ഫ്ലൈ ദുബായ് വിമാനത്തിലെ ആക്രമണം: സഹപൈലറ്റിന്‍റെ വിവരങ്ങൾ പുറത്തുവിട്ട് സിഎൻഎൻ
ഫ്ലൈ ദുബായ് വിമാനത്തിൽ ആക്രമണം നടത്തിയ സഹ പൈലറ്റിൻ്റെ വിവരങ്ങൾ പുറത്തുവിട്ട് സിഎൻഎൻ. അക്രമം നടത്തിയ സഹ പൈലറ്റ് ഹമാം അൽ-ഹമ്മാമി എന്ന ഒമാനി പൗരനെന്നാണ് സിഎൻഎൻ റിപ്പോർട്ട്. ഇയാൾ ഒമാൻ എയറിൽ ഏഴ് വർഷം ജോലി ചെയ്തുവെന്ന് ലിങ്ക്ഡ്ഇൻ പ്രൊഫൈലിൽ പറയുന്നു. ലിങ്ക്ഡ്ഇൻ പ്രൊഫൈൽ ഇപ്പോൾ നീക്കം ചെയ്യപ്പെട്ടിരിക്കുകയാണ്. 2025 ജൂണിൽ റോയൽ എയർ മൊറോക്കോയിൽ ചേർന്നു. ഈ വർഷം ആദ്യമാണ് റോയൽ എയർ വിട്ട് ഫ്ലൈ ദുബായിൽ എത്തിയത്. എന്നാൽ സഹപൈലറ്റിനെ സംബന്ധിച്ചും ഇയാൾ എന്തിന് വിമാനത്തിൽ ആക്രമണം നടത്തി എന്നത് സംബന്ധിച്ചും ഔദ്യോഗിക വിവരങ്ങൾ ഇതുവരെ പുറത്തു വന്നിട്ടില്ല.
ആന്റോ അഗസ്റ്റിന്റെ ഭാര്യാമാതാവിനായി അന്വേഷണം ഊർജിതമാക്കി എക്സൈസ്; മുൻകൂർ ജാമ്യത്തിനായി കൽപ്പറ്റ കോടതിയെ സമീപിച്ച് ലില്ലി ജോസ്
വയനാട്: റിപ്പോർട്ടർ ചാനൽ എംഡി ആന്റോ അഗസ്റ്റിന്റെ വീട്ടിൽ നിന്ന് അനധികൃതമായി സൂക്ഷിച്ച മദ്യശേഖരം കണ്ടെത്തിയ കേസിൽ ഭാര്യാമാതാവ് ലില്ലി ജോസ് കൽപ്പറ്റ കോടതിയിൽ മുൻകൂർ ജാമ്യാപേക്ഷ നൽകി. കേസിൽ ചോദ്യം ചെയ്യലിനിടെ അറസ്റ്റ് ചെയ്യാനുള്ള സാധ്യത കണക്കിലെടുത്താണ് ലില്ലി ജോസ് മുൻകൂർ ജാമ്യാപേക്ഷ നൽകിയത്. കോടതി ഈ ജാമ്യാപേക്ഷ ഒക്ടോബർ ഏഴിന് പരിഗണിക്കും.രണ്ടാഴ്ച മുൻപാണ് ആൻ്റോ അഗസ്റ്റിൻ്റെ വീട്ടിൽ നിന്ന് 67 ലിറ്റർ മദ്യം എക്സൈസ് സംഘം പിടിച്ചെടുത്തത്. ഇതോടെ സുൽത്താൻ ബത്തേരി മജിസ്ട്രേറ്റ് കോടതിയിലും ഹൈക്കോടതിയിലും ഈ വീട് തന്റേതല്ലെന്ന് ആന്റോ അഗസ്റ്റിൻ വാദിച്ചിരുന്നു. 2022 ൽ ജപ്തി ചെയ്ത ഈ വീട് തന്റെ ഭാര്യാമാതാവായ ലില്ലി ജോസ് വാങ്ങിയതാണെന്നായിരുന്നു കോടതിയിൽ ആന്റോയുടെ നിലപാട്.ഇതിന്റെ അടിസ്ഥാനത്തിലാണ് ലില്ലി ജോസിലേക്ക് എക്സൈസ് അന്വേഷണം വ്യാപിപ്പിച്ചത്. നോട്ടീസ് നൽകുന്നതിനായി എക്സൈസ് ഉദ്യോഗസ്ഥർ ലില്ലിയുടെ ബത്തേരി കോളിയാടുള്ള വീട്ടിലെത്തിയെങ്കിലും വീട് പൂട്ടിയിട്ട നിലയിലായിരുന്നു. തുടർന്നാണ് ലില്ലിക്കായുള്ള അന്വേഷണം ഊർജിതമാക്കിയത്.
