കേരളോത്സവം ഫുട്ബോൾ ടൂർണമെന്റ്: നവോദയ തളിപ്പുഴ ജേതാക്കൾ
വൈത്തിരി ഗ്രാമപഞ്ചായത്ത് കേരളോത്സവത്തിന്റെ ഭാഗമായി സംഘടിപ്പിച്ച ഫുട്ബോൾ ടൂർണമെന്റിൽ നവോദയ തളിപ്പുഴ ജേതാക്കളായി. ചുണ്ടേൽ എസ്റ്റേറ്റ് എൽ.ആർ.സി ഫുട്ബോൾ ഗ്രൗണ്ടിൽ നടന്ന ഫൈനൽ മത്സരത്തിൽ എതിരില്ലാത്ത ഒരു ഗോളിന് കോളിച്ചാൽ എഫ്.സിയെ പരാജയപ്പെടുത്തിയാണ് നവോദയ തളിപ്പുഴ കിരീടം സ്വന്തമാക്കിയത്.മത്സരത്തിന്റെ ഒന്നാം പകുതിയിൽ നവോദയ തളിപ്പുഴയുടെ പത്താം നമ്പർ താരം ആനന്ദാണ് വിജയഗോൾ നേടിയത്.മത്സരത്തിനുശേഷം വിജയികൾക്കുള്ള സമ്മാനദാനവും നടന്നു. വൈത്തിരി ഗ്രാമപഞ്ചായത്ത് പ്രസിഡന്റ് സി.വി. രാജൻ പരിപാടി ഉദ്ഘാടനം ചെയ്തു. വാർഡ് മെമ്പർ ശ്രീജിൻ കുമാർ അധ്യക്ഷത വഹിച്ചു. ഗ്രാമപഞ്ചായത്ത് സെക്രട്ടറി ജോസഫ് ഡാരിൽ ജോസ്, രാഷ്ട്രീയ പാർട്ടി പ്രതിനിധികളായ ഫൈസൽ വൈത്തിരി, കെ. പ്രസാദ് തുടങ്ങിയവർ സംസാരിച്ചു.
ചെറിയ ഉള്ളി വില കേട്ടാല്‍ കണ്ണുനിറയും; കിലോയ്ക്ക് 160 രൂപ, കേരളത്തില്‍ വില കുതിക്കുന്നു
സംസ്ഥാനത്ത് ചെറിയ ഉള്ളി വില കുതിക്കുന്നു. കേരളത്തിലെ ചില്ലറവില്‍പ്പന ശാലകളില്‍ കിലോയ്ക്ക് 160 രൂപയായി ഉയർന്നു.തമിഴ്നാട്ടിലെ മൊത്തവിപണികളില്‍ 60 മുതല്‍ 70 രൂപ വരെയാണ് വില. കാലാവസ്ഥ വ്യതിയാനത്തില്‍ വിളവ് കുത്തനെ കുറഞ്ഞത് വിലക്കയറ്റത്തിന് കാരണമെന്ന് കർഷകരും വ്യാപാരികളും പറയുന്നു.പ്രതികൂല കാലാവസ്ഥ കാരണം തമിഴ്നാട്ടിലടക്കം വടക്കെ ഇന്ത്യയില്‍ ഉള്ളി ഉത്പാദന മേഖലകളില്‍ ഇത്തവണ വിളവ് പകുതിയിലധികമായി കുറഞ്ഞിരുന്നു. ഇതിനുപുറമെയാണ് വിളവെടുപ്പിന് ശേഷമുള്ള തൂക്കക്കുറവ് കർഷകർക്ക് ഇരട്ടപ്രഹരമാകുന്നത്. പാടത്തുനിന്ന് ലഭിക്കുമ്പോള്‍ നല്ല ഈർപ്പവും തൂക്കവുമുണ്ടാകുന്ന ചെറിയ ഉള്ളി, ദിവസങ്ങള്‍ പിന്നിട്ട് ഉണങ്ങുമ്പോള്‍ കാര്യമായി ഭാരം കുറയും.പത്ത് കിലോ ഉള്ളി ഉണങ്ങിക്കഴിയുമ്പോള്‍ പലപ്പോഴും ആറും ഏഴും കിലോയായി ചുരുങ്ങുന്ന അവസ്ഥ. ഈ നഷ്ടം നികത്താനും മെച്ചപ്പെട്ട നിരക്ക് ലഭിക്കാനും കർഷകർ ഉള്ളി ഉണക്കി സൂക്ഷിച്ചുവെച്ച്‌ വിപണിയിലെത്തിക്കുകയാണ് പതിവ്. നിലവില്‍ തമിഴ്നാട്ടിലെ മൊത്തവിപണികളില്‍ കിലോയ്ക്ക് 60 മുതല്‍ 70 രൂപ വരെ നിരക്കിലാണ് കച്ചവടമെങ്കിലും കേരളത്തിലേക്ക് എത്തുമ്പോള്‍ ഈ തൂക്കനഷ്ടവും കയറ്റിറക്കുകൂലിയും കടത്തുചെലവും ഇടനിലക്കാരുടെ ലാഭവും കൂടി ചേരുമ്പോള്‍ വില ഇരട്ടിയിലധികമായി മാറുന്നു. ഇതോടെയാണ് കേരളത്തിലെ ചില്ലറവില്‍പ്പന ശാലകളില്‍ ചെറിയ ഉള്ളി വില 150 രൂപ കടക്കുന്നത്.
