കോവിഡ് രൂക്ഷമായതോടെ സംസ്ഥാനത്ത് ഏർപ്പെടുത്തിയ ലോക്കഡൌൺ ദിവസങ്ങളിൽ ആശുപത്രി യാത്രകൾക്ക് ഇ-പാസ് നിർബന്ധമല്ലെന്ന് പോലീസ്.പകരം മെഡിക്കൽ രേഖകളും സത്യവാങ്മൂലവുമാണ് കൈയിൽ കരുതേണ്ടത് എന്ന് പോലീസ് അറിയിച്ചു.ഒപ്പം വാഹനത്തിൽ പരമാവധി മൂന്നു പേർക്ക് വരെ യാത്ര ചെയ്യാം എന്നും അറിയിച്ചു.ഔദ്യോഗിക ഫേസ്ബുക്ക് പേജിലൂടെയാണ് പൊലീസ് ഇക്കാര്യം അറിയിച്ചിരിക്കുന്നത്. അവശ്യ സർവീസ് വിഭാഗത്തിൽ ഉള്ളവർക്ക് സ്ഥാപനത്തിന്റെ തിരിച്ചറിയൽ കാർഡ് ഉണ്ടെങ്കിൽ പാസ് വേണ്ടതില്ല.
ലോക്ക്ഡൗണിനോടനുബന്ധിച്ച് ഏർപ്പെടുത്തിയ ഓൺലൈൻ പാസ് സംവിധാനത്തിലേക്ക് ആയിരക്കണക്കിന് അപേക്ഷകളാണ് ലഭിച്ചത്.ഇതിൽ ഭൂരിഭാഗവും അവശ്യസാധനങ്ങൾ വാങ്ങുന്നതിനുള്ള അപേക്ഷകളാണ്.ഇത്രയും പേർക്ക് ഇ-പാസ് നൽകിയാൽ ലോക്ക്ഡൗണിന്റെ ലക്ഷ്യം പരാജയപ്പെടും.
അതിനാൽ തൊട്ടടുത്ത കടയിൽ നിന്ന് മരുന്ന്, പാൽ,ഭക്ഷണം, പച്ചക്കറികൾ എന്നിവ വാങ്ങുന്നതിനായി പാസിന് അപേക്ഷിക്കേണ്ട എന്നും സത്യവാങ്മൂലം കയ്യിൽ കരുതിയാൽ മതി എന്നും പോലീസ് ഫേസ്ബുക്ക് പോസ്റ്റിലൂടെ അറിയിച്ചു. ഒപ്പം അവശ്യസാധനങ്ങൾക്ക് വേണ്ടി പുറത്തിറങ്ങാം എന്നാണെങ്കിലും അത് ദുരുപയോഗം ചെയ്താൽ കർശന നടപടി സ്വീകരിക്കുമെന്നും പൊലീസ് മുന്നറിയിപ്പ് നൽകി.
