ജില്ലയില് അതിശക്തമായ മഴ ((ഓറഞ്ച് അലേര്ട്ട്) മുന്നറിയിപ്പുള്ള സാഹചര്യത്തില് ജനങ്ങള് ജാഗ്രത പാലിക്കണമെന്ന് ജില്ലാ ദുരന്ത നിവാരണ അതോറിട്ടി ചെയര്പേഴ്സണ് കൂടിയായ ജില്ലാ കളക്ടര് ഡോ. രേണു രാജ് അറിയിച്ചു. മലയോര മേഖലകളിലേക്കുള്ള രാത്രിയാത്ര പരമാവധി ഒഴിവാക്കണം. മണ്ണിടിച്ചില് ഉള്പ്പടെയുള്ള ദുരന്തസാധ്യതയുള്ളതിനാല് മലയോരമേഖലകളില് താമസിക്കുന്നവര് ജാഗ്രത പാലിക്കണമെന്നും, ആവശ്യമായ ഘട്ടത്തില് മാറിതാമസിക്കണമെന്നും ജില്ലാ കളക്ടര് അറിയിച്ചു. ജലാശയങ്ങളില് പെട്ടെന്ന് വെള്ളം ഉയരാന് സാധ്യതയുള്ളതിനാല് പുഴയോരത്ത് താമസിക്കുന്ന ജനങ്ങള് ജാഗ്രത പാലിക്കണം. ശക്തമായ മഴ പെയ്യുന്ന സാഹചര്യത്തില് ഒരു കാരണവശാലും പുഴകളോ, തോടുകളോ മുറിച്ച് കടക്കാനോ, പുഴകളിലോ മറ്റ് ജലാശയങ്ങളിലോ കുളിക്കാനോ, മീന് പിടിക്കാനോ മറ്റ് ആവശ്യങ്ങള്ക്കോ ഇറങ്ങാന് പാടുള്ളതല്ല. ശക്തമായ മഴ തുടരുന്നതിനാല് ദുരന്ത സാധ്യത കണക്കിലെടുത്ത് ക്വാറികളുടെ പ്രവര്ത്തനത്തിനും, യന്ത്രസഹായത്തോടെയുള്ള മണ്ണെടുപ്പിനും, മലയോരപ്രദേശങ്ങളിലേയ്ക്കുള്ള ട്രക്കിംഗിനും ജില്ലാ ദുരന്ത നിവാരണ അതോറിറ്റി നിരോധനം ഏര്പ്പെടുത്തി. മേപ്പാടി ഗ്രാമപഞ്ചായത്തിലെ തൊള്ളായിരം കണ്ടിയിലേക്കുള്ള വിനോദസഞ്ചാരികളുടെ പ്രവേശനത്തിന് താത്കാലിക വിലക്ക് ഏര്പ്പെടുത്തിയിട്ടുള്ളതായും ജില്ലാ കളക്ടര് അറിയിച്ചു. വീടുകളിലേക്ക് വെള്ളം കയറിയതിനെ തുടര്ന്ന് വൈത്തിരി താലൂക്കില് വെങ്ങപ്പള്ളി വില്ലേജിലെ ചാമുണ്ടി കോളനിയില് താമസിക്കുന്ന 14 കുടുംബങ്ങളിലെ 66 പേരെ തെക്കുംതറ അമ്മസഹായം യു.പി സ്കൂളിലേയ്ക്ക് മാറ്റിപ്പാര്പ്പിച്ചിട്ടുണ്ട്. മരം വീണ് വീട് തകര്ന്നതിനെതുടര്ന്ന് മാനന്തവാടി താലൂക്കില് വാളാട് വില്ലേജില് പോരൂര്കുന്ന് പ്രദേശത്തുളള ഒരു കുടുംബത്തെ സമീപത്തുള്ള ക്ലബ് കെട്ടിടത്തിലേ്ക്കും മാറ്റിപ്പാര്പ്പിച്ചിട്ടുണ്ട്.
വൈദ്യുതി മുടങ്ങും
വെള്ളമുണ്ട ഇലക്ട്രിക്കൽ സെക്ഷനു കീഴിലുള്ള വാളേരി, പാറക്കടവ്, കുനിക്കരച്ചാൽ ട്രാൻസ്ഫോർമർ പരിധികളിൽ നാളെ (തിങ്കളാഴ്ച) രാവിലെ 8.30 മുതൽ വൈകുന്നേരം 5.30 വരെ വൈദ്യുതി വിതരണം ഭാഗികമായി തടസപ്പെടും Facebook Twitter WhatsApp