രാജ്യം ഞെട്ടിയ പ്രഖ്യാപനം, നോട്ട് നിരോധനത്തിന് പത്താണ്ട്; ആദ്യ സർജിക്കൽ സ്ട്രൈക്കെന്ന് വിശേഷണം, ഇന്ന് നേട്ടമായി ഉയർത്തിക്കാട്ടാതെ ബിജെപി
നരേന്ദ്ര മോദിയുടെ നോട്ട് നിരോധന പ്രഖ്യാപനത്തിന് ഇന്നേക്ക് പത്ത് വർഷം. മോദി സർക്കാറിന്റെ ആദ്യ സർജിക്കൽ സ്ട്രൈക്കായി വിശേഷിപ്പിക്കപ്പെട്ടെങ്കിലും പത്ത് വർഷത്തിനിപ്പുറം നടപടി നേട്ടമായി ഉയർത്തിക്കാട്ടാൻ ബിജെപിയും മുതിരുന്നില്ല. നോട്ട് നിരോധനം ഇന്ത്യൻ സമ്പദ് വ്യവസ്ഥയിൽ പ്രതിസന്ധിയുണ്ടാക്കി എന്ന വിമർശനം പ്രതിപക്ഷം തുടരുകയാണ്. ഡിജിറ്റൽ പണമിടപാടിലേക്ക് ജനങ്ങളെ അടുപ്പിക്കാനായി എന്നതാണ് നോട്ട് നിരോധനത്തിന്റെ നേട്ടം.2016 നവംബർ 8 രാത്രി 8 മണി. പ്രധാനമന്ത്രി നരേന്ദ്രമോദി രാജ്യത്തെ അഭിസംബോധന ചെയ്തു. ഇന്ത്യ ഒന്നടങ്കം ഞെട്ടിയ നിമിഷം. അഞ്ഞൂറ് ആയിരം നോട്ടുകൾക്ക് കടലാസിന്റെ വിലപോലുമില്ലാതായി. അന്ന് രാജ്യം മുഴുവൻ പ്രചാരത്തിലുണ്ടായിരുന്ന 15.41 ലക്ഷം കോടി രൂപയുടെ നോട്ടുകളാണ് ഒറ്റയടിക്ക് അസാധുവായത്. ഇത് ആകെ പ്രചാരത്തിലുള്ള നോട്ടുകളുടെ 86.9% മൂല്യം വരും. ജനങ്ങൾക്ക് വലിയ ബുദ്ധിമുട്ട് നടപടി മൂലം ഉണ്ടാകുമെന്ന് കേന്ദ്രസർക്കാറിനും അറിയാമായിരുന്നു. പക്ഷേ കള്ളപ്പണക്കാർക്കെതിരായ യുദ്ധപ്രഖ്യാപനമായി മോദി ജനങ്ങൾക്ക് മുന്നിൽ നടപടിയെ അവതരിപ്പിച്ചു. 50 ദിവസം സമയം തരാൻ ആണ് മോദി ആവശ്യപ്പെട്ടത്. പക്ഷേ നിരോധിച്ച നോട്ടെല്ലാം അതേപടി തിരിച്ചെത്താൻ തുടങ്ങിയതോടെ നടപടി പാളിയെന്ന് വ്യക്തമായി.
സംസ്ഥാനത്ത് അടുത്ത അഞ്ച് ദിവസം മഴ കനക്കും; ഇന്ന് 7 ജില്ലകളിൽ യെല്ലോ അലർട്ട്
തെക്കൻ കേരളത്തിലും മധ്യകേരളത്തിലും അടുത്ത അഞ്ച് ദിവസം മഴ കനക്കുമെന്ന് കാലാവസ്ഥാനീരീക്ഷണ കേന്ദ്രം. ഇന്ന് 7 ജില്ലകളിൽ യെല്ലോ അലർട്ടാണ്. തിരുവനന്തപുരം മുതൽ എറണാകുളം വരെയുള്ള ജില്ലകളിലാണ് മഴ മുന്നറിയിപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളിലാണ് യെല്ലോ അലർട്ട് പ്രഖ്യാപിച്ചിരിക്കുന്നത്. നാളെ ഒരു ജില്ലകളിലും മുന്നറിയിപ്പ് നൽകിയിട്ടില്ല.യെല്ലോ അലർട്ട് നൽകിയിരിക്കുന്ന ജില്ലകലിൽ ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്.കേരള – കർണാടക – ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് തടസ്സമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. അതേസമയം കേരളത്തിൽ ഒറ്റപ്പെട്ടയിടങ്ങളിൽ ഇന്ന് മുതൽ നവംബർ 10 വരെ ഇടിമിന്നലോട് കൂടിയ മഴയ്ക്കും മണിക്കൂറിൽ 30-40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ട്. നവംബർ 11 മുതൽ നവംബർ 12 വരെ ഇടിമിന്നലോട് കൂടിയ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
കൂടിക്കാഴ്ച
കാട്ടിക്കുളം ഗവണ്മെന്റ് ഹായർസെക്കന്ററി സ്കൂളിൽ നിലവിലുള്ള തത്കാലിക ഒഴിവിലേക്ക് ക്ലാർക്ക്, HST അറബിക് തസ്തികകളിൽ കൂടിക്കാഴ്ച നവംബർ 11 ബുധൻ രാവിലെ 10 മണിക്ക് സ്കൂൾ ഓഫീസിൽ നടത്തുന്നു.
