കോഴിക്കോട്: മയക്കുമരുന്ന് ഉപയോഗിക്കാനായി വാഹനമോഷണവും ക്ഷേത്രക്കവർച്ചയും പതിവാക്കിയ വിദ്യാർഥികൾ ഉൾപ്പെട്ട അഞ്ചംഗ സംഘം പിടിയിൽ. ഇതിൽ ഒരാൾക്ക് മാത്രമാണ് പ്രായപൂർത്തിയായത്. മറ്റ് നാലുപേരും വിദ്യാർഥികളാണ്. വെള്ളയിൽ, നാലുകുടിപ്പറമ്പ് ഷാഹിദ് അഫ്രീദിയാണ് (18) പ്രായപൂർത്തിയായ സംഘാംഗം. ദിവസങ്ങൾ നീണ്ട നിരീക്ഷണത്തിനൊടുവിൽ നടക്കാവ് ഇൻസ്പെക്ടർ പി.കെ. ജിജീഷിന്റെ നേതൃത്വത്തിലുള്ള സംഘമാണ് ഇവരെ അറസ്റ്റ് ചെയ്തത്.
കൊയിലാണ്ടി തിരുവങ്ങൂരിലെ ക്ഷേത്രപാലൻ കോട്ട അമ്പലത്തിൽ മോഷണം നടത്തിയത് തങ്ങളാണെന്ന് ഇവർ പോലീസിന് മൊഴി നൽകി. തിക്കോടി ടൗണിലെ കടകളിലും സംഘം മോഷണം നടത്തിയിട്ടുണ്ട്. കൂടാതെ ബാലുശ്ശേരി, ഫറോക്ക്, നടക്കാവ്, വെള്ളയിൽ തുടങ്ങി ഒട്ടേറെ സ്ഥലങ്ങളിൽ വീടുകളിൽ നിർത്തിയിട്ട ഇരുചക്രവാഹനങ്ങൾ രാത്രി മോഷണം നടത്തിയതും സംഘമാണെന്ന് വ്യക്തമായി.
വാഹനങ്ങളുടെ ബാറ്ററികൾ മോഷ്ടിച്ച് വിൽക്കുന്ന പതിവും ഇവർക്കുണ്ട്. മോഷ്ടിച്ച് കിട്ടുന്ന പണം മയക്കുമരുന്ന് ഉപയോഗത്തിനുവേണ്ടിയാണ് ചെലവഴിക്കുന്നത്. കൂടുതൽ പണം കിട്ടിയാൽ ഗോവയിലേക്ക് പോവുകയാണ് രീതി.
സ്കൂട്ടറുകൾ മാത്രമാണ് ഇവർ മോഷ്ടിക്കുന്നത്. ബൈക്ക് ഓടിക്കാൻ പലർക്കും അറിയില്ല. ഇത് വയർ ഉപയോഗിച്ച് കണക്ഷൻ കൊടുത്ത് സ്റ്റാർട്ടാക്കുകയാണ് ചെയ്യുന്നത്. കുട്ടികളെല്ലാം പ്ലസ് വൺ, പ്ലസ് ടു വിദ്യാർഥികളാണ്. യൂണിഫോമിൽ ചിലരെ കണ്ടതോടെയാണ് മോഷണങ്ങളിൽ വിദ്യാർഥികളും ഉൾപ്പെട്ടിട്ടുണ്ടെന്ന് പോലീസിന് മനസ്സിലായത്.
മോഷ്ടിച്ച സ്കൂട്ടറുകൾ 5000 മുതൽ 10,000 വരെ രൂപയ്ക്കാണ് വിൽക്കുക. അമ്പലങ്ങളിൽനിന്ന് മോഷ്ടിക്കുന്ന പിച്ചള, ഓട് സാധനങ്ങൾ ആക്രിക്കടകളിൽ വിൽക്കും.
നിർത്തിയിട്ട ഓട്ടോകളുടെ ബാറ്ററികൾ ഇവർ വ്യാപകമായി മോഷ്ടിച്ചു വിൽപ്പന നടത്തിയിട്ടുണ്ട്. ഫോണെടുക്കാതെയാണ് മോഷണത്തിനിറങ്ങുക. ഫോൺ ഉപയോഗിക്കുകയാണെങ്കിൽ ഇൻസ്റ്റഗ്രാം മെസേജുകൾ വഴി മാത്രമാണ് ആശയവിനിമയം. വീടുകളിൽ അലക്കിയിടുന്ന ഡ്രസ്സുകളും ഷൂസുകളും മോഷ്ടിക്കുന്ന പതിവുമുണ്ട്. ഡ്രസ്സുകൾ എല്ലാവരും മാറ്റിയിടുന്നതാണ് രീതി.
നിർത്തിയിട്ട വണ്ടികളിൽനിന്ന് പെട്രോളും ഊറ്റിയെടുക്കും. കിട്ടുന്ന പണംകൊണ്ട് മയക്കുമരുന്ന് വാങ്ങി എല്ലാവരും ചേർന്ന് ഉപയോഗിക്കുകയാണ് രീതി. മയക്കുമരുന്ന് ഉപയോഗിക്കാനായി ഇവർക്ക് പരിചയമുള്ള ആളില്ലാത്ത വീടുകളിലും മറ്റും ഒത്തുകൂടും.
നഗരത്തിലെ ചില സ്കൂൾപരിസരങ്ങളിൽ കറങ്ങി നടക്കുന്ന കുട്ടികളെ പിടികൂടി ചോദ്യം ചെയ്തപ്പോൾ ഇവർ പല സ്കൂളുകളിൽനിന്ന് വരുന്നവരാണെന്നാണ് പോലീസിന് അറിയാൻ കഴിഞ്ഞത്. എന്നാൽ ഈ കുട്ടികൾ തമ്മിലെല്ലാം അടുത്ത ബന്ധമുണ്ടെന്നും പോലീസ് പറയുന്നു.
