ഇന്ത്യന്‍ സിനിമയില്‍ അഭിനേതാക്കള്‍ക്ക് വന്‍ തുക പ്രതിഫലം നല്‍കുന്ന ഇന്‍ഡസ്ട്രികളിലൊന്നാണ് തെലുങ്ക്. കഴിഞ്ഞ കുറച്ച് വര്‍ഷങ്ങളായി ഇന്ത്യന്‍ സിനിമയിലെ തന്നെ ബോക്‌സോഫീസ് കളക്ഷനില്‍ റെക്കോഡ് ഇടുന്നത് തെലുങ്ക് സിനിമകളാണ്.ബാഹുബലി തുടങ്ങി വെച്ച ഈ പതിവ് ആര്‍ആര്‍ആറും ദേവരയും എല്ലാം എത്തി നില്‍ക്കുന്നു. തെലുങ്ക് സിനിമയില്‍ നടന്‍മാര്‍ക്കെല്ലാം വന്‍ തുകയാണ് പ്രതിഫലം ലഭിക്കുന്നത്.
നടിമാരും പ്രതിഫലക്കാര്യത്തില്‍ മോശമൊന്നുമല്ല. മലയാളത്തിലെ സൂപ്പര്‍താരങ്ങളേക്കാള്‍ പ്രതിഫലമാണ് തെലുങ്ക് സിനിമയില്‍ നടിമാര്‍ വാങ്ങുന്നത്. ഏറ്റവുമധികം പ്രതിഫലം വാങ്ങുന്ന ഏഴ് തെലുങ്ക് നടിമാരെ കുറിച്ചാണ് ഇനി ഇവിടെ പറയാന്‍ പോകുന്നത്. ഇതില്‍ ഒന്നാം സ്ഥാനത്ത് ഒരു മലയാളി നടിയാണ് എന്നതാണ് ഏറ്റവും ശ്രദ്ധേയം.
നയന്‍താര
സൗത്ത് ഇന്ത്യയിലെ എന്നല്ല ഇന്ത്യന്‍ സിനിമയിലെ തന്നെ ഏറ്റവും കൂടുതല്‍ പ്രതിഫലം വാങ്ങുന്ന താരങ്ങളിലൊരാളാണ് നയന്‍താര. തെലുങ്ക് സിനിമയില്‍ ഏറ്റവും കൂടുതല്‍ പ്രതിഫലം വാങ്ങുന്ന താരവും ലേഡി സൂപ്പര്‍സ്റ്റാര്‍ എന്നറിയപ്പെടുന്ന നയന്‍താര തന്നെ. ഒരു സിനിമയ്ക്ക് 13 മുതല്‍ 15 കോടി വരെയാണ് നയന്‍സ് ഈടാക്കുന്നത്. മനസിനക്കരെ എന്ന മലയാള ചിത്രത്തിലൂടെയാണ് നയന്‍താര കരിയര്‍ ആരംഭിക്കുന്നത്. പിന്നീട് തമിഴിലേക്ക് താരം ചുവടുമാറ്റി, തെലുങ്ക്, കന്നഡ, ഹിന്ദി ഭാഷകളിലും താരം അഭിനയിച്ചു.
അനുഷ്‌ക ഷെട്ടി
തെന്നിന്ത്യയിലെ മറ്റൊരു സൂപ്പര്‍ നായിക അനുഷ്‌ക ഷെട്ടിയാണ് പട്ടികയില്‍ രണ്ടാമത്. ഒരുപിടി മികച്ച കഥാപാത്രങ്ങളെ അവതരിപ്പിക്കാന്‍ അവസരം ലഭിച്ചിട്ടുള്ള അനുഷ്‌ക ഒരു ചിത്രത്തിന് 4 മുതല്‍ 7 കോടി രൂപ വരെയാണ് വാങ്ങുന്നത്. അനുഷ്‌കയുടെ ഏറ്റവും പുതിയ ചിത്രം മിസ് ഷെട്ടി മിസ്റ്റര്‍ പോളിഷെട്ടി ആയിരുന്നു. മലയാളത്തിലെ ബിഗ് ബജറ്റ് ചിത്രമായ കത്തനാരിലും താരം വേഷമിടുന്നുണ്ട്.