ജില്ലാ നെറ്റ്‌ബോൾ ചാമ്പ്യൻഷിപ്പ്: ജി.എച്ച്.എസ്.എസ് പനമരം ജേതാക്കൾ
വയനാട് ജില്ലാ നെറ്റ്‌ബോൾ അസോസിയേഷന്റെ ആഭിമുഖ്യത്തിൽ ബത്തേരി സെന്റ് ജോസഫ്സ് ഹയർ സെക്കൻഡറി സ്കൂളിൽ വെച്ച് നടന്ന ജില്ലാതല സബ് ജൂനിയർ നെറ്റ്‌ബോൾ ചാമ്പ്യൻഷിപ്പിൽ ജി.എച്ച്.എസ്.എസ് പനമരം ജേതാക്കളായി. ആവേശകരമായ ഫൈനൽ പോരാട്ടത്തിൽ കരുത്തരായ ജി.വി.എച്ച്.എസ്.എസ് മുണ്ടേരിയെ പരാജയപ്പെടുത്തിയാണ് പനമരം കിരീടം ചൂടിയത്.സ്കൂളിലെ കായികാധ്യാപകൻ നവാസ് മാസ്റ്ററുടെ നേതൃത്വത്തിലും സീനിയർ താരങ്ങളായ ആൽവിൻ ആർ., തമീം എ. എന്നിവരുടെ പരിശീലനത്തിലുമാണ് ടീം മത്സരത്തിനിറങ്ങിയത്. ചാമ്പ്യൻഷിപ്പ് നേടിയ ടീം അംഗങ്ങളെയും പരിശീലകരെയും സ്കൂൾ പിടിഎയും സ്റ്റാഫ് കൗൺസിലും ചേർന്ന് അഭിനന്ദിച്ചു.
തെരുവുനായ കുറുകെ ചാടി നിയന്ത്രണംവിട്ടു ബൈക്ക് മറിഞ്ഞ് 2 പേർക്ക് പരിക്ക്
വള്ളിയൂർക്കാവ് ബസ് സ്റ്റോപ്പിന് സമീപം തെരുവുനായ കുറുകെ ചാടിയതിനെ തുടർന്ന് ബൈക്ക് നിയന്ത്രണം വിട്ട് മറിഞ്ഞ് അപകടം. അപകടത്തിൽ അഫാസ് (19), ലസിൻ (17) എന്നിവർക്ക് സാരമായി പരിക്കേറ്റു.വിവരമറിഞ്ഞ് മാനന്തവാടി അഗ്നിരക്ഷാ നിലയത്തിൽ നിന്നും സേനാംഗങ്ങൾ സ്ഥലത്തെത്തി പരിക്കേറ്റവർക്ക് പ്രാഥമിക പരിചരണം നൽകി മെഡിക്കൽ കോളേജ് ആശുപത്രിയിലേക്ക് മാറ്റി.Gr.SFRO M ഈ.ജെ. മത്തായി.ഫയർ ആൻഡ് റെസ്ക്യൂ ഓഫീസർമാരായ സുജിത്ത് എം.എസ്., ആനന്ദ് ടി., ഹോം ഗാർഡുമാരായ അലക്സാണ്ടർ പി വി,ശിവദാസൻ കെ. എന്നിവർ രക്ഷാപ്രവർത്തനത്തിൽ ഉണ്ടായിരുന്നത്.
മൂന്നാനക്കുഴിയിൽ തെരുവുനായ ആക്രമണം കുട്ടികളടക്കം 15 പേർക്ക് പരിക്ക്
ഇന്ന് രാവിലെയാണ് ആക്രമണം. നായയെ പിന്നീട് വാഹനമിടിച്ച് ചത്തനിലയിൽ കണ്ടെത്തി. പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ചു.
മുള്ളൻകൊല്ലി ഗ്രാമപഞ്ചായത്ത് കേരളോത്സവത്തിന് ആവേശകരമായ തുടക്കം
പാടിച്ചിറ: മുള്ളൻകൊല്ലി ഗ്രാമപഞ്ചായത്ത് സംഘടിപ്പിക്കുന്ന 2026-ലെ കേരളോത്സവത്തിന് ആവേശകരമായ തുടക്കമായി. കേരളോത്സവത്തിന്റെ ഭാഗമായി സംഘടിപ്പിക്കുന്ന വിവിധ കലാ-കായിക മത്സരങ്ങളുടെയും ഗെയിംസിന്റെയും ഉദ്ഘാടനം ഗ്രാമപഞ്ചായത്ത് പ്രസിഡന്റ് ലിസി സാബു നിർവഹിച്ചു.പാടിച്ചിറ സെന്റ് സെബാസ്റ്റ്യൻസ് യു.പി. സ്കൂൾ ഗ്രൗണ്ടിൽ നടന്ന ക്രിക്കറ്റ് മത്സരം ഉദ്ഘാടനം ചെയ്തുകൊണ്ടാണ് കേരളോത്സവത്തിന് ഔദ്യോഗിക തുടക്കമായത്. വരും ദിവസങ്ങളിൽ ഗ്രാമപഞ്ചായത്തിലെ വിവിധ പ്രദേശങ്ങളിലായി വോളിബോൾ, ബാസ്കറ്റ്ബോൾ, ഫുട്ബോൾ മത്സരങ്ങൾ സംഘടിപ്പിക്കും. അത്ലറ്റിക്സ് മത്സരങ്ങൾ മുള്ളൻകൊല്ലി സെന്റ് മേരീസ് ഹയർ സെക്കൻഡറി സ്കൂൾ ഗ്രൗണ്ടിൽ നടക്കും.കേരളോത്സവത്തിന്റെ ഭാഗമായി വിവിധ മത്സരങ്ങളിൽ പങ്കെടുക്കുന്നതിനായി പഞ്ചായത്തിലെ വിവിധ പ്രദേശങ്ങളിൽ നിന്നായി 250-ഓളം യുവതീ-യുവാക്കൾ രജിസ്റ്റർ ചെയ്തിട്ടുണ്ട്.ഉദ്ഘാടന ചടങ്ങിൽ മൂന്നാം വാർഡ് മെമ്പർ ശ്രീ. സണ്ണി ജോസഫ് അധ്യക്ഷത വഹിച്ചു. ഗ്രാമപഞ്ചായത്ത് ആരോഗ്യ-വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ശ്രീമതി ഷൈനി സണ്ണി, വൈസ് പ്രസിഡന്റ് ശ്രീ. ഷിനു കച്ചിറ എന്നിവർ സംസാരിച്ചു. ജനപ്രതിനിധികൾ, വിവിധ ക്ലബ്ബുകളുടെ ഭാരവാഹികൾ, ഗ്രാമപഞ്ചായത്ത് ജീവനക്കാർ തുടങ്ങിയവർ ചടങ്ങിൽ പങ്കെടുത്തു.
