ഡല്ഹി: ഇന്ത്യയില് നെസ്ലെയുടെ ഏറ്റവും കൂടുതല് വിറ്റഴിക്കപ്പെടുന്ന രണ്ട് ബേബി-ഫുഡ് ഉത്പന്നങ്ങളില് ഉയർന്ന അളവില് പഞ്ചസാര അടങ്ങിയിട്ടുള്ളതായി റിപ്പോർട്ട്. എന്നാല് യുകെ, ജര്മനി, സ്വിറ്റ്സര്ലന്ഡ് തുടങ്ങിയ രാജ്യങ്ങളില് പഞ്ചസാര ഇല്ലാതെയാണ് ഇത്തരം ഭക്ഷണ ഉത്പന്നങ്ങള് നെസ്ലെ വിറ്റഴിക്കുന്നതെന്നും സ്വിസ് അന്വേഷണ ഏജന്സിയായ പബ്ലിക് ഐയുടെ അന്വേഷണ റിപ്പോര്ട്ടില് പറയുന്നു. ഇന്ത്യയില് സെർലാക്ക് ഉത്പന്നങ്ങളില് ശരാശരി മൂന്ന് ഗ്രാം പഞ്ചസാര അടങ്ങിയിട്ടുണ്ടെന്നാണ് റിപ്പോർട്ട്.
അതേ ഉല്പ്പന്നം ജർമ്മനിയിലും യുകെയിലും പഞ്ചസാര ചേർക്കാതെ വില്ക്കുന്നു. എത്യോപ്യയിലും തായ്ലൻഡിലും ഏകദേശം 6 ഗ്രാം പഞ്ചസാര അടങ്ങിയിട്ടുണ്ടെന്ന് പഠനം പറയുന്നു. ദക്ഷിണാഫ്രിക്കയില് നടത്തിയ പഠനത്തിലും സമാനമായ തോതിലാണ് പഞ്ചസാരയുടെ അളവ്.
ദക്ഷിണാഫ്രിക്കയില് സെര്ലാക് ഉത്പന്നത്തില് നാല് ഗ്രാമും അതിലധികവും പഞ്ചസാരയാണ് കണ്ടെത്തിയതെന്നും റിപ്പോര്ട്ടില് പറയുന്നു. 2022-ല് ഇന്ത്യയില് 20,000 കോടി രൂപയുടേതാണ് നെസ്ലെയുടെ സെര്ലാക് ഉത്പന്നങ്ങളുടെ വില്പന.