ചരിത്ര നേട്ടത്തിൽ നാല് വയസ്സുകാരൻ : ഈസ ലാമിൻ ഹാഷിർ ബ്രാൻ ഇന്ത്യാ ബുക് ഓഫ് അച്ചീവർ
വയനാട് സ്വദേശിയായ ഹാഷിർ ബ്രാൻ്റെ മകൻ നാല് വയസ്സുകാരൻ ഈസ ലാമിൻ ബ്രാൻ വെറും 4 മിനിറ്റും 31 സെക്കൻ്റും കൊണ്ട് ഐക്യരാഷ്ട്രസഭ അംഗീകരിച്ച 195 രാജ്യങ്ങളുടെ പേരുകളും പതാകളും പറഞ്ഞു കൊണ്ടാണ് ഐ ബി ആർ അച്ചീവർ എന്ന ബഹുമതിക്ക് അർഹനായത്. മാനന്തവാടി സ്വദേശിയും ഖത്തറിൽ എഞ്ചിനീയറുമായ ഹാഷിർ ബ്രാൻ്റെയും ഷബ്നത്തിൻ്റെയും മകനാണ്. വയനാട്ടിലെ രാഷ്ട്രീയ സാമൂഹിക പ്രവർത്തനങ്ങളിൽ നിറ സാന്നിധ്യമായ അലി ബ്രാൻ്റെ പേരകുട്ടിയാണ് ഈസ ലാമിൻ ഹാഷിർ ബ്രാൻ . അടുത്ത ഘട്ടത്തിൽ ലോക നേട്ടം കൈവരിക്കാനുള്ള ഒരുക്കത്തിലാണ് മിടുക്കനായ ഈ ബാലൻ.
‘പുനർജനി’ NSS മിനി ക്യാമ്പിന് സമാപനമായി
സുൽത്താൻ ബത്തേരി: ഗവ. സർവജന വൊക്കേഷണൽ ഹയർ സെക്കൻഡറി സ്കൂൾ NSS യൂണിറ്റിന്റെ നേതൃത്വത്തിൽ ‘പുനർജനി – മിനി ക്യാമ്പ് 2026’ എന്ന പേരിൽ ഒക്ടോബർ 1, 2 തീയതികളിൽ സംഘടിപ്പിച്ച ദ്വിദിന മിനി ക്യാമ്പിന് സമാപനം. “Not Me, But You” എന്ന NSS ആപ്തവാക്യം ഉയർത്തിപ്പിടിച്ച് സേവന-സാമൂഹിക പ്രതിബദ്ധതയ്ക്ക് പ്രാധാന്യം നൽകിയാണ് ക്യാമ്പ് സംഘടിപ്പിച്ചത്.ഒക്ടോബർ 1ന് വൈകിട്ട് 4.30ന് രജിസ്ട്രേഷനോടെയാണ് ക്യാമ്പിന് തുടക്കമായത്. വൈകിട്ട് 5ന് നടന്ന ഉദ്ഘാടന സമ്മേളനം സുൽത്താൻ ബത്തേരി നഗരസഭ പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സൺ ഷിഫാനത്ത് വി.കെ. ഉദ്ഘാടനം ചെയ്തു. PTA പ്രസിഡന്റ് അനീഷ് എൻ.സി. അധ്യക്ഷത വഹിച്ചു. സ്കൂൾ പ്രിൻസിപ്പൽ ദിലിൻ സത്യനാഥ്, NSS പ്രോഗ്രാം ഓഫീസർ സൗമ്യ പി. കുര്യൻ, അധ്യാപകർ, NSS വളണ്ടിയർമാർ, രക്ഷിതാക്കൾ, വിദ്യാർഥികൾ എന്നിവർ പങ്കെടുത്തു.തുടർന്ന് ‘എന്നിലെ ഗാന്ധി’ റാലി, സമത്വജ്വാല, വിവിധ ബോധവത്കരണ പരിപാടികൾ എന്നിവ സംഘടിപ്പിച്ചു. വിദ്യാർഥികളുടെ നേതൃത്വത്തിൽ വൈകുന്നേരം മുതൽ രാത്രി വരെ വിവിധ കലാ-സാംസ്കാരിക പരിപാടികളും അരങ്ങേറി.രണ്ടാം ദിവസം രാവിലെ വ്യായാമം, യോഗ എന്നിവയോടെയാണ് പ്രവർത്തനങ്ങൾ ആരംഭിച്ചത്. തുടർന്ന് ജെൻഡർ പാർലമെന്റിന്റെ ഭാഗമായി ഡിബേറ്റ് സംഘടിപ്പിച്ചു. പ്രഭാതഭക്ഷണത്തിനുശേഷം ‘തപോവനം’ അഗതിമന്ദിരം സന്ദർശിച്ച NSS വളണ്ടിയർമാർ അന്തേവാസികൾക്കായി വിവിധ പരിപാടികൾ സംഘടിപ്പിക്കുകയും ഉപഹാരങ്ങൾ നൽകുകയും ചെയ്തു. സ്ത്രീധനത്തിനെതിരെ ഗൃഹദർശനവും ‘സമദർശനം – സർവേ’യും നടത്തി.കൂട്ടായ പ്രവർത്തനങ്ങളിലൂടെയും ചർച്ചകളിലൂടെയും വിദ്യാർഥികളിൽ നേതൃത്വപാടവം, സഹകരണ മനോഭാവം, സാമൂഹിക ഉത്തരവാദിത്തം എന്നിവ വളർത്തുന്നതിനും ക്യാമ്പ് വേദിയായി.ഉച്ചഭക്ഷണത്തിനുശേഷം ക്യാമ്പ് റിവ്യൂ നടത്തി. രണ്ട് ദിവസത്തെ പ്രവർത്തനങ്ങളും അനുഭവങ്ങളും വിലയിരുത്തിയശേഷം വൈകിട്ട് 3.30ന് സമാപന സമ്മേളനവും പതാക താഴ്ത്തലും നടന്നു.സേവന മനോഭാവവും സാമൂഹിക പ്രതിബദ്ധതയും വിദ്യാർഥികളിൽ വളർത്തിയെടുക്കുന്നതിനായി വൈവിധ്യമാർന്ന പ്രവർത്തനങ്ങൾ ഉൾപ്പെടുത്തി സംഘടിപ്പിച്ച ‘പുനർജനി’ NSS മിനി ക്യാമ്പ് ശ്രദ്ധേയമായി.
