മാനന്തവാടി: മാസങ്ങളായി മാലിന്യ നീക്കം നിലച്ച മാനന്തവാടി നഗരസഭ ഓഫീസിലേക്ക് സി പി ഐ എം മുൻസിപ്പൽ കമ്മറ്റി നേതൃത്വത്തിൽ ബഹുജന പ്രക്ഷോഭം നടത്തി. നാലു മാസത്തിലേറെയായി ഹരിത കർമ്മസേനയുടെ പ്രവർത്തനങ്ങൾ മാനന്തവാടിയിൽ നിലച്ചു. വള്ളിയൂർകാവ് ഉൽസവ കാലത്ത് സ്വരൂപിച്ചതടക്കം മാലിന്യങ്ങൾ കുമിഞ്ഞ് കൂടി കിടക്കുകയാണ്. ഗാന്ധി പാർക്കിലെ ശുചി മുറി റോഡു നവീകരണത്തിന്റെ ഭാഗമായി പൊളിച്ച് നീക്കിയിട്ട് മാസങ്ങളായെങ്കിലും പകരം സംവിധാനമൊരുക്കാനും നഗരസഭ ഭരണ സമിതിക്കായിട്ടില്ല.
മാലിന്യ നിക്ഷേപത്തിനായി ഗവ.യു.പി.സ്കൂളിന്റെ സ്ഥലം കൈയ്യേറുകയും വിവാധമാവുകയും ചെയ്തു. ഇവിടെ നിന്ന് ചട്ടങ്ങൾ പാലിക്കാതെ കെട്ടിടം പൊളിച്ച് ഓട്, മരങ്ങൾ, തുടങ്ങിയ വസ്തുക്കൾ കടത്തികൊണ്ടുപോവുകയും ചെയ്തു. ഈ സാഹചര്യത്തിലാണ് സി പി ഐ എം നേതൃത്വത്തിൽ നൂറ് കണക്കിനാളുകൾ പങ്കെടുത്ത പ്രക്ഷോഭം നടന്നത്. സമരം സി പി ഐ എം ജില്ലാ സെക്രട്ടറിയറ്റ് അംഗം പി.വി സഹദേവൻ ഉദ്ഘാടനം ചെയ്തു. ജില്ലാകമ്മറ്റി അംഗം പി.ടി ബിജു അധ്യക്ഷനായി. ഏരിയാ കമ്മറ്റി അംഗങ്ങളായ കെ.എം വർക്കി മാസ്റ്റർ, അബ്ദുൾ ആസിഫ്, എം റെജീഷ്, വി.ആർ പ്രവിജ് എന്നിവർ ചടങ്ങിൽ പ്രസംഗിച്ചു.
