല്‍ ഇന്റർനെറ്റ് പ്രശ്‌നങ്ങളെക്കുറിച്ചും, 14% പേർ ജിയോ ഫൈബർ സംബന്ധമായ പ്രശ്‌നങ്ങളെക്കുറിച്ചും പരാതിപ്പെട്ടു.
ജിയോഡൗണ്‍ (Jiodown) എന്ന ഹാഷ്‌ടാഗ് ഇപ്പോള്‍ എക്‌സില്‍ വ്യാപകമായി പ്രചരിക്കുകയാണ്. രാജ്യത്തുടനീളമുള്ള ജിയോ ഉപയോക്താക്കള്‍ ഈ ഹാഷ്‌ടാഗ് ഉപയോഗിച്ച്‌ ട്വീറ്റ് ചെയ്ത് തങ്ങളുടെ സേവനം തടസ്സപ്പെട്ടതിനെക്കുറിച്ച്‌ പരാതിപ്പെടുന്നു. ഉപയോക്താക്കള്‍ തങ്ങളുടെ നിരാശയും രസകരമായ മെമുകളും പങ്കുവെക്കുന്നുണ്ട്.
