പരമ്പാരഗതമായി തന്നെ സ്വർണത്തോട് വലിയ കമ്പമുള്ളവരാണ് ഇന്ത്യക്കാർ. കണക്കുകള് നോക്കുകയാണെങ്കില് അമേരിക്കയുടെ ഔദ്യോഗിക ശേഖരത്തേക്കാള് എത്രയോ മടങ്ങ് സ്വർണമാണ് ഇന്ത്യയിലെ വീടുകളില് മാത്രമായുള്ളത്. വിവാഹം, മക്കളുടെ വിദ്യാഭ്യാസം, വീടുവെക്കല് തുടങ്ങിയ ഭാവിയിലെ പല ആവശ്യങ്ങള്ക്കുമായി സ്വർണത്തില് നിക്ഷേപിക്കുന്നത് ഉത്തരേന്ത്യയിലൊക്കെ പതിവ് രീതിയാണ്.
2026 മാർച്ച് വരെയുള്ള കണക്കുകൾ പ്രകാരം, ഇന്ത്യൻ കുടുംബങ്ങൾ ഏകദേശം 25,000 മുതൽ 34,000 ടൺ വരെ സ്വർണ്ണം കൈവശം വയ്ക്കുന്നുണ്ട്. 24 കോടി കുടുംബങ്ങളായി വിഭജിച്ചാൽ ഓരോ കുടുംബത്തിനും ശരാശരി 100 മുതൽ 150 ഗ്രാം സ്വർണ്ണം ഉണ്ടാകുമെന്നാണ് കണക്ക്. നിലവിലെ വില പ്രകാരം ഇത് ഏകദേശം 15 മുതൽ 20 ലക്ഷം രൂപ വരെ വിലമതിക്കുന്നു. കോട്ടക് ഇൻസ്റ്റിറ്റ്യൂഷണൽ ഇക്വിറ്റീസിന്റെ റിപ്പോർട്ട് പ്രകാരം, ഇന്ത്യൻ കുടുംബങ്ങളുടെ സ്വർണ്ണ സ്റ്റോക്കിന്റെ മൂല്യം ഏകദേശം 5 ട്രില്യൺ ഡോളറില് അധികമാണ്. രാജ്യത്തെ കുടുംബങ്ങളുടെ ആസ്തികളിൽ സ്വത്ത് ഒഴികെയുള്ള ഭാഗത്തിന്റെ 65 ശതമാനത്തോളം വരും ഇത്.
സ്വർണ്ണാഭരണങ്ങൾ, നാണയങ്ങൾ അല്ലെങ്കിൽ കട്ടികള് എന്നിവ വാങ്ങുന്നതിന് പകരമായി ഡിജിറ്റൽ ഗോൾഡ്, ഗോൾഡ് ഇടിഎഫുകൾ (ETFs), ഗോൾഡ് മ്യൂച്ച്വൽ ഫണ്ടുകൾ തുടങ്ങിയ നിരവധി ബദലുകൾ ഇപ്പോൾ ലഭ്യമാണ്. ഇവയിൽ ഡിജിറ്റൽ തന്നെ ഗോൾഡും ഗോൾഡ് ഇടിഎഫുകളുമാണ് ഏറ്റവും ജനപ്രിയമായ മാർഗ്ഗങ്ങള്.
എന്താണ് ഡിജിറ്റൽ ഗോൾഡ് ?
ഏറ്റവും ചുരുക്കത്തില് ഫിസിക്കൽ സ്വർണ്ണത്തിന് സമാനമായിരിക്കുന്ന ഒരു ആശയമാണ് ഡിജിറ്റൽ ഗോൾഡ്. നിങ്ങൾ ഓൺലൈനായി വാങ്ങുന്ന സ്വർണ്ണം കമ്പനികള് സുരക്ഷിതമായ വോൾട്ടുകളിൽ സൂക്ഷിക്കുന്നു. റിസർവ് ബാങ്ക് ഓഫ് ഇന്ത്യ (RBI) അല്ലെങ്കിൽ സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ (SEBI) എന്നിവയുടെ നേരിട്ടുള്ള നിയന്ത്രണത്തിന് വിധേയമല്ലാത്ത ഈ നിക്ഷേപം വരുമാന നികുതി നിയമങ്ങൾക്ക് അനുസൃതവുമാണ്. 24 മാസത്തിലധികം കൈവശം വയ്ക്കുന്ന ഡിജിറ്റൽ ഗോൾഡിന്റെ ലാഭം ലോങ്ങ് ടേം ക്യാപിറ്റൽ ഗെയിൻ (LTCG) ആയി കണക്കാക്കി സെസ് ഉൾപ്പെടെ ഉള്പ്പെടെ 12.5 ശതമാനം നികുതിയാണ് ഈടാക്കുന്നത്.