ടോൾ പ്ലാസകളിൽ ഇനി വണ്ടി നിർത്തേണ്ട; വരുന്നത് വമ്പൻ മാറ്റം
ദേശീയപാതകളിലെ ടോൾ പിരിവ് കൂടുതൽ വേഗത്തിലും എളുപ്പത്തിലും ആക്കാൻ പുതിയ സംവിധാനവുമായി ദേശീയപാത അതോറിറ്റി ഓഫ് ഇന്ത്യ. തമിഴ്നാട്ടിൽ ആദ്യമായി മൾട്ടി-ലെയ്ൻ ഫ്രീ ഫ്ലോ ടോളിങ് സംവിധാനം നടപ്പിലാക്കി. എൻഎച്ച്-179ബി യിലെ താംബരം-തിണ്ടിവനം പാതയിലെ പരനൂർ ടോൾ പ്ലാസയിലാണ് പുതിയ സംവിധാനം ആരംഭിച്ചിരിക്കുന്നത്. ഇതോടെ ടോൾ നൽകുന്നതിനായി വാഹനങ്ങൾ ടോൾ പ്ലാസയിൽ നിർത്തേണ്ട സാഹചര്യം ഒഴിവാകും.ടോൾ പ്ലാസയിൽ വാഹനം നിർത്തേണ്ടപുതിയ മൾട്ടി-ലെയ്ൻ ഫ്രീ ഫ്ലോ സംവിധാനത്തിന്റെ പ്രധാന പ്രത്യേകത വാഹനങ്ങൾക്ക് ടോൾ പ്ലാസയിൽ നിർത്താതെ തന്നെ കടന്നുപോകാൻ കഴിയുമെന്നതാണ്. വാഹനം സ്വന്തം ലെയ്നിൽ തുടരുന്നതിനിടെ ടോൾ പിരിവ് സ്വമേധയാ പൂർത്തിയാകും. ഇതിനായി ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ ക്യാമറകളും ഫാസ്ടാഗ് സംവിധാനവുമാണ് ഉപയോഗിക്കുന്നത്. ക്യാമറകൾ വാഹനത്തിന്റെ രജിസ്ട്രേഷൻ നമ്പർ തിരിച്ചറിയും. ഫാസ്ടാഗ് വഴി ടോൾ തുക വാഹന ഉടമയുടെ അക്കൗണ്ടിൽ നിന്ന് സ്വമേധയാ ഈടാക്കുകയും ചെയ്യും.
കാപ്പ ചുമത്തി നാടുകടത്തി
വൈത്തിരി : സ്ഥിരം കുറ്റവാളിയെ കാപ്പ നിയമ പ്രകാരം നാട് കടത്തി. വൈത്തിരി, കുന്നത്തിടവക,പന്ത്രണ്ടാം പാലം, എം കെ നിവാസിൽ എം.കെ ദാസൻ(48)നെയാണ് വയനാട് ജില്ലയിൽ നിന്നും നാട് കടത്തിയത്. കഴിഞ്ഞ 7 വർഷത്തിനുള്ളിൽ കൽപ്പറ്റ എക്സൈസ് റേഞ്ച് ഓഫീസിൽ 6 ഓളം കേസുകളും കൂടാതെ വൈത്തിരി സ്റ്റേഷനിലും ഇയാൾക്കെതിരെ അബ്കാരി കേസുകളുണ്ട്. ഇയാൾക്കെതിരെ കേരള സാമൂഹ്യ വിരുദ്ധ പ്രവർത്തനങ്ങൾ (തടയൽ) നിയമം വകുപ്പ് 15(1) (KAAPA)പ്രകാരമാണ് ജില്ലയിൽ നിന്നും 6 മാസത്തേക്ക് നാടുകടത്തിയത്. ഉത്തരവ് ലംഘിച്ചാൽ മൂന്നു വർഷം വരെ തടവു ശിക്ഷയും ലഭിക്കാവുന്ന കുറ്റമാണ്. വയനാട് ജില്ലാ പോലീസ് മേധാവി എസ്. ദേവമനോഹർ ഐ.പി.എസ് സമർപ്പിച്ച റിപ്പോർട്ടിന്റെ അടിസ്ഥാനത്തിൽ കണ്ണൂർ മേഖല ഡി.ഐ.ജി കെ. കാർത്തിക് ഐ.പി.എസിന്റെ ഉത്തരവ് പ്രകാരമാണ് നടപടി.
