ന്യൂഡല്‍ഹി: അടുത്ത ലോക്സഭാ തിരഞ്ഞെടുപ്പില്‍ രാഹുല്‍ ഗാന്ധി അമേഠിയില്‍ നിന്ന് മത്സരിക്കുമെന്ന് ഉത്തര്‍പ്രദേശ് കോണ്‍ഗ്രസ് അദ്ധ്യക്ഷന്‍ അജയ് റായ്.
പ്രിയങ്കാ ഗാന്ധി വാരണാസിയില്‍ മത്സരിക്കാന്‍ ആഗ്രഹിച്ചാല്‍ വിജയിപ്പിക്കാന്‍ പ്രവര്‍ത്തിക്കുമെന്നും അജയ് റായ് മാധ്യമങ്ങളോട് പ്രതികരിച്ചു.
യുപി കോണ്‍ഗ്രസ് അദ്ധ്യക്ഷനായ ശേഷം പ്രവര്‍ത്തകര്‍ നല്‍കിയ സ്വീകരണത്തിനിടെ മാധ്യമ പ്രവര്‍ത്തകരുടെ ചോദ്യത്തോട് പ്രതികരിക്കുകയായിരുന്നു അദ്ദേഹം.
രാഹുൽ ഗാന്ധിയെ വൻ ഭൂരിപക്ഷത്തോടെ വീണ്ടും എംപിയായി തിരഞ്ഞെടുത്ത് ഡൽഹിയിലേക്ക് അയക്കണമെന്നാണ് അമേഠിയിലെ ജനങ്ങളോടുള്ള തന്റെ അഭ്യർത്ഥനയെന്നും അജയ് റായ് പറഞ്ഞു.
‘ഗാന്ധി-നെഹ്റു കുടുംബത്തിന് അമേഠിയുമായി പരമ്പരാഗതമായ ബന്ധമുണ്ട്. അത് ആർക്കും തകർക്കാൻ സാധിക്കില്ല. 2024 ലെ ലോക്സഭാ തിരഞ്ഞെടുപ്പിൽ രാഹുൽ ഗാന്ധി അമേഠിയിൽ നിന്ന് മത്സരിക്കും,’ അജയ് റായ് മാധ്യമപ്രവർ‌ത്തകരോട് പറഞ്ഞു.
