കൽപ്പറ്റ :
2024-25 അധ്യയന വർഷത്തെ ലോവർ/ അപ്പർ പ്രൈമറി സ്കൂള് സ്കോളർഷിപ് (എല്‍എസ്‌എസ്/യുഎസ്‌എസ്) പരീക്ഷകള്‍ക്ക് ഇപ്പോള്‍ അപേക്ഷിക്കാം. ഫെബ്രുവരി 27-ന് ആണ് പരീക്ഷ. രാവിലെയും ഉച്ചയ്ക്കുമായി രണ്ട് പേപ്പറുകളാണുള്ളത്. യുഎസ്‌എസ് വിജയികള്‍ക്ക് തുടർപഠനത്തിനായി 1500 രൂപയും എല്‍എസ്‌എസ് വിജയികള്‍ക്ക് 1000 രൂപയും പ്രതിവർഷം ലഭിക്കും. എല്‍എസ്‌എസുകാർക്ക് 5, 6, 7 ക്ലാസുകളിലും യുഎസ്‌എസുകാർക്ക് 8, 9, 10 ക്ലാസുകളിലുമാണ് സ്കോളർഷിപ്പ് ലഭിക്കുക.
ലോവർ പ്രൈമറി
കേരളത്തിലെ സർക്കാർ/എയ്‌ഡഡ് / അംഗീകാരമുള്ള അണ്‍ എയ്‌ഡഡ് വിദ്യാലയങ്ങളില്‍ നാലാം ക്ലാസില്‍ പഠിക്കുന്നവരും രണ്ടാം ടേം പരീക്ഷയില്‍ മലയാളം, ഇംഗ്ലീഷ്, ഗണിതം പരിസരപഠനം എന്നീ വിഷയങ്ങളില്‍ ‘എ’ ഗ്രേഡ് നേടിയിട്ടുള്ളവരുമായ വിദ്യാർഥികള്‍ക്കാണ് യോഗ്യത. ഉപജില്ലാതല കലാകായിക പ്രവൃത്തിപരിചയ ഗണിത സോഷ്യല്‍ സയൻസ് മേളകളില്‍ ഏതെങ്കിലും ഇനത്തില്‍ ‘എ’ ഗ്രേഡോ ഒന്നാം സ്ഥാനമോ ലഭിച്ചവർക്ക് മേല്‍പറഞ്ഞ വിഷയങ്ങളില്‍ ഏതെങ്കിലുമൊന്നില്‍ ‘ബി’ ഗ്രേഡ് ലഭിച്ചാലും അപേക്ഷിക്കാം. ഒന്നാം ഭാഷയും (മലയാളം /കന്നട/തമിഴ്) ഇംഗ്ലീഷും പൊതുവിജ്ഞാനവുമടങ്ങിയ ഒന്നാം പേപ്പറും പരിസരപഠനവും ഗണിതവുമടങ്ങിയ രണ്ടാം പേപ്പറുമടങ്ങിയതാണ് പരീക്ഷ. ഓരോ പേപ്പറിനും ഒന്നര മണിക്കൂറാണ് സമയം. രണ്ട് പേപ്പറിലും പരമാവധി 40 മാർക്ക് വീതം. വിശദമായ പരീക്ഷാ ഘടന വിജ്ഞാപനത്തിലുണ്ട്. രണ്ട് പേപ്പറിനും കൂടി 60 ശതമാനമോ അതിന് മുകളിലോ മാർക്ക് ലഭിക്കുന്നവർക്കാണ് സ്കോളർഷിപ്പ് ലഭിക്കുക.