കുട്ടികളുടെ സൈബർ സുരക്ഷ ഉറപ്പാക്കാൻ 'കിഡ് ഗ്ലോവ്' പദ്ധതിയുമായി വയനാട് പോലീസ്
കുട്ടികൾക്കായി കൂടുതൽ സുരക്ഷിതമായ ഒരു നാളെ പടുത്തുയർത്തുക എന്ന ലക്ഷ്യത്തോടെ കുട്ടികളിലെ സൈബർ സുരക്ഷയും ഡിജിറ്റൽ സാക്ഷരതയും ലക്ഷ്യമിട്ട് കേരള പോലീസ് നടപ്പിലാക്കുന്ന 'കിഡ് ഗ്ലോവ്' (Kid Glove) പദ്ധതിയുടെ ജില്ലാതല ഉദ്ഘാടനവും ബാഡ്ജ് വിതരണവും വയനാട് പോലീസ് കോ-ഓപ്പറേറ്റീവ് സൊസൈറ്റി ഹാളിൽ നടന്നു. ജില്ലയിലെ തിരഞ്ഞെടുക്കപ്പെട്ട 30 ഓളം കുട്ടികളും അവരുടെ രക്ഷിതാക്കളും മറ്റുമായി 80 ഓളം പേർ പരിപാടിയിൽ പങ്കെടുത്തു. വയനാട് ജില്ലാ അഡീഷണൽ എസ്.പിയും സോഷ്യൽ പോലീസിംഗ് നോഡൽ ഓഫീസറുമായ എൻ.ആർ ജയരാജ് ചടങ്ങിന്റെ ഉദ്ഘാടനവും ബാഡ്ജ് വിതരണവും നിർവ്വഹിച്ചു. എ.ഡി.എൻ.ഓ എൻ.കെ ദാമോദരൻ, എസ്. കെ എം ജെ സ്കൂൾ അദ്ധ്യാപിക ബി. ലക്ഷ്മിപ്രിയ എന്നിവർ ആശംസകളർപ്പിച്ചു സംസാരിച്ചു. സൈബർ ക്രൈം പോലീസ് സ്റ്റേഷൻ സബ് ഇൻസ്‌പെക്ടർമാരായ ബിനോയ്‌ സ്കറിയ, എ. വി ജലീൽ, സീനിയർ സിവിൽ പോലീസ് ഓഫീസർ കെ.അബ്ദുൾസലാം തുടങ്ങിയവർ സൈബർ കുറ്റകൃത്യങ്ങൾ, കുട്ടികളിലെ ഡിജിറ്റൽ സാക്ഷരത തുടങ്ങിയ വിഷയങ്ങളിൽ ക്ലാസ്സെടുത്തു. സോഷ്യൽ പോലീസിങ് ഡിവിഷന് കീഴിലെ ഡി -ഡാഡ് സൈക്കോളജിസ്റ്റ് സി.എൻ അനുശ്രീ, ഡി.സി.ആർ.സി കൗൺസിലർമാരായ അനില വി. അബ്രഹാം, കെ.വി ഫാബി, എം.ആർ സംഗീത, ഡി- ഡാഡ് കോർഡിനേറ്റർ ടി.കെ അജിത തുടങ്ങിയവർ സംസാരിച്ചു.
മദ്യ ലഹരിയിൽ ഭാര്യയെ കുത്തി കൊലപ്പെടുത്താൻ ഭർത്താവ് ഒളിവിൽ
വാളാട് അമ്പലക്കുന്ന് പണിയ ഊരിൽ ഇന്നലെ രാത്രി 9 മണിയോടെയാണ് സംഭവം. ഭാര്യ ദീപയെ (28) കൊലപ്പെടുത്താൻ ശ്രമിച്ച ശേഷം ബിനു ഒളിവിൽ പോകുകയായിരുന്നു. പരിക്കേറ്റ ദീപയെ വയനാട് മെഡിക്കൽ കോളേജിൽ പ്രവേശിപ്പിച്ചു. പ്രതിക്കായി ലുക് ഔട്ട് നോട്ടീസ് പുറപ്പെടുവിച്ചിട്ടുണ്ട്.
കാരാപ്പുഴ ഡാമിൽ യുവാവ് മുങ്ങിമരിച്ചു.
കാരാപ്പുഴ ഡാമിൽ കുളിക്കാനിറങ്ങിയ യുവാവ് വെളളത്തിൽ മുങ്ങി മരിച്ചു. ബത്തേരി ബീനാച്ചി സ്വദേശിയായ ഷെഫീഖ് ടി. എം (35) ആണ് മരിച്ചത്. ഡാമിൽ കുളിക്കുന്നതിനിടെ അപകടത്തിൽപ്പെട്ട യുവാവിനെ കരയ്ക്കെത്തിച്ചെങ്കിലും ജീവൻ രക്ഷിക്കാനായില്ല.
മഹാത്മാ ജയന്തി അനുസ്മരണവും, പുഷ്പാർച്ചനയും നടത്തി
മഹാത്മാഗാന്ധിയുടെ 157 മത് ജന്മദിനത്തോടനുബന്ധിച്ച് പ്ലാന്റേഷൻ ലേബർ കോൺഗ്രസിന്റെ നേതൃത്വത്തിൽ മേപ്പാടിയിൽ അനുസ്മരണവും പുഷ്പാർച്ചനയും നടത്തി. എൻ വേണുഗോപാലിന്റെ അധ്യക്ഷതയിൽ ചേർന്ന അനുസ്മരണ പരിപാടി എ.ഐ.സി.സി അംഗം എൻ. ഡി. അപ്പച്ചൻ ഉദ്ഘാടനം ചെയ്തു.കെ. കെ. ജേക്കബ് സത്യപ്രതിജ്ഞ വാചകം ചൊല്ലിക്കൊടുത്തു. ചടങ്ങിൽ മേപ്പാടി ഗ്രാമപഞ്ചായത്ത് അംഗം യൂനുസ്, ഈ. യു. പോൾ, പി. എം. ഇബ്രാഹിം, പി. ഗോപാലകൃഷ്ണൻ ഇ. ബെൽസർ, കെ. എസ്. ശശി, എം. പി. മുഹമ്മദ്, ടി.എ. മുഹമ്മദ്, ഇ. പി. ജോസ്, ബീരാൻ ചെമ്പോത്തറ, അഷറഫ് ഓടത്തോട്, ബൈജു ചോലമല, സെയ്തലവി കുന്നംപറ്റ, പി, ആർ, കൃഷ്ണൻകുട്ടി, ടി ഇ. ബെന്നി, ഡി. സുരേഷ് ബാബു, ജോസുകുട്ടി 46, പി ഡി ജോർജ്, രമേശൻ കെ എം വയൽ, ലീല ടീച്ചർ, അസീസ് ചുളുക്ക, പൗലു ചുങ്കത്തറ, കെ.ടി. അബ്ദുൾ റഹ്മാൻ, ഖാദർ മുണ്ടക്കൈ എന്നിവർ സംസാരിച്ചു.