മുന്നിൽ വരുന്ന ടിഷ്യു പേപ്പറുകളിൽ ഒപ്പിടാറില്ല, ഫയൽ പരിശോധിച്ച് വിശദാംശങ്ങൾ പഠിച്ചാണ് തീരുമാനം എടുത്തത്'; മറുപടിയുമായി മുഖ്യമന്ത്രി
വൈദ്യുതി വാങ്ങൽ കരാറുമായി ബന്ധപ്പെട്ട പ്രതിപക്ഷ നേതാവ് പിണറായി വിജയൻ്റെ പ്രതികരണത്തിന് മറുപടിയുമായി മുഖ്യമന്ത്രി വി ഡി സതീശൻ. വൈദ്യുതി കരാർ സംബന്ധിച്ച് വിശദമായ മറുപടി നൽകിയിട്ടും ഉന്നയിച്ച അതേ 'ദുരൂഹ' ആരോപണം പ്രതിപക്ഷ നേതാവ് ഇന്നും ആവർത്തിക്കുകയാണെന്ന് മുഖ്യമന്ത്രി പറഞ്ഞു. 12.50 രൂപയ്ക്ക് ഹിമാചൽ പ്രദേശ് വൈദ്യുതി നൽകാമെന്ന് പറഞ്ഞതിൻ്റെ രേഖകൾ എവിടെയെന്ന് ചോദിച്ചതിന് പ്രതിപക്ഷ നേതാവ് മറുപടി പറഞ്ഞിട്ടുമില്ല. അതിനാൽ അത്തരമൊരു ഓഫർ ഹിമാചൽ പ്രദേശ് നൽകിയിട്ടില്ലെന്ന് പ്രതിപക്ഷ നേതാവിന് ബോധ്യപ്പെട്ടെന്ന് കരുതട്ടെയെന്നും മുഖ്യമന്ത്രി പറഞ്ഞു.ഹിമാചലിൽ നിന്ന് വൈദ്യുതി വാങ്ങുന്നതിന് രാജസ്ഥാൻ ഒക്ടോബർ 18ന് തീരുമാനിച്ചിരുന്നു. ഒക്ടോബർ 28ന് രാജസ്ഥാൻ റെഗുലേറ്ററി കമ്മീഷന് മുന്നിൽ കരാർ നിർദേശങ്ങൾ എത്തുകയും ചെയ്തു. കെഎസ്ഇബി ശുപാർശയിൽ അന്തിമ തീരുമാനം എടുക്കാൻ മുഖ്യമന്ത്രിയെന്ന നിലയിൽ തൻ്റെ പക്കൽ ഫയൽ വരുന്നത് ഒക്ടോബർ 30നാണെന്ന് മുഖ്യമന്ത്രി പറഞ്ഞു.
വൈദ്യുതി കരാറുമായി ബന്ധപ്പെട്ട രേഖകൾ മുഖ്യമന്ത്രി എന്തുകൊണ്ട് പുറത്ത് വിടുന്നില്ല: പിണറായി വിജയൻ
വൈദ്യുതി കരാറുമായി ബന്ധപ്പെട്ട രേഖകൾ മുഖ്യമന്ത്രി എന്തുകൊണ്ട് പുറത്ത് വിടുന്നില്ലെന്ന് പ്രതിപക്ഷ നേതാവ് പിണറായി വിജയൻ. ആരോപണങ്ങൾക്ക് വ്യക്തത നൽകാതെ മുഖ്യമന്ത്രി ഒളിച്ചോടുന്നുവെന്നും പ്രതിപക്ഷ നേതാവ് കുറ്റപ്പെടുത്തി. വിഷയത്തിൽ ദുരൂഹതയും അവ്യക്തതയും സൃഷ്ടിക്കാൻ ശ്രമം നടക്കുന്നുവെന്നും പ്രതിപക്ഷ നേതാവ് ചൂണ്ടിക്കാണിച്ചു.കെഎസ്ഇബി സാങ്കേതികവും സാമ്പത്തികവുമായ പരിശോധന നടത്തി സർക്കാരിന് സമർപ്പിച്ച ഹിമാചൽ വൈദ്യുതി വാങ്ങാനുള്ള പ്രൊപ്പോസൽ അട്ടിമറിച്ചത് എന്തിന്റെ അടിസ്ഥാനത്തിലാണെന്നും പ്രതിപക്ഷ നേതാവ് പിണറായി വിജയൻ ചോദിച്ചു. വകുപ്പ് മന്ത്രിയുടെ അഭിപ്രായം മറികടന്ന് ജിഎൻഎയുമായി കരാറിന് മുഖ്യമന്ത്രി തീരുമാനിച്ചത് ആർക്കുവേണ്ടിയാണെന്ന ചോദ്യവും പ്രതിപക്ഷ നേതാവ് ഉന്നയിച്ചു. ജിഎൻഎയുമായി ബന്ധപ്പെട്ട മുഴുവൻ ഫയലുകളും കത്തുകളും പുറത്തുവിടണമെന്നും പ്രതിപക്ഷനേതാവ് ആവശ്യപ്പെട്ടു. കെഎസ്ഇബി തള്ളിയ ജിഎൻഎ ഓഫർ കണ്ണടച്ച് സ്വീകരിച്ചത് ഏത് മാനദണ്ഡപ്രകാരമാണെന്ന ചോദ്യവും പ്രതിപക്ഷ നേതാവ് ഉന്നയിച്ചു.
