ജില്ലാ ഭരണകൂടവും ജില്ലാ സ്പോർട്സ് കൗൺസിലും സംയുക്തമായി നടത്തുന്ന ലഹരി വിരുദ്ധ പ്രചാരണ പരിപാടികളുടെ ആലോചന യോഗം സ്പോർട്സ് കൗൺസിൽ ഹാളിൽ ചേർന്നു. സ്പോർട്സ് ലഹരിയാക്കി കുട്ടികളെ കായിക മേഖലയിലേക്ക് എത്തിക്കാൻ എല്ലാവരും മുന്നിട്ടിറങ്ങണമെന്ന് യോഗം ഉദ്ഘാടനം ചെയ്തു ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ പറഞ്ഞു. ആരോഗ്യകരമായ സമൂഹം കെട്ടിപ്പടുക്കുന്നതിൽ കായിക- വിനോദങ്ങൾക്ക് സുപ്രധാന സ്ഥാനമുണ്ടെന്നും ജില്ലയിലെ കായിക പ്രവർത്തനങ്ങൾക്ക് കൂടുതൽ പ്രോത്സാഹനം നൽകുന്നതിന് ജില്ലാ പഞ്ചായത്ത് ഒപ്പമുണ്ടാകുമെന്നും
യുവജനങ്ങൾ കായികരംഗത്ത് സജീവമാകുന്നതിലൂടെ ലഹരി പോലുള്ള സാമൂഹിക തിന്മകളിൽ നിന്ന് അകന്നുനിൽക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
സംസ്ഥാന കായിക വകുപ്പിന്റെ നേതൃത്വത്തിൽ മെയ്‌ അഞ്ചിന് ആരംഭിച്ച് ഏഴിന് ജില്ലയിൽ പ്രവേശിക്കുന്ന വിപുലമായ ക്യാമ്പയിൻ വിജയിപ്പിക്കുന്നതിന്റെ ഭാഗമായി സംസ്ഥാന, ജില്ലാ സ്പോർട്സ് കൗൺസിലുകൾ മുഖേന ചേരുന്ന ജില്ലാ തദ്ദേശസ്ഥാപനതല യോഗങ്ങളുടെ നടത്തിപ്പ് സംബന്ധിച്ച് ചർച്ച ചെയ്തു.
ഇതിന്റെ ഭാഗമായി ഏഴംഗ ജില്ലാതല സംഘാടകസമിതി രൂപീകരിച്ചു. പ്രചാരണ പരിപാടിയുടെ ഭാഗമായി ഗ്രാമപഞ്ചായത്തുകളിൽ ഉന്നതല യോഗങ്ങൾ, പരിപാടികൾ, സെമിനാറുകൾ എന്നിവ നടത്തും. കൂട്ടയോട്ടം, വടംവലി, ഫോട്ടോഗ്രഫി തുടങ്ങിയ പരിപാടികൾ പ്രചാരണ പരിപാടിയുടെ ഭാഗമായി നടത്താനും തീരുമാനമായി.
ജില്ലയിലെ പ്രവർത്തനക്ഷമമല്ലാത്ത മുഴുവൻ കളിക്കളങ്ങൾ, കുളങ്ങൾ, കായിക സ്മാരകങ്ങൾ എന്നിവ കണ്ടെത്തി നവീകരിച്ച് കായിക പ്രവർത്തനങ്ങൾക്ക് യോഗ്യമാക്കി തീർക്കും. എല്ലാ തദ്ദേശസ്വയംഭരണ സ്ഥാപനങ്ങളുടെ കീഴിലും തെരഞ്ഞെടുക്കപ്പെടുന്ന 25 പേരടങ്ങുന്ന തിങ്ക് ടാങ്ക് ഗ്രൂപ്പ് ഉണ്ടായിരിക്കണം. ഇവരുടെ നേതൃത്വത്തിൽ സംസ്ഥാനമൊട്ടാകെ നടക്കുന്ന പ്രചാരണ ജാഥയുടെ മുന്നോടിയായി തദ്ദേശസ്വയംഭരണ പ്രദേശങ്ങളിൽ മെയ്‌ ഒന്നിന് ഒരു നിശ്ചിത സ്ഥലത്തുനിന്ന് മറ്റൊരു നിശ്ചിത സ്ഥലം വരെ വാക്കത്തോൺ സംഘടിപ്പിക്കും. വകുപ്പുകളുടെ ഏകോപനത്തിന് പുറമേ ജില്ലയിലുള്ള അസോസിയേഷനുകൾ, ക്ലബ്ബുകൾ, സംഘടനകൾ, കുട്ടികൾ, കുടുംബശ്രീ, വിവിധ കൂട്ടായ്മകൾ തുടങ്ങി എല്ലാവരുടെയും സാന്നിധ്യവും സഹകരണവും ഉറപ്പുവരുത്തും.
ലഹരിയുടെ ദൂഷ്യവശങ്ങളിൽ നിന്ന് യുവതലമുറയെ സംരക്ഷിച്ച് കായികരംഗത്തേക്ക് അവരെ ആകർഷിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിക്കുന്നത്.
ജില്ലാ സ്പോർട്സ് കൗൺസിൽ പ്രസിഡന്റ് എം മധു അധ്യക്ഷനായിരുന്നു. കോട്ടത്തറ ഗ്രാമപഞ്ചായത്ത് പ്രസിഡന്റ് പി പി റനീഷ്, തവിഞ്ഞാൽ ഗ്രാമപഞ്ചായത്ത് പ്രസിഡന്റ് എൽസി ജോയ്, പൊഴുതന ഗ്രാമപഞ്ചായത്ത് പ്രസിഡന്റ് അനസ് റോസ്ന സ്റ്റെഫി, മുൻസിപ്പാലിറ്റി ചെയർമാൻമാർ, ഗ്രാമപഞ്ചായത്ത് പ്രതിനിധികൾ, എഡിഎം കെ ദേവകി, സംസ്ഥാന സ്പോർട്സ് കൗൺസിൽ സ്റ്റാൻഡിങ് കമ്മിറ്റി അംഗം വി കെ സനോജ്, യുവജന ക്ഷേമ ബോർഡ് കോർഡിനേറ്റർ കെ
എം ഫ്രാൻസിസ്, അഡീഷണൽ എസ്പി ടി എൻ സജീവൻ, എക്സൈസ് സിഐ ടി ഷറഫുദ്ദീൻ,
ജില്ലാ സ്പോർട്സ് കൗൺസിൽ സെക്രട്ടറി പ്രപു പ്രേംനാഥ്,
ജില്ലാ സ്പോർട്സ് കൗൺസിൽ വൈസ് പ്രസിഡന്റ് സലീം കടവൻ, രാഷ്ട്രീയപാർട്ടിയെ പ്രതിനിധീകരിച്ചു കെ റഫീക്ക് (സിപിഎം), സ്പോർട്സ് അസോസിയേഷനുകൾ, സംഘടനകൾ, വിവിധ വകുപ്പുകൾ, അധ്യാപകർ, വിദ്യാർത്ഥികൾ എന്നിവർ പങ്കെടുത്തു.