ശ്രേയസ് ദിനാചരണം സംഘടിപ്പിച്ചു.
മലങ്കര :ബത്തേരി രൂപതയുടെ സാമൂഹ്യ സേവന വിഭാഗമായ ശ്രേയസ് വാർഷിക ദിനാചരണത്തിന്റെ ഭാഗമായി മലങ്കര യൂണിറ്റിൽ ഡയറക്ടർ മോൺസിഞ്ഞോർ ഡോ.ജേക്കബ് ഓലിക്കൽ ശ്രേയസ് പതാക ഉയർത്തി.ബത്തേരി മേഖല പ്രോഗ്രാം ഓഫീസർ പോൾ പി.എഫ്.മുഖ്യസന്ദേശം നൽകി.സെൻട്രൽ പ്രോഗ്രാം ഓഫീസർ ജിലി ജോർജ് ക്ലാസ് എടുത്തു. യൂണിറ്റ് വൈസ് പ്രസിഡന്റ് സുപ്രഭ വിജയൻ അധ്യക്ഷത വഹിച്ചു.മുൻ മേഖല കോർഡിനേറ്റർ ജോയി ഓലിക്കൽ,സെൻട്രൽ,മേഖല പ്രോഗ്രാം ഓഫീസർമാർ, യൂണിറ്റിന്റെ ആദ്യകാല പ്രസിഡന്റ് വർക്കി,സി ഡി ഒ സാബു പി. വി.എന്നിവരെ ഷാൾ അണിയിച്ച് ആദരിച്ചു.യൂണിറ്റ് സെക്രട്ടറി ഷീജ മനു നന്ദി പറഞ്ഞു.മധുര പലഹാര വിതരണത്തോടെ പരിപാടികൾ സമാപിച്ചു.
ഇ-ചെല്ലാൻ പിഴകളിൽ വൻ ഇളവ് പ്രഖ്യാപിച്ച് സർക്കാർ; ഇനി പകുതി തുക നൽകി കുടിശ്ശിക തീർക്കാം
മോട്ടോർ വാഹന നിയമലംഘനങ്ങൾക്ക് പിഴയടയ്ക്കാൻ വിഷമിക്കുന്ന വാഹന ഉടമകൾക്ക് ആശ്വാസമായി സർക്കാരിന്റെ സുപ്രധാന പ്രഖ്യാപനം. കെട്ടിക്കിടക്കുന്ന ഇ-ചെല്ലാൻ പിഴകളിൽ 50 ശതമാനം ഇളവ് അനുവദിച്ചുകൊണ്ട് സർക്കാർ ഉത്തരവിറക്കി. മോട്ടോർ വാഹന വകുപ്പും പൊലീസും ചുമത്തിയ പിഴകളാണ് ഈ ആംനസ്റ്റി പദ്ധതിയിലൂടെ പകുതി നിരക്കിൽ അടച്ചുതീർക്കാൻ സാധിക്കുക.2026 മാർച്ച് 31-നോ അതിനുമുമ്പോ ലഭിച്ചതും ഇതുവരെ കോടതിയിലേക്ക് കൈമാറാത്തതുമായ ഇ-ചെല്ലാനുകൾക്കാണ് ഈ ഇളവ് ബാധകമാകുന്നത്.ആശ്വാസകരമായ തീരുമാനം കോടികളുടെ കുടിശ്ശിക കാരണംസംസ്ഥാനത്ത് കോടിക്കണക്കിന് രൂപയുടെ പിഴയാണ് ഇനിയും ഒടുക്കാനുള്ളത്. 2026 മാർച്ച് 31 വരെയുള്ള കണക്കുകൾ പ്രകാരം ഒരുകോടിയിലധികം (1,00,22,255) ഇ-ചെല്ലാനുകളാണ് സംസ്ഥാനത്ത് കെട്ടിക്കിടക്കുന്നത്. ഇതിലൂടെ 907 കോടിയിലധികം രൂപയാണ് (9,07,74,86,813 രൂപ) സർക്കാരിലേക്ക് പിഴയിനത്തിൽ ഈടാക്കാനുള്ളത്.ഉയർന്ന പിഴത്തുക കാരണം പല വാഹന ഉടമകളും തുക അടയ്ക്കാൻ തയ്യാറാകാതിരിക്കുന്നതും, ഇത് വാഹനങ്ങളുടെ ഉടമസ്ഥാവകാശ കൈമാറ്റം (Ownership Transfer), ഫിറ്റ്നസ് സർട്ടിഫിക്കറ്റ് പുതുക്കൽ എന്നിവയ്ക്ക് തടസ്സമാകുന്നതും സർക്കാരിന്റെ ശ്രദ്ധയിൽപ്പെട്ടിരുന്നു. ഈ പ്രതിസന്ധിക്ക് പരിഹാരം കാണുക ലക്ഷ്യമിട്ടാണ് പുതിയ ആംനസ്റ്റി പദ്ധതി.ഇളവ് ലഭിക്കുന്നത് ആർക്ക്: 2026 മാർച്ച് 31-ന് മുൻപ് ലഭിച്ചതും ഇതുവരെ കോടതിക്ക് കൈമാറാത്തതുമായ ഇ-ചെല്ലാനുകൾക്ക്.