എലത്തൂര് റെയില്വേ സ്റ്റേഷന് സമീപം കോരപ്പുഴ പാളത്തില് പിഞ്ചു കുഞ്ഞടക്കം മൂന്ന് പേരുടെ മൃതദേഹം കണ്ടെത്തി. ആലപ്പുഴ- കണ്ണൂര് എക്സ്പ്രസില് പെട്രോള് ഒഴിച്ച് തീ കൊളുത്തിയുള്ള അജ്ഞാതന്റെ ആക്രമണം നടന്ന ട്രെയിനില് നിന്ന് ചാടിയവരാണ് മരിച്ചതെന്നാണ് വിവരം. ഒരു സ്ത്രീയുടേയും മധ്യവയസ്കന്റേയും രണ്ടര വയസ്സായ കുഞ്ഞിന്റെയും മൃതദേഹമാണ് കണ്ടെത്തിയത്.
ആക്രമണം ഭയന്ന് കണ്ണൂര് സ്വദേശിയായ അമ്മയും കുഞ്ഞും ട്രെയിനില് നിന്ന് ചാടിയെന്ന് നേരത്തെ യാത്രക്കാര് സൂചിപ്പിച്ചിരുന്നു. ഇവര്ക്കായി തെരച്ചില് തുടരുന്നതിനിടെയാണ് മൂന്ന് മൃതദേഹങ്ങള് കണ്ടെത്തിയത്. കണ്ണൂര് മട്ടന്നൂര് സ്വദേശി റഹ്മത്തിനേയും രണ്ട് വയസുള്ള മകളേയുമാണ് കാണാതായത്. മരിച്ചത് ഇവര് തന്നെയാണെന്നാണ് പ്രാഥമിക നിഗമനം. റഹ്മത്ത് , സഹോദര പുത്രി സഹാറ, എന്നിവരെ കൂടാതെ മറ്റൊരു പുരുഷന്റെ മുരുതദേഹവുമാണ് കണ്ടെത്തിയത്.
മറ്റൊരു ട്രെയിനിലെ ലോകോ പൈലറ്റാണ് ട്രാക്കില് മൃതദേഹങ്ങള് കണ്ടത്. ഇദ്ദേഹം ഉടന് റെയില്വേ ഉന്നത ഉദ്യോഗസ്ഥരെ വിവരമറിയിക്കുകയും പൊലീസും റെയില്വേ ഉദ്യോഗസ്ഥരും സ്ഥലത്തെത്തി മൃതദേഹങ്ങള് കണ്ടെത്തുകയുമായിരുന്നു. അതേസമയം, ട്രെയിനില് തീയിട്ട അക്രമിക്കായി തിരച്ചില് ഊര്ജ്ജിതമാക്കി. അക്രമി എന്തോ ഇന്ധനം ഒഴിച്ച് തീ കൊളുത്തുകയായിരുന്നെന്ന് ദൃക്സാക്ഷികള് പറയുന്നു. പെട്ടന്നുണ്ടായ ആക്രമണമാണെന്നും തീ ആളിപ്പടര്ന്നെന്നും അവര് പറഞ്ഞു.
തീപടര്ന്നതോടെ ആളുകള് പരിഭ്രാന്തരായെന്ന് യാത്രക്കാര് പറഞ്ഞു. അക്രമി ചങ്ങല വലിച്ച് ട്രെയിന് നിര്ത്തിയത് പാലത്തിന് മുകളിലായതിനാല് പുറത്തിറങ്ങാന് കഴിയാത്ത നിലയിലായിരുന്നു. ചുവന്ന തൊപ്പി വച്ചയാളാണ് ഓടിരക്ഷപെട്ടതെന്ന് ട്രെയിലുണ്ടായിരുന്ന യാത്രക്കാർ പ്രതികരിച്ചു.