ഷാഹിദ് അഫ്രീദിയുടെ ലോകറെക്കോർഡ് തകർത്ത് രോഹിത് ശർമ്മ; ക്രിസ് ഗെയ്‌ലിന്‍റെ നേട്ടത്തിനരികെ 'ഹിറ്റ്‌മാൻ'
ന്യൂസിലൻഡിനെതിരായ രണ്ടാം ഏകദിനത്തിൽ തകർപ്പൻ റെക്കോർഡ് സ്വന്തമാക്കി മുൻ ഇന്ത്യൻ ക്യാപ്റ്റൻ രോഹിത് ശർമ്മ. ഏകദിന ക്രിക്കറ്റിൽ കിവീസിനെതിരെ ഏറ്റവും കൂടുതൽ സിക്സറുകൾ നേടുന്ന ബാറ്ററെന്ന പാകിസ്ഥാൻ മുൻ താരം ഷാഹിദ് അഫ്രീദിയുടെ റെക്കോർഡാണ് രോഹിത് മറികടന്നത്. വെല്ലിംഗ്ടണിൽ മഴ തടസപ്പെടുത്തിയ മത്സരത്തിൽ 28 പന്തിൽ 23 റൺസാണ് രോഹിത് നേടിയത്. രണ്ട് ഫോറുകളും രണ്ട് സിക്സറുകളും അടങ്ങുന്നതായിരുന്നു രോഹിതിന്‍റെ ഇന്നിംഗ്സ്.രണ്ട് സിക്സറുകൾ നേടിയതോടെ ഏകദിനത്തിൽ ന്യൂസിലൻഡിനെതിരെ രോഹിതിന്‍റെ സിക്സർ നേട്ടം 51 ആയി. 34 ഇന്നിംഗ്സുകളിൽ നിന്നാണ് രോഹിത് ഈ നേട്ടത്തിലെത്തിയത്. 35 ഇന്നിംഗ്സുകളിൽ നിന്ന് 50 സിക്സറുകൾ നേടിയ ഷാഹിദ് അഫ്രീദിയെയാണ് രോഹിത് മറികടന്നത്. 45 സിക്സറുകളുമായി വെസ്റ്റ് ഇൻഡീസ് ഇതിഹാസം ക്രിസ് ഗെയ്‌ലാണ് പട്ടികയിൽ മൂന്നാമത്. സനത് ജയസൂര്യ (41), ജോസ് ബട്‌ലർ (29), വിരാട് കോലി (29) എന്നിവരാണ് രോഹിത്തിന് പിന്നില്‍.റെക്കോർഡ് നേട്ടത്തിന് പുറമെ, അന്താരാഷ്ട്ര ക്രിക്കറ്റിൽ എല്ലാ ഫോർമാറ്റുകളിലുമായി (ടെസ്റ്റ്, ഏകദിനം, ടി20) ന്യൂസിലൻഡിനെതിരെ ഏറ്റവും കൂടുതൽ സിക്സറുകൾ നേടിയ ക്രിസ് ഗെയ്‌ലിന്‍റെ സർവ്വകാല റെക്കോർഡിന് തൊട്ടടുത്തെത്താനും രോഹിത്തിനായി. അന്താരാഷ്ട്ര തലത്തിൽ ഗെയ്‌ൽ 87 സിക്സറുകൾ നേടിയിട്ടുള്ളപ്പോൾ രോഹിതിന് നിലവിൽ 85 സിക്സറുകളുണ്ട്. മൂന്ന് സിക്സറുകൾ കൂടി നേടിയാൽ ഗെയ്‌ലിനെയും മറികടന്ന് ഈ പട്ടികയിലും ഒന്നാമതെത്താൻ രോഹിതിന് സാധിക്കും. ഈ പട്ടികയിൽ 64 സിക്സറുകളോടെ അഫ്രീദി മൂന്നാമതും ഓയിൻ മോർഗൻ (53), ഫഖർ സമൻ (52) എന്നിവർ തൊട്ടടുത്ത സ്ഥാനങ്ങളിലുമുണ്ട്.
മെസിയുടെ പേരിലെ തട്ടിപ്പ്: ആന്‍റോക്കും റിപ്പോർട്ടർ കമ്പനിക്കുമെതിരെ കേസെടുത്ത് ഇഡി; എഫ്ഐആർ റദ്ദാക്കണമെന്ന് ആവശ്യപ്പെട്ട് ആന്‍റോ ഹൈക്കോടതിയിൽ
ലയണൽ മെസിയെ കേരളത്തിൽ എത്തിക്കാമെന്ന പേരിൽ നടത്തിയ സാമ്പത്തിക തട്ടിപ്പിൽ ആന്‍റോ അഗസ്റ്റിനും റിപ്പോർട്ടർ ബ്രോഡ്കാസ്റ്റിംഗ് കമ്പനിക്കും മെതിരെ കേസ് എടുത്ത് എൻഫോഴ്സ്മെന്റ് ഡയറക്ട്രേറ്റ് (ഇ ഡി). കള്ളപ്പണം വെളുപ്പിക്കൽ തടയൽ നിയമപ്രകാരമാണ് എൻഫോഴ്സ്മെന്റ് കേസ് ഇൻഫർമേഷൻ റിപ്പോർട്ട് (ECIR) ഫയൽ ചെയ്തത്. ഇ ഡി കേസ് വരുന്നതിന് തൊട്ട് മുന്നെ മെസി കേസിലെ പൊലീസ് എഫ് ഐ ആർ റദ്ദാക്കണമെന്ന് ആവശ്യപ്പെട്ട് ആന്‍റോ അസ്റ്റിൻ ഹൈക്കോടതിയെയും സമീപിച്ചു. സർക്കാറിന് നഷ്ടവും അവമതിപ്പുമുണ്ടാക്കിയതിന് തെളിവില്ലെന്നാണ് വാദം. സർക്കാരിന് ഉണ്ടായ നഷ്ടം എത്രയെന്ന്, അല്ലെങ്കിൽ ഡെപ്പോസിറ്റ് കെട്ടിവെക്കണം എന്ന് കാണിക്കുന്ന കൃത്യമായ വിവരങ്ങൾ ഇല്ല എന്നും ഹർജിയിൽ ചൂണ്ടികാട്ടിയിട്ടുണ്ട്.
