മാസ്കുകൾ ധരിക്കുന്ന കാര്യത്തിൽ ശ്രദ്ധ പുലർത്തണമെന്ന് മുഖ്യമന്ത്രി പിണറായി വിജയൻ. ഒരിക്കൽ ഉപയോഗിച്ച തുണി മാസ്കുകൾ നന്നായി കഴുകി വെയിലത്ത് ഉണക്കിയ ശേഷം വേണം വീണ്ടും ഉപയോഗിക്കാൻ. സർജിക്കൽ മാസ്ക് ഒറ്റ തവണ മാത്രമേ ഉപയോഗിക്കാവൂ.
എൻ-95 മാസ്ക് ഒറ്റത്തവണ ഉപയോഗിക്കുന്നതാണ് നല്ലതെന്നും മുഖ്യമന്ത്രി പിണറായി വിജയൻ. വില കണക്കിലെടുത്ത് കൂടുതൽ തവണ എൻ 95 മാസ്ക് ഉപയോഗിക്കുന്നതിനുള്ള ശാസ്ത്രീയമായ രീതി എയിംസ് പുറത്ത് വിട്ടിട്ടുണ്ടെന്നും മുഖ്യമന്ത്രി പറഞ്ഞു.
അഞ്ച് 5 എൻ95 മാസ്ക് ഒന്നിച്ചു വാങ്ങിയാൽ നല്ലതെന്ന് എയിംസ് പഠനം പറയുന്നു. ഒരു തവണത്തെ ഉപയോഗത്തിന് ശേഷം മാസ്ക് മലിനമായില്ലെങ്കിൽ ആ മാസ്ക് ഒരു പേപ്പർ കവറിൽ സൂക്ഷിക്കണം. മറ്റ് നാല് മാസ്ക് കൂടി ഉപയോഗിച്ച് ഇതേ പോലെ സൂക്ഷിച്ച ശേഷം ആറാം ദിവസം ആദ്യം ഉപയോഗിച്ച മാസ്ക് വീണ്ടും ഉപയോഗിക്കാം. ഈ വിധം പരമാവധി മൂന്ന് തവണ ഒരു മാസ്ക് ഉപയോഗിക്കാം. അതിൽ കൂടുതൽ തവണയോ, തുടർച്ചയായോ എൻ95 മാസ്കുകൾ ഉപയോഗിക്കാൻ പാടില്ല.
സർജിക്കൽ മാസ്ക് ഒറ്റത്തവണ മാത്രമേ ഉപയോഗിക്കാൻ പാടുള്ളു. ആറ് മുതൽ 8 മണിക്കൂർ വരെയെ സർജിക്കൽ മാസ്ക് ഉപയോഗിക്കാവൂ. തുണി മാസ്കുകൾ നന്നായി കഴുകി ഉണക്കി വേണം ഉപയോഗിക്കാൻ.
അതേ സമയം മാസ്ക് ഉപയോഗം ബ്ലാക്ക് ഫംഗസ് ബാധയുമായി ബന്ധപ്പെടുത്തി നടക്കുന്നത് അശാസ്ത്രീയ പ്രചാരണമാണെന്നും അത് വാസ്തവ വിരുദ്ധമാണെന്നും മുഖ്യമന്ത്രി പറഞ്ഞു.
