ലഖ്നൗ: ഐപിഎല് പ്രഥമ സീസണ് തൊട്ട് അമിത് മിശ്ര വിവിധ ടീമുകളുടെ ഭാഗമാണ്. കഴിഞ്ഞ സീസണില് മാത്രമാണ് അദ്ദേഹത്തെ ആരും താരലേലത്തില് സ്വന്തമാക്കാതിരുന്നത്. ഇതിനിടെ ഡല്ഹി കാപിറ്റല്സ്, ഡെക്കാണ് ചാര്ജേഴ്സ്, സണ്റൈസേഴ്സ് ഹൈദരാബാദ് എന്നീ ടീമുകള്ക്ക് വേണ്ടി അദ്ദേഹം കളിച്ചു.
ഇത്തവണ ലഖ്നൗ സൂപ്പര് ജെയ്ന്റ്സിന് വേണ്ടിയും. ലഖ്നൗ ജേഴ്സിയില് ഇന്ന് അദ്ദേഹത്തിന്റെ അരങ്ങേറ്റമായിരുന്നു. രണ്ട് വിക്കറ്റോടെ അദ്ദേഹം അരങ്ങേറ്റം കെങ്കേമമാക്കുകയും ചെയ്തു. എന്നാല് അദ്ദേഹം ഉള്പ്പെട്ട മറ്റൊരു വീഡിയോയാണ് ഇന്ന് സോഷ്യല് വൈറലാകുന്നത്. ഹൈദരാബാദ് താരം രാഹുല് ത്രിപാഠിയെ പുറത്താക്കാനെടുത്ത ക്യാച്ചായിരുന്നു അത്.
യാഷ് ഠാക്കൂറിന്റെ സ്ലോ ബൗണ്സ് അപ്പര് കട്ട് ചെയ്യാനാണ് ത്രിപാഠി ശ്രമിച്ചത്. എന്നാല് കൃത്യമായ കണക്ഷന് കിട്ടിയില്ല. ഷോര്ഡ് തേര്ഡ്മാനിലുണ്ടായിരുന്നു മിശ്ര ഇടത്തോട്ട് ഡൈവ് ചെയ്ത് പന്ത് കയ്യിലൊതുക്കി. 40 കാരായ മിശ്ര അത്തരത്തിലൊരു ക്യാച്ചെടുക്കുമെന്ന് ക്രിക്കറ്റ് ആരാധകര് കരുതിയത് പോലുമില്ല.
മിശ്രയുടെ രണ്ട് വിക്കറ്റിന് പുറമെ ക്രുനാല് പാണ്ഡ്യ മൂന്ന് വിക്കറ്റ് വീഴ്ത്തിയിരുന്നു. ഇതോടെ ടോസ് നേടി ബാറ്റിംഗിനെത്തിയ ഹൈദരാബാദിന് എട്ട് വിക്കറ്റ് നഷ്ടത്തില് 121 റണ്സെടുക്കാന് മാത്രമാണ് സാധിച്ചത്. 41 പന്തില് 35 റണ്സ് നേടിയ രാഹുല് ത്രിപാഠിയാണ് ടോപ് സ്കോറര്. അന്മോല്പ്രീത് സിംഗ് (31) ഭേദപ്പെട്ട പ്രകടനം പുറത്തെടുത്തു.
മൂന്നാം ഓവറില് തന്നെ ഹൈദരാബാദിന് ആദ്യ വിക്കറ്റ് നഷ്ടമായി. പാണ്ഡ്യയുടെ പന്തില് ഷോര്ട്ട് കവറില് മാര്കസ് സ്റ്റോയിനിസ് ക്യാച്ച് നല്കിയാണ് അഗര്വാള് മടങ്ങിയത്. എട്ടാം ഓവറില് അന്മോല്പ്രീതിനെ ക്രുനാല് വിക്കറ്റിന് മുന്നില് കുടുക്കി. തൊട്ടടുത്ത പന്തില് എയ്ഡന് മാര്ക്രം (0) ബൗള്ഡായി. ടീമിന്റെ ക്യാപ്റ്റനായുള്ള മാര്ക്രമിന്റെ അരങ്ങേറ്റം അദ്ദേഹം മറക്കാന് ആഗ്രഹിക്കുന്ന ഒന്നാായി. ഹാരി ബ്രൂക്കാവട്ടെ (3) രവി ബിഷ്ണോയിക്ക് വിക്കറ്റ് നല്കി. നിക്കോളാസ് പുരാന് സ്റ്റംപ് ചെയ്ത് പുറത്താക്കുകയായിരുന്നു ബ്രൂക്കിനെ.
28 പന്തുകള് നേരിട്ട വാഷിംഗ്ടണ് സുന്ദറിന് ഒരു ബൗണ്ടറി പോലും നേടാനായില്ല. 16 റണ്സെടുത്ത സുന്ദര്, മിശ്രയുടെ പന്തില് ദീപക് ഹൂഡയ്ക്ക് ക്യാച്ച് നല്കി. ആദില് റഷീദിനേയും (4) മിശ്ര മടക്കി. ഉമ്രാന് (0) റണ്ണൗട്ടായി. അബ്ദുള് സമദാണ് (10 പന്തില് 21) സ്കോര് 100 കടത്താന് സഹായിച്ചത്. ഭുവനേശ്വര് കുമാര് (0) പുറത്താവാതെ നിന്നു.