മുണ്ടക്കൈ– ചൂരൽമല ഉരുൾപൊട്ടൽ:വാണിജ്യ കെമുണ്ടക്കൈ– ചൂരൽമല ഉരുൾപൊട്ടൽട്ടിടങ്ങൾക്കും സംരംഭകർക്കും നഷ്ടപരിഹാരം
മുണ്ടക്കൈ– ചൂരൽമല ഉരുൾപൊട്ടലിൽ നാശനഷ്ടം സംഭവിച്ച വാണിജ്യ കെട്ടിടങ്ങൾക്കും വ്യാപാര സ്ഥാപനങ്ങൾക്കുമുള്ള നഷ്ടപരിഹാരം നൽകാൻ ജില്ലാ കോ-ഓർഡിനേഷൻ കമ്മിറ്റി തീരുമാനമെടുത്തു. കെട്ടിട നമ്പർ ഉണ്ടായിരുന്ന കെട്ടിടങ്ങൾക്കും ലൈസൻസ് ഉണ്ടായിരുന്ന സംരംഭകർക്കുള്ള നഷ്ടപരിഹാര വിതരണം ഉടൻ ആരംഭിക്കും. കെട്ടിട നമ്പർ ഇല്ലാത്ത കെട്ടിടങ്ങൾ, പെർമിറ്റോ ലൈസൻസോ ഇല്ലാത്ത സ്ഥാപനങ്ങൾ, പെർമിറ്റോ ലൈസൻസോ ആവശ്യമില്ലാതിരുന്ന സ്ഥാപനങ്ങൾ എന്നിവയുടെ കാര്യത്തിൽ പ്രാദേശിക അന്വേഷണം നടത്തി പ്രസക്തമായ തെളിവുകൾ ശേഖരിച്ച് അർഹരായവർക്ക് നഷ്ടപരിഹാരം നൽകാൻ തുടർനടപടി സ്വീകരിക്കും. ആദ്യഘട്ടത്തിൽ കെട്ടിട നമ്പറുള്ള കെട്ടിടങ്ങളുടെ പട്ടിക വിശദമായ പരിശോധന ആരംഭിച്ചു. പരിശോധന പൂർത്തിയാക്കിയവർക്കുള്ള നഷ്ട പരിഹാരം വിതരണം ചെയ്യും. തുടർന്ന് നമ്പർ ഇല്ലാത്തവയുടെയും ലൈസൻസ് ഇല്ലാത്തവയുടെയും കേസുകൾ വിശദമായി പഠിച്ച് ആവശ്യമായ തുടർ നടപടികൾ സ്വീകരിക്കുമെന്നും അധികൃതർ അറിയിച്ചു.
മുണ്ടക്കൈ– ചൂരൽമല ഉരുൾപൊട്ടൽ:വാണിജ്യ കെമുണ്ടക്കൈ– ചൂരൽമല ഉരുൾപൊട്ടൽട്ടിടങ്ങൾക്കും സംരംഭകർക്കും നഷ്ടപരിഹാരം
മുണ്ടക്കൈ– ചൂരൽമല ഉരുൾപൊട്ടലിൽ നാശനഷ്ടം സംഭവിച്ച വാണിജ്യ കെട്ടിടങ്ങൾക്കും വ്യാപാര സ്ഥാപനങ്ങൾക്കുമുള്ള നഷ്ടപരിഹാരം നൽകാൻ ജില്ലാ കോ-ഓർഡിനേഷൻ കമ്മിറ്റി തീരുമാനമെടുത്തു. കെട്ടിട നമ്പർ ഉണ്ടായിരുന്ന കെട്ടിടങ്ങൾക്കും ലൈസൻസ് ഉണ്ടായിരുന്ന സംരംഭകർക്കുള്ള നഷ്ടപരിഹാര വിതരണം ഉടൻ ആരംഭിക്കും. കെട്ടിട നമ്പർ ഇല്ലാത്ത കെട്ടിടങ്ങൾ, പെർമിറ്റോ ലൈസൻസോ ഇല്ലാത്ത സ്ഥാപനങ്ങൾ, പെർമിറ്റോ ലൈസൻസോ ആവശ്യമില്ലാതിരുന്ന സ്ഥാപനങ്ങൾ എന്നിവയുടെ കാര്യത്തിൽ പ്രാദേശിക അന്വേഷണം നടത്തി പ്രസക്തമായ തെളിവുകൾ ശേഖരിച്ച് അർഹരായവർക്ക് നഷ്ടപരിഹാരം നൽകാൻ തുടർനടപടി സ്വീകരിക്കും. ആദ്യഘട്ടത്തിൽ കെട്ടിട നമ്പറുള്ള കെട്ടിടങ്ങളുടെ പട്ടിക വിശദമായ പരിശോധന ആരംഭിച്ചു. പരിശോധന പൂർത്തിയാക്കിയവർക്കുള്ള നഷ്ട പരിഹാരം വിതരണം ചെയ്യും. തുടർന്ന് നമ്പർ ഇല്ലാത്തവയുടെയും ലൈസൻസ് ഇല്ലാത്തവയുടെയും കേസുകൾ വിശദമായി പഠിച്ച് ആവശ്യമായ തുടർ നടപടികൾ സ്വീകരിക്കുമെന്നും അധികൃതർ അറിയിച്ചു.
