പ്രമുഖ മലയാള നടൻമാരായ ഷെയിൻ നിഗമിന്റെയും ശ്രീനാഥ് ഭാസിയുടെയും വിലക്ക് നീക്കി. ശ്രീനാഥ് ഭാസി പ്രൊഡ്യൂസേഴ്സ് അസോസിയേഷന് ക്ഷമാപണം നടത്തി കത്ത് നൽകി.
ഷെയിൻ അധികമായി ആവശ്യപ്പെട്ട പ്രതിഫലത്തിൽ വിട്ടുവീഴ്ച ചെയ്തു. അതേസമയം ശ്രീനാഥ് ഭാസി രണ്ട് ചിത്രങ്ങൾക്കായി വാങ്ങിയ അഡ്വാൻസ് തുക തിരികെ നൽകും.
ഷൂട്ടിംഗ് സെറ്റുകളില് കൃത്യ സമയത്ത് എത്താമെന്നും കൈപ്പറ്റിയ തുക ഘട്ടം ഘട്ടമായി തിരികെ നല്കാമെന്നും ശ്രീനാഥ് ഭാസി നിര്മ്മാതാക്കളുടെ സംഘടനയ്ക്ക് രേഖാമൂലം എഴുതി നല്കിയെന്നാണ് സൂചന.
എഡിറ്റ് ചെയ്ത ഭാഗങ്ങളില് പ്രാധാന്യം കുറഞ്ഞുവെന്നതുമായി ബന്ധപ്പെട്ട് ഉണ്ടായ തര്ക്കങ്ങളാണ് ഷെയ്നുമായുള്ള നിസ്സഹകരണത്തിനു കാരണമായത്.
കഴിഞ്ഞ ഏപ്രില് മാസത്തിലാണ് നടന്മാരായ ഷെയിന് നിഗത്തിനും ശ്രീനാഥ് ഭാസിക്കും അപ്രഖ്യാപിത വിലക്ക് നിര്മ്മാതാക്കളുടെ ഭാഗത്ത് നിന്നുമുണ്ടായത്.
നിര്മ്മാതാക്കളുടെ സംഘടനയിലെ അംഗങ്ങള് നിര്മ്മിക്കുന്ന ചിത്രത്തില് ഇവരെ സഹകരിപ്പിക്കില്ലെന്നായിരുന്നു തീരുമാനം. സിനിമ സംഘടനകള് സംയുക്തമായി കൊച്ചിയില് നടത്തിയ വാര്ത്ത സമ്മേളനത്തിലും ഇത് ആവാര്ത്തിച്ചു.
സിനിമ സംഘടനകള് നിസ്സഹകരിക്കുമെന്നു പ്രഖ്യാപിച്ചതോടെ താരസംഘടനയായ അമ്മയില് അംഗത്വം നേടാന് നടന് ശ്രീനാഥ് ഭാസി ശ്രമിച്ചിരുന്നു. എന്നാൽ നിര്മ്മാതാക്കളുമായുള്ള പ്രശ്നം പരിഹരിച്ചശേഷം അപേക്ഷ പരിഗണിക്കാമെന്നാണ് അമ്മ അറിയിച്ചത്.
