മനുഷ്യശരീരത്തെ ധരിച്ചു നിർത്തുന്ന ഒരു നെടുംതൂണാണ് നട്ടെല്ല്. കുനിയുക, നിവരുക, അങ്ങോട്ടും ഇങ്ങോട്ടും തിരിയുക തുടങ്ങിയ ശരീരത്തിലെ ചലനങ്ങളെ നിയന്ത്രിക്കുന്നത് നട്ടെല്ലാണ്. 33 കശേരുക്കൾ ഓര്ഡറിൽ അടുക്കിവച്ചിരിക്കുന്നതും ഇതിനോടനുബന്ധമായി ഇതിന്റെ ഇടയിൽ ഡിസ്കുകളും ഒരു പ്രത്യേക രീതിയിൽ സംവിധനം ചെയ്തിരിക്കുന്നതാണ്നമ്മുടെ വെട്ടിബ്രൽ കോളം. അതിനു നടുവിലൂടെ സുഷുമ്നാ നാഡി കടന്നുപോകുന്നു. ഇതെല്ലാം കൂടി കൂടുമ്പോഴാണ് ശരീരത്തിന്റെ പ്രവർത്തികളെ വേണ്ടരീതിയിൽ കേന്ദ്രീകരിച്ചു കൊണ്ടുപോകുന്നത്.
വളരെ ചെറു പ്രായത്തിൽതന്നെ കഴുത്തിനും നടുവിനും പ്രശ്നങ്ങളുമായി വരുന്ന ഒരു യുവതലമുറയാണ് ഇപ്പോഴുള്ളത്. നട്ടെല്ലിനെ ആശ്രയിച്ചു വരുന്ന രോഗങ്ങൾക്ക് ഇപ്പോൾ പ്രായവ്യത്യാസമില്ലെന്നാണ് ഇതിൽ നിന്നു മനസ്സിലാകുന്നത്. സ്കൂൾ കുട്ടികളിൽ വരെ സെർവിക്കൽ പ്രശ്നങ്ങളും നടുവിനു നീർക്കെട്ടും കണ്ടുവരുന്നുണ്ട്. യുവജനങ്ങളിൽ വളരെ നല്ലൊരു ശതമാനം കശേരുക്കൾക്കുണ്ടാകുന്ന പ്രശ്നങ്ങൾക്കു ചികിൽസ തേടിയെത്തുന്നുണ്ട്. മുതിർന്നവരിലും വാർധക്യസഹജമായി ഈ വേദനകൾ എത്തുന്നുണ്ട്.
അസ്ഥികൾക്കും പല്ലുകൾക്കും എല്ലുകൾക്കും ബലം ഉണ്ടാക്കുന്നതും നമ്മുടെ പ്രതിരോധശക്തി ആർജ്ജിക്കുന്ന രീതിയിലുമുള്ള ആഹാരങ്ങളും ഔഷധങ്ങളും ശീലങ്ങളും കൈവരിക്കാൻ നമ്മൾ ശ്രദ്ധിക്കണം.
എല്ലിനു ബലം നൽകാൻ കഴിക്കാം ഈ ഭക്ഷണങ്ങൾ
അസ്ഥി സന്ധിയെ ആശ്രയിച്ചു വരുന്ന വേദനകളും പ്രശ്നങ്ങളും എല്ലാ പ്രായക്കാരിലും കാണുന്നുണ്ട്. ഇതിനൊരു പ്രധാന കാരണം ആഹാരശീലങ്ങളാണ്. എല്ലുകളുടെ പോഷണവും വളർച്ചയും ശരിയായ രീതിയിൽ നടക്കാത്തതാണ് അസ്ഥിസംബന്ധമായ വേദനകൾക്കു കാരണമാകുന്നത്. അതിനാൽ ഇതിനു സഹായിക്കുന്ന രീതിയിലുള്ള ആഹാരങ്ങൾ നമ്മുടെ ഡയറ്റിൽ ഉൾപ്പെടുത്തണം.
പാൽ, മുട്ട, സോയാബീൻ, പയറുവർഗങ്ങൾ, മുളപ്പിച്ച ചെറുപയർ എന്നിവ ചെറുപ്രായത്തിലെ കുട്ടികളിൽ ശീലിപ്പിക്കാം. പാലും മുട്ടയും സ്ഥിരമായി കഴിക്കുന്നത് മുതിർന്നവരിൽ ചിലപ്പോൾ കൊളസ്ട്രോൾ പ്രശ്നങ്ങൾ സൃഷ്ടിക്കാം. അതിനാൽ വിദഗ്ധ നിർദേശ പ്രാകാരം ഇവ കഴിക്കുക. വൈറ്റമിൻ കെ സപ്ലിമെന്റ് അസ്ഥി സന്ധികളുടെയും എല്ലുകളുടെയും പോഷണത്തിന് സഹായകമാണ്. ബ്രക്കോളി, കോളിഫ്ളവർ, ബീൻസ് മുതലായവ ആഹാരത്തിൽ ഉൾപ്പെടുത്താം. പാലും പാലുൽപ്പന്നങ്ങളും കാൽസ്യം വർധിപ്പിക്കാൻ സഹായിക്കും.
വൈറ്റമിൻ ഡിയുടെ കുറവ് അസ്ഥിവേദനകൾക്കു പ്രധാന കാരണമാണ്. ഇതു പരിഹരിക്കാൻ വൈകുന്നേരം ഇളംവെയിൽ ഏൽക്കാം. വൈറ്റമിൻ ഡിയിൽ വരുന്ന കുറവ് കഴിക്കുന്ന ആഹാരത്തിലുള്ള കാൽസ്യം ശരീരത്തിലേക്കു വലിച്ചെടുക്കുന്നതു കുറയ്ക്കും. ഇത് അസ്ഥിക്ഷയം, ഓസ്റ്റിയോപൊറോസിസ് തുടങ്ങിയവയ്ക്കു കാരണമാകും.
ബേക്കറിയിൽ നിന്നു വാങ്ങുന്ന പലഹാരങ്ങളിൽ മിക്കവയിലും കലോറിക മൂല്യം കൂടുതലാണ്. എന്നാൽ പോഷകം വളരെ കുറവും. വീട്ടിൽത്തന്നെ ഇവ ആവശ്യത്തിനു പോഷകം കൂടി കിട്ടുന്ന രീതിയിൽ ഉണ്ടാക്കി ഉപയോഗിക്കാവുന്നതാണ്. ഇലക്കറികൾ, പച്ചക്കറികൾ, പഴവർഗങ്ങൾ, ചെറുമത്സ്യങ്ങൾ എന്നിവ ഭക്ഷണത്തിൽ ഉൾപ്പെടുത്താം.