പൂജ ഹെഗ്ഡെ
തെലുങ്ക് സിനിമയിലും ബോളിവുഡിലും തന്റേതായ വ്യക്തിമുദ്ര പതിപ്പിച്ച താരമാണ് പൂജ ഹെഗ്ഡെ. നിരവധി ബോക്‌സോഫീസ് ഹിറ്റുകളില്‍ ഭാഗമായ പൂജ ഒരു സിനിമയ്ക്ക് 5 കോടി രൂപയാണ് തെലുങ്കില്‍ പ്രതിഫലം വാങ്ങുന്നത്. സൂപ്പര്‍താരം വിജയിയുടെ അവസാന ചിത്രമായ ദളപതി 69 ല്‍ നായികയായി എത്തുന്നതും പൂജ ഹെഗ്‌ഡെയാണ്.
തൃഷ കൃഷ്ണന്‍
തെന്നിന്ത്യന്‍ സിനിമാ ലോകത്തെ മറ്റൊരു സൂപ്പര്‍ നായികയാണ് തൃഷ കൃഷ്ണന്‍. തെലുങ്കില്‍ ഏറ്റവുമധികം പ്രതിഫലം വാങ്ങുന്ന നടിമാരില്‍ നാലാമതാണ് തൃഷ. ഒരു സിനിമയ്ക്ക് 4 മുതല്‍ 6 കോടി വരെയാണ് അവര്‍ ഈടാക്കുന്നത്. രണ്ട് പതിറ്റാണ്ടിലേറെ നീണ്ട കരിയറില്‍, തമിഴ്, തെലുങ്ക് സിനിമകളിലെ സ്ഥിര സാന്നിധ്യമായി മാറാന്‍ താരത്തിനായിരുന്നു.
രശ്മിക മന്ദാന
‘നാഷണല്‍ ക്രഷ്’ എന്ന് രശ്മിക മന്ദാനയാണ് പട്ടികയില്‍ അഞ്ചാം സ്ഥാനത്തുള്ളത്. ഒരു സിനിമയ്ക്ക് 3 മുതല്‍ 4 കോടി വരെയാണ് താരം പ്രതിഫലം വാങ്ങുന്നത്. ഇന്‍ഡസ്ട്രിയില്‍ താരതമ്യേന പുതിയ ആളാണെങ്കിലും, ഗീത ഗോവിന്ദം, പുഷ്പ: ദി റൈസ് തുടങ്ങിയ ചിത്രങ്ങളിലൂടെ രശ്മിക പെട്ടെന്ന് താരപദവിയിലേക്ക് ഉയര്‍ന്നു.
സാമന്ത റൂത്ത് പ്രഭു
തെന്നിന്ത്യയിലെ മറ്റൊരു മുന്‍നിര നടിയാണ് സാമന്ത. ഒരു ചിത്രത്തിന് ഏകദേശം 3 മുതല്‍ 5 കോടി വരെയാണ് അവര്‍ ഈടാക്കുന്നത്. തെലുഭങ്കിനൊപ്പം തമിഴിലും ശ്രദ്ധേയ സാന്നിധ്യമായ താരം വെബ്‌സീരീസിലും ശ്രദ്ധ കേന്ദ്രീകരിക്കുന്നുണ്ട്.
കാജല്‍ അഗര്‍വാള്‍
ഒരു സിനിമയ്ക്ക് 2 കോടി രൂപ പ്രതിഫലം വാങ്ങുന്ന കാജല്‍ അഗര്‍വാള്‍ പട്ടികയില്‍ ഏഴാം സ്ഥാനത്ത്. തെലുങ്ക്, തമിഴ്, ഹിന്ദി എന്നിവയുള്‍പ്പെടെ ഒന്നിലധികം ഭാഷകളില്‍ വ്യാപിച്ചുകിടക്കുന്ന കരിയര്‍ ഉള്ള ഒരു പാന്‍-ഇന്ത്യന്‍ താരമാണ് കാജല്‍. മഗധീര ഡാര്‍ലിംഗ്, തുപ്പാക്കി എന്നിവ കാജലിന്റെ ചിത്രങ്ങളില്‍ ചിലതാണ്. സിംഗപ്പൂരിലെ മാഡം തുസാഡ്സില്‍ മെഴുക് പ്രതിമ സ്ഥാപിച്ച ആദ്യത്തെ ഇന്ത്യന്‍ നടി കൂടിയാണ് കാജല്‍.