പണം അടയ്ക്കേണ്ട കാലാവധി: വരുന്ന നവംബർ 1 മുതൽ അടുത്ത വർഷം ജനുവരി 31 വരെ പിഴയൊടുക്കി കുടിശ്ശിക തീർക്കാം.ശ്രദ്ധിക്കുക: 2026 മാർച്ച് 31-ന് ശേഷം ലഭിച്ച പുതിയ ഇ-ചെല്ലാനുകൾക്ക് ഈ ഇളവ് ലഭിക്കില്ല. പുതിയ ചെല്ലാനുകളിൽ കർശനമായി പിഴ ഈടാക്കാനാണ് ഗതാഗത വകുപ്പിന്റെ നിർദ്ദേശംലഭിച്ച ഈ സുവർണ്ണാവസരം ഉപയോഗപ്പെടുത്തി വാഹന ഉടമകൾക്ക് വലിയ സാമ്പത്തിക ഭാരമില്ലാതെ തങ്ങളുടെ ഇ-ചെല്ലാൻ കുടിശ്ശികകൾ തീർപ്പാക്കാവുന്നതാണ്.
മാനന്തവാടി ഉപജില്ല സ്കൂൾ കായിക മേള സമാപിച്ചു
മരവയൽ: വടക്കേ വയനാട്ടിലെ 1700 ലധികം സ്കൂൾ കായിക പ്രതിഭകൾ മാറ്റുരച്ച മാനന്തവാടി ഉപജില്ല കായിക മേള സമാപിച്ചു.രണ്ട് ദിനങ്ങളിലായി മരവയൽ ജില്ല സ്റ്റേഡിയത്തിൽ നടന്ന കായിക മേള പരാതിരഹിത മത്സരമായി അംഗീകാരം നേടി. അധ്യാപക സംഘടനകളുടെ നേതൃത്വത്തിൽ വിവിധ ഉപസമിതികൾ രൂപീകരിച്ച് മികച്ച രീതിയിലാണ് കായിക മേളയുടെ വിജയത്തിനായി പ്രവർത്തിച്ചത്.ഏച്ചോം സർവ്വോദയ ഹയർ സെക്കണ്ടറി സ്കൂളും പള്ളിക്കുന്ന് ലൂർദ് മാതാ ഹയർസെക്കണ്ടറി സ്കൂളും സംയുക്തമായാണ് കായിക മേളയ്ക്ക് ആതിഥേയത്വംവഹിച്ചത്. സമാപന സമ്മേളനം മാനന്തവാടി ബ്ലോക്ക് പഞ്ചായത്ത് പ്രസിഡന്റ് മീനാക്ഷി രാമൻ ഉദ്ഘാടനംചെയ്തു. പനമരം പഞ്ചായത്ത് പ്രസിഡൻ്റ് ലക്ഷ്‌മി ആലക്ക മറ്റം അധ്യക്ഷത വഹിച്ചു. പനമരം ബ്ലോക്ക് പഞ്ചായത്ത് പ്രസിഡന്റ് ദിലീപ് കുമാർ സമ്മാനം വിതരണം നടത്തി.
കേരളത്തിലെ സ്വർണ വിലയിൽ വർധനവ്, ഇന്ന് ഒരു പവന് കൂടിയത് 760 രൂപ
സംസ്ഥാനത്ത് സ്വർണ വിലയിൽ വർധനവ്. ഇന്ന് 22 കാരറ്റ് ഒരു ഗ്രാം സ്വർണത്തിന് 95 രൂപയും പവന് 760 രൂപയുമാണ് കൂടിയിരിക്കുന്നത്. ഇതോടെ ഇന്ന് കേരളത്തിൽ ഒരു ഗ്രാം സ്വർണം 13,775 രൂപയിലും ഒരു പവൻ 1,10,200 രൂപയിലുമാണ് വ്യാപാരം നടക്കുന്നതെന്ന് കേരളാ ഗോൾഡ് ആന്റ് സിൽവർ മെർച്ചന്റ്സ് അസോസിയേഷൻ അറിയിച്ചു. ഇന്നലെ സംസ്ഥാനത്ത് പവന് 240 രൂപയോശളം കുറഞ്ഞ് ഗ്രാമിന് 13,680 രൂപയും പവന് 1,09,440 രൂപയുമായിരുന്നു. അന്താരാഷ്ട്ര വിലയിൽ വരുന്ന മാറ്റങ്ങളാണ് കേരളത്തിലും സ്വർണ വിലയിലും പ്രതിഫലിക്കുന്നത്. അതേ സമയം, സംസ്ഥാനത്ത് വെള്ളി വില മാറ്റമില്ലാതെ തുടരുകയാണ്. ഇന്ന് വെള്ളി ഗ്രാമിന് 235 രൂപയിലും പവന് 2,350 രൂപയിലുമാണ് വ്യാപാരം നടക്കുന്നത്.
