ശ്രീനാരായണ ധർമ്മീമാംസ പരിഷത്തും ശ്രീ ശാരദ പ്രതിഷ്ഠ വാർഷിക മഹോത്സവവും ഞായറാഴ്ച നടക്കും

പുൽപ്പള്ളി:ഗുരുധർമ്മ പ്രചരണ സഭ വയനാട് ജില്ലാ കമ്മിറ്റിയുടെയും മാതൃസഭ,യുവജന സഭ ജില്ലാ കമ്മിറ്റികളുടെയും സംയുക്ത ആഭിമുഖ്യത്തിൽ 114 -മത് ശ്രീ ശാരദ പ്രതിഷ്ഠാ വാർഷിക മഹോത്സവവും 64-ാമത് ശ്രീനാരായണ ധർമ്മ മീമാംസ പരിഷത്തും സംഘടിപ്പിക്കും. ഏപ്രിൽ 19ന് ഞായറാഴ്ച രാവിലെ പുൽപ്പള്ളി ജയശ്രീ കോളേജ് ഓഡിറ്റോറിയത്തിൽ നടക്കുന്ന ജില്ല പരിഷത്ത് സമ്മേളനം ശിവഗിരി മഠം സന്യാസി സ്വാമി സുരേശ്വരാനന്ദ ഉദ്ഘാടനം ചെയ്യും. ഗുരുധർമ്മ പ്രചരണ സഭ വയനാട് ജില്ലാ പ്രസിഡണ്ട് കെ ആർ ജയരാജ് അധ്യക്ഷത വഹിക്കും.
രാവിലെ 9 മണിക്ക് സീനിയർ വൈസ് പ്രസിഡണ്ട് പവിത്രൻ അമരക്കുനി പതാക ഉയർത്തുന്നത്തോടെ പരിപാടികൾക്ക് തുടക്കം കുറിക്കും. 9.15ന് സുരേശ്വരാനന്ദ സ്വാമികളുടെ കാർമ്മികത്വത്തിൽ വിശേഷാൽ ഗുരുപൂജയും ശ്രീ ശാരദ അർച്ചനയും നടക്കും. തുടർന്ന് സമൂഹ പ്രാർത്ഥനയ്ക്ക് ശേഷം 10 മണിക്ക് ജില്ലാപരിഷത്ത് മഹാസമ്മേളനവും ശ്രീനാരായണ ദർശന പഠന ക്ലാസുകളും നടക്കും.
ഉച്ചകഴിഞ്ഞ് രണ്ടുമണിക്ക് നടക്കുന്ന ഗുരുധർമ്മ പ്രചരണ സഭ ജില്ലാ വാർഷിക പൊതുയോഗം സഭാ രജിസ്ട്രാർ കെ ടി സുകുമാരൻ അടിമാലി ഉദ്ഘാടനം ചെയ്യും. മാതൃസഭയുടെയും യുവജന സഭയുടെയും കേന്ദ്ര സമിതി നേതാക്കളായ പി പുഷ്പവല്ലി,പി ഓമനടീച്ചർ ,രാജേഷ് സഹദേവൻ,നിഷ രാജൻ,സി ആർ പ്രദീപ് ചിറ്റേത്ത് തുടങ്ങിയവർ സംബന്ധിക്കും.
സരസു നാരായണൻകുട്ടി,അഡ്വക്കേറ്റ് പി ചാത്തുക്കുട്ടി,കെ ആർ ഗോപി,അഡ്വക്കേറ്റ് കെ പ്രമോദൻ, കെ എൻ ചന്ദ്രൻ കുഴുപ്പിൽ എന്നിവർ ശ്രീനാരായണ ദർശനപഠന ക്ലാസുകൾ എടുക്കും. ഗുരുധർമ്മ പ്രചരണ സഭയുടെ അംഗങ്ങൾക്ക് പുറമെ ശ്രീനാരായണധർമ്മ വിശ്വാസികളായ എല്ലാവർക്കും ജില്ല പരിഷത്തിൽ പങ്കെടുക്കാമെന്ന് ജില്ലാ ഭാരവാഹികളായ എൻ എൻ ചന്ദ്രബാബു,പി ബി സജിനി,എംവി ബാബു എന്നിവർ അറിയിച്ചു