പല ആവശ്യങ്ങള്‍ക്കായും ഇപ്പോള്‍ ഒന്നില്‍ കൂടുതല്‍ ബാങ്ക് അക്കൗണ്ടുകള്‍ ഉള്ളവരാണ് കൂടുതലും. മാത്രമല്ല, ഡിജിറ്റല്‍ ബാംങ്കിംഗ് സംവിധാനം വഴി വീട്ടിലിരുന്ന് തന്നെ അക്കൗണ്ട് തുറക്കാനുള്ള അവസരം ലഭിച്ചതോടെ കൂടുതല്‍ പേർ ഒന്നില്‍ കൂടുതല്‍ അക്കൗണ്ടുകള്‍ തുറന്നിട്ടുണ്ട്.
നിലവില്‍ ഡിജിറ്റല്‍ ബാങ്കിങ് വഴി സേവിങ്സ് അക്കൗണ്ട് തുറക്കുന്നതിനായുള്ള അപേക്ഷ നല്‍കുന്നതിനും കെവൈസി പൂർത്തിയാക്കുന്നതിനും അക്കൗണ്ട് ആരംഭിക്കാനും നിമിഷങ്ങള്‍ മാത്രം മതി. എന്നാല്‍ കണ്ണുംപൂട്ടി എത്ര ബാങ്ക് അക്കൗണ്ടുകള്‍ വേണമെങ്കിലും എടുത്തുകളയാമെന്ന ധാരണ വേണ്ട, ഒന്നില്‍ കൂടുതല്‍ ബാങ്ക് അക്കൗണ്ടുകള്‍ ഉള്ളത് ധനകാര്യം നിയന്ത്രിക്കാൻ എളുപ്പമാക്കുന്നുണ്ടെങ്കിലും ഇവ കൈകാര്യം ചെയ്യുക എന്നുള്ളത് പ്രയാസകരമാണ്.
ഉപഭോക്താക്കള്‍ക്ക് തുറക്കാവുന്ന ബാങ്ക് അക്കൗണ്ടുകളുടെ എണ്ണത്തില്‍ റിസർവ് ബാങ്ക് പരിധി നിശ്ചയിച്ചിട്ടില്ല. അതിനാല്‍ത്തന്നെ ഒരു വ്യക്തി ഒന്നില്‍ കൂടുതല്‍ ബാങ്ക് അക്കൗണ്ട് തുറക്കാം. എന്നാല്‍ അതിലുള്ള പ്രയാസങ്ങള്‍ മനസിലാക്കാം.
മിനിമം ബാങ്ക് ബാലൻസ്:
ഏറ്റവും പ്രധാനം മിനിമം ബാലൻസ് തന്നെയാണ്. ഒന്നിലധികം ബാങ്ക് അക്കൗണ്ടുകള്‍ ഉള്ളത് നിങ്ങളുടെ എല്ലാ അക്കൗണ്ടുകളിലും മിനിമം ബാലൻസ് നിലനിർത്തുന്നത് ബുദ്ധിമുട്ടാക്കിയേക്കാം. അക്കൗണ്ടില്‍ മിനിമം ബാലൻസ് ഉണ്ടായിരിക്കുന്നതിന് ഓരോ സേവിംഗ്സ് അക്കൗണ്ടിനും അതിന്റേതായ പരിധിയുണ്ട്. നിങ്ങള്‍ തുക നിലനിർത്തുന്നില്ലെങ്കില്‍, ബാങ്ക് പിഴ ഈടാക്കിയേക്കാം.
സാമ്ബത്തിക ആസൂത്രണം:
ഒന്നിലധികം ബാങ്ക് അക്കൗണ്ട് ഉള്ള വ്യക്തികള്‍ കൃത്യമായ സാമ്ബത്തിക ആസൂത്രണം നടത്തണം. ഓരോ അക്കൗണ്ടിന്റെയും ഇടപാടുകള്‍ കൃത്യമായി അറിഞ്ഞിരിക്കണം. ബാങ്ക് അക്കൗണ്ടുകള്‍ മാറി പോകാതെ ഇടപാടുകള്‍ പൂർത്തിയാക്കാൻ കഴിയണം.
ആനുകൂല്യങ്ങളും ചെലവുകളും:
ബാങ്ക് നല്‍കുന്ന ആനുകൂല്യങ്ങളുമായി ചെലവുകള്‍ താരതമ്യം ചെയ്യുന്നത് എല്ലായ്പ്പോഴും നല്ലതാണ്. ആനുകൂല്യങ്ങള്‍ ചെലവിനേക്കാള്‍ കൂടുതലാണെങ്കില്‍, അവ ഒഴിവാക്കുക.
വിവിധ തരം അക്കൗണ്ടുകള്‍:
ഇക്കാലത്ത്, കറന്റ് അക്കൗണ്ടുകള്‍, സാലറി അക്കൗണ്ടുകള്‍, ഫിക്സഡ് ഡിപ്പോസിറ്റ് അക്കൗണ്ടുകള്‍, ആവർത്തന നിക്ഷേപ അക്കൗണ്ടുകള്‍, എൻആർഐ അക്കൗണ്ടുകള്‍, എൻആർഒ അക്കൗണ്ടുകള്‍ തുടങ്ങി നിരവധി തരത്തിലുള്ള അക്കൗണ്ടുകള്‍ തുറക്കാൻ ബാങ്കുകള്‍ അനുവദിക്കുന്നു. ഉപഭോക്താക്കള്‍ക്ക് അവരുടെ ആവശ്യങ്ങള്‍ക്കനുസരിച്ച്‌ അക്കൗണ്ട് തുറക്കാൻ കഴിയും; പലിശയുടെ ആനുകൂല്യം കാരണം മിക്ക ആളുകളും സേവിംഗ്സ് അക്കൗണ്ടുകള്‍ തുറക്കുന്നു. സേവിംഗ്സ് അക്കൗണ്ടില്‍ വിവിധ ഓപ്ഷനുകളും ഉണ്ട്.