സെക്യൂരിറ്റി സ്റ്റാഫ് നിയമനം
പി.കെ കാളൻ മെമ്മോറിയൽ കോളേജ് ഓഫ് അപ്ലൈഡ് സയൻസിൽ സെക്യൂരിറ്റി സ്റ്റാഫിന്റെ (എക്സ് സർവ്വീസ്മെൻ) താത്‌കാലിക നിയമനം നടത്തുന്നു. ഉദ്യോഗാർത്ഥികൾ ഐ.ഡി കാർഡ് (എക്സ് സർവ്വീസ്മെൻ), ഡിസ്‌ചാർജ്ജ് ബുക്ക്, ആധാർ കാർഡ് എന്നിവയുടെ അസ്സലും പകർപ്പും സഹിതം ഒക്ടോബർ ഏഴിന് രാവിലെ 10 ന് കോളേജ് ഓഫീസിൽ കൂടിക്കാഴ്ചക്ക് എത്തണം. ഫോൺ- 8547005060
തെരുവുനായ്ക്കൾക്ക് റാബിസ് വാക്സിനേഷന്‍
പൊഴുതന ഗ്രാമപഞ്ചായത്ത് 2026-27 വാർഷിക പദ്ധതിയുടെ ഭാഗമായി പ്രദേശത്തെ തെരുവുനായ്ക്കൾക്കും കമ്യൂണിറ്റി നായ്ക്കൾക്കുമായി പ്രത്യേക പേവിഷബാധ വിരുദ്ധ വാക്‌സിനേഷൻ (റാബിസ് വാക്സിനേഷന്‍) യജ്ഞം സംഘടിപ്പിക്കുന്നു. ഒക്ടോബർ മൂന്ന്, നാല് തിയതികളിലാണ് വാക്‌സിനേഷൻ ഡ്രൈവ് നടക്കുന്നത്. മൃഗങ്ങളിൽ നിന്ന് മനുഷ്യരിലേക്ക് പകരുന്ന മാരക രോഗങ്ങളിൽ ഏറ്റവും പ്രധാനപ്പെട്ട ഒന്നാണ് പേവിഷബാധ. പ്രധാനമായും നായ്ക്കളുടെ കടിയിലൂടെയാണ് ഇത് പകരുന്നത്. പ്രദേശത്ത് പേവിഷബാധ പൂര്ണ്ണമായും നിയന്ത്രിക്കുന്നതിന് വളർത്തു നായ്ക്കൾക്കൊപ്പം തെരുവ്-കമ്യൂണിറ്റി നായ്ക്കൾക്കും വാക്‌സിൻ നൽകേണ്ടത് അത്യാവശ്യമായതിനാലാണ് പഞ്ചായത്ത് ഇത്തരമൊരു പദ്ധതിക്ക് രൂപം നൽകിയിരിക്കുന്നത്. പ്രദേശത്തുള്ള തെരുവുനായ്ക്കളെയും കമ്യൂണിറ്റി നായ്ക്കളെയും കണ്ടെത്തി വാക്‌സിനേഷൻ ടീമിന് മുന്നിലെത്തിക്കാൻ പൂർണ പിന്തുണ നൽകണമെന്ന് പൊഴുതന ഗ്രാമപഞ്ചായത്ത് പ്രസിഡന്റ് പറഞ്ഞു.
മെഗാ ക്ലീനിങ് ഡ്രൈവ് സംഘടിപ്പിച്ചു.
കൈയ്യോടു കൈ–സ്വച്ഛതാ ഹി സേവാ 2026 ക്യാമ്പയിന്റെ ഭാഗമായി മാനന്തവാടി നഗരസഭയുടെ നേതൃത്വത്തിൽ ജില്ലാ മെഡിക്കൽ കോളേജ് പരിസരത്ത് മെഗാ ക്ലീനിങ് ഡ്രൈവ് സംഘടിപ്പിച്ചു. നഗരസഭ ചെയർമാൻ ജേക്കബ് സെബാസ്റ്റ്യൻ ഉദ്ഘാടനം ചെയ്തു. മെഡിക്കൽ കോളേജ് പരിസരം നാല് ക്ലസ്റ്ററുകളായി തിരിഞ്ഞ് ശുചീകരണ പ്രവർത്തനങ്ങൾ നടത്തി.ഡെപ്യൂട്ടി ചെയർപേഴ്സൺ അഡ്വ. സിന്ധു സെബാസ്റ്റ്യൻ അധ്യക്ഷത വഹിച്ചു. ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ ഷിബു കെ. ജോർജ്, വികസനകാര്യ സ്റ്റാൻഡിങ് കമ്മിറ്റി ചെയർമാൻ പി.വി. ജോർജ്, മെഡിക്കൽ കോളേജ് സൂപ്രണ്ട് ജീവൻ ലാൽ, ക്ലീൻ സിറ്റി മാനേജർ രാജീവ്, നഗരസഭാ കൗൺസിലർമാർ, ശുചീകരണ വിഭാഗം തൊഴിലാളികൾ, ഹരിത കർമ്മ സേന അംഗങ്ങൾ, ആരോഗ്യ വിഭാഗം ജീവനക്കാർ, എന്നിവർ പങ്കെടുത്തു.