24 മാസത്തിനുള്ളിൽ വിറ്റാൽ ഷോർട്ട് ടേം ക്യാപിറ്റൽ ഗെയിൻ (STCG) ആയി നിങ്ങളുടെ വരുമാന സ്ലാബ് പ്രകാരമുള്ള നിരക്കിൽ നികുതി അടയ്ക്കേണ്ടിവരും. ഫിസിക്കൽ സ്വർണ്ണത്തിനും പേപ്പർ ഗോൾഡിനും (ഗോൾഡ് ഇടിഎഫുകൾ, എസ്ജിബികൾ, ഗോൾഡ് മ്യൂച്ച്വൽ ഫണ്ടുകൾ) സമാനമായ നികുതി നിയമങ്ങളാണ് ഡിജിറ്റൽ ഗോൾഡിനും ബാധകം.
എന്താണ് ഗോള്ഡ് ഇടിഎഫ് ?
ആഭ്യന്തര വിപണിയിലെ സ്വർണ്ണത്തിൽ നിക്ഷേപിക്കുന്ന ഒരു കോമോഡിറ്റി ഫോക്കസ്ഡ് മ്യൂച്ച്വൽ ഫണ്ടാണ് ഗോൾഡ് ഇടിഎഫ്. ഓരോ യൂണിറ്റും ഏകദേശം ഒരു ഗ്രാം സ്വർണ്ണത്തിന് തുല്യമാണ്. ഇത് ഓഹരികൾ പോലെ സ്റ്റോക്ക് എക്സ്ചേഞ്ചിൽ വ്യാപാരം ചെയ്യാവുന്നതാണ്. ഫിസിക്കൽ സ്വർണ്ണത്തിന്റെ സുരക്ഷയും സംഭരണ പ്രശ്നങ്ങളും ഇല്ലാതെ, സ്വർണ്ണ വിലയ്ക്ക് സമാനമായ റിട്ടേണുകൾ ലഭിക്കുന്നതോടൊപ്പം സ്റ്റോക്ക് ട്രേഡിങ്ങിന്റെ സൗകര്യവും ഗോൾഡ് ഇടിഎഫ് നൽകുന്നു. 12 മാസത്തിലധികം കൈവശം വയ്ക്കുന്ന ഗോൾഡ് ഇടിഎഫുകൾക്ക് ഇൻഡക്സേഷൻ ഇല്ലാതെ 12.5 ശതമാനം ലോങ്ങ് ടേം ക്യാപിറ്റൽ ഗെയിൻ നികുതിയാണ് ഈടാക്കുന്നത്. 12 മാസത്തിനുള്ളിൽ വിറ്റാൽ 20 ശതമാനംഷോർട്ട് ടേം ക്യാപിറ്റൽ ഗെയിൻ നികുതിയും ബാധകമാകമാണ്.
ഇടിഎഫുകൾ എങ്ങനെ പ്രവർത്തിക്കുന്നു?
ആസറ്റ് മാനേജ്മെന്റ് കമ്പനി ഫിസിക്കൽ സ്വർണ്ണം വാങ്ങി സുരക്ഷിത വോൾട്ടുകളിൽ സൂക്ഷിക്കുകയാണ് ഇവിടെ ചെയ്യുന്നത്. നിക്ഷേപകർ ഇതില് നിന്നു യൂണിറ്റുകൾ വാങ്ങുന്നു. ഓരോ യൂണിറ്റിന്റെയും നെറ്റ് ആസറ്റ് വാല്യൂ (NAV) സ്വർണ്ണ വിലയോട് ചേർന്ന് മാറിക്കൊണ്ടിരിക്കും. സ്റ്റോക്ക് എക്സ്ചേഞ്ചിലൂടെ സൗകര്യപ്രദമായി യൂണിറ്റുകൾ വാങ്ങാനും വിൽക്കാനും കഴിയും. ഉദാഹരണത്തിന് 30000 രൂപ നിക്ഷേപിച്ചാൽ ഓരോ യൂണിറ്റിന് 5000 രൂപ നിരക്കിൽ ആറ് യൂണിറ്റുകൾ ലഭിക്കും. സ്വർണ്ണ വില ഉയരുമ്പോഴോ താഴുമ്പോഴോ യൂണിറ്റുകളുടെ മൂല്യം മാറും. ഓഹരികൾ വിൽക്കുന്നത് പോലെ എക്സ്ചേഞ്ചിൽ തന്നെ യൂണിറ്റുകൾ വിൽക്കാം.