വിദ്യാർത്ഥികളിൽ പ്രതിരോധത്തിന്റെ കരുത്തുണർത്തി ലഹരിവിരുദ്ധ സെമിനാർ
കൗമാര-യുവതലമുറയെ ലഹരിയുടെ കരാളഹസ്തങ്ങളിൽ നിന്ന് സംരക്ഷിക്കുന്നതിനും ജാഗ്രതയുള്ള ഒരു വിദ്യാർത്ഥി സമൂഹത്തെ വാർത്തെടുക്കുന്നതിനുമായി ഡ്രീം വയനാടിന്റെ നേതൃത്വത്തിൽ കൽപ്പറ്റ എസ്.കെ.എം.ജെ ഹയർസെക്കൻഡറി സ്കൂളിൽ ലഹരിവിരുദ്ധ ബോധവൽക്കരണ സെമിനാർ സംഘടിപ്പിച്ചു. പരിപാടിയുടെ ഔദ്യോഗിക ഉദ്ഘാടനം എക്സൈസ് വിമുക്തി മിഷൻ വയനാട് ജില്ലാ കോർഡിനേറ്റർ എൻ.സി. സജിത്ത്കുമാർ അച്ചൂരാനം നിർവ്വഹിച്ചു.ലഹരി വ്യക്തിയെയും കുടുംബത്തെയും സമൂഹത്തെയും തകർക്കുന്ന മഹാവിപത്താണെന്നും, കൂട്ടുകാരുടെ തെറ്റായ സ്വാധീനങ്ങളിൽ വീഴാതെ ശക്തമായ പ്രതിരോധം തീർക്കാൻ വിദ്യാർത്ഥികൾക്ക് സാധിക്കണമെന്നും അദ്ദേഹം ഉദ്ഘാടന പ്രസംഗത്തിൽ പറഞ്ഞു. കായിക-സർഗ്ഗാത്മക മേഖലകളിലേക്ക് ശ്രദ്ധ തിരിച്ച് നാളെയുടെ മികച്ച കാവലാളുകളായി മാറാൻ കുട്ടികൾ തയ്യാറാകണമെന്നും അദ്ദേഹം ആഹ്വാനം ചെയ്തു.ചടങ്ങിൽ ഡ്രീം വയനാട് ഡയറക്ടർ ഫാദർ ജിതിൻ അദ്ധ്യക്ഷത വഹിച്ചു. എസ്.കെ.എം.ജെ സ്കൂൾ ഹെഡ്മാസ്റ്റർ എം.പി. കൃഷ്ണകുമാർ സ്വാഗതമാശംസിച്ചു. തുടർന്ന് നടന്ന ബോധവൽക്കരണ ക്ലാസിന് ഡ്രീം ജില്ലാ കൗൺസിലർ എൻ.റ്റി. റ്റാനിയ നേതൃത്വം നൽകി; ലഹരിവസ്തുക്കളുടെ ചതിക്കുഴികളെക്കുറിച്ചും മാനസിക കരുത്തോടെ അവയെ നിരസിക്കേണ്ട രീതികളെക്കുറിച്ചും വിദ്യാർത്ഥികൾക്ക് വിശദമായ മാർഗ്ഗനിർദ്ദേശങ്ങൾ നൽകി.പരിപാടിയിൽ ആൻറി നാർക്കോട്ടിക് ക്ലബ് കൺവീനർ എ.ഡി. പ്രവീൺ,എസ്.പി.സി. (സ്റ്റുഡന്റ് പോലീസ് കേഡറ്റ്) ലീഡർ എം.എസ്. ശിഖ എന്നിവർ ആശംസകൾ അർപ്പിച്ചു. ഡ്രീം ജില്ലാ കോർഡിനേറ്റർ പി.എം. അഭിനന്ദ് കൃതജ്ഞത രേഖപ്പെടുത്തി. അധ്യാപകരും വിദ്യാർത്ഥികളും ഉൾപ്പെടെ നിരവധി പേർ സെമിനാറിൽ സജീവമായി പങ്കെടുത്തു.
ദ്വാരകയും മാനന്തവാടിയും ജേതാക്കൾ
മാനന്തവാടി: വയനാട് ജില്ല ശാസ്ത്രമേള സമാപിച്ചപ്പോൾ സ്കൂളുകളിൽ379 പോയന്റുമായി ദ്വാരക സേക്രട്ട് ഹാർട്ട് ഹയർ സെക്കൻഡറി സ്കൂൾ ഓവറോൾ കിരീടം നേടി. 32 4പോയൻറുമായി പിണങ്ങോട് വയനാട് ഓർ ഫനേജ് ഹയർ സസെക്കൻ്ററി സ്കൂൾ രണ്ടാം സ്ഥാനവും 318 പോയന്റു മായിനടവയൽ സെന്റ് തോമസ് സ്കൂൾ മൂന്നാം സ്ഥാനവും നേടി. 1786 പോയന്റോടെ മാനന്തവാടി ഉപജില്ല ഒന്നാം സ്ഥാനത്തും 1723 പോയന്റു മായി ബത്തേരി ഉപജില്ല രണ്ടാം സ്ഥാനവും 1509 പോയന്റുമായി വൈത്തിരി ഉപജില്ല മൂന്നാം സ്ഥാനവും നേടി ഐ.ടി. മേളയിൽ എം.ജി.എം.സ്കൂൾ ഓവറോൾ കിരീടം നേടി.