ഗതാഗതം നിരോധിച്ചു
നവീകരണ പ്രവൃത്തി നടത്തുന്നതിനാൽ വാഴവറ്റ-പാക്കം ഏഴാംചിറ മാമലകുന്ന്- പള്ളികവല റോഡിൽ ഒക്ടോബർ മൂന്ന് മുതൽ 24വരെ ഗതാഗതം പൂർണ്ണമായും തടസ്സപ്പെടുമെന്ന് അസിസ്റ്റൻറ് എഞ്ചിനീയർഅറിയിച്ചു.
മീനങ്ങാടിയിലെ ഹൈവേ റോബറി; രണ്ട് പേർ പിടിയിൽ
മീനങ്ങാടി: കാർ തടഞ്ഞു നിർത്തി കാർ യാത്രികന്റെ മുഖത്ത് കുരുമുളക് സ്പ്രേ അടിച്ച് പണവും വാഹനവും തട്ടിയെടുത്ത കേസിൽ രണ്ടു പേർ അറസ്റ്റിൽ. കണ്ണൂർ സ്വദേശികളായ പെരിങ്ങളം, അനിയാരം, മുത്തേടത്ത് താഴേകുനിയിൽ എം. രഞ്ജു (32), മട്ടന്നൂർ, സൗരവ് നിവാസ്, സൗരവ് സുനിൽ(26) എന്നിവരെയാണ് മീനങ്ങാടി പോലീസ് അറസ്റ്റ് ചെയ്തത്. കൃത്യം നടന്ന് മണിക്കൂറുകൾക്കുള്ളിൽ കണ്ണൂർ, തലക്കണ്ണിയിൽ നിന്നാണ് നാട്ടുകാരുടെ സഹായത്തോടെ പോലീസ് ഇവരെ പിടികൂടിയത്. ഇരുവരും നിരവധി കേസുകളിൽ പ്രതികളാണ്. രഞ്ജുവിന് ബത്തേരി, ചൊക്ലി സ്റ്റേഷനുകളിലായി 13-ഓളം കേസുകളും, സൗരവിന് പയ്യന്നൂർ, വാടാനപ്പള്ളി സ്റ്റേഷനുകളിലും കേസുകളുണ്ട്.30.09.2026 തിയ്യതി വൈകീട്ടോടെ മീനങ്ങാടി എഫ്.സി.ഐ ഗോഡൗണിനു സമീപം വച്ചാണ് സംഭവം. കൊടുവള്ളി സ്വദേശി കർണാടകയിലെ ബേഗൂരിൽ നിന്ന് വരുമ്പോഴാണ് പത്തോളം പേർ രണ്ട് കാറുകളിലായി വന്ന് ഇന്നോവ വാഹനം ബ്ലോക്കിട്ട് നിർത്തിച്ചത്. വാഹനത്തിന്റെ സൈഡ് ഗ്ലാസുകൾ അടിച്ച് പൊട്ടിക്കുകയും, യുവാവിന്റെ മുഖത്ത് പേപ്പർ സ്പ്രേ അടിച്ച് കാറിൽ നിന്നും ബലം പ്രയോഗിച്ച് പുറത്തിറക്കി കാറും, കാറിലുണ്ടായിരുന്ന 21000 രൂപയും തട്ടിയെടുക്കുകയുമായിരുന്നു. വിവരമറിഞ്ഞയുടൻ ജില്ലയിലും ജില്ലാതിർത്തികളിലും പരിശോധനയും നിരീക്ഷണവും ശക്തമാക്കി. തുടർന്ന് ഇവരെ തലക്കണ്ണിയിൽ നിന്ന് നാട്ടുകാരുടെ സഹായത്തോടെ പിടികൂടുകയായിരുന്നു. മറ്റു പ്രതികൾക്കായുള്ള അന്വേഷണം ഊർജിതമാക്കി.
വിദ്യാർഥികൾക്കായി റീൽസ് മത്സരം നടത്തി
വയനാട് ജില്ലാ സാമൂഹ്യനീതി ഓഫീസ് '' വയോജനങ്ങളെ ചേർത്ത് പിടിക്കുക'' എന്ന വിഷയത്തിൽ വയനാട് ജില്ലയിലെ സ്കൂൾ വിദ്യാർത്ഥികൾക്കായി നടത്തിയ റീൽസ് മത്സരത്തിൽ വാളേരി ഗവൺമെന്റ് ഹയർ സെക്കണ്ടറി സ്കൂളിലെ വിദ്യാർഥികൾ ഒന്നാം സമ്മാനം നേടി.ഓൺലൈനിൽ നടന്ന മത്സരത്തിൽ സ്കൂൾ അധ്യാപിക കെ.ജെ.ത്രേസ്യ നേതൃത്വം നൽകി. നിവേദ്യ.എം,അൽഫോൻസ മരിയ,ആഗ്നസ് മരിയഅഭിനന്ദ്. സി,ടെസ്സ മേരി,ആരാധ്യ അജീഷ്, എഡ്വിൻ എം.റ്റി. എന്നീ കുട്ടികളാണ് പങ്കെടുത്തത്. മീനങ്ങാടി പഞ്ചായത്ത് കമ്മ്യൂണിറ്റി ഹാളിൽ നടന്ന ചടങ്ങിൽ വച്ച് സമ്മാനം വിതരണം ചെയ്തു.