കേരളത്തിലും പെട്രോളിൽ അനുവദനീയമായ പരിധിയിലും അധികം എഥനോൾ കലർത്തി വിൽക്കുന്നുവെന്ന് പരാതി, അന്വേഷണത്തിന് സർക്കാർ ഉത്തരവ്
പെട്രോൾ ഉൽപ്പന്നങ്ങളിൽ അനുവദനീയമായ പരിധിയിലും അധികമായി എഥനോൾ കലർത്തി വിൽക്കുന്നുണ്ടെന്ന പരാതി ഉയർന്നതിനെ തുടർന്ന് കേരളത്തിലെ പെട്രോൾ പമ്പുകളിൽ വ്യാപക പരിശോധന നടത്താൻ സംസ്ഥാന സർക്കാർ ഉത്തരവിട്ടു. മന്ത്രി അനൂപ് ജേക്കബ് പൊതുവിതരണ ഉപഭോക്തൃകാര്യ കമ്മീഷണർക്കാണ് നിർദ്ദേശം നൽകിയത്. മുഖ്യമന്ത്രി വിഡി സതീശനുമായി നടത്തിയ ചർച്ചയ്ക്ക് ശേഷമാണ് നിർദ്ദേശം. തിരുവനന്തപുരം, എറണാകുളം, കോഴിക്കോട് , കണ്ണൂർ ജില്ലകളിലെ സാമ്പിൾ ശേഖരിച്ച് പരിശോധന നടത്തും. മായം കലർത്തിയിട്ടുണ്ടെന്ന് കണ്ടെത്തിയാൽ കർശന നടപടിക്കാണ് സർക്കാർ നീക്കം. അയൽസംസ്ഥാനമായ കർണാടകയിൽ ഇത്തരത്തിൽ അമിതമായി എഥനോൾ ചേർത്തതായി കണ്ടെത്തിയ പശ്ചാത്തലത്തിലാണ് കേരളത്തിലും നീക്കം.
ഓട്ടോ ചാർജ് വർധനവ് നടപ്പിലാക്കണം: എസ്.ഡി.റ്റി.യു വയനാട് ജില്ലാ കമ്മിറ്റി
ഇന്ധനവില വർധനവും വാഹനങ്ങളുടെ അനുബന്ധ ചെലവുകളും കാരണം ഓട്ടോ തൊഴിലാളികൾ നേരിടുന്ന സാമ്പത്തിക പ്രതിസന്ധി പരിഹരിക്കാൻ കാലോചിതമായ ഓട്ടോ ചാർജ് വർധനവ് ഉടൻ നടപ്പിലാക്കണമെന്ന് എസ്.ഡി.റ്റി.യു വയനാട് ജില്ലാ കമ്മിറ്റി ആവശ്യപ്പെട്ടു. അറ്റകുറ്റപ്പണി ചെലവുകളും ഇൻഷുറൻസ് നിരക്കുകളും കുത്തനെ ഉയർന്ന സാഹചര്യത്തിൽ തൊഴിലാളികളുടെ ന്യായമായ വേതനം ഉറപ്പാക്കാൻ നിരക്ക് വർധന അനിവാര്യമാണെന്ന് ഭാരവാഹികൾ വ്യക്തമാക്കി. ഈ ആവശ്യങ്ങളുന്നയിച്ച് സംയുക്ത സമരസമിതിയുടെ നേതൃത്വത്തിൽ നവംബർ 12-ന് നടക്കുന്ന പ്രക്ഷോഭ പരിപാടികൾക്ക് എസ്.ഡി.ടി.യു പൂർണ്ണ പിന്തുണ പ്രഖ്യാപിച്ചിട്ടുണ്ട്. സമരത്തിൽ സംഘടനയിലെ തൊഴിലാളികൾ സജീവമായി പങ്കാളികളാകുമെന്നും അവകാശ പോരാട്ടങ്ങളിൽ മുന്നിലുണ്ടാകുമെന്നും ജില്ലാ പ്രസിഡന്റ് വി.കെ. മുഹമ്മദലിയും ജനറൽ സെക്രട്ടറി കെ. മമ്മൂട്ടിയും അറിയിച്ചു.
ശ്രുതി ഇനി സന്ദീപിന് സ്വന്തം
മുണ്ടക്കൈ ഉരുൾപൊട്ടൽ ദുരന്തത്തിൽ കുടുംബത്തെ നഷ്‌ടമായ ശ്രുതി വിവാഹിതയായി. ഇന്ന് രാവിലെ ഗുരുവായൂർ ക്ഷേത്രത്തിൽ വച്ചായിരുന്നു വിവാഹം. വയനാട് കളക്‌ടറേറ്റിലെ ജീവനക്കാരനും മാനന്തവാടി സ്വദേശിയുമായ സന്ദീപാണ് വരൻ. മുൻ മന്ത്രി കെ രാജനാണ് ശ്രുതിയുടെ രക്ഷിതാവിന്റെ സ്ഥാനത്ത് നിന്ന് വിവാഹച്ചടങ്ങിൽ പങ്കെടുത്തത്. 2026 ജൂലായിൽ ശ്രുതിയുടെയും സന്ദീപിന്റെയും വിവാഹനിശ്ചയം നടന്നിരുന്നു.എല്ലാം അറിഞ്ഞ് കൈപിടിച്ചയാളാണ് സന്ദീപ്. സന്തോഷത്തോടെ ജീവിക്കാൻ കഴിയണമെന്നാണ് പ്രാർത്ഥനയെന്ന് ശ്രുതി വിവാഹശേഷം പറഞ്ഞു. സന്തോഷത്തോടെ ജീവിതത്തിലേക്ക് കടക്കുന്നുവെന്നും എല്ലാവർക്കും നന്ദിയുണ്ടെന്നും സന്ദീപും പറഞ്ഞു. വയനാട് ദുരന്തത്തിൽ സ്വന്തം കുടുംബത്തിലെ ഒമ്പത് അംഗങ്ങളെയാണ് ശ്രുതിക്ക് നഷ്‌ടപ്പെട്ടത്. പിന്നാലെ പ്രതിശ്രുത വരനും വാഹനാപകടത്തിൽ മരിച്ചിരുന്നു. വാഹനാപകടത്തിൽ ശ്രുതിക്കും ഗുരുതര പരിക്കേറ്റിരുന്നു. പിന്നീട് ശ്രുതിക്ക് സർക്കാർ ജോലി നൽകിയിരുന്നു.
